Read Khoekhoegowab Markub 5 Bible Online

Markub 5 - Khoekhoegowab bible

Markub 5

¹Tsî gu ge hurirob nauǃani ge sī, Gadareǁîn ǃhūb ǃnâ.

²Tsî ǂgausa xub ge ǂoa, ob ge ǁnātimîsi khoeb, ǃanuoǃnâ gagaba ūhâb, ǀhobade xu ge ǀkhība ǁîba ge ǃoa,

³ǁîb ǁanǃkhaisa ǀhobadi ǃnâ ūhâba; tsî khoe-i xare-i ge ǁîba ǁkhamaidi ǀkha ge ǃgae ǁoa i.

⁴ǃNuri ǃnādeb ge ǂaiǃgae-ūdan tsî ǁkhamaidi tsîn ǀkha ge ǃgaehe hâ i, tsîb ge ǁkhamaide ge ǂgaekhôa tsî ǂaiǃgae-ūdana ge khôaǃā, tsî khoe-i xare-i ge ǁîba ǁkhamaidi ǀkha xawe ǃgae ǁoa ge i.

⁵Tsîb ge mâ ǁaeb hoaba tsuxuba tsî tsēa ǀhobadi ǃnâ tsî ǃhomgu ai gere hâ, ǃau tsî ra ǀuiǁhomsenǃâ.

⁶Tsî Jesubab ge ǃnūseba xu mûo, ob ge ǃkhoesī tsî ǁîb aiǃâ ǁnāǁgoe,

⁷tsî kai dommi ǀkha ǃau tsî ge mî: Tare-e ta sats ǀkha ǁae hâ, Jesu, Hoan xa ǀGapi Elob Ôatse? Elob ǃnâ ta ra ǀkhoma tsi, tā tsûtsû te!

⁸ǁÎb ǃoab go mî xui-ao: ǃAnuoǃnâ gagatse, nē khoeba xu ǂoa.

⁹Ob ge ǁîba ge dî: Matits ǀon hâ? ti. Ob ge ǃeream tsî ge mî: Legio, ti, ta ǀon hâ, ǂguige a sige xui-ao.

¹⁰Ob ge kaise ge ǀkhoma bi, îb ǁîga tā ǁnā ǃhūǃâsa xu doeǁgaǂui.

¹¹Tsîs ge ǁnāpa ǃhomgu ǀkhāb ai kai hāgūn ǀhaosa gere ǃû.

¹²O gu ge ǁgâuaga ǂgan bi tsî ge mî: Hāgūn ǃoa sî ge re î ge ǁîn ǃnâ ǂgâ re.

¹³Ob ge ǁîga ge mā-am. O gu ge ǃanuoǃnâ gagaga ǂoa, tsî hāgūn ǃnâ ge ǂgâ. Os ge ǀhaosa ǃhaoba xu hurib ǃnâ ge ǃkhoeǁgôa, (ǀgamǀoadisin ge nî ī hâ i) tsî hurib ǃnâ ge āǁō.

¹⁴Tsî ǁîna gere ǃûigu ge ǁhâ, tsî ǁîsa ǃās tsî ǃhaidi tawa ge sī ǂhôa. On ge ge ǂoa, ī go-en nî mûse.

¹⁵Tsîn ge Jesub tawa ge hā tsî ǁgâuab xa hâǃnâhe iba anahe hâse tsî ǁnâuǃāxase ge mûǂnôa, ǁnâ Legionna go ūhâ iba, on ge ge ǃao.

¹⁶Tsî mû gon ge ǁîna ge ǃhoaba, ǁgâuab xa hâǃnâhe go ib ǀkha go ī ǃkhaisa tsî hāgūn tsîn di-e.

¹⁷On ge ǁîba ge ǀkhomatsoatsoa, ǁîn di ǀkhariba xub nî bē ǃkhaisa.

¹⁸Tsî ǂgaus ǃnâb ra ǂgâ, hîab ge ǁgâuab xa go hâǃnâhe iba ge ǀkhoma bi, ǁîb ǀkhab nî hâsa.

¹⁹Xaweb ge Jesuba mā-am bi tama i tsî ǁîb ǃoa ge mî: ǁAru re san ǃoa, î ǁîna ǂhôa, matikō kai xūnab go ǃKhūba dī tsi, matib go ǀkhomxaǂgao tsi ǃkhaisa.

²⁰Ob ge ǃgû tsî Dekapolib ǃnâ ge aoǁnâtsoatsoa, matikō kai xūnab go Jesuba dī bi ǃkhaisa; on ge hoana ge buru.

²¹Tsî Jesub ge ǁkhawa ǂgaus ǃnâ nauǃani ǃgâuo, os ge kai ǂnubisa ǁîb tawa ge ǀhao; tsîb ge hurirob tawa ge hâ i.

²²Tsî mû, sinagogeb danakhoegu di ǀguib Jairub ti ǀon hâb ge ǁîb ǃoa ge hā, tsî mû bib ge, ob ge ǁîb ǂaira tawa ǁnāǁgoe,

²³tsî kaise ǀkhoma bi, tsî ge mî: Ti ôaros ge ǁōb ǀgūse hâ. Sī î ǃomma ǁgui-ai si îs ûi re.

²⁴Ob ge ǁîb ǀkha ge ǃgûsī, tsî ǀoasa ǂnubis ge ǁîba ge sao tsîn ge ge ǁgâiǀā bi.

²⁵Tsîs ge ǂanǂansa tarasa ge hâ i, disiǀgamǀa kuriga ǀaoǂnâba ge ūhâ is,

²⁶tsî ǂgui sōǀôadī-aogu ǃnâ kaise ge tsâ hâ is, tsî ǁîs din hoana ǁîs ǂama ge dītoa, xawe hui-e hō tamas, tsî ǃaruǀîǀgui ǁnās ǃgâ-ai ge tsâsa.

²⁷ǁÎs ge Jesub xa ǁnâuo, os ge ǁaes di ǂhāgus ǃnâ khaosǀkhāba xu hā, tsî ǁîb di saraba ge tsâǀkhā,

²⁸mîs ge xui-ao: Sarab âba ta ga tsâǀkhās ǀguisa hî o ta ge nî ǂgau.

²⁹Os ge ǁnātimîsi ǀaob âs di ǀausa ge ǂnâ, tsîs ge soros âs ǃnâ ge hōǃâ ǁîs ǁō-ai-e xus go ǂgau ǃkhaisa.

³⁰Ob ge Jesuba ǁnātimîsi ǁîba xu go ǂoa ǀgaiba ǁîb ǃnâ ge hōǃâ, tsî ǂnubis ǃoa ǂnan tsî ge mî: Tari-e ti sarana go tsâǀkhā?

³¹O gu ge ǁîb ǁkhāǁkhāsabega ǁîb ǃoa ge mî: Mûts kom ra o, ǁaes ra sa ǂnamipe ǀāgu ǃkhai-eo, ots: Tari-e go tsâ khā te, ti ra mî?

³²Ob ge ge kōǂnamipe, ǁîsa go dī khoesab nî mûga.

³³Os ge tarasa ǃaob xa ra ǀkhūǃâ hā, ǁîs ǀkha go ī ǃkhaisa ǂan tsî, tsî ǁîb aiǃâ ǁnāǁgoe, tsî amab hoaba ge mîba bi.

³⁴Ob ge ge mîǀî si: ǀGôase, ǂgoms âs go hui si, ǂkhîb ǃnâ ǃgû î ǂgau sa ǁō-ai-e xu.

³⁵Ganupeb ra ǃhoa hîa gu ge ǀnîgu sinagogeb danakhoeb diga hā tsî ge mî: Sa ôas ge go ǁō. Tarexats ra ǁkhāǁkhā-aoba gorose ǀhupuǀhupu?

³⁶Xaweb ge Jesuba ǃhoan go mîsa ǃgâ tama i tsî danakhoeb ǃoa ge mî: Tā ǃao; ǂgoms ǀguisa hî re.

³⁷Tsîb ge ǀgui-i xare-e ǁîba saosa mā-am tama ge i, Petrub tsî Jakobub tsî Johaneb, Jakobub ǃgâsab tsîgu ǀguiga.

³⁸Tsî gu ge sinagogeb ǂamsab di oms tawa sī, tsîb ge ǂkhupi ran tsî ā ran tsî kaise ra ǃauna mûo,

³⁹ob ge ǂgâ tsî ge mîǀî in: Tarexa du ǂkhupi tsî ra ā? ǀGôaros kom ǁō tama tsî ǁom hâo. On ge ge âiǂui bi.

⁴⁰Ob ge hoana ge doeǁgaǂui tsî ǁgûb tsî ǁgûs tsîra ǀgôaros dira tsî ǁîb ǀkha hân tsîna ū tsî ǀgôaros ǁgoeǃkhais tawa ǂgâ,

⁴¹tsî ǀgôaros di ǃomma ǃkhō tsî ǁîs ǃoa ge mî: Talita kumi! ǁNās ge ǂnûiǃkhunihe hâ: ǀGôarose, tita ra mîba si: ǂKhai!

⁴²Os ge ǀgôarosa ǁnātimîsi khâi tsî ge ǃgû; disiǀgamǀa kurixas ge i xui-ao. On ge kai ǃhurib xa ge ǃkhōhe.

⁴³Tsîb ge ǁîna kaise ge ǃkhâi, î-i tā khoe-e ǂan ti, tsî ǂûmāhes nîsa ge mîmā.