Read Khoekhoegowab Markub 3 Bible Online

Markub 3 - Khoekhoegowab bible

Markub 3

¹Tsîb ge ǁkhawa sinagogeb ǃnâ ge ǂgâ. Tsî ǁnāpab ge khoeb ǂnâsa ǃomma ūhâba ge hâ i.

²O gu ge ǁîba ge ǃkhē iseb nî sâtsēs ai ǂgauǂgau bisa, ǃnuriǃgâ bi gu nî ǃkhaisa gu nî hōse.

³Ob ge ǂnâsa ǃomma ūhâb ǃoa ge mî: ǁAegub ǃnâ ǀkhī re!

⁴Ob ge ǁîgu ǃoa ge mî: Mâsa sâtsēs ai mā-amhe hâsa: ǃGâidīsa? Tsūdīsa? Ûiba sâusa? ǃGamsa? O gu ge ge ǃnō.

⁵Tsîb ge ǁîga ǁaeb ǀkha kōǂnamipe, tsî ǁîgu ǂgaogu di karokarosens ǂama ge ǃoa, tsî khoeb ǃoa ge mî: ǃOmmi âtsa ǀhōǂui! Tsî ǀhōǂui bib geo, ob ge ǃommi âba ge ǂgau.

⁶O gu ge Farisega ǂoa tsî Herodeǁîgu ǀkha ǀapeǀhaosa ge dī, mati gu nî ǁîba ǃgamsa.

⁷Ob ge Jesuba ǁîb ǁkhāǁkhāsabegu ǀkha ge ǂgō hurirob ǃoa, tsî ǂgui khoen Galileab tsî Judeab din ge ǁîba ge sao,

⁸tsî Jerusalems din, Idumeab din, Jordanǃāb nauǃanib din, Tires tsî Sidons tsîra ǁanǂnamipe hân tsîna tsî ǂgui khoen ge ǁîb ǃoa ge hā, ǁîb gere dīn xan ge ǁnâuo.

⁹Ob ge ǁîb ǁkhāǁkhāsabegu ǃoa ge mî, ǂgauro-e gu nî ǂnubis ǃaroma ǁîba ǂhomiba ǃkhaisa, ǁgâiǀā bin tidese.

¹⁰ǂGuinab gere ǂgauǂgau, xui-aon ge tsû-aina ūhân hoana ǁîba ge ǁgūǀkhā, tsâǀkhā bin nîse.

¹¹Tsî ǃanuoǃnâ gagagu ge mû bi, o gu ge ǁîb aiǃâ ǁnāǁgoe tsî ǂgaiǂui tsî ge mî: Sats kom Elob Ôatsao!

¹²Ob ge ǁîga ǁkhōse ge ǃkhâi, ǂhaiǂhaiǃgâ bi gu tidega.

¹³Tsîb ge ǃhommi ai ǃapa tsî ǂgaob ran hoana ge ǂgaihā, tsîn ge ǁîb tawa ge sī.

¹⁴Tsîb ge disiǀgamǀaga ge mâi, ǁîb ǀkha gu nî hâga, tsî sîǂui gub nîga, aoǁnâ gu nîse,

¹⁵tsî gu nî ǀgaiba ūhâse, ǁgâuaga ǃhaeǂui-ūsa.

¹⁶Tsîb ge disiǀgamǀaga mâi tsî Simonna Petrub ti ge ǂgaiǀaro,

¹⁷Jakobub, Sebedeub ôab, tsî Johaneb Jakobub ǃgâsab tsîkha; tsîb ge ǁîkha Boanergekha ti ge ǂgaiǀaro, ǁnās ge: ǃGurub ôakha, ti mîsa.

¹⁸Tsî Andreab, Filipub, Bartolomeub, Mateub, Tomab, Jakobub, Alfeub ôab, Tadeub, Simonni Kanaǁîb,

¹⁹tsî Judab Iskarioǁîb, ǁîba ǁkhāti ge ǀapexūb tsîga.

²⁰Tsîb ge oms tawa ge sī. Os ge ǂnubisa ǁkhawa ge ǀhao, pereba ǂûs xawesa gu ge dī ǁoa is kōse.

²¹Tsî ǁîb tawa mân ge ǁnâuo, on ge ǁîban nî ǃkhōse ge ǂoa: ǃKhaub kom hâo, ti mî tsî.

²²Tsî Jerusalemsa xu ge ǁgôaxa xoaǂansabegu ge ge mî: Beelsebulab kom ūhâo, tsî ǁgâuagu di ǂamsaba xub kom ǁgâuaga ra ǃhaeǂuio.

²³Ob ge ǁîga ǂgaihā tsî ǂkhōdi ǃnâ ǁîga ge mîǀî: Matib kha Satanna ǁî-aitsama a ǃhaeǂuisen ǁkhā?

²⁴Tsî gaosis ga ǁîs ǂûs ǃoagu ǀgoraǃāseno, os kom ǁnā gaosisa a mâǀgai ǁoao.

²⁵Tsî om-i ga ǁî-i ǂû-i ǃoagu ǀgoraǃāseno, o-i kom ǁnā om-e a mâǀgai ǁoao.

²⁶Tsî Satanni ga ǁîb ǂûb ǃoagu khâima tsî ǀgoraǃāseno, ob kom mâ ǁoa, tsî go toao.

²⁷Xawe khoe-i xare-i ge ǀgaisab di oms ǃnâ ǂgâ tsî ǁîb xapana a ū ǁoa, aibe i ga ǀgaisaba ǃgae tama io, tsî ǁnāǃnubai i ge ǁîb omsa nî ū.

²⁸Amase ta ra mîba du, ǁoren hoan ge khoen ôana nî ǀûbahe, tsî ǃkhāǃkhādi ǁîdi ǀkhan ga Eloba ǃkhāǃkhā hâdi tsîna.

²⁹Xawe ǃAnu Gagab ai ga ǃkhāǃkhā hâ-i ǁnā-i ge ǀamosib kōse ǀûbasa hō tide, tsî i ge ǀamo ǀgoraǃgâsa a anu.

³⁰Mî gu go xui-ao: ǃAnuoǃnâ gagabab kom ūhâo!

³¹Tsîn ge ǁîb îs tsî ǁîb ǃgâsan tsîna hā, tsî ǃauga mâ tsî ǁîb ǃoa sî tsî ge ǂgai kai bi.

³²Tsîs ge ǂnubisa ǁîba ge ǂnûǂnamipe. On ge ǁîba ge mîba: Mû, sa îs tsî sa ǃgâsan tsîn kom ǃauga hâ tsî ra ôa tsio.

³³Ob ge ǁîna ǃeream tsî ge mî: Tarina kha ti îs tsî ti ǃgâsan tsîna?

³⁴Ob ge ǁîba ǂnûǂnamipe hâna kōǂnami tsî ge mî: Mû, ti îs tsî ti ǃgâsan tsîn ge nēna.

³⁵Elob ǂâisa kara dīn hoan, ǁîn ge ti ǃgâsab tsî ti ǃgâsas tsî ti îs tsîna.