Read Khoekhoegowab Markub 8 Bible Online

Markub 8 - Khoekhoegowab bible

Markub 8

¹ǁNā tsēdi ǃnâ i ge kai ǂnubi-e ge ǀhao hâ i, tsî ǂûxū-e in ge ūhâ tama hâ i ǃnubaib ge Jesuba ǁîb ǁkhāǁkhāsabega ǂgaihā tsî ge mîǀî gu:

²ǂNubisa ta ra ǀkhom, ǀnain go ǃnona tsēde tita ǀkha hâ, xawen ǂûxū-e ūhâ tama xui-ao;

³tsî ǂû taman hâse ta ga ǁîna ǁaru kaio, on ge daob ai nî tsânaǁkhui; ǀnîn ge ǃnūseba xu hā hâ i xui-ao.

⁴O gu ge ǁîb ǁkhāǁkhāsabega ge ǃeream bi: Mapa xu i kha khoe-e nēna pere-i ǀkha nî ǁâǁâ nē ǃgaroǃhūb ǃnâ?

⁵Ob ge ǁîga ge dî: Matikō pere-e go ǁnâi ūhâ? O gu ge: Hû, ti ge mî.

⁶Ob ge ǁaes nî ǃhūb ai ǂnûsa ge mîmā. Ob ge hû perega ū tsî gangan tsî khôa tsî ǁîb ǁkhāǁkhāsabega ge mā, mâi-aiǃâ gu nîse; o gu ge ǁaesa ge mâi-aiǃâ.

⁷Tsî gu ge ǀoro ǁaurona ge ūhâ i; tsî ganganni geo, ob ge ǁîn on nî mâi-aiǃâhesa ge mîmā.

⁸Tsîn ge ǂû tsî ge ǁâ, tsî ǃgau go ǃâron xa hû ǀharudi ǀoaba ge ūkhâi.

⁹Tsî ǂû gen ge hakaǀoadisi nî ī; tsîb ge ǁîna ge ǃgû kai.

¹⁰Tsî ǁnātimîsib ge ǁîb ǁkhāǁkhāsabegu ǀkha ǂgaus ǃnâ ge ǂgâ, tsî Dalmanutab ǀkharib ǃnâ ge sī.

¹¹Tsî gu ge Farisega ǂoa, tsî ǁîb ǀkha ge ǂnoagutsoatsoa, tsî ǁîb ai sao-e ǀhomma xu ge ǂgan, ǁîba ǃâitsâ tsî.

¹²Ob ge gagas âb ǃnâ ra ǀhâimâinǀomse ge mî: Tarexas ra nē ǃhaosa sao-e ǂgan? Amase ta ra mîba du, sao-es nē ǃhaosa māhe tide ǃkhaisa.

¹³Ob ge ǁîga ǁnāxū tsî ǁkhawa ǂgaus ǃnâ ǂgâ tsî nauǃani ge ǃgâu.

¹⁴Tsî gu ge ǁkhāǁkhāsabegu âba perena ūǃgûsa ge ǀuru, tsî ǀgui pereb ǀguib ose ǀnî-e ǁîgu ǀkha ǂgaus ǃnâ ūhâ tama ge hâ i.

¹⁵Ob ge ǁîga mîmā tsî ge mî: Kō, î ǂanbasen re Farisegu di ǀkhuruǀkhurupereb xa, tsî Herodeb di ǀkhuruǀkhurupereb xa.

¹⁶O gu ge ǁîgu ǃnâ ǂâiǂâisen tsî ge mî: Perena ge ūhâ tama amagas komo.

¹⁷Tsî Jesub ge hōǃâo, ob ge ge mîǀî gu: Tarexa go ra ǂâiǂâisen, perena go ūhâ tama ǃkhaisa? Gorose go ǁnâi xū-i xare-e ǁnâuǃā tsî hōǃâ tama hâ? Ganupe go ǁnâi karokarosa ǂgaoba ūhâ?

¹⁸Mûde ūhâ tsî go kha mû tama hâ, tsî ǂgaede ūhâ tsî go kha ǁnâu tama hâ? Tsî ǂâi tama go kha hâ,

¹⁹ǁnā koro peregu, hîa ta ge koroǀoadisigu ǃnâ gere khôagu xa? Matikō ǀharudi ǀoaba go ge ūkhâisa ǃâron xa? O gu ge ge mîǀî bi: Disiǀgamǀadi komo.

²⁰Tsî ǁnā hûgu hîa ta ge hakaǀoadisigu ǃnâ gere khôagu xa, matikō ǀharudi ǀoaba go ge ūkhâisa ǃgau ge ǃâron xa? O gu ge ge mî: Hûdi komo.

²¹Ob ge ge mîǀî gu: Mati go ǁnâi ǁnâuǃā tama hâ?

²²Tsî gu ge Betsaidas tawa ge sī. On ge ǂgī hâba ǁîb ǃoa ūhâ tsî ge ǀkhoma bi, îb ǁîba tsâǀkhā.

²³Ob ge ǂgī hâb di ǃomma ǃkhō tsî ǁîba ǃārosa xu ǃaugaba ǃoa ǂgaeǂguiǂui tsî ǁîb mûra ǃnâ ǂara tsî ǃomkha ǁgui-ai bi tsî ge dî bi, iseb xū-e ra mû ǃkhaisa.

²⁴Ob ge kōkhâi tsî ge mî: Khoena ta ra mû, hain khamin ra ǃgûmase.

²⁵ǁNās khaoǃgâb ge ǁkhawa ǃomkha ǁîb di mûra ai ǁgui tsî ge kōkhâi tsîb ge ǂgau tsî hoana ǂhaisase ge mû ǁkhā.

²⁶Ob ge ǁîb oms ǃoa sî bi tsî ge mî: Tā ǃāros ǃnâ ǂgâ, î tā ǁkhāti khoe-e ǃāros ǃnâ xū-e mîba.

²⁷Tsîb ge Jesuba ǁîb ǁkhāǁkhāsabegu ǀkha ge ǃgûǂoa Kaesareas Filipub dis di ǃārodi ǃoa. Ob ge daob ai ǁkhāǁkhāsabega dî tsî ge mîǀî gu: Tari ta a, tin ra khoena mî?

²⁸O gu ge ge ǃeream: Johane ǁĀǁnâ-aots, tsî nauna, Eliats, tsî nauna, kēbo-aogu di ǀguits.

²⁹Ob ge ǁîgu ǃoa ge mî: Tsî sago ǁnâi tari ta ti go ra mî? Ob ge Petruba ǃeream tsî ge mîǀî bi: Xristuts kom satsao.

³⁰Ob ge ǁîga ge ǃkhâi khoe-i xare-e gu ǁîb xa mîba tide ǃkhaisa.

³¹Tsîb ge ǁîga ge ǁkhāǁkhātsoatsoa, Khoen Ôab ǂguina nîra tsâ tsî kaigu tsî ǀgapipristergu tsî xoaǂansabegu xa aoxūhe tsî ǃgamhe tsî ǃnonaǁî tsēs ai nîra khâi ǃkhaisa.

³²Tsîb ge ǁnā mîsa ǁkhoaǂgaose ge ǃhoa. Ob ge Petruba ǁîba ū tsî ge ǀau bi tsoatsoa.

³³Ob ge ǂnan tsî ǁkhāǁkhāsabegu âba ǃgapaǀî tsî Petruba ǃgabe tsî ge mî: Bē ti khaoǃgâ, Satantse, Elob dina ǂâi tama i tsîts ra khoen dina ǂâi xuige.

³⁴Tsî ǂnubisa ǁkhāǁkhāsabegu âb ǀkha ǂgaihā tsîb ge ǁîna ge mîǀî: Tita ga sao ǂgao-e a-i ǁî-aitsama ǀūxūsen, î-i ǃgâuhaib â-e ūkhâi, tsî tita sao.

³⁵ǁÎ-i ûiba ga sâu ǂgao-i ge ǁîb xa nîra kāhe-e, tsî ǁî-i ûib xa ga tita tsî ǃgâiǂhôas ǃaroma kāhe-i ge ǁîba nîra hō-e xuige.

³⁶Tare-e kha khoe-e nî harebeba ǃhūbaib hoaba i ga hō, tsî i ga ǀoms â-i tawa ǂkhôaba hō-o?

³⁷Tsî mâ xoremari-e i kha khoe-e nî mā ǁî-i ǀoms ama?

³⁸Tita tsî ti mîde ga tao-i nē ǃgamekhôaxa tsî ǁorexa ǃhaos ǃnâ, ǁî-eb kom ǁkhāti Khoen Ôaba nîra tao-o, ǁîb îb di ǂkhaisib ǃnâ tsî ǁîb di ǃanu ǀhomǃgāgu ǀkhab ga hāo.