Read Khoekhoegowab Lukab 11 Bible Online

Lukab 11 - Khoekhoegowab bible

Lukab 11

¹Tsî ǂanǂansa ǃkhai-i tawab ra ǀgore hîa, tsî toab ge ob ge ǁkhāǁkhāsabegu âb di ǀguiba ǁîb ǃoa ge mî: ǃKhūtse ǀgoreǁkhāǁkhā ge re, Johaneb ge ǁkhāǁkhāsabegu âba ǁkhāti ǁkhāǁkhā khami.

²Ob ge ǁîgu ǃoa ge mî: ǀGore du kao, nēti mî: Sida Îtse, ǀhommi ǃnâ hâtse, sa ǀonsa as khaihe re, sa gaosiba ab hā re, sa ǂâisa as ī, ǀhommi ǃnâs ra īs ǁkhās khami ǁnāti ǃhūbaib on ai;

³nētsē sida tsēkorobe pereba mā da.

⁴Î sida ǁorena ǀûba da, sida tawa ǀhapixa hân hoana da ra ǁkhāti ǀûba xuige, î tā ǃâitsâb ǃnâ ǂgaeǂgui da, î ǂkhababa xu ore da.

⁵Tsîb ge ǁîgu ǃoa ge mî: Tari-e sadu ǃnâ ǀhōsa-e ūhâ, tsuxuǃgâb ai-i, ǁî-i tawa sī tsî i nî mîǀî-e: Ti khoetse, ǃnona perega ǀkhupi te:

⁶Ti ǀhōsab go ǃgûdaoba xu hā, o ta ge mâi-aiǃâ bi ta nî xū-e ūhâ tama hâ.

⁷Ob ge oms ǃnâ hâba ǃeream, tsî nî mî: Tā ǂhani te, ǀnais kom oms dao-amsa go ǂganamheo, tsî ti ôaron kom tita ǀkha kharob ǃnâ hâo; tsî ta kom khâi tsî a mā tsi ǁoao.

⁸Mîba du ta ra, ǁîb di ǀhōsab a amagab ga khâi, tsî mā bi tama i, xaweb ge ǁîb di ǀû tamase ǂgans ǃaroma khâi, tsî ǂhâbab hân hoana nî mā bi.

⁹O ta ra mîba du: ǂGan, o du ge nîra māhe; ôa, o du ge nîra hō; ǃgubu-am, o du ge nîra ǁkhowa-ambahe.

¹⁰ǂGan ra-i hoa-i ge nî ǃkhōǃoa, ôa ra-i hoa-i ge nî hō, tsî ǃgubu-am ra-i hoa-i nî ǁkhowa-ambahe xuige.

¹¹Tsî mâ ǁgûb sadu ǃnâ hâba kha, ǀgôab âb ga pere-e ǂgano, ǀui-e nî mā bi, tsî ǁau-eb ga ǂgano, ǁau-i di amǃnâs ai ǀao-e nî mā bi?

¹²Tsî ǃupu-eb ga ǂgano, ǀhū-e[2] nî mā bi?

¹³Sadu hîa ǁnâi ǂkhaba du ga ǂano, sadu ôana ǃgâi xūna māsa, matikōseb ǁnās ǂamai ǀhomsi ǁGûba ǃAnu Gagaba ǂgan bi rana nî mā.

¹⁴Tsîb ge ǁgâuaba ge ǃhaeǂui, ǃgomeba. Tsî i ge ge ī, ǁgâuab ge ǂoao, ob ge ǃgome khoeba ge ǃhoa. Os ge ǂnubisa ge buru.

¹⁵On ge ǀnîn ǁîn dina ge mî: Beelsebuli ǁgâuagu di ǂamsab ǃnâ-ūb kom ǁgâuaga ra aoǂuio.

¹⁶Tsî naun ge ǃâitsâ bi, tsî ǁîb xa ǀhomma xu hâ sao-e ge ǂgaoǀkhā.

¹⁷Tsî ǂâidi ânab ge ǂan, ob ge ǁîna ge mîǀî: Mâ gaosis hoas, ǀgoraǃāsen hâs ge a hîkākāsa, tsî ommi ǀgoraǃāsen hâb hoab ge ra ǁnā.

¹⁸Tsî Satanni on ga ǀgoraǃāsen hâo, matis gaosis âba nî mâhō? Beelsebuli ǃnâ-ū ta ǁgâuaga ra aoǂui, ti du kom ra mîo.

¹⁹Tsî tita ga Beelsebuli ǃnâ-ū ǁgâuaga aoǂuio, tari-i ǃnâ-ū gu ǁnâi sadu ôaga ra ǃhaeǂui gu? ǁNā-amaga gu ge ǁîga nî sadu ǂhanuǂhanu-ao.

²⁰Xawe tita ga Elob ǀkhunub ǃnâ-ū ǁgâuaga aoǂuio, ob kom Elob gaosiba ǀnai sadu tawa ge hāo.

²¹ǀGaisa aob ga ǁâtanisen hâse ǁîb di omsa ǃûio, on ge ūb hân hoana ǂkhîb ǃnâ hâ,

²²xawe ǁîb ǃgâ-ai ǀgaisab ga hāǂam bi tsî dan bio, ob ge ǁâtanin âb, ǁîn aib ǂgomaiǂnûi hâna ūǀhana bi, tsî ǃkhōǀhanab go xūna ra ǂhûiǂui.

²³Tita ǀkha hâ tama-i ge ti ǃoagu hâ-e, tsî tita ǀkha ǀhaoǀhao tama-i ge ra ǀgaruǀgaru.

²⁴ǃAnuoǃnâ gagab ra khoe-e xu ǂoao, ob ge ǀkhuru ǃkhaide ra ǃgûmaǃnâ, sâ-e ra ôaǃâ; tsî ǁî-eb hō tama amagab ra mî: ǁKhawa ta nî ti oms ǃoa oa, ǁîsa xu ta go ǂoasa.

²⁵Tsî sīb rao, ob ge ǀnapuǃnâhe tsî î-îhe hâse ra hō si.

²⁶ǃNubaib ge ǃgû tsî ǀnî hû gagagu, ǁîb xa ǂkhabaga sī ra ū. O gu ge ǂgâ, tsî ǁnāpa ra ǁan; os ge ǁnā khoe-i di ǀamsa ǂguros ǃgâ-ai a tsū.

²⁷Tsî i ge nēnab ra ǃhoa hîa ge ī, o-i ge ǂanǂansa tara-e ǂnubisa xu domma ǃhâkhâi, tsî ge mî: ǃGâiǃōb ge hâ ǃnāb, satsa ge tanib, tsî samra, sats gere daira!

²⁸Ob ge ǁîba ge mî: Ā, ǃgâiǃōn ge hâ, Elob mîsa ǁnâu tsî ra sâubasena.

²⁹Tsî ǂnubis ge ǁgūǀhao, ob ge ge mîtsoatsoa: ǂKhaba ǃhao-i ge nē-e, sao-e i ge ra ôa-am, xawe i ge sao-i xare-e māhe tide, Jonab kēbo-aob di saos ǀguis.

³⁰Jonab ge Nineveǁîna saose ības ǁkhās khamib Khoen Ôab ona nē ǃhaosa saose nî ība xui-ao.

³¹ǃKhawagas di gao-aos ge ǀgoraǃgâs ǃnâ nē ǃhaos khoen ǀkha khâi, tsî nî ǁîna ǀgoraǃgâ; ǃhūbaib di ǀamde xus ge hā amaga, Salomob di gā-aisibas nî ǁnâuse; tsî mû, Salomoba ǃnā hâb ge nē hâ.

³²Nineves khoegu ge ǀgoraǃgâs ǃnâ nē ǃhaos ǀkha khâi, tsî nî ǁîsa ǀgoraǃgâ; Jonab di aoǁnâsa xu gu ge ǃhobasen amaga; tsî mû, Jonaba ǃnā hâb ge nē hâ.

³³Khoe-i xare-i, ǃamamǀae-e ra ǃam-i ge ǁî-e ǂganǂamsib ǃnâ tsî ǃhoroǀguirob ǃnaga mâi tama, tsî kandelari ai ra ǂgā-i, ǂgâxa ran nî ǃnâba mûse.

³⁴Mûs ge soros di ǃamamǀaesa. Mûs âts ga ǂuruo, os ge sa soros hoasa ra ǃnâ; tsî ǁîs ga tsūo, os ge sa soros ona a ǃkhae.

³⁵ǂAnbasen ǁnâi re, îb tā ǃnâb, sats ǃnâ hâba ǃkhaenase ī.

³⁶Tsî sa soros hoas ga ǃnâb xa ǀoa, tsîs ga ǃkhaenaǃâro-e ūhâ tama io, os ge hoaragase nî ǃnâ, ǃamamǀaes ra ǃnâb âs ǀkha ǃnâǃnâ tsi khami.

³⁷Tsî ǃhoab ra, hîab ge ǂanǂansa Fariseba ge ǁkhau bi, ǁîb ǀkhab nî ǂûse; ob ge sī, tsî tāb tawa ge ǂnû.

³⁸Tsî Fariseb ge mû, ob ge ǂûs aiǃâb go ǁāsen tama is xa ge buru.

³⁹Ob ge ǃKhūba ǁîb ǃoa ge mî: Sago Farisego ge āǀgabis tsî ǃoresa ra ǃanuǃanuǀkhā, xawe ǃnāb âgo ge ǃnarib tsî ǂkhabab tsîkha xa ǀoa hâ.

⁴⁰Sa gârego, ǀkhāba ge kuruba kha ǃnāb ona kuru tama hâ?

⁴¹ǃOredi ǃnāb ǃnâ hân xa au te mā; mû on ge hoana nî ǃanuba go.

⁴²Tsūba go, Farisego, ǃhūba xu ra ǁhain hoan xa disiǁî ǃâ-e ra mā, xawe Elob di ǂhanub tsî ǀnammi tsîkha ra ǃûǂamgo; nēna-i kha khoe-e dī, tsî nauna-i kha ǁnākhao tide.

⁴³Tsūba go Farisego, aisǀkhāb ǂnûǃkhaide sinagogeb ǃnâ ǀnam tsî ǁamaxūǃkhaidi ai tawedehes xa go ǃgâibahe amaga.

⁴⁴Tsūba go Farisego, sa hînaxaǃnâgo, saohe tama hâ ǀhobadi khoen ra ǀūn ase ǁîdi ai ǃgûdi khami go ī amaga.

⁴⁵Ob ge ǂhanu ǂansabegu di ǀguiba ǃeream, tsî ge mîǀî bi: ǁKhāǁkhā-aotse, nēnats ra mîo, ots kom sige ona ra tsûtsûo.

⁴⁶Ob ge ge mî: Tsî tsūba ǁkhāti sago ǂhanuǂansabego, khoena go taniǁoasa ǃgomga ra ǃnao-ai, tsî ǁî-aitsama go ǁnā ǃgomga ǀgui ǀkhunub xaweb ǀkha tsâǀkhā tama xui-ao.

⁴⁷Tsūba go, kēbo-aogu di ǀhobade go ra ǂnubikhâi xui-ao; tsî sago îgu ge ǁîga ge ǃgamga.

⁴⁸O go ǁnāti ra ǀhûǀguitimî, tsî sago îgu di sîsengu ǀkha ra ǀgui; ǁîgu ge gere ǃgamgu, o go ge sago ǀhobadi âga ra ǂnubikhâi.

⁴⁹ǁNā-amagab ge ǁkhāti Elob di gā-aisiba ge mî: Kēbo-aogu tsî apostelgu tsîga ta ge ǁîn ǃoa nî sî, on ge ǁîgu xa ǀnîga ǃgam, tsî nî nauga ǃgôaǃgon.

⁵⁰ǀAob hoa kēbo-aogu dib, ǃhūbaib di ǃgaoǃgaosa xu ǂnâxūhe hâb nî nē ǃhaosa xu ǂgaoǀkhāhega,

⁵¹Abeli di ǀaoba xu, Saxariab, altars tsî tempeli tsîkha ǁaegu ge ǃgamheb di ǀaob kōse; ā, ti ta ra mîba go, nē ǃhaosa xub ge nîra ǂgaoǀkhāhe.

⁵²Tsūba go ǂhanuǂansabego, ǂans di ǁkhowa-amma go ge ūbē amaga; ǁî-aitsama go ǂgâ tama, tsî ǂgâ ǂgao rana go kom ra ǂkhāo.

⁵³Tsî nēnab ra ǁîgu ǃoa mî, hîa gu ge xoaǂansabegu tsî Farisegu tsîga kaise au-ausenai bi tsoatsoa, tsî ǂgui xūna ge dîǃnâ bi,

⁵⁴ǁîba ǃûiǃgâ tsî ra ôa-amǃâ, ise gu ams âba xu ǀhapiǀhapi bi gu nî xū-e hō tidesa.