Read Khoekhoegowab Markub 4 Bible Online

Markub 4 - Khoekhoegowab bible

Markub 4

¹Tsî ǁkhawab ge hurirob tawa ǁkhāǁkhātsoatsoao, os ge kai ǂnubisa ǁîb tawa ge ǀhao, ǂgaus ǃnâ ǂgâ tsîb nî ǁîs ǃnâ hurirob ai ǂnûs kōse, tsîs ge ǂnubis hoasa hurirob tawa ǃhūb ai ge mâ i.

²Ob ge ǁîna ǂgui xūna ǂkhōdi ǃnâ gere ǁkhāǁkhā, tsî ǁkhāǁkhās âb ǃnâ ǁîn ǃoa ge mî:

³ǃGâ du re: Tsoro-aob ge ǂoa, tsorob nîse.

⁴O i ge ge ī, tsorob ra hîa i ge ǀnî-e daob amǃgâ ge ǁnā, tsîn ge anirona hā tsî ǁî-e ge hapu.

⁵Tsî ǀnî-i ge ǃhaoxa-am ǃkhaib ai ge ǁnā, ǀoasa ǃhūba i ūhâ tama ǃkhaib tawa, tsî i ge ǃhaese ge ǃī, ǃgamse i ge ǃhūb ǃnâ hâ tama hâ i amaga.

⁶Tsî sores ge ǂoaxao, o i ge ge khauǃkhūhe, tsî ǃnoma-e i ge ūhâ tama hâ i amaga i ge ge ǂnâ.

⁷Tsî ǀnî-i ge ǁkhūn ǃnâ ge ǁnā, tsî ǁkhūn ge ǀomkhâio, on ge ǁî-e ge ǀhomdom tsî i ge ǂûtani tama ge i.

⁸Tsî ǀnî-i ge ǃgâi ǃhūb ǃnâ ge ǁnā tsî ǂû-e ge ūǀkhī, ǁhai tsî ra ǀomkhâi ǂû-e, tsî-i ge ǀnî-e ǃnonadisi ǃnādi, tsî nau-e ǃnanidisi ǃnādi, tsî nau-e ǀguikaidisi ǃnādi kōse ge ǂûtani.

⁹Ob ge ge mîǀî gu: ǂGaera ūhâ ǁnâu-i nîse-e, a-i ǁnâu!

¹⁰Tsî ǀgurib ge hâ, on ge ǁîb ǀkha hâna disiǀgamǀagu ǀkha ǂkhōdi xa ge dî bi.

¹¹Ob ge ǁîn ǃoa ge mî: Sadu ge Elob Gaosib di ǂganǃgâsiga māhe hâ, xawe naun ǃauga hân ge hoana ǂkhōdi ǃnâ ǀgui ra hō.

¹²Mû rasen nî mû, xawen mûǂan tidese tsî ǁnâu rasen nî ǁnâu, xawen ǁnâuǃā tidese; tātsēn ǃhobasen tsî ǁîn di ǁorena ǀûbahe tidese.

¹³Tsîb ge ǁîn ǃoa ge mî: Nē ǂkhōsa du ǁnâuǃā tama hâ tsî mati du kha ǁnâi nau ǂkhōdi hoade nî ǃkhā?

¹⁴Tsoro-aob ge mîsa ra tsoroba.

¹⁵Tsî nēn ge a ǁnān, daob tawa ge tsorohena: Mîs ga ǃkhai-i tawa, tsorohe tsîn ga ǁnâu sio, ob ge Satanna ǁnātimîsi hā tsî mîs ǁîn ǂgaogu ǃnâ goro tsorohesa ra ūbē.

¹⁶Tsî ǁnās ǁkhās xase ǃhaoxa-am ǃkhai-i ai ge tsorohen ge nēn, mîsan ra ǁnâu, o ǁnātimîsi ǁîsa ǃgâiaǂgaob ǀkha ra ǃkhōǃoana.

¹⁷Tsî ǃnoma-en ǁîn ǃnâ ūhâ tama, amagan ge ǁaerob ǀguiba ra hâ; ǁnās khaoǃgâ, mîs ǃaromab ga tsūǀkhāb tsî ǃgôaǃgonna hāo, on ra ǁnātimîsi ǁgonǁgonǂgaohe.

¹⁸Tsî nēn ge a ǁnān, ǁkhūn ǃnâ ge tsorohen, mîsa ra ǁnâuna;

¹⁹tsî nē ǃhūbaib di ǂhansendi, tsî ǃkhūsib di ǀnamǂâibasens, tsî nau xūn di tura-aigu tsîn ge ǂgâ tsî mîsa ra ǀhomdom, on ge ǂûtani tama ra i.

²⁰Tsî nēn ge a ǁnān, ǃgâi ǃhūb ǃnâ ra tsorohena: ǁÎn mîsa ǁnâu tsî ǃkhōǃoa tsî ra ǂûtanina, ǀnî-e ǃnonadisi ǃnāde, tsî nau-e ǃnanidisi ǃnāde, tsî nau-e ǀguikaidisi ǃnādi kōse.

²¹Tsîb ge ǁîgu ǃoa ge mî: ǃAmamǀae-e ūhāhe i ra xare, ǀguirob ǃnaga tsî kharob ǃnaga i nî mâihese? Tātsē, xawe kandelari ai i nî mâihese.

²²ǂGanǃgâsase hâ xū-i hîa ǂhaiǂhaihe tide-i kom hâ tamao; tsî ǂganamhe hâ xū-i hîa ǃnâb ǃnâ hā tide-i kom hâ tamao.

²³ǂGaera ūhā-e ǁnâu i nîse, a-i ǁnâu!

²⁴Tsîb ge ǁîn ǃoa ge mî: Mûbasen re, tare-e du ra ǁnâusa. Sadu ra ǀguiro-ū ǀguirob ǀkha du ge nî ǀguirohe, tsî du ge ǃnāsase nîra ǁguiribahe.

²⁵Ūhâ-i hoa-i ge nî māhe, tsî ūhâ tama-i ge ū-i hâ-i ona nî ūxūhe xui-ao.

²⁶Tsîb ge ge mî: Elob Gaosib ge nēti ī, khoeb ǃkhomma ǃhūb ai ra tsorob khami,

²⁷tsîb ra tsēs tsî tsuxub tsîra ǃnâ ǁom tsî khâi, tsîb ge ǃkhomma ǃī tsî ra ǀomkhâi, ǁîb aitsama ǀū matis asa.

²⁸ǁÎ-aitsamab kom ǃhūba ǂûna ra ūǀkhīo, aibe ǁhaona, ǁnās khaoǃgâ ǃnuruba, tsî ega ǀoa hâ ǃhoroba ǃnurub ǃnâ.

²⁹Tsî ǂû-i ra ǁan, ob ge khoeba ǁnātimîsi ǃhoroǃgao-ūdasa ra sî, ǃgaoǁaeb go hā xui-ao.

³⁰Tsîb ge ge mî: Mâ xū-i ǀkha da nî Gaosib Elob diba ǂkhō, tsî mâ ǂkhō-i ǀkha da nî ǁîba ǂkhōǂkhō?

³¹Mosterdǃkhomro-i khami ī, ǃhūb ǃnâ i ra tsorohe, ǃnubai i ge ǃhūbaib ai hâ ǃkhomn hoan xa a ǂkhari.

³²Tsî tsorohe i ra, o i ra ǀomkhâi, tsî ǁhaon hoan xa kai, tsî gaxu ǂgonaga ra hō, ǀhommi di anin ǁîgu sommi ǃnâ a ǁan ǁkhās kōse.

³³Tsî nēti ī ǂkhōdi ǂguidi ǃnâb ge ǁîna mîsa ge aoǁnâba, ǁnâuǃā ǁkhān ges kōse.

³⁴Tsîb ge ǂkhōs ose ǁîna ǃhoa-ū tama ge hâ i, xaweb ge ǃgōsase hoana ǁîb di ǁkhāǁkhāsabega gere ǁguiǃāba.

³⁵Tsî ǁkhā tsēs ai ǃui i geo, ob ge ǁîgu ǃoa ge mî: A ge nauǃani ǃgâu.

³⁶Tsî ǂnubisa ǃgû kai tsî gu ge ǁîba ǂgaus ǃnâb hâse ge ūǃgû, tsî di ge ǀnî ǂgaude ǁnāpa ge hâ i.

³⁷Tsî kai ǁgaoǂoab ge ǀkhīo, o gu ge ǃgabiga ǂgaus ai ge ǀaisen, ǀoaǀoahes ges kōse.

³⁸Tsîb ge ǁîba ǂgaus di khaosǀkhāb ai ǂkhapis ai ge ǁom hâ i. O gu ge ǂkhaiǂkhai tsî ge mîǀî bi: ǁKhāǁkhā-aotse, ǁō ge ra ǃkhaisats ǁae tama hâ?

³⁹Ob ge khâi tsî ǂoaba ǃgabe tsî hurib ǃoa ge mî: ǃNō! ǃGome! Ob ge ǂoaba ge ǁgoe tsîb ge kai ǃnōsasiba ge hâ.

⁴⁰Ob ge ge mîǀî gu: Tarexa go nētikōse a ǃaoǃnâ? Mati go ǂgom-e ūhâ tama hâ?

⁴¹O gu ge kaise ǃao tsî ge mîǀîgu: Tariba kha nēba, o kha ǂoab tsî hurib tsîkha ra ǁnâuǀnam bi?