Read Khoekhoegowab Lukab 1 Bible Online

Lukab 1 - Khoekhoegowab bible

Lukab 1

¹ǂGuigu ge ge ǂâibasen, sada ǃnâ ge ī ǃnaeǃkhaide gu nî îsase xoamâisa,

²ǁnān, ǂgurosa xu ǃgapaǀî-ao tsî mîs di ǃgā ge in ge ǁîde mā da hâ i khami:

³ǁNā-amaga ta ge tita ona ǂâibasen hâ, hoana ta gere ǂōrisase ôaǃnâs khaoǃgâ, īn ge khami xoaba tsisa, ǀnamǀnamsa Teofilutse,

⁴ǁKhāǁkhāhets hâ xūn di ǂanǁaposats nî hōga.

⁵Herodeb, Judeab gao-aob di tsēdi ǃnâb ge ǂanǂansa pristera ge hâ i, Saxariab ti ǀon hâb, Abiab di ǁkhāǁkhādomma xu hâba, tsîs ge taras âba Aronni ôadi di ge i, tsî ǀons âs ge a Elisabet.

⁶Tsî ra ge hoara Elob aiǃâ ǂhauǃnâ ge i tsî Elob di mîmādi tsî ǂnûiǂgādi hoadi ǃnâ ūose gere tanisen.

⁷Tsî ra ge ǀgôa-e ūhâ tama ge hâ i, Elisabets ǁora tama tsî hoara ge kaira hâ i amaga.

⁸Tsî i ge ge ī, pristersîsennab ra Elob aiǃâ sîsen, ǁîb pristerdommi ǃoa,

⁹hîab ge ǁaeba ge hā, pristersis di ǁnaetib ǃoab nî ǂgâ tsî ǃgâihamxūna ǀanǀan ǃkhaisa; ob ge ǃKhūb di tempeli ǃnâ ge ǂgâ.

¹⁰Tsî hoaraga ǂnubis ge ǀanǀanǁguibas di ǁaeb ai ǃauga mâ tsî gere ǀgore.

¹¹Ob ge ǃKhūb di ǀhomǃgāba ge ǂhai bi, ǀanǀanaltars amǀkhāb ai mâ tsî.

¹²Tsî Saxariab ge mû bi, ob ge ǃhuri tsî ǃaob xa ge hāǂamhe.

¹³Ob ge ǀhomǃgāba ǁîb ǃoa ge mî: Tā ǃao, Saxariatse, ǀgores âts go ǁnâu-amhe xuige; sa taras Elisabets ge ǀgôaba nîra ǁoraba tsi, tsîts ge ǀons âba Johaneb ti nî ǂgai.

¹⁴Tsî sats ge ǃgâiaǂgao tsî nîra dâ, tsî ǂguin ge ǁîb ǃnaes ǂama nîra ǃgâiaǂgao;

¹⁵ǃKhūb di ais aiǃâb nîra kai xui-ao; ǂauxûib tsî ǀgaisa āxūnab ge ā tide, tsîb ge ǀnai ǁgûs di ǃnāba xu ǃAnu Gagab ǀkha nîra ǀoaǀoahe.

¹⁶ǁÎb ge ǂguin Israeli ôan dina nîra ǃhobasen kai ǃKhūb, ǁîn di Eloba ǃoa;

¹⁷tsîb ge nîra aiǃgûba bi Eliab gagas tsî ǀgaib ǃnâ, ǁgûgu ǂgaogab nî ǀgôan ǃoa ǃhobasen kaise, tsî ǁnâuǀnam tamana ǂhanu-ain di ǂâisa ǃoa, ǃKhūba nî ǂhomisen hâ ǁaesa dī-unubase.

¹⁸Ob ge Saxariaba ǀhomǃgāb ǃoa ge mî: Mati ta kha nēsa nîra ǂan? Tita kom kaira hâo, tsî ti taras kom ǁkhāti kaira hâo.

¹⁹Ob ge ǀhomǃgāba ǃeream bi, tsî ge mî: Tita ge Gabrielta, Elob aiǃâ mâta, tsî ta ge go sîǂuihe, satsa ǃhoa-ū, tsî ta nî nē ǃgâiǂhôasa ǂhôa tsise.

²⁰Tsî mû, sats ge ǃnō tsî nî ǃhoa ǁoa, nēn nîra ī tsēs kōse, ti mîdets go ǂgom tama i amaga, ǁîdi ǁaeb ai nîra ǀoaǀoahede.

²¹Tsîs ge ǁaesa Saxariaba ǃâu, tsî ge buru, tempeli ǃnâb ra ǁnātikōse gaxuse ǀhape ǃkhais xa.

²²Tsî ǂoaxab ge, ob ge ge ǁîn ǀkha ǃhoa ǁoa i; on ge ge hōǃâ, ai-eb go tempeli ǃnâ mûsa; ob ge ǁîna nape, tsî ǃgomese ge hâ.

²³Tsî i ge ge ī, ǁîb sîsentsēdi ge ǃgôa-īo, ob ge ge ǁaru.

²⁴Tsî ǁnā tsēdi khaoǃgâs ge taras âb Elisabetsa ge ǀgamǀkhā; os ge koro ǁkhâga gaugausen, tsî ge mî:

²⁵Nētib ge ǃKhūba go dī te, ǁîb go ǃgapaǀî te tsēdi ai, ti ǃharaxūhesab nî khoen ǃnâ ūbēba tese.

²⁶Tsî ǃnaniǁî ǁkhâb aib ge ǀhomǃgāb Gabriela ge sîǂuihe, Nasaret ti ǀon hâ ǃās, Galileab disa ǃoa,

²⁷Jose ti ǀon hâ khoeb, Davib omma xu hâba ge āba mā hâ i ǂkhamkhoes ǃoa; tsî nē ǂkhamkhoes di ǀons ge a Maria.

²⁸Tsîb ge ǀhomǃgāba, ǂgâ tsî, ǁîs ǃoa ge mî: Tawede si sas ǀkhomma go hōsa! ǃKhūb ge hâǀkhā si sas taradi ǃnâ ǀkhaehe hâsa.

²⁹Tsî mû bis geo, os ge ǁîb di mîs ǂama ǃhuri tsî ge ǂâi, mati ī tawede-ai-e nē-e nî ī, ti.

³⁰Ob ge ǀhomǃgāba ǁîs ǃoa ge mî: Tā ǃao, Mariase, ǀkhomas go Elob tawa hō xuige.

³¹Tsî mû, ǀgamǀkhā tsîs ge ǀgôaba nî hō, tsîs ge ǀons âba Jesub ti nî ǂgai.

³²ǁÎb ge nîra kai, tsî Hoan xa ǀGapib Ôa ti nîra ǂgaihe, tsî ǃKhūb Elob ge ǁîb îb Davib di tronsa nîra mā bi.

³³Ob ge ǀamos kōse Jakob ommi ǂama nîra gaosîsen, tsî ǁîb gaosib ge ǀam-e ūhâ tide.

³⁴Os ge Mariasa ǀhomǃgāba ǃoa ge mî: Matis nēsa nîra ī? Ao-e ta kom ǂan tama o.

³⁵Ob ge ǀhomǃgāba ǃeream, tsî ge mîǀî si: ǃAnu Gagab ge nîra hāǂam si, tsî Hoan xa ǀGapib di ǀgaib ge nîra somsomǂam si; ǁnā-amaga i ge sasa xu nîra ǃnae ǃAnu-e, Elob Ôab ti nîra ǂgaihe.

³⁶Tsî mû, Elisabets sa ǀhōsas on ge ǀgôaba ǀgamǀkhā hâ kaira tsēdi âs ǃnâ tsî nēb ge ǃnaniǁî ǁkhâb âs, ǁîs ǀgôa-e hō tama, ti ra mîhes diba.

³⁷Xū-i xare-i kom Elob tawa īǁoasa tamao.

³⁸Os ge Mariasa ge mî: Mû, ǃKhūb di ǃgāta ge tita; mîts go khami a-i īǀkhā te; ob ge ǀhomǃgāba ǁîsa xu ge bē.

³⁹Tsîs ge Mariasa ǁnā tsēdi ǃnâ khâi, tsî ǃhaese ǃhomgu ai ǁgoe ǃās Judab dis ǃoa ǃgû,

⁴⁰tsî Saxariab oms ǃnâ sī, tsî Elisabetsa ge tawede.

⁴¹Tsî i ge ge ī, Elisabets ge Marias di tawedesa ǁnâu, ob ge ǀgôaroba ǃnāb âs ǃnâ ge urikhâi; tsîs ge Elisabetsa ǃAnu Gagab ǀkha ǀoa,

⁴²tsî ǃgari dommi ǀkha ǂgai, tsî ge mî: ǀKhaehes hâ sasa taradi ǃnâ, tsî ǀkhaeheb hâ ǃnāb âs di suriba.

⁴³Tsî matis go nēsa hāǂam te, os ti ǃKhūb di îsa tita ǃoa go hā?

⁴⁴Mû, sa tawedes go ti ǂgaes ǃnâ ǂgâ, ǃnubaib kom ǀgôaroba ti ǃnāb ǃnâ ǃgâiaǂgaob xa go urikhâio.

⁴⁵Tsî ama ǃgâiǃōs hâ sas ǂgom gosa, ǃKhūb xas go mîbahen nîra dīǀoaǀoahe ǃkhaisa.

⁴⁶Os ge Mariasa ge mî: Ti ǀoms ge ǃKhūba ra kaikai,

⁴⁷tsî ti gagas ge ra dâ, Elob ti ǃGâiǃōdī-aob ǃnâ,

⁴⁸ǁîb ǃgās di ǃgamǃgamsensab go ǃgapaǀî amaga; tsî mû, nēsisa xu di ge hoa ǃhaode ǃgâiǃōse nîra kare te,

⁴⁹kai xūnab go ǀgaisaba dī te amaga, tsî ǀons âb a ǃanu,

⁵⁰tsî ǁîb di ǀkhommi ra hâhâ nē ǃhaosa xu nau ǃhaos kōse, ǁîba ra ǃaoǃgân ǂama.

⁵¹ǀGaisa dī-eb go dī, ǁîb di ǁôab ǀkha; ǁîn ǂgaogu di ǂâidi ǃnâ ǃguri hânab ge go ǀgaruǀgaru.

⁵²ǀGaisanab ge tronde xu go ǂgaeǁnâ, tsî ǃgamǃgamsensanab ge go ǀgapiǀgapi.

⁵³ǃÂ hânab ge ǃgâin ǀkha go ǁâǁâ, tsî ǃkhū hânab ge ǀkhaiǃomse go sîbē.

⁵⁴Israeli, ǁîb di ǃgābab ge go hui, ǀkhommi âb xa ǂâi tsî.

⁵⁵Sada îgab ge mîba khami, Abrahammi tsî ǁîb di suriba ǀamosib kōse.

⁵⁶Tsîs ge Mariasa ǁaupexa ǃnona ǁkhâgu kōse ǁîs ǀkha ge hâ; tsî ǁnās khaoǃgâs ge ge ǁaru.

⁵⁷Tsî Elisabets ǁaeb, ǀgôa-es nî hōb ge mâtoao, os ge ǀgôaba ge ǁora.

⁵⁸Tsî ǁanǁare-aon tsî ǀaokhoen âs ge ǁnâu, ǃKhūb go kai ǀkhomma ǁgau si ǃkhaisa, on ge ge ǃgâiaǂgaoǀkhā si.

⁵⁹Tsî i ge ge ī, ǁkhaisaǁîtsēs ain ge hā ǃkhaisa, ǀgôaroban nî ǃgaose, on ge ǁîba ǁgûb di ǀons ǃoa Saxaria, ti ge ǂgai.

⁶⁰Os ge ǁgûsa ǃeream, tsî ge mî: Hî-î, xaweb kom Johaneb ti nî ǂgaiheo.

⁶¹On ge ǁîsa ge mîǀî: ǀGui-i xare-i kom sa ǀaokhoen ǃnâ hâ tamao, nē ǀonsa ūhâ-e.

⁶²On ge ǁgûba ǃommi ǀkha ge ǁgau, matib nî ǁîba ǂgaihesab ra ǂgao ǃkhaisa.

⁶³Ob ge xoa-aixūro-e ǂgan, tsî ge xoa: Johaneb ge ǀons âba. On ge hoana ge buru.

⁶⁴Tsî ǁnātimîsis ge ams âba ge khowahe tsî nams âba ge xorehe, ob ge ǃhoa tsî Eloba ge kare.

⁶⁵Tsî ǁanǁare-aon hoan ge ǃaob xa ge hāǂamhe; tsîn ge nēn hoan xa Judeab ǃhomxa ǀkharib hoab ǃnâ kaise ge ǃhoabagu.

⁶⁶Tsî ǁnâu gen hoan ge ǁîsa ǂgaob ǃnâ ū tsî ge mî: Tare-e kha nî ī nē ǀgôarob ǀkha? Tsîb ge ǃKhūb di ǃomma ǁîb ǀkha ge hâ i.

⁶⁷Tsîb ge ǁgûb Saxariaba ǃAnu Gagab ǀkha ǀoa, tsî kēbo tsî ge mî:

⁶⁸Ab karehe ǃKhūb, Israelǁîn Eloba; sarihā tsîb go ǁaes âba oresa dība amaga,

⁶⁹tsîb ge ǃgâiǃōb di ǁnâba go ūkhâiba da, Davib, ǃgāb âb di ommi ǃnâ;

⁷⁰hukasa xub ge ǁîb ǃanu kēbo-aogu di amsa xu mîmâi hâ i khami.

⁷¹Sadab nî orese, sada khākhoen tsî ǁkhan da ran hoan di ǃomma xu,

⁷²sadu îgab nî ǀkhomxase, tsî ǁîb di ǃanu ǃgaeǀhaos xab nî ǂâise,

⁷³tsî nūs xab nî ǂâise, sada îb Abrahammab ge nūba nūs xa, sadab nî mā bise.

⁷⁴Sada khākhoen di ǃomma xu orehe hâǃâ da nî ǃaob ose ǃoaba bise,

⁷⁵ǃanusib tsî ǂhanu-aisib ǃnâ ǁîb di ais aiǃâ, sada ûitsēdi hoade.

⁷⁶Tsî sats ǀgôarots ge Hoan xa ǀGapib di kēbo-ao, ti nî ǂgaihe, ǃKhūb di ais aiǃâts nîra aiǃgû amaga, ǁîb daogats nî ǂhomiba bise,

⁷⁷ǃgâiǃōb di ǂans, ǁoren ǀûbas ǃnâ hâsats nî ǁîb ǁaesa māse,

⁷⁸ǃnāb di ǀkhomxaǂgaosib sada Elob diba xu, ǁîb ǀkhab ge ǀgapiseb di ǃnâba a sari daba,

⁷⁹ǃkhaenab tsî ǁōb di sommi ǃnâ ǂnôanab nî ǃnâǃnâǂamse, tsîb nî sada ǂâide ǂkhîb daob ǃoa unuse.

⁸⁰Tsîb ge ǀgôaroba kaikhâi, tsî gagas ǃnâ ge ǀgai, tsî ǃgaroǃhūb ǃnâ ge hâ i, Israelǁaes aiǃâb nî ǁgausen tsēs kōse.