Read Khoekhoegowab Markub 7 Bible Online

Markub 7 - Khoekhoegowab bible

Markub 7

¹Tsî gu ge Farisegu tsî ǀnîgu xoaǂansabegu digu Jerusalemsa xu go hāga ǁîb tawa ge ǀhao.

²Tsî mû gu geo, ǀnî ǁkhāǁkhāsabegu âb ǀurixa ǃomgu, ǁnās ge ǁāhe tamagu, ǀkha ra pereǂûsa, o gu ge ǁnās xa ge tsūbahe.

³Farisegu tsî Jodeǁîn hoan kom ǂû tamao aiben ga ǃomga ǂōrisase ǁā tama io, kaigu di ǂnûiǂgāsan ra ǃkhōǀgaipe xui-ao.

⁴Tsî ǁamaxūǃkhaisa xun ra hāo, on kom ǁkhāti ǂû tamao, aiben ga ǁāsen tama io; tsî ǁkhāti ǀnî xūn ǂguin hâ, ǃkhōǀgaipe nîsen ge ǃkhōǃoana: ǀGabidi tsî xapan tsî ǂaisūdi tsîn di ǁāsa.

⁵O gu ge Farisegu tsî xoaǂansabegu tsîga ge dî bi: Tare xū-i ǃaroma gu ǁnâi ǁkhāǁkhāsabegu âtsa kaigu di ǂnûiǂgās ǃoa tanisen tama hâ, tsî ǁāhe tama ǃomgu ǀkha ra pereǂû?

⁶Ob ge ǁîgu ǃoa ge mî: ǃGâiseb ge Jesajaba sago hînaxaǃnâgo xa gere kēbo, xoahe hâ khami: Nē ǁaes ge amǁgaugu ǀkha ra ǃgôa te, xawe ǂgaob ân ge tita xu ǃnū hâ;

⁷ǁausen ra ǃgôa te, ǁkhāǁkhāde ra ǁkhāǁkhāǃâ, khoen xa ǂnûiǂgāhe hâde.

⁸Elob di mîmāsa ǁnāxū, tsî go kom khoen di ǂnûiǂgāsa ra ǃkhōǀgaipeo.

⁹Tsîb ge ǁîgu ǃoa ge mî: Ama ǃgâise gu Elob mîmāsa ra ǁaudī, sago ǂnûiǂgāsa go nî dīga.

¹⁰Moseb kom ge mîo: Saob tsî saos tsîrats ge nî ǃgôa! Tsî ǁgûb tsîra ga ǀâxare-i ge ǁōba nî tsâ-e.

¹¹Xawe go sago ra mî: ǁGûb tsî ǁgûs tsîra ǃoa: “Korbans” ǁnās ge ǁguibas, “tita xu ga harebeba tsisa” ti ga mî khoe-i ge ra ǂâuǂâu,

¹²tsî go ge ǁnāti ǁî-e ǃaruǀî ǁî-i îb tsî îs tsîra xū-i xare-e dība kai tama hâ.

¹³Tsî go ge Elob mîsa ra ǀgaioǃnâ kai sago di ǂnûiǂgās ǀkha; tsî ǂguin nēti īna go kom ra dīo.

¹⁴Tsî ǂnubis hoasa ǁkhawa ǂgaihā tsîb ge ǁîn ǃoa ge mî: Tita ǁnâu hoado, î du ǁnâuǃā!

¹⁵Xū-i khoe-i ǃauga hâ-i tsî ǁî-i ǃnâ ra ǂgâ-i ge ǁî-e ǀuriǀuri tama-e, xawe ǁî-e xu ra ǂoan ge khoe-e ra ǀuriǀurina.

¹⁶ǂGaera ǁnâu i nîse ūhâ-e a-i ǁnâu.

¹⁷Tsî ǁaesa xub ge oms ǃnâ ǂgâ ǃnubai gu ge ǁkhāǁkhāsabegu âba nē ǂkhōs xa ge dî bi.

¹⁸Ob ge ǁîgu ǃoa ge mî: Sago ona kha ǁnâi ǁnâuǃā-i ose hâ? ǃKhā tama go kha hâ ǃaugaba xu khoe-i ǃnâ ra ǂgâ-i hoa-i ǁî-e a ǀuriǀuri ǁoa ǃkhaisa?

¹⁹ǁÎ-i ge ǂgaob ǃnâ ǂgâ tama, tsî i kom ǃnāb ǃnâ ra ǂgâ tsî ǂganǃgâsib ǃnâ ra ǂoao.

²⁰Tsîb ge ge mî: Khoe-e xu ra ǂoaxa-i ge khoe-e ra ǀuriǀuri-e.

²¹Khoen ǂgaob di ǃnāba xun kom ra ǀkhīo: ǂKhaba ǂâidi, ǃgamekhôas, ǀaib, ǃgams,

²²ǃnaris, xūǃgunuxasib, ǁaixasib, gāxaǃnâsib, ǂūǁoasib, ǂkhabamûs, ǃkhāǃkhās, ǃgurixasib tsî ǁnâuǃāoǃnâsib tsîna.

²³Nē ǂkhaban hoan ge ǃnāba xu ǂoaxa tsî khoe-e ra ǀuriǀurina.

²⁴Tsîb ge ǁnāpa xu khâi, tsî Tires tsî Sidons tsîra ǀkharigu ǃnâ ǃgû tsî oms ǃnâ ǂgâ, tsî ǂgao tama ge hâ i, khoe-i nî ǁîsa ǂansa, xaweb ge ǂganǃgâsase hâ ǁkhā tama ge i.

²⁵Taras, ǃanuoǃnâ gagab ǀkha hâ ǀgôasa ūhâs ge ǁîb xa ǁnâu xui-ao; os ge hā tsî ǁîb ǂaira tawa ge ǁnāǁgoe.

²⁶Tsîs ge tarasa Grikeǁî khoe tsî Sirofenisiaǁî ǃhaos di ge i; tsîs ge ge ǂgan bi, îb ǁgâuaba ǁîs ôasa xu ǃhaeǂui.

²⁷Ob ge Jesuba ge mîǀî si: Aibe an ǀgôarona ǁâ; ǃgâi tama i kom hâo, ǀgôan di pere-e ū tsî arirona aomāsao.

²⁸Os ge ǃeream tsî ge mîǀî bi: Ama i ge, ǃKhūtse, xawen kom arirona tāb ǃnaga ǀgôaron di ǂoman xa ra ǂûo.

²⁹Ob ge ǁîs ǃoa ge mî: Nē mîs ǃaroma ǃgû; ǁgâuab go ǂoa sa ôasa xu xuige.

³⁰Tsî ǁîs oms tawas ge sī, os ge ge hōǃâ, ǁgâuab go ǂoaxu si tsîs ǀgôasa kharob ai ǁgoe ǃkhaisa.

³¹Tsî ǁkhawab ge Tires tsî Sidons tsîra di ǀkhariba xu ǂoao, ob ge Galileahurirob tawa ge sī, Dekapoliǀkharib ǁaegub ǃnâ.

³²Tsîn ge ǃgome tsî ǂganaǂgae hâ khoeba ǁîb ǃoa ūhā tsî ge ǀkhomma bi, îb ǃomma ǁgui-ai bi.

³³Ob ge ǁîba ǁaesa xu ǀguri ūbē, tsî ǀkhunugu âba ǁîb ǂgaera ǃnâ ǂgā, tsî ǂara tsî ǂāb ǀkha nammi âba ge tsâǀkhā.

³⁴Tsîb ge ǀhommi ǃoa kōǃapa tsî ǀhâimâinǀom tsî ge mîǀî bi: Efata, ǁnās ge ǁkhowa-amsen ti mîsa.

³⁵Os ge ǁnâus âba ge ǁkhowa-amsen tsî ǃgae-ūdab nammi âb dib ge ge oresen tsîb ge ǂhanuse ge ǃhoa.

³⁶Tsîb ge ǁîna ge ǃkhâi, khoe-i xare-en mîba tidesa; tsî matikōseb ge ǃkhâi, xawen ge ǁnās ǃgâ-ai ǁîsa ge ǂhôa,

³⁷tsî ǃnāǂamsase buru, tsîn ge ge mî: ǃGâiseb ge hoana go dī; ǂganaǂgae hânab kom ra ǁnâu kaio, tsî ǃgomenab kom ra ǃhoa kaio.