Read Khoekhoegowab Lukab 12 Bible Online

Lukab 12 - Khoekhoegowab bible

Lukab 12

¹Tsî nēn ra ī, hîan ge ǂgui ǀoadisi khoena ge ǃkhoeǀhao, dāǃgâgun ges kōse ob ge ǁkhāǁkhāsabegu âb ǃoa ge mîtsoatsoa: ǃÛisen ǀkhuruǀkhurupereb Farisegu dib xa, ǁnāb ge hînaxaǃnâsiba.

²ǂGanǃgâsase hâ xū-i, hîa ǂhaiǂhaihe tide-i kom hâ tamao, tsî sâusase hâ xū-i hîa ǂanhe tide-i kom hâ tamao.

³ǁNā-amaga ǃkhaenab ǃnâ du ra mîn hoan ge ǃnâb ǃnâ nîra ǁnâuhe; tsî ǃnā-omdi ǃnâ du ǂgaes ǃnâ ra mî-i hoa-i ge omdi ǂamaidi ai nîra aoǁnâhe.

⁴O ta ge sadu, ti khoedo ra mîba: Tā ǃao, ǁnān, sorosa a ǃgam ǁkhān, tsî ǁnās khaoǃgâ ǃaruǀî xū-i xare-e a dī ǁoana.

⁵Î ta ǁgau du, tari-e du nî ǃaosa: ǃGammi kas khaoǃgâ ǀamoǀaeb ǃnâ aoǂgās ǀgaiba ūhâba ǃao; ā, ǁîba ǃao, ti ta ra mîba du.

⁶Koro ǀui-anirona kha ǀgam mariron ama ǁamaxūhe taman hâ? Tsî ǀgui-i ân xare-i kom Elob xa ǀuruhe tamao.

⁷Tsî ǀûn sadu danas din hoan ge ǁkhāti ǃgôahe hâ. Tā ǁnâi ǃao, ǂgui ǀui-anirona du kom ra īǂamo.

⁸Tsî ta ra mîba du: Tari-i hoa-i, khoen aiǃâ ga ǂan te-i, ǁî-eb ge ǁkhāti Khoen Ôaba nîra ǂan, Elob di ǀhomǃgāgu aiǃâ.

⁹Tsî khoen aiǃâ ga tita ǀūxū-i ge Elob di ǀhomǃgāgu aiǃâ nîra ǀūxūhe-e.

¹⁰Tsî mâ-i hoa-i, Khoen Ôab ǃoagu ga mî-e mî-i, ǁnā-i ge nîra ǀûbahe, xawe ǃAnu Gagaba ga ǃkhāǃkhā-i ge ǀûbahe tide-e.

¹¹Tsî sinagogegu ǃoa tsî ǂamkhoegu tsî ǀgaisagu aiǃân ga ūsī du ǃnubai tā ǂhansen, mati tsî mâ xū-e du nî ǃeream raǃâ mîsa, tsî tare-e du nî ǃhoasa.

¹²ǃAnu Gagab kom ǁkhā iri ǃnâ mî du nî xū-e nîra ǁkhāǁkhā duo.

¹³Tsîb ge ǀguiba ǂnubisa xu ǁîb ǃoa ge mî: ǁKhāǁkhā-aotse, ti ǃgâsaba mîba, îb ǀumisa tita ǀkha ǀgoragu re.

¹⁴Ob ge ǁîb ǃoa ge mî: Khoetse, tari-e kha tita sakho ǂama ǂhanuǂhanu tsî ǀgoraǃgâ-aose mâi hâ?

¹⁵Ob ge ǁîn ǃoa ge mî: Kō, î du hoa xūǃgunuxasib xa ǃûisen; khoe-i di ûib ge ǃnāǂamsase i ūhâ xūn ǃnâ hâ tama hâ xuige.

¹⁶Tsîb ge ǂkhō-e ǁîn ǃoa ǃhoa, tsî ge mî: ǂAnǂansa ǃkhū hâ khoeb di ǃhanab ge ǀoasase ge ǂûtani

¹⁷Ob ge ǁîb ǃnâ ǂâi, tsî ge mî; Tare-e ta ǁnâi nî dī: Ti ǂûna ta nî ǀhaoǀhaoǃnâ ǃkhai-e ta kom ūhâ tamao.

¹⁸Ob ge ge mî: Nēsa ta ge nî dī: Ti sâu-omga khôaǁnâ, tsî ta nî ǁîgu ǃgâ-ai kaiga ǂnubibasen, o ta ge ǁnāpa, ǃhūb ra ūǀkhība ten hoan, tsî nau xūn âtan tsîna nî ǀhaoǀhaobasen.

¹⁹O ta ge ti ǀoms ǃoa nî mî: ǀOmse, ǂgui ǂûn, ǂgui kurigas ǁguibēbahe hânas kom ūhâo; ǁnâi sâ, î ǂû, î ā, î ǃgâiaǂgao.

²⁰Xaweb ge Eloba ǁîb ǃoa ge mî: Gâretse, nē tsuxub ǁkhāb ǃnâts ge ǀoms âtsa nî ǂgaoǀkhāhe, on nēn, ǂhomits gona tari-i din nî?

²¹ǁNāti i ge khoe-e ī, ǁî-aitsama ǁuiba ra ǀhaoǀhaobasen, xawe Elob ǃnâ ǃkhū tama-e.

²²Tsîb ge ǁkhāǁkhāsabegu âb ǃoa ge mî: ǁNā-amaga ta ra mîba du, sadu ûib xa tā ǂhansen, tare-e du nî ǂû ti, tsî soros xa, tare-e du nî ana, ti.

²³Ûib kom ǂûn ǂamai ǃnāsao, tsî soros kom saran ǂamai ǃnāsao.

²⁴Gorana ǃgaoǃgâ: Tsoro tsîn ǃgao tama ǃkhaisa, tsî ǂûn om-i tsî sâuǃnâ-om-en ūhâ tama, xawen Elob xa ra ǂûmāhe ǃkhaisa; matikōse du anina ra īǂam?

²⁵Tsî tari-e sadu ǃnâ, ǂhansens ǀkha ǁî-i di gaxusib tawa, ǀgui eli xaweba ǀaro ǁkhā?

²⁶Tsî ǂkhariro-i xawe-e du ga ǁkhā tama io, tarexa du ǁnâi naun xa ra ǂhansen?

²⁷ǃAub di ǃkhārona ǃgaoǃgâ, matin ra ǀomsa; sîsen tsîn ǀhôa tama; xawe ta ge ra mîba du, Salomob ge ǁîb di ǂkhaisib hoab ǃnâ ǀgui-i ân khami anahe tama hâ i ǃkhaisa.

²⁸Tsî Elob ga ǀgâb, nētsē mâb, tsî ǁari ǁganoms ǃnâ ra aoǂgāheba ǁnāti anao, matikō ǃnāǂamseb nî ǁîsa sado dība, sa ǂkhariǂgomxaǃnâdo.

²⁹O du ge sadu ona ôa-am tide, tare-e du nî ǂû, tsî tare-e du nî ā ǃkhaisa; î du tā ǀgomaxa.

³⁰Nēn hoana di ge ǃhūbaib di ǁaede ra ôa-am, xaweb kom sadu Îba a ǂano, nēna du ǂhâba hâsa.

³¹Î du nēn ǃgâ-ai gaosib Elob diba ôa, on ge nēn hoana sado nîra ǀarobahe.

³²Tā ǃao, ǂkhari gūrodo, sadu Îb di ǃgâiǃgâibasens komo sadob nî gaosiba mā ǃkhaisao.

³³Ū du hâna ǁamaxū, î au. ǁÎ-aitsama mariǁhōdi, hîa ǀoro tamade dībasen, î ǁui-i hîa ǀoro tide-e ǀhommi ǃnâ ǀhaoǀhaobasen, ǁîb ǃnâ i ǃnari-ao-e sī tideb, tsî ǁguri-i ǁgaoǁgao tideba.

³⁴ǁUib âdu hâpa, ǁnāpab nî ǁkhāti ǂgaob âdu ona hâ xuige.

³⁵A gu sadu kamanaga ǃgaesen hâse hâ, î di sadu ǃamamǀaede khaurase hâ.

³⁶Î du khoen khami ī, ǀhonkhoeb âna ra ǃâuna, ǃgameǁâusa xub ra oa ǃnubai, în ga ǁîba, hā tsîb ga ǃgubu-amo, ǁnātimîsi ǁkhowa-amba ti.

³⁷ǃGâiǃō gu hâ ǁnā ǃgāga, ǀhonkhoeb nî ǁîb di hās ǃnâ ǂkhaikari hâse hōga; amase ta ra mîba du, ǃgaesen tsîb nî ǁîga tāb tawa ǂnû kai, tsî nî ǃoaba gu.

³⁸Tsî hāb kao, ǀgamǁî tsuxuǃûiǁaeb ǃnâs karao, ǃnonaǁî tsuxuǃûiǁaeb ǃnâs karao, tsîb ga ǁnāti hō guo, ǃgâiǃō gu ge ǁnā ǃgāga.

³⁹Î du nēsa ǂan, oms ǀhonkhoeb ga ǂan io, mâ iri ǃnâ i ǃnari-ao-e nî hāsa, ob ga ǂkhaikari hâ, tsîb ga oms âba khôaǂgâhesa mā-am tama hâ.

⁴⁰Î du ǁnâi sadu ona ǂhomisen hâse hâ; ǂâi tama du hâ iri ǃnâb Khoen Ôaba nîra hā xuige.

⁴¹Ob ge Petruba ǁîb ǃoa ge mî: Sigets ra mîba nē ǂkhōsa? Naun hoan ona?

⁴²Ob ge ǃKhūba ge mî: Tariba kha ǁnā ǂgomǂgomsa tsî gā-ai mûǂamaob, ǀhonkhoeb âb ǁîb di ǃgān ǂama ra mâiba, mîmâisa ǁaeb aib nî ǁîna ǂûna ǂhûiǂuise?

⁴³ǃGâiǃōb ge ǁnā ǃgāb, ǀhonkhoeb âb nî hāb kao, ǁnātib ra dīse hōba.

⁴⁴Amase ta ra mîba du, ǁîb di xūn hoan ǂamab nîra mâi bi ǃkhaisa.

⁴⁵Xaweb ga ǁnā ǃgāba ǂgaob âb ǃnâ mîo: Ti ǀhonkhoeb di hās kom ra ǀhaweo; tsîb ga ǃgāna ǂnautsoatsoa, tsîb ga ǂû tsî ā tsî ǀhoro-o,

⁴⁶ob ge ǁnā ǃgāb di ǀhonkhoeba, ǃâu tamab hâ tsēs ai, tsî ǀūb a-iri ai hā, tsî nîra ǂkhūǂkhū bi, tsî amǃnâs âba ǂgomoǃnân ǀkha nîra mā bi.

⁴⁷Tsî ǁnā ǃgāb, ǁîb ǀhonkhoeb di ǂâisa ǂan tsî ga ǂhomisen tamab, tsî ǁîb di ǂâis ǃoa dī tamab, ǁnāb ge ǂgui ǃnabaga nîra ǂnauhe.

⁴⁸Xawe ǁîsa ǀū tsî ga ǂnauhesa anu hâ-e dīb, ǁnāb ge ǀoro ǃnabaga nîra ǂnauhe. ǂGuina māhe hâ-i, ǁî-i tawan ge ǂguina nîra ôahe, tsî ǂguina ǂgomǃgâbahe hâ-i, ǁî-e xun ge ǃnāsana nîra ǂgaoǀkhāhe xui-ao.

⁴⁹ǀAesa ta nî ǃhūbaib ai aose ta ge ge hā, tsî matikōse ta ǂgao hâ, ǀnai-i ga khau ǃkhaisa.

⁵⁰Xawe ta aibe ǁāǁnâ-i ǀkha nîra ǁāǁnâkaisen; tsî matikōse ta ra ǁgâiǀāhe, dīǀoaǀoahe-i nîras kōse.

⁵¹ǂKhîba ta nî ǃhūbaib ai ūhāse ta ge hā, ti du ǂâi hâ? Hî-î, xawe ǀgoras ǀguisa, ti ta ra mîba du.

⁵²Nēsisa xun ge ǀgui oms ǃnâ hâ korona nî ǀgorasa; ǃnonan ǀgamn ǃoagu, tsî ǀgamn ǃnonan ǃoagu.

⁵³ǀGorasan ge nî ǁgûba ǀgôaba xu, ǀgôaba ǁgûba xu, ǁgûsa ǀgôasa xu, ǀuiǁgûsa ǀuiǀgôasa xu, tsî ǀuiǀgôasa ǀuiǁgûsa xu.

⁵⁴Tsîb ge ǁkhāti ǂnubis ǃoa ge mî: ǀNanu-i huriǂoasa xu ra ǁhao ǃkhaisa du ga mûo, o du ge ǁnātimîsi: ǀApi-i ge nî, ti ra mî, tsî i ge ǁnāti ra ī.

⁵⁵Tsî ǃkhawagas di ǂoab ra ǃgom ǃkhaisa du ra mûo, o du ge: ǀGam-i ge nî, ti ra mî, tsî i ge ra ī.

⁵⁶Hînaxaǃnâdo, ǃhūbaib tsî ǀhommi tsîkha di aisa ǀgorasa du ge a ǂan tsî mati du kha ǁnâi nē ǁaeba a ǀgora ǁoa?

⁵⁷Tsî tarexa du ǁkhāti ǁî-aitsama sado xu ǂhanu-e ǀgora tama hâ?

⁵⁸Sa mâǃoasabe-i ǀkhats ga ǂamkhoegu ǃoa ǃgûo, ǁnâi daob ai ǀhupuǀhupusen, ǁî-e xuts nî xorehese, î-i tā ǂhanuǂhanu-aob ǃoa ǃgû-ū tsi, îb tā ǂhanuǂhanu-aoba ǃgāba māǁnâ tsi, îb ǃgāba tā ǃkhō-oms ǃnâ aoǂgā tsi.

⁵⁹Mîba tsi ta ra, tātsēts ge ǁnāpa xu ǂoa tide, ǀuni marirosats nî matares kōse.