Read Khoekhoegowab Lukab 15 Bible Online

Lukab 15 - Khoekhoegowab bible

Lukab 15

¹Tsîn ge mariǃkhōǃoa-aon tsî ǁore-aon tsîn hoana ǁîb ǃoa ge ǀgū, ǁnâu bin nîse.

²O gu ge Farisegu tsî xoaǂansabegu tsîga ǀara, tsî ge mî: Nēb ge ǁore-aona ra ǃkhōǃoa, tsî ǁîn ǀkha ra ǂû.

³Ob ge ǁîgu ǃoa nē ǂkhōsa ǃhoa tsî ge mî:

⁴Mâ khoeb sadu dib, ǀguikaidisi gūna ūhâb, tsî i ga ǀgui-e ǁîn xa kāba kha khoesedisikhoeseǀana ǃgaroǃhūb ǃnâ ǁnāxū tsî kā hâ-i ǃoa ǃgû tide, ǁî-eb nî hōs kōse?

⁵Tsî hōb rao, ob ra ǁî-e ǃgâiaǂgaob ǀkha ǁîb di ǃhōra ai ǁgui.

⁶Tsî oms tawab ra sī, ob ge ǀhōsan tsî ǁanǁare-aon tsîna ǂgaiǀhû, tsî ǁîna ra mîǀî: Tita ǀkha ǃgâiaǂgao re, kā te go hâ i gūsa ta go hō xuige.

⁷Mîba du ta ra, ǁnāti i ge ǃgâiaǂgao-e ǀhommi ǃnâ nî hâ, ǀgui ǁore-ao-i, ǃhobasen ra-i ǂama, khoesedisikhoeseǀa ǂhanu-ain, ǃhobasensa ǂhâba tama hân ǃgâ-ai.

⁸Tsî mâ taras, disi maride ūhâs, tsî ga ǀgui marisa kāsa kha ǃamamǀae-e ǃamam, tsî omsa ǀnapuǃnâ tsî ǂōrisase ôa tide, ǁîsas nî hōs kōse?

⁹Tsî hōs rao, os ge ǀhōsadi tsî ǁanǁare-aodi tsîde ǂgaiǁare, tsî ra mî: Tita ǀkha ǃgâiaǂgao re, kā te go hâ i marisa ta go hō xuige.

¹⁰ǁNāti i ge ǃgâiaǂgao-e Elob di ǀhomǃgāgu aiǃâ nî hâ, ti ta ra mîba du, ǀgui ǁore-ao-i, ǃhobasen ra-i ǂama.

¹¹Tsîb ge ge mî: ǂAnǂansa khoeb ge ǀgam ǀgôakha ge ūhâ i;

¹²Tsîb ge ǂkhammi âkha ǁgûb ǃoa ge mî: Ti îtse, anuba te hâ amǃnâs xūn disa mā te. Ob ge ûixūna ge ǀgora kha.

¹³Tsî ǂgui tama tsēdi nēs khaoǃgâb ge ǀgôab ǂkhamma hoana ǃkhōǀhao, tsî ǃnū ǃhūb ǃoa ge doebē, tsî ǁnāpa xūn âba ge hîǀhuru, ǀgau tamase ûi tsî.

¹⁴Tsî hoanab ge dītoa, ob ge kai ǃâtsūǀkhāba ǁnā ǃhūb ǃnâ ge hā, ob ge ge tsūǀkhātsoatsoa.

¹⁵Ob ge ǃgû, tsî ǁnā ǃhūb ǁanǂgāsabegu di ǀguib tawa ge sī sîsenôa; ob ge ǁîba ǃhanab âb ǁgā ge sî bi, hāgūnab nî ǃûise.

¹⁶Tsîb ge ǃnāb âba hāgūn gere ǂû ǂûǃnôan ǀkha gere ǀoaǀoa ǂgao; xawe khoe-i xare-i ge xū-e mā bi tama ge hâ i.

¹⁷Ob ge ǂâi-oa, tsî ge mî: Matikō ǃgâisen ti îb ǃgāna ǃnāǂamsase pere-e ūhâ, o ta tita ra ǃâs xa ǁō.

¹⁸Khâi tsî ta ti îb ǃoa ǃgû, tsî ǁîb ǃoa nî mî: Ti îtse, ǁore ta go ǀhommi ǃoagu tsî sats aiǃâ,

¹⁹tsî ta anu tama, ǃaruǀî sa ôase ǂgaihesa; ǁnâi sa ǃgān di ǀguise dī te.

²⁰Ob ge khâi, tsî ǁgûb ǃoa ge ǃgû. Tsî goroseb ǃnūse hâ, hîab ge ǁgûb âba mû bi, tsî ge ǀkhom bi; ob ge ǃkhoesī tsî ǁnam tsî ge ǁoa bi.

²¹Ob ge ǀgôaba ǁîb ǃoa ge mî: Ti îtse, ǁore ta go ǀhommi ǃoagu tsî sats aiǃâ, tsî ta anu tama, ǃaruǀî sa ôase ǂgaihesa.

²²Ob ge ǁgûba ǃgāgu âb ǃoa ge mî: Hoan xa îsa saraba ūǂui, î ana bi, î ǀkhunuǂnûida-e ǁîb di ǀkhunub ǃnâ ǂgā tsî ǁharora ǁîb ǂaira ǃaroma;

²³î kaukauhe hâ tsâu-e ūhā, î ǁî-e ǂā, î da ǂû tsî ǃgâiaǂgao.

²⁴Nē ti ôab go ǁō hâ i, tsî go ǁkhawa ûi, tsîb go kā hâ i, tsî go hōhe xuige. On ge ge dâtsoatsoa.

²⁵Tsî ǀgôab kaib ge ǃhanab ai ge hâ i; tsî ǁarub garu hîab ge omsa ǀgūo, ob ge ǁnaes tsî ǂnās tsîra ge ǁnâu.

²⁶Tsî ǃgāgu di ǀguiba ǂgaihā, tsî ge dîǃā bi, tare-i asa.

²⁷Ob ge ge mîǀî bi: Sa ǃgâsab kom go hāo, ob kom sa îba kaukauhe hâ tsâuba go ǂāo, ǂuruseb go hō bi amaga.

²⁸Ob ge ǁaixa, tsî ǂgâ ǂgao tama ge i. Ob ge ǁgûba ǂoa tsî ge ǀkhoma bi.

²⁹Xaweb ge ǃeream, tsî ǁgûb ǃoa ge mî: Kō, nētikō ǂgui kuriga ta gere ǃoaba tsi, tsî ta tātsē ǀgui mîmā-i âtsa ǃûǂam tama hâ; xawets kom tātsē piriro-i xawe-e mā te tamao, ti ǀhōsan ǀkha ta nî ǃgâiaǂgaose.

³⁰Ots kom, nē sa ôab, ûixūn âtsa ǀai-aodi ǀkha gere hapub go hā ǃnubai kaukauhe hâ tsâuba go ǂāba bio.

³¹Ob ge ǁîb ǃoa ge mî: Ti ôa, sats kom hugaǀgui tita ǀkha hâo, tsî tin hoan kom a sao.

³²Os kom dâ tsî ǃgâiaǂgaosa anuo, nē sa ǃgâsab go ǁō hâ i, tsî go ǁkhawa ûi, tsîb go kā hâ i, tsîb go hōhe xui-ao.