Read Khoekhoegowab Lukab 14 Bible Online

Lukab 14 - Khoekhoegowab bible

Lukab 14

¹Tsî i ge ge ī, Farisegu ǂamsab di oms ǃnâ sī tsîb ra sâtsēs ai pereǂû hîa gu ge re ǃkhē bi ǃkhaisa.

²Tsî mû, ob ge ǁgamǀaesen hâ khoeba ǁîb aiǃâ ge hâ i.

³Ob ge Jesuba ǃeream, tsî ǂhanuǂansabegu tsî Farisegu tsîgu ǃoa ge mî: Xare mā-amhes hâ, sâtsēs ai ǂgauǂgausa?

⁴O gu ge ge ǃnō. Ob ge ūkhâi tsî ǂgauǂgau bi tsî ge ǃgû kai bi.

⁵Ob ge ǃeream, tsî ǁîgu ǃoa ge mî: Tari-e kha sadu ǃnâ, ǁî-i di ôab kas, ǁî-i di gomab kas ga tsau-i ǃnâ ǁnāo, ǁnātimîsi sâtsēs ai xawe ǁîba ǂgaeǂui tide?

⁶O gu ge nēn ai ǃeream bi ǁoa ge i.

⁷Tsîb ge ǁkhausabena ǂkhō-e ge ǁgamba, matin ra ǂguro ǂnûǃkhaide ūǂuibasen ǃkhaisab ge mûo, tsî ǁîn ǃoa ge mî:

⁸Khoe-i xats ga ǃgameǁâu-i ǃoa ǁkhauheo, tā ǂoaǂamsa ǂnûǃkhais ai ǂnû, î-i tā ǀnîsi sats xa ǀgapi ǁkhausabe-e hā;

⁹îb tā sats tsî ǁîb tsîkho ǁkhau hâba hā, tsî mîǀî tsi: Nē khoeba ǂnûǃkhai-e mā; ots kom ga taob ǀkha ǃgâb ai hâ ǃkhaisa hō-o.

¹⁰Xawe ǁkhauhets kao, ǃgû, î ǃgâb ai hâ ǃkhais ai sī ǂnû, îb ǁkhau tsi goba, hāb karao mîǀî tsi: Ti khoe, aiǃâb ǃoa ǂnûǃapa re! ǃNubaits kom tāb tawa ǂnôaǀkhā tsin aiǃâ nîra ǃgôaheo.

¹¹Mâ-i hoa-i, ǁî-aitsama ra ǀgapiǀgapisen-i ge nîra ǃgamǃgamhe, tsî ǁî-aitsama ra ǃgamǃgamsen-i ge nîra ǀgapiǀgapihe xui-ao.

¹²Tsîb ge ǁkhāti ǁîba go ǁkhauba ǃoa ge mî: Tsēǃgâǂûs kas, ǃuiǂûs kasats ga dīo, tā ǁkhau re sa khoen kas, sa ǃgâsan kas, sa ǀaokhoen kas, sa ǃkhū hâ ǁanǁare-aon kas hoasa; în tā ǀnîsi satsa ǁkhau, îts tā dīdawa-amhe.

¹³Xawe ǂûǀhaosats ga dīo, ǁkhau ǁnâi re ǀgâsan, tsî ǃhom hân, tsî ǃhoran, tsî ǂgīn tsîna,

¹⁴ots ge nî ǃgâiǃō, mādawa-am tsin nî xū-en ūhâ tama amaga; xawets kom nîra dīdawa-amheo ǂhanu-ain di khâis ǃnâ.

¹⁵Tsî tāb tawa ǂnôan di ǀguib ge nēna ǁnâuo, ob ge ge mîǀî bi: ǃGâiǃō-i ge hâ, Elob gaosib ǃnâ ra pere-e ǂû-e.

¹⁶Ob ge ǁîb ǃoa ge mî: ǂAnǂansa khoeb ge kai ǂûǀhao-e dī, tsî ǂguina ge ǁkhau.

¹⁷Ob ge ǃgāb âba ǂûǁaeb ai sî, tsî ǁkhausabena ge mîba kai: Hā, ǀnain hoana ǂhomihe hâ xuige.

¹⁸On ge hoana ǀguiǂâixase ge ǀhapiokaisentsoatsoa. ǂGurob ge ǁîb ǃoa ge mî: ǃHanaba ta go ǁamabasen, o ta ǂoa tsî nî ǁîba kō; o ta ra ǀkhoma tsi: ǀHapiokai te re.

¹⁹Tsî naub ge ge mî: Koro ǃnaogu di gomaga ta go ǁamabasen, o ta ǃgû tsî nî ǁîga ǃâitsâ; o ta ra ǀkhoma tsi: ǀHapiokai te re.

²⁰Tsî naub ge ge mî: Tarasa ta go ǃgame, tsî ǁnā-amaga ta a sī ǁoa.

²¹Ob ge ǁnā ǃgāba oa tsî oms ǀhonkhoeb âba nēna ge ǂhôa. ǃNubaib ge oms ǀhonkhoeba ǁaixa, tsî ǃgāb âb ǃoa ge mî: ǃHaese ǂoa, ǃās di daogu tsî ǃgangu ai îts ǀgâsan tsî ǃhomn tsî ǃhoran tsî ǂgīn tsîna ūǂgâxa.

²²Ob ge ǃgāba ge mî: ǀHonkhoetse, mîmāts go khami go ī; xawe i kom gorose ǃkhai-e hâo.

²³Ob ge ǃKhūba ǃgāb ǃoa ge mî: ǂOa daogu ai tsî ǃharadi ǃnâ, î ǂgâxan nîsa ǁîna ǁgari, îs ti omsa ǀoa.

²⁴Mîba du ta ra xuige, ǁnā khoen, ǁkhauhe gon di ǀgui-i xare-i ti ǂûǀhaosa amǃnâxa tide ǃkhaisa.

²⁵Tsîn ge ǂgui khoena ge ǃgûǀkhā bi. Ob ge ǂnan, tsî ǁîna ge mîǀî:

²⁶Khoe-i ga tita ǁga hā, tsî i ga ǁkhan tama io, ǁî-i ǁgûb, tsî ǁgûs, tsî taras, tsî ǀgôan, tsî ǃgâsagu, tsî ǃgâsadi, ā, ǁî-i ûib ǁkhāb ka xaweo, o-i ge a ti ǁkhāǁkhāsabe ǁoa.

²⁷Tsî ǁî-i ǃgâuhaiba tani tsî ga tita sao tama i-i ge a ti ǁkhāǁkhāsabe ǁoa.

²⁸Tarib âdu ǂgō-om-e ra ǂnubi ǂgaoba kha aibe ǂnû, tsî ǁnās ǃoa ǂhâbab hâna ǃgôa tama hâ, iseb xare dītoab nîsa ǂâuba hâna ūhâsa?

²⁹În tā ǀnîsi mû ran hoana ǃhō bi tsoatsoa: ǃGaoǃgaoba ǁgui tsîb ga dītoa ǁoao,

³⁰tsî mî: Nē khoeb kom ǂnubitsoatsoa, tsî dītoab nîsa ǁkhā tama go io.

³¹Tsî mâ gao-aob, nau gao-aob ǀkha toroba ra dī ǂgaoba kha aibe ǂnû, tsî ǀapeǀape tama hâ, iseb a ǁkhā ǃkhais, disiǀoadisigu ǀkha naub, ǀgamdisiǀoadisigu ǀkha ǁîb ǃoagu ra hāba ǃoasa.

³²Tsî ǁkhā tamab ga io, ob ge, ganupeb nauba a ǃnū hîa sîsabega ra sî, tsî ǂkhîb dina ra ǂgan.

³³ǁNās ǁkhās khami, sadu di-i hoa-i, ǁî-i di xūn hoana ǁnāxū ǁoa-i ge a ti ǁkhāǁkhāsabe ǁoa.

³⁴ǃGâi xū-i ge ǂō-e; xawe ǂō-i ga ǁkhoao-o, tare-i ǀkha i kha nî ǁkhoaǁkhoahe?

³⁵ǃHūb ais kas, ǀarub ais kasa i kom harebe tamao. ǃAugaba ǃoa i kom ra aoǂuiheo. ǂGaera ūhâ-e, ǁnâu-i nîse a-i ǁnâu.