Read Khoekhoegowab Lukab 10 Bible Online

Lukab 10 - Khoekhoegowab bible

Lukab 10

¹Nēn khaoǃgâb ge ǃKhūba gorose ǀnî hûdisiga ge ǁgaumâi, tsî ǀgamǀgammese ǁîb aiǃâ ge sîǂui gu, hoa ǃādi tsî ǃārodi, ǁîb ǂûb nî sī ǃnâdi ǃoa;

²Tsîb ge ǁîgu ǃoa ge mî: ǃGaos ge a kai, xawe gu ge sîsenaoga a ǀoro; ǀgore ǁnâi ǃKhūb ǃgaos diba, sîsenaogab nî ǁîb di ǃgaos ǃoa sîǂui ǃkhaisa.

³ǃGû; mû, tita ge ǁkhaon khami ǂhiran ǁaegu ra sîǂgā go.

⁴Tā ǁnâi ūǃgû mariǁhō-e, tsî ǁgaru-e tsî ǁharo-e, î go daob ai tā khoe-e tawede.

⁵Tsî om-i ǃnâ go ga ǂgâ o aibe: Ab ǂkhîba hâ, nē oms ǀkha, ti mî.

⁶Tsî ǂkhîb di ôa-i ga ǁnāpa hâo, ob ge ǂkhîb âgo ǁî-i ai nî hâ; tsî hâ tama-i ga io, ob ge nî ǁkhawa sago ǃoa oa.

⁷Î ǁnā oms ǃnâ hâ, ūn hân xa ǂû tsî ra āse; sîsenao-i ǁî-i amǃnâsa anu hâ xuige; î go tā nē omsa xu nau oms ǃoa ǃgû!

⁸Tsî ǃā-i ǃnâ go ga ǂgâ, tsîn ga ǃkhōǃoa go o, ǁnâi mâi-aiǃâhe go kana ǂû,

⁹î go ǁnāpa hâ ǀaesen hâna ǂgauǂgau, î ǁîna mîba: Gaosib Elob dib ge sadu ǀgūse hā hâ.

¹⁰Tsî ǃā-i ǃnâ go ga ǂgâ, tsîn ga ǃkhōǃoa go tama io, ǂoa ǁîs di daogu ai, î mî:

¹¹Tsarab sadu ǃās dib, sige ǂaidi ai hâb tsîna ge ge sadu ai ra ǃhaebeǁnâ; î du nēsa ǂan, Elob gaosib go sado ǀgū isa.

¹²Tsî ta ge ra mîba go, Sodoms din ge ǁnā tsēs ai taniǁkhāsase nîra hō ǃkhaisa, ǁnā ǃās xa.

¹³Tsūba si, Xorasinse! Tsūba si, Betsaidase! Tires tsî Sidons tsîra ǃnân ga saro ǃnâ ge ī buruxana ī hâ io, o ra kom ga huga ǁhōb tsî tsaob tsîkha ǃnâ ǂnôase ǃhobasen hâ io.

¹⁴O ra ge Tires tsî Sidons tsîra saro xa taniǁkhāsase nîra hō ǀgoraǃgâs ǃnâ.

¹⁵Tsî sas, Kapernaums, ǀhommi kōses nî ǀgapiǀgapihe? Hadeb kōses ge sasa nîra ǂhāǁguihe.

¹⁶Sago ra ǁnâu-i ge tita ra ǁnâu-e, tsî sago ra ǃharaxū-i ge tita ra ǃharaxū-e. Tsî tita ra ǃharaxū-i ge tita ge sîba ra ǃharaxū-e.

¹⁷Tsî gu ge hûdisiga ǃgâiaǂgaob ǀkha oahā tsî ge mî: ǃKhūtse, ǁgâuagu xawe gu kom sa ǀons ǃnâ sige ra ǁnâuǀnamo.

¹⁸Ob ge ǁîgu ǃoa ge mî: Satanna ta ge napab xaseb ra ǀhomma xu ǁnāse go mû.

¹⁹Mû, sago ta ge ǀgaiba go mā, ǀaon tsî ǀhūn[1] tsîn ai dāsa, tsî khākhoeb di ǀgaib hoab ǂama; tsî xū-i xare-i ge sago ǂkhôadī tide.

²⁰Xawe gagagu sago ra ǁnâuǀnam ǃkhais xa tā ǃgâiaǂgao, î go ǁnās ǃgâ-ai ǃgâiaǂgao, sago ǀondi ǀhommi ǃnâ xoahe hâ ǃkhais xa.

²¹ǁKhā iri ǃnâb ge Jesuba ǃAnu Gagab ǃnâ dâ, tsî ge mî: Gangan tsi ta ra, Abotse, ǀhommi tsî ǃhūbaib tsîkha di ǃKhūtse, nēnats gā-ain tsî ǁnâuǃāxan tsîna ǂganǃgâsa kaiba, tsîts go ǁîna ǁnâuǃāoǃnâna ǂhaiǂhaiba ǃkhaisa. Ā, Abotse, ǁnāti i ge sats aiǃâ ǃgâi ge i.

²²Hoana ta ge ti Îb xa māhe hâ, tsî khoe-i xare-i ge ǂan tama hâ, tarib a ǀGôa ǃkhaisa, ǁGûb ǀguib, tsî tarib a ǁGû ǃkhaisa, ǀGôab ǀguib, tsî ǀGôab ra ǂhaiǂhaiba ǂgao-i ǀgui-i.

²³Tsî ǁkhāǁkhāsabegu ǃoa ǂnan, tsîb ge ǁîgu ǀguigu ǃoa ge mî: ǃGâiǃōdi ge hâ mûdi, sadu ra mûna ra mûde.

²⁴Mîba du ta ra xui-ao. ǂGui kēbo-aogu tsî gao-aogu tsîgu gere tura, sadu ra mûna gu nî mûse, tsî gu ge mû tama ge i, tsî sadu ra ǁnâuna gu nî ǁnâuse, tsî gu ge ǁnâu tama ge i.

²⁵Tsî mû, ǂhanuǂansabeb ge khâi tsî ǃâitsâ bi, tsî ge mî: ǁKhāǁkhā-aotse, tare-e dī tsî ta nî ǀamo ûiba ǀumi?

²⁶Ob ge ǁîb ǃoa ge mî: ǂHanub ǃnâ tare-e xoahe hâ? Matits ra khomai?

²⁷Ob ge ǃeream, tsî ge mî: ǃKhūb sa Elobats ge nî ǀnam sa ǂgaob hoab ǀkha, tsî sa ǀoms hoas ǀkha, tsî sa ǀgaib hoab ǀkha, tsî sa ǁnâuǃāb hoab ǀkha; tsî sa ǀgūkhoeba sats ǁkhāts khami.

²⁸Ob ge ge mîǀî bi: ǂHanusets go ǃeream; ǁnāsa dī, ots ge nî ûi.

²⁹Xaweb ge ǁî-aitsama ǂhauǃnâkaisen ǂgao, tsî Jesub ǃoa ge mî: Tari-e kha a ti ǀgūkhoe?

³⁰Ob ge Jesuba ǃeream, tsî ge mî, ǂAnǂansa khoeb ge Jerusalemsa xu Jerixosa ǃoa ǁgôa, tsî ǃgamaogu di ǃomǁae ge ǁnā; o gu ge ǂgaeǂuiǀkhā, tsî ǂnautsûtsû bi, tsî ǁōǁga raseb ǁgoe hîa ge bē.

³¹O-i ge ǀūǂamse ge ī, pristeri ge ǁkhā daob ǀkha ǁgôaxa ǃkhaisa; tsî mû bib ge, ob ge ge ǃgû-īǀkhā bi.

³²ǁNās ǁkhās xaseb ge ǁkhāti Leviǁîba ge dī; ǃkhais tawa sī tsîb ge mû bi, ob ge ge ǃgû-īǀkhā bi.

³³Xawe Samariaǁîb ge, ǃgûb garu hîa ǁîb tawa ge sī; tsî mû bib ge, ob ge ge ǀkhomxa bi.

³⁴Tsî ǃgûsī tsîb ge ǀhapin âba ǃgae-aiba bi, tsî oli-i tsî ǂauxûi-i xa ge ǂnâ-ai. Ob ge ǁîb di ǃgapixūb ai ūkhâi, tsî ǃgûkhoen ommi ǃoa ūsī, tsî ge sâu bi.

³⁵Tsî sao ra tsēb ge dāǁnâ, ob ge ǀgam denarkha ūǂui, tsî sâu bi nî khoeba mā, tsî ge mîǀî bi: Sâu bi, tsî nēkha ǃnāǂam hâ-ets ga ǂhâba, o ta ge, oa ta kao nî mā tsi.

³⁶Mâb ǁnâi, nē ǃnonagu diba ǃgamaogu ǃomǁae ge ǁnāb di ǀgūkhoe ge i, tits ra ǂâi?

³⁷Ob ge ge mî: ǁNāb, ǀkhomxaǂgaosiba ge dī bib komo. Ob ge Jesuba ge mîǀî bi: ǃGû ǁnâi, î sats ona ǁnāti dī.

³⁸Tsî i ge ǃgû gu garu hîa ge ī, o gu ge ǃāro-i ǃnâ ge sī. Tsîs ge ǂanǂansa taras, Marta ti ǀon hâsa ǁîba ǁîs oms ǃnâ ge ǃkhōǃoa.

³⁹ǁÎs ge ǃgâsasa ge ūhâ i, Maria ti ǀon hâs, Jesub ǂaira tawa ǂnû, tsî mîs âba gere ǃgâbasensa.

⁴⁰Xawes ge Martasa kaise sîsenba bis ǀkha ge ǂhansen. Os ge hā tsî ge mî: ǃKhūtse, ǁae tamats kha hâ, ti ǃgâsas ra tita ǀguri sîsen kai ǃkhais xa? Mîba si ǁnâi re, îs hui te.

⁴¹Ob ge Jesuba ǃeream, tsî ǁîs ǃoa ge mî: Martase, Martase, ǂguin ǀkhas ra ǂhansen tsî ǀhupuǀhupusen.

⁴²Xawe ǀgui-i ge ǂhâbasa-e. Marias ge ǃgâi amǃnâsa go ǁhûiǂuibasen, ǁîsa xu ūbēhe tidesa.