Read Khoekhoegowab Markub 9 Bible Online

Markub 9 - Khoekhoegowab bible

Markub 9

¹Tsîb ge ǁîn ǃoa ge mî: Amase ta ra mîba du, ǀnîn ge hâ nē mân xa, ǁōba tsâ tidena, Elob gaosiban nî ǁîb ǀgaib ǃnâb hâse mûs kōse.

²Tsî ǃnani tsēdi khaoǃgâb ge Jesuba Petrub tsî Jakobub tsî Johaneb tsîga ū, tsî ǁîga ǀgapi ǃhommi ǃoa ǀguri ge ūǃapa; tsîb ge ǁnāpa ǁîgu aiǃâ ge ǀkharaǀkharahe.

³Tsî saran âb ge ge ǂkhai tsî kaise ǃuri tsamaros khami ǃuriǃuri-ao-i ǃhūbaib ai ǁnāti a ǃuriǃuri ǁoas kōse.

⁴Tsî Eliab ge Moseb ǀkha ǁîga ge ǂhai, tsî kha ge Jesub ǀkha gere ǃhoa.

⁵Ob ge Petruba ǃeream tsî Jesub ǃoa ge mî: Rabitse, sage nēpa hâs ge a ǃgâi; a ge ǃnona ǁhaode dībasen, satsa ǀguis, Moseba ǀguis tsî Eliaba ǀguisa.

⁶Tare-eb ra mîsab ge ge ǀū i, ǃao gu ge hâ i xui-ao.

⁷Tsî i ge ǀnanu-e hā tsî ǁîga ge somsomǂam. Tsî ǀnanusa xu i ge dom-e ge ǀkhī: Nēb ge ti ǀnamǀnamsa ǀGôaba; ǁîba ǁnâu! ti ra mî-e.

⁸Tsî ǁnātimîsi, kōǂnamipe gu geo, o gu ge ǀnî khoe-e ǁîgu ǀkha mû tama ge i, Jesub ǀguiba.

⁹Tsî ǃhomma xu gu ra ǁgôaxa hîab ge ǁîga ge ǃkhâi, khoe-i xawe-e gu mû gu gon xa mîba tidesa, Khoen Ôab nî ǁō hâna xu khâis kōse.

¹⁰O gu ge nē mîsa ǁîgu ǃnâ ūhâbasen, tsî ge dîǃnâgu, tares a ǁō hâna xu khâisa ǃkhaisa.

¹¹O gu ge ǁîba dî tsî ge mî: Xoaǂansabegu kom ra mîo, Eliab nî aibe hāsa?

¹²Ob ge ǃeream tsî ge mîǀî gu: Eliab kom aibe hā tsî hoana nîra dī-unuo; tsî Khoen Ôab xa xoahe hâ khami i kom nîra īo, kaise tsâ tsîb nîra ǃharaxūhe ǃkhaisa.

¹³Xawe ta ra mîba go: Eliab ge ǀnai ge hā, tsîn ge ǂgaon ra khami ge sîsenū bi ǃkhaisa, ǁîb xa xoahe hâ khami.

¹⁴Tsî ǁîb ǁkhāǁkhāsabegu tawa gu ge hā, o gu ge kai ǂnubis ǁîgu tawa hâsa ge mû, tsî xoaǂansabegu ǁîgu ǀkha ra ǂnoaguga.

¹⁵Tsî ǁnātimîsi ǂnubis hoas ge mû bio, on ge ǃhuri tsî ge hā tawede bi.

¹⁶Ob ge xoaǂansabega ge dî: Tarexa go ǁîgu ǀkha goro ǂnoagu?

¹⁷Ob ge ǀguib ǁaes diba ǃeream tsî ge mî: ǁKhāǁkhā-aotse, ti ôaba ta ge sats ǃoa go ūhā, ǃgome gagaba ūhâba.

¹⁸Tsî ǃkhō bib ka ǃkhais aib ge ra ǀkhau bi; ob ra goa-am tsî ǁaninǁgû, tsî ǀkhama, o ta ǁkhāǁkhāsabegu âtsa goro mîba, î gu ǁîba ǃhaeǂui ti, xawe gu ge go ǁkhā tama hâ i.

¹⁹Ob ge ǃeream tsî ǁîna ge mîǀî: O! Sa ǂgomoǃnâ ǃhaose, matikōse ta kha sadu ǀkha nî hâ? Matikōse ta kha nî tani du? Tita ǃoa ūhā bi!

²⁰On ge ǁîb ǃoa ge ūhā bi, tsî ǁîbab ge mûo, ob ge gagaba ǁnātimîsi ge ǀkhau bi; ob ge ǃhūb ai ǁnā, tsî goa-am raǃâ ge gabapesen.

²¹Ob ge ǁgûb âba ge dî: Mâ ǁaeba xusa ǁnâi nēs ge hāǂam bisa? Ob ge: ǂKhamsis âba xus ge, ti ge mî.

²²Tsî ǃnuri ǃnādeb ge ǁîba ǀaes ǃnâ gere aoǂgā, tsî ǁgam-i ǃnâ, ǃgam bib nîse, xawe xū-ets ga dī ǁkhāo, ǀkhomxa î hui khom re.

²³Ob ge Jesuba ǁîb ǃoa ge mî: ǂGom ǁkhāts kao; ǂgom ra-i kom hoan xa īǁkhāsabaheo.

²⁴Ob ge ǀgôab di îba ǁnātimîsi ǂgai tsî ge mî: ǂGom ta ra ǃKhūtse; ti ǂgomoǃnâsiba hui re.

²⁵Tsî Jesub ge mû ǂnubis ra ǃkhoeǀhû ǃkhaisa, ob ge ǃanuoǃnâ gagaba ǃgabe, tsî ǁîb ǃoa ge mî: Sa ǃhoa ǁoa tsî ǁnâu ǁoa gagatse, tita ra mîba tsi ǁîba xu ǂoa, î ǃaruǀî tā ǂgâǃnâ bi.

²⁶Ob ge ǃau tsî kaise ǀkhau bi tsî ge ǂoa. Ob ge ǁō hâ-i khami ge ī, ǂguin ge: ǁŌb kom go-o, ti a mîs kōse.

²⁷Ob ge Jesuba ǁîb ǃomma ǃkhō tsî ge ūkhâi bi, ob ge ge khâi.

²⁸Tsî oms tawab ge sīo, o gu ge ǁkhāǁkhāsabegu âba ǁîba ǀguri ge dî: Tare xū-i ǃaroma ge sige ǃhaeǂui bi ǁkhā tama go i?

²⁹Ob ge ǁîgu ǃoa ge mî: Nē ǁgâuaǃnôa-i kom ǀnî xū-i xa ǂoa kaihe tamao, ǀgores tsî ǂûtamahâs ǀguis xa.

³⁰Tsî gu ge ǁnāpa xu bē tsî Galileaba ge ǃgûǃnâǃganu, tsîb ge ǂgao tama ge i khoe-i nî ǁîsa ǂansa.

³¹ǁÎb di ǁkhāǁkhāsabegab gere ǁkhāǁkhā, tsî ǁîgu ǃoa mî xui-ao: Khoen Ôab ge khoen di ǃomǁae nîra māǁnâhe, tsîn ge nîra ǃgam bi; tsî ǃgamheb kao, ob ge ǃnona tsēdi khaoǃgâ ǁkhawa nîra khâi.

³²Xawe gu ge nē mîsa ǁnâuǃā tama i tsî ǁîba gu nî dîsa ge ǃao.

³³Tsî gu ge Kapernaums tawa ge sī tsî oms ǃnâb ge ǁîga ge dî: Tare xū-i ǃaroma go daob ai goro ǂnoagu?

³⁴O gu ge ge ǃnō; daob ai gu goro ǂnoagu xui-ao, tarib a hoagu xa kaisa.

³⁵Ob ge ǂnû tsî disiǀgamǀaga ǂgai tsî ǁîgu ǃoa ge mî: Khoe-i ga ǂguro ǂgao-o, a-i hoan xa khaos ai hâ, a-i hoan di ǃgā.

³⁶Tsî ǀgôaro-e ū tsîb ge ǁîgu ǁaegu mâi tsî ǁî-e ǁnam, tsî ge mîǀî gu:

³⁷Nēti ī ǀgôaron di ǀgui-e ga ti ǀons ǃnâ ǃkhōǃoa-i ge tita ra ǃkhōǃoa-e, tsî tita ga ǃkhōǃoa-i ge tita ǃkhōǃoa tama, xawe tita ge sîba ra ǃkhōǃoa-e.

³⁸Ob ge Johaneba ǃeream bi tsî ge mî; ǁKhāǁkhā-aotse, ǀguiba ge go mû, sa ǀons ǃnâ ǁgâuaga goro aoǂuib, sage sao tamaba; o ge ge go ǃkhâi bi, sageb sao tama amaga.

³⁹Ob ge Jesuba ge mî: Tā ǃkhâi bi; khoe-i ti ǀons ǃnâ buruxana ra dī, tsî nî ǃhaese tita xa ǁgaisise ǃhoa ǁkhā-i hâ tama hâ xuige.

⁴⁰Sage ǃoagu hâ tama-i kom sage ǀkha hâ-eo.

⁴¹Mâ-i hoa-i sago ga ǁgam-i hâǃnâ ǀgabi-e ā go nîse mā-i, ti ǀons ǃnâ, Xristub digo ao, amase ta ra mîba go, ǁî-i ge amǃnâs â-e tātsē ǂoaǃnâ tide.

⁴²Tsî nē ǂkharin tita ǃnâ ra ǂgomn di ǀgui-e ga ǁgonǁgonǂgao-i, ǁî-i ga ǃgâibahe, ǁkhamiǀui-i ga ǁî-i di ǃaos ai ǃgaehe, tsî i ga hurib ǃnâ aoǂgāhe ǃkhaisa.

⁴³Tsî ǃommi âts ga ǁgonǁgonǂgao tsio, ǁîba ǁhāǁnâ; ǃgâiba tsi ka, ǃhorasets nî ûib ǃnâ ǂgâsa, ǀgam ǃomkha ūhâsets nî ǀamo ǀaeb ǃnâ ǂgâs xa, ǀariǁoasa ǀaes ǃnâ.

⁴⁴ǁNāpab ge ǁîn di ǂuniba ǁō tama hâ, tsîs ge ǁîn di ǀaesa tātsē ǀari tama hâ.

⁴⁵Tsî ǂais âts ga ǁgonǁgonǂgao tsio, ǁîsa ǁhāǁnâ; ǃgâiba tsi ka ǃhorasets nî ûib ǃnâ ǂgâsa, ǀgam ǂaira ūhâsets nî ǀamo ǀaeb ǃnâ aoǂgāhes xa, ǀariǁoasa ǀaes ǃnâ.

⁴⁶ǁNāpab ge ǁîn di ǂuniba ǁō tama hâ, tsîs ge ǁîn di ǀaesa ǀari tama hâ.

⁴⁷Tsî mûs âts ga ǁgonǁgonǂgao tsio, ǁîsa ūǂui; ǃgâiba tsi ka, ǀgui mûs ǀkhats nî gaosib Elob dib ǃnâ ǂgâsa, ǀgam mûra ūhâsets nî ǀamoǀaeb ǃnâ aoǂgāhes xa.

⁴⁸ǁNāpab ge ǁîn di ǂuniba ǁō tama hâ, tsîs ge ǁîn di ǀaesa ǀari tama hâ.

⁴⁹Mâ-i hoa-i ge ǀaes ǀkha nî ǂōǂgāhe tsî mâ ǁguiba-i hoa-i ge ǂō-i ǀkha nî ǂōǂgāhe xui-ao.

⁵⁰ǂŌ-i ge a ǃgâi; xawe ǂō-i ga ǁkhoao-o, mâ xū-i ǀkha du kha ǁî-e nî ǁkhoaǁkhoa? ǂŌ-e sago ǃnâ ūhâ î go ǂkhîbagu re.