Read Khoekhoegowab Markub 6 Bible Online

Markub 6 - Khoekhoegowab bible

Markub 6

¹Tsîb ge ǁnāpa xu ǂoa, tsî ǁîb aboxan ǃāsa ǃoa ge hā, tsî ǁkhāǁkhāsabegu âb ge ge sao bi.

²Tsî sâtsēs ge hā, ob ge sinagogeb ǃnâ ge ǁkhāǁkhātsoatsoa. Tsî ǂguin ǁnâu bi gen ge burugâ tsî ge mî: Mapa xub kha nēba nēna ra hō? Tsî mâ gā-aisi-eb kha māhe hâ, on nēti ī buruxa dīna ǁîb ǃomkha xu ra ī?

³ǁNâi haikuru-ao tamaba, Marias ôab, Jakobub, Joseb, Judab tsî Simonni tsîgu di ǃgâsa tamaba, tsî ǃgâsadi âba nēpa sada ǀkha hâ tama di hâ? On ge ǁîb ǃnâ ge ǁgonǁgonǂgaosen.

⁴Ob ge Jesuba ǁîn ǃoa ge mî: Kēbo-aob ge ǁîb aboxan ǃās tsî ǀaokhoen tsî ǁîb oms ǃnâb ǃgôasib ose hâ khami ǀnî ǃkhai-i ai hâ tama hâ.

⁵Tsîb ge ǁnāpa ǀgui buruxadī-i xare-e dī ǁoa ge i, ǀoro ǀaesen hânab ge ǃomkha ǁgui-ai tsî ǁîna ǂgauǂgaus ǀguis.

⁶Tsîb ge ǁîn di ǂgomoǃnâsib ǂama ge buru, tsî ǂnamipe ǁgoe ǃāde ǁkhāǁkhā rase ge ǃgûǃnâǃganu.

⁷Tsîb ge disiǀgamǀaga ǂgaihā tsî ǁîga ǀgamǀgamese ge sîǂuitsoatsoa tsî ǃanuoǃnâ gagagu ǂama ǀgaiba ge māgu.

⁸Tsî ǁîga ge mîmā, xū-i xare-e gu daob ai ūsao tidesa, hai-i ǀgui-e gu nî ū xawe pere-i kas, ǁgaru-i kas, mari-i kas hoasa gu ūsao tidesa.

⁹Tsî ǁharona gu nî ǂgaeǂgāsa, tsî ǀgam ǂamsarakha gu ana tidesa

¹⁰tsîb ge ǁîgu ǃoa ge mî: Om-i ǃnâ go ga ǂgâo, ǁnāpa hâ, ǁnāpa xu go nî ǂoas kōse.

¹¹Tsî sagon ga ǃkhōǃoa tama i tsî ǁnâu go tama io, o ǁnāpa xu ǂoa, î sago ǂaidi ǃnaga hâ tsaraba ǃhaebeǁnâ, ǁîn di mîdansa ǃoa.

¹²O gu ge ǂoa tsî gere aoǁnâ, în ǃhobasen.

¹³ǂGui ǁgâuaga ǃhaeǂui tsî gu ge ǂgui ǀaesen hâna olib ǀkha ǂkhau, tsî gere ǂgauǂgau.

¹⁴Tsî gao-aob Herodeb ge ǁîsa ǁnâu, ǁîb di ǀons ge ǂansa tsîn khoena gere mî xui-ao: Johaneb ǁĀǁnâ-aob ge ǁō hâna xu go khâi, tsî ǁnā-amaga gu kom nē ǀgaiga ǁîb ǃnâ ra sîseno.

¹⁵Tsîn ge ǀnîna ge mî: Eliab komo, tsî nauna: Kēbo-aob komo, kēbo-aogu di ǀguib khamib kom īo.

¹⁶Tsî Herodeb ge ǁnâu, ob ge ge mî: Johaneb tita ge ǁhāǁnâdana kaib kom ǁō hâna xu go khâio.

¹⁷Herodeb ge sîsī tsî Johaneba ǃkhō tsî ǃkhō-oms ǃnâ ge ǃgae bi, Herodias ǁîb ǃgâsab, Filipub di taras ǃaroma; ǁîsab ge ǃgame xui-ao.

¹⁸Johaneb ge Herodeb ǃoa mî xui-ao: Mā-amhe tamats kom hâo, sa ǃgâsab tarasa ūsa.

¹⁹Os ge Herodiasa ǁkhan bi tsî ǁîba ge ǃgam ǂgao, xawes ge ǁkhā tama ge hâ i.

²⁰Herodeb ge Johaneba ǃao xui-ao, ǂhanu-ai tsî ǃanu khoeseb ge ǁîba ǂan i amaga, ob ge ǁîba ge ǃûi tsî ǁnâu bib geo, ob ge kaise ǂâixa tsî ge ǁnâu bi ǂgao.

²¹Tsî ǃgâiga tsēs ge hāo, Herodeb ge ǁîb di ǃnaetsēs ai ǁîb di kaigu tsî ǂamkhoegu tsî ǂgurosagu Galileab diga ǂûǁae-e dībao.

²²Os ge Herodias ôasa ǂgâxa tsî gere ǂnā, tsî Herodeb tsî ǁîb ǀkha ǂnôaga ge ǃgâiǃgâi. Ob ge gao-aoba ǀgôasa ǃoa ge mî: ǂGan te re ǂgaos ra xū-i hoa-e, o ta ge nî mā si.

²³Tsîb ge ǁîsa ge nūba: ǂGan tes ka-i hoa-e ta nî mā si, ti gaosis di ǃkhareǃâs ka xawe.

²⁴Os ge ǂoa tsî ǁgûs âs ǃoa ge mî: Tare-e ta nî ǂgan? Os ge ge mî: Johaneb ǁĀǁnâ-aob di danasa.

²⁵Os ge ǁnātimîsi ǃnoesase gao-aob tawa ǂgâ, tsî ǂgan tsî ge mî: ǂGao ta ra, nēsits nî tita ǃores ai Johaneb ǁĀǁnâ-aob di danasa mā ǃkhaisa.

²⁶Ob ge gao-aoba kaise ge ǃoa; xawe nūdi tsî ǂnûǀhao hân ǃaromab ge ǁîsa ǂkhā ǂgao tama ge i.

²⁷Tsîb ge gao-aoba ǁnātimîsi ǁhāǁnâdana-aoba sî tsî ge mîmā, Johaneb danas nî ūhāhesa.

²⁸Ob ge ǃgû tsî Johaneba ǃkhō-oms ǃnâ ǁhāǁnâdana, tsî danas âba ǃores ai ūhā tsî ǁîba ǀgôasa ge mā, tsîs ge ǁîsa ǁgûs âsa ge mā.

²⁹Tsî ǁkhāǁkhāsabegu âb ge ǁnâuo, o gu ge hā tsî ǁîb sorosa ū, tsî ǁîsa ǀhobas ǃnâ ge ǁgui.

³⁰Tsî apostelgu ge ǁkhawa Jesub tawa ǀhao tsî ge ǃhoaba bi ǁîgu goro dī tsî ǁkhāǁkhān hoana.

³¹Ob ge ǁîgu ǃoa ge mî: ǃŪ-aisa ǃkhais ǃoa ǀguri hâǃgû î go sâro re. Hā tsî ra ǃgûn ge ge ǂgui i, tsî ǂû gu nî ǁaeb xaweba gu ge hō tama hâ i xui-ao.

³²O gu ge ǂgaus ǀkha ǃū-aisa ǃkhais ǃoa ǀguri ge hâǃgû.

³³Tsî ǂguin ge ǁîgu ǃgâusa ge mû; tsî mûǂan gun geo, on ge ǀnūb ǀkha hoa ǃāde xu ǁnāpa ǃkhoeǀhao, tsî ǁîga ge aisība.

³⁴Tsî Jesub ge ǂoaxa tsî kai ǂnubisa mûo, ob ge ǁîna ge ǀkhomxa, gūn ǃûi-ao-i ose hân khamin ge ī i xui-ao; tsîb ge ǂgui xūna ǁîna ge ǁkhāǁkhātsoatsoa.

³⁵Tsî ǀnais ra tsēsa ǁaupe toa hîa gu ge ǁkhāǁkhāsabegu âba ǁîb ǃoa hā tsî ge mî: Nē ǃkhais a ǃū-aisa tsî ǁaeb kom ǀnai go toao;

³⁶ǁîna ǁnâi xū, în ǁgoeǂnamipe hâ ǃhaidi tsî ǃādi ǃoa ǂûxū-e ǁamabasenǃgû.

³⁷Ob ge ǁîba ǃeream tsî ǁîgu ǃoa ge mî: Sago ǁîna ǂûmā re. O gu ge ǁîb ǃoa ge mî: ǁNâi ǃgû tsî ge nî ǀgamkaidisi marin ama pere-e ǁama tsî ǁîna ǂûmā?

³⁸Ob ge ǁîgu ǃoa ge mî: Matikō pere-e go ǁnâi ūhâ? ǃGûsī, î go kō re. Tsî ǂan gu ge o gu ge ge mî: Koro peren tsî ǀgam ǁaurokha tsîn.

³⁹Ob ge ǁîga ge mîmā, hoana gu nî ǂnû kaisa, nēpa ǀhaoǃnâ-i, naupa ǀhaoǃnâ-e, ǃam ǀgân ai.

⁴⁰On ge nē dommi ai ge ǂnû, nēpa ǀguikaidisise tsî naupa korodisise.

⁴¹Ob ge koro peren tsî ǀgam ǁaurokha tsîna ū, tsî ǀhommi ǃoa kōǃapa tsî ǁîna ǀkhae, tsî perena khôa tsî ǁîna ǁkhāǁkhāsabega ge mā, ǁîna gu nî mâi-mâi-aiǃâ nîse, tsî ǀgam ǁaurokha onab ge hoan ǃnâ ge ǀgora.

⁴²Tsîn ge hoana ǂû tsî ge ǁâ.

⁴³Tsîn ge ǃâron xa disiǀgamǀa ǀharudi di ǀoaba ge ūkhâi, tsî ǁauron tsîn xa.

⁴⁴Tsî perena ge ǂû gu ge koroǀoadisi khoe ge iga.

⁴⁵Tsîb ge ǁnātimîsi ǁîb ǁkhāǁkhāsabega ge ǁgari, ǂgaus ǃnâ ǂgâ tsî gu nî nauǃani Betsaidas ǃoa aiǃgûsa, ǁîb ǂûb nî ǂnubisa ǃgû kai hîa.

⁴⁶Tsî ǁîna xub ge ǀgorao, ob ge ǃhommi ǃoa ge ǀgoreǃgû.

⁴⁷Tsî ǃui-i geo, os ge ǂgausa hurirob ǁaegub ǃnâ ge hâ i, tsî ǁîb ge ǃhūb ai ǀguri ge hâ i.

⁴⁸Tsî mûb geo ǃgûgaus ǃnâ gu ra tsūǀkhāsa (ǂoab ge ǁîgu ǃoagu hâ i amaga), ob ge hakaǁî tsuxuǃûis iri ai hurirob ai ra ǃgûse ǁîgu tawa sī, tsî ǁîga gere ǃgû-īǀkhā ǂgao.

⁴⁹Tsî hurirob aib ra ǃgû hîa gu ge mû bio, o gu ge ǀnore-i ti ǂâi tsî kaise ge ǃau.

⁵⁰Hoagu ge ǁîba mû tsî ǃhuri xui-ao. Ob ge ǁnātimîsi ǁîgu ǀkha ǃhoa tsî ge mîǀî gu: ǃGâiǂâixa re, tita komo, tā ǃao re!

⁵¹Ob ge ǁîgu tawa ǂgaus ǃnâ ge ǂgâ, tsîb ge ǂoaba ge ǁgoea-ai. O gu ge kaise ǃhuri tsî ge buru.

⁵²Peren tawa gu ge ǁnâuǃākaisen tama i tsî ǁîgu di ǂgaogu ge gorose karokarosen hâ i amaga.

⁵³Tsî ǃgâuxa tsî gu ge Genesarets ǃhūb tawa sī tsî ǁnāpa ge sī mâ.

⁵⁴Tsî ǂgausa xu gu ge ǁgôaxa, on ge khoena ǁnātimîsi ge mûǂan bi.

⁵⁵Tsîn ge ǁnā ǂnamipe ǁgoe ǃhūb hoab ǃnâ ǃkhoema, tsî ǀaesen hâna tani-ūxūgu ai ge ūhātsoatsoa, ǁîb hâsan ge ǁnâu ǃkhais ǃoa.

⁵⁶Tsî mapab gere ǂgâ xawe, ǃhaidi ǃnâs kas, ǃādi ǃnâs kas, ǁgâudi ǃnâs kas hoasa, ǁnāpan ge ǀaesen hâna ǁamaxūǃkhaidi ai ǂnûi, tsî gere ǀkhoma bi, în ǁîb sarab di ǂomamǃgâba tsâǀkhā, ti; tsî tsâǀkhā bi gen hoan ge ge ǂgau.