Read Khoekhoegowab Lukab 13 Bible Online

Lukab 13 - Khoekhoegowab bible

Lukab 13

¹Tsî ǁkhā ǁaeb ain ge ǀnîna ǁnāpa ge hâ i, ǁnā Galileaǁîn, ǁîn di ǀaobab Pilatuba ǁguibadi ân ǀkha ge haban xa ge ǂhôa bina.

²Ob ge Jesuba ǃeream, tsî ǁîn ǃoa ge mî: Nē Galileaǁîn nau Galileaǁîn hoan ǂamai a ǁore-ao, ti du ǂâi hâ, nēti īnan go tsâ amaga?

³Hî-î, ti ta ra mîba du; xawe sadu ga ǃhobasen tama io, o du ge hoatsama ǁnās ǁkhās xase nîra kā.

⁴Tsî ǁnā disiǁkhaisaǀan, ǁîn aib ge Siloams di ǂgō-omma ǁnā tsî ǃgamn, ǁîn Jerusalems ǃnâ ǁan hân hoan ǂamai a ǁore-ao, ti du ǂâi hâ?

⁵Hî-î, ti ta ra mîba du; xawe sadu ga ǃhobasen tama io, o du ge hoatsama ǁnās ǁkhās xase nîra kā.

⁶Tsîb ge nē ǂkhōsa ge mî: Khoeb ge ǀnomahai-e ǁîb ǂauxûiǂûǃhanab ǃnâ ge ǂgā; tsî hā, tsîb ge ǂûna ǁîs ai gere ôa, xaweb ge hō tama ge i.

⁷Ob ge ǂauxûiǂûǃhanab di sîsenaob ǃoa ge mî: Mû, ǃnona kuriga ta ge go hâ, nē ǀnomahais ai ǂûna ra ôaǃâ, tsî ta hō tama. ǁHāǂui si; tarexas ra ǃhūba ǂûoǃnâ kai?

⁸Ob ge ǃeream, tsî ge mîǀî bi: ǀHonkhoetse, as gorose nē kurib ǀguiba mâ, ǁîsa khaoǂnamipe tsî ta nî ǀarumā sis kōse;

⁹Tsî ǂûtanis kao, as mâ; tsî tani tamas ka io, sao ra kuri ǁhāǂui si.

¹⁰Tsîb ge sinagogegu di ǀguib ǃnâ sâtsēs ai gere ǁkhāǁkhā.

¹¹Tsî mû, tara-i ge ǁnāpa ge hâ i, disiǁkhaisaǀa kuriga ǀaesenni di gaga-e ūhâ ge isa, tsîs ge ǃgamǃgâ ge hâ i, tsî ǁî-aitsama khuisen ǁoa ge i.

¹²Tsî Jesub ge ǁîsa mû, ob ge ǂgaihā, tsî ge mîǀî si: Tarase, as ǀaesenni âsa xu orehe!

¹³Tsî ǃomkhab ge ǁgui-ai sio, os ge ǁnātimîsi ǁkhawa ǂhanu, tsî Eloba ge kare.

¹⁴Ob ge sinagogeb di ǂamkhoeba ge ǁaixa, sâtsēs aib go Jesuba ǂgauǂgau ǃkhais xa, tsî ǃeream tsî ǁaes ǃoa ge mî: ǃNani tsēdi kom hâo, ǁîdi ai nî sîsenhede; ǁîdi ai ǁnâi hā, î ǂgauǂgaukaisen, î tā sâtsēs ai hā.

¹⁵Ob ge ǃKhūba ǃeream bi tsî ge mî: Hînaxaǃnâtse, mâ-i hoa-i sadu di-e kha sâtsēs ai ǁî-i gomab tsî eseli tsîkha ǁgoroba xu xore, tsî āsiǃgû tama hâ?

¹⁶Tsî nē ǀgôas Abrahammi dis, Satanni xa disiǁkhaisaǀa kuriga ǃgaehe hâsa kha sâtsēs ai xawe nē ǃhâuba xu orehe tide?

¹⁷Tsî nēnab ge mî, on ge mâǃoa bi ran hoana ge tao, tsî ǂnubis hoas ge ge ǃgâiaǂgao ǁîba xu ge ǃnae ǂkhaisa xūn hoan ǂama.

¹⁸Tsîb ge ge mî: Tare-i khamib kha Elob gaosiba ī, tsî tare-i ǀkha ta kha nî ǂkhō bi?

¹⁹Mostardǃkhomros khami ī, khoe-i ū tsî ǁî-i ǃhanab ǃnâ ge tsorosa; tsî ǁhai tsîs ge hai kaio, on ge ǀhommi di anina ǁîs di ǂgonagu ǃnâ om tsî ge ǁan.

²⁰Tsîb ge ǁkhawa ge mî: Tare-i ǀkha ta kha gaosib Elob diba nî ǂkhō?

²¹Khūkhū-i khami ī, taras ū tsî ǃnona ǀguirogu tsampereb xa ǀoa hâgu ǃnâ ra ǂgā-e, hoaragaseb ge khūs kōse.

²²Tsîb ge ǃādi tsî ǃārodi tsîde ǃgûǃganu, tsî gere ǁkhāǁkhā, Jerusalemsa ǃoa ǃgûgaruǃâ.

²³Tsî i ge ǀgui-e ǁîb ǃoa ge mî: ǃKhūtse, ǀorona kha, ǃgâiǃō nîna? Ob ge ǁîn ǃoa ge mî:

²⁴ǂNoagu ǀgaisase, î du ǂō dao-ams ǃnâ ǂgâ, ǂguin ge nî ôa-am, matin nî ǂgâsa, ti ta ra mîba du, tsîn ǁkhā tide xuige.

²⁵ Oms ǀhonkhoeb nî khâi, tsî dao-ams nî ǂganamhe, tsî du ǃauga mâ, tsî nî dao-ams ai ǃgubutsoatsoa; ǃnubai du ge nîra mî: ǃKhūtse, ǃKhūtse, ǁkhowa-amba da re! Ob ge ǃeream tsî nîra mîǀî du: ǂAn du tama ta hâ, mapa xu du hâsa.

²⁶ǃNubai du ge nîra mîtsoatsoa: Sats aiǃâ da kom ǂû tsî gere āo, tsî sida daogu aits kom gere ǁkhāǁkhāo.

²⁷Ob ge nîra mî: Mîba du ta ra, ǂan du tama ta hâ, mapa xu du hâsa. Bēxū te, sadu ǂhanuoǃnâsib sîsenaodu hoado!

²⁸ǁNāpa kha ge āb tsî ǁaninǁgûb tsîkha nîra hâ, Abrahammi tsî Isaki tsî Jakob tsî kēbo-aogu hoagu Elob gaosib ǃnâ hâ, tsî sadu aoǂuihe hâ ǃkhaisa du ga mûo.

²⁹Tsîn ge aiǂoas, huriǂoas, ǀapas tsî ǃkhawagasa xu hā, tsî nîra Elob di gaosib ǃnâ tāb tawa ǂnû.

³⁰Tsî mû, ǀuniga hân ge nîra ǂguro; tsî ǂguro hân ge nîra ǀuniga.

³¹ǁNā iri ǁkhāb ai gu ge ǀnî Farisega hā, tsî ǁîb ǃoa ge mî: ǃGû, î nēpa xu doe, Herodeb kom ra ǃgam tsi ǂgao-o.

³²Ob ge ge mîǀî gu: ǃGû, î go ǁnā ǀgiriba sī mîba: Mû, ǁgâuaga ta ra ǃhaeǂui tsî ta ra ǂgauǂgau, nētsē tsî ǁari, tsî ǃnonaǁî tsēs ai ta nîra ǀamǀam.

³³O ta ge nētsē, ǁari tsî aetsē nî ǃgû. Anu tama i kom hâo, kēbo-ao-i nî Jerusalems ǃaugab ai ǃgamhesa.

³⁴Jerusalemse, Jerusalemse, sas kēbo-aoga ra ǃgams, tsî sas ǃoa sîhe hâga ra ǀuiǁhomse, matikō ǃnāde ta ge sa ôana ǀhaoǀhao ǂgao hâ i, anis ǁîs di ôarona ǁgabokha âs ǃnâ ra ǀhaoǀhao khami, xawe du ge ǂgao tama ge i.

³⁵Mû, sadu omsa du ge hîkākāsase nîra ǁnāxūbahe. Tsî ta ge ra mîba du, tātsē du mû tidesa: ǀKhaeheb hâ ǃgoaxaba ǃKhūb di ǀons ǃnâ, ti du nîra mî ǁaeb nî hās kōse.