Read Khoekhoegowab Markub 2 Bible Online

Markub 2 - Khoekhoegowab bible

Markub 2

¹Tsîb ge ǀnî tsēdi khaoǃgâ ǁkhawa Kapernaums ǃnâ ge ǂgâ. Tsîn ge oms ǃnâb hâsa ge ǁnâu.

²On ge ǁnātikō ǂguina ge ǀhaoǀhaosen, dao-ams ǃauga i ge hâǃkhai-e ǀkhai is kōse; tsîb ge ǁîna mîsa gere mîba.

³Tsîn ge ǃhom hâb, haka khoegu xa taniheb ǀkha ǁîb ǃoa ge hā.

⁴Tsî ǁîban ge ǂnubis ǃaroma ǀgū ǁoa io, on ge oms di ǂamaisa ge ǁkhopa, ǁîb hâǃkhais tawa, tsî khaoǃkhopa si, tsî tani-ūxūb, ǃhom hâb ǁgoe-aiba ge ǁgôa kai.

⁵Tsî Jesub ge ǁîn ǂgomsa mûo, ob ge ǃhom hâb ǃoa ge mî: ǀGôatse, ǁoren âtsats ge ǀûbahe hâ.

⁶O gu ge ǀnî xoaǂansabegu, ǁnāpa ǂnôaga ǁîgu ǂgaogu ǃnâ ge ǂâi:

⁷Tarexab nēba nēti ra ǃhoa. Eloǃkhāǃkhās komo! Tari-e kha a ǁkhā, ǁorena ǀûbasa? Elob ǀguib kom a ǁkhāo.

⁸Tsî Jesub ge ǁnātimîsi ǁîb gagas ǃnâ ge hōǃâ nēti ī-e gu go ǂâi ǃkhaisa, ob ge ǁîgu ǃoa ge mî: Tarexa go nēti ī-e sago ǂgaogu ǃnâ ra ǂâi?

⁹Mâsa a supu, ǃhom hâb ǃoa: ǁOren âtsats ǀûbahe hâ, ti mîs tsî: Khâi î tani-ūxūb âtsa ū î ǃgû, ti mîs tsîra xa?

¹⁰Xawe ǂan go nîga, Khoen Ôab ǃhūbaib ai ǁorenab nî ǀûbase ǀgaiba ūhâsa, ob ge ǃhom hâb ǃoa ge mî:

¹¹Mîba tsi ta ra: Khâi, î kharob âtsa ūkhâi, î ǁaru!

¹²Ob ge khâi, tsî ǁnātimîsi tani-ūxūb âba ū tsî hoan aiǃâ ge ǂoa; on ge hoana ǃhurigâ tsî Eloba kare tsî ge mî: Tātsē da ge nēti ī xū-e mû tama hâ.

¹³Tsîb ge ǁkhawa hurirob ǃoa ge ǂoa. Os ge ǁaes hoaragasa ǁîb tawa ge sī, tsîb ge ǁîna gere ǁkhāǁkhā.

¹⁴Tsî ǃgû-īb ra hîab ge Levib, Alfeub ôaba mariǃkhōǃoa-ommi ǃnâ mûǂnôa, tsî ǁîb ǃoa ge mî: Sao te re! Ob ge khâi, tsî ge sao bi.

¹⁵Tsî i ge ge ī, ǁîb ge oms âb ǃnâ tāb tawa ǂnôa io, o gu ge ǂgui mariǃkhōǃoa-aogu tsî ǁore-aogu tsîga Jesub tsî ǁîb ǁkhāǁkhāsabegu ǀkha ge ǂnû; ǂguin ge ǁnāpa hâ i tsî ǁîba sao xui-ao.

¹⁶Tsî xoaǂansabegu Farisegu digu ge mû, ǁîb ra mariǃkhōǃoa-aon tsî ǁore-aon tsîn ǀkha ǂûsa, o gu ge ǁîb ǁkhāǁkhāsabegu ǃoa ge mî: Tarexab ra mariǃkhōǃoa-aon tsî ǁore-aon tsîn ǀkha ǂû tsî ā?

¹⁷Tsî Jesub ge ǁnâu, ob ge ge mîǀî gu: ǂUrun ge soǀôadī-aoba ǂhâba tama hâ tsî ǀaesen hân ge ǂhâba bi hâ. ǂHanu-aina ta nî ǂgaise ta ge hā tama hâ, xawe ǁore-aona ta nî ǂgaise ta ge ge hā.

¹⁸Tsî Johaneb tsî Farisegu di ǁkhāǁkhāsabegu ge ǂûtama ge hâ i. O gu ge hā tsî ǁîb ǃoa ge mî: Tare xū-i ǃaroma gu Johaneb tsî Farisegu di ǁkhāǁkhāsabega ǂûtama ra hâ, o gu sa ǁkhāǁkhāsabega ǂûtama a hâ ǁoa?

¹⁹Ob ge Jesuba ǁîgu ǃoa ge mî: Matin ǁnâi ǃgameǁâus khoena ǂûtama a hâ ǁkhā, ǃkhoeǂgâsabeb ǁîn ǀkha hâ hîa? ǃKhoeǂgâsabeban ǁîn ǀkha ūhâ ǁaeb kōsen kom ǂûtama a hâ ǁoao.

²⁰Xawe di ge tsēde nîra hā, ǃkhoeǂgâsabeb nî ǁîna xu ūbēhede tsî ǁnā tsēdi ain ge ǂûtama nîra hâ.

²¹Tsî khoe-i xare-i ge ǀasa ǃnaba-e ǀoro sara-i ai ǃnaba tama hâ; ǁnāsa i ga dī, o-i kom ǀasa dī-unuǃkhai-e ǀoro-e xu ra ǀkhauǁnâseno, tsî ǀkhausens kom ǁnās ǃgâ-ai nî kaio.

²²Tsî khoe-i xare-i ge ǀasa ǂauxûiba ǀoro ǃgapagu ǃnâ ǂnâ tama hâ; ǁnāsa i ga dī, ob kom ǀasa ǂauxûiba ǃgapaga ra nôa kaio, tsî ǂauxûiba ǂnâxūsen tsî ǃgapaga ra hîkākāheo; o-i ge khoe-e ǀasa ǂauxûiba ǀasa ǃgapagu ǃnâ ra ǂnâ.

²³Tsî i ge ge ī, sâtsēs aib ǃhoron ǃnâ ra ǃgû, hîa gu ge ǁîb ǁkhāǁkhāsabega ǃgûs âgu ǃnâ ǃhoroǂûna ge ǂgaeǂuitsoatsoa.

²⁴O gu ge Farisega ǁîb ǃoa ge mî: Kō mati gu sâtsēs ai mā-amhe tama xū-e ra dī ǃkhaisa.

²⁵Ob ge ǁîgu ǃoa ge mî: Tātsē go ǁnâi khomai tama hâ, Davib ge dīsa, tôasi tsîb ge ǃâ ǃnubai, ǁîb ǂûb tsî ǁîb ǀkha ge hâ in tsîna,

²⁶matib ge Elob ommi ǃnâ ǂgâ, ǀgapipristeri Abjatari di ǁaeb ǃnâ tsî ǁgauperega ǂûsa, ǀnî khoe-i xare-i ǂûsa mā-amhe tamaga, pristergu ǀguigu, tsî ǁîb ǀkha ge hâ in tsîna ge māsa?

²⁷Ob ge ǁîgu ǃoa ge mî: Sâtsēs ge khoeb ǃaroma ge dīhe, tsî khoeba sâtsēs ǃaroma tama.

²⁸Ob kom Khoen Ôaba sâtsēs on di ǃKhūo.