Read Khoekhoegowab Lukab 16 Bible Online

Lukab 16 - Khoekhoegowab bible

Lukab 16

¹Tsîb ge ǁkhāti ǁkhāǁkhāsabegu âb ǃoa ge mî: ǂAnǂansa ǃkhū hâ khoeb ge ge hâ i, ommûǂamaoba ge ūhâ iba tsîb ge nēba ǁîb tawa xūn âba ra hîǀhurub ase ge ǃnuriǃgâhe.

²Ob ge ǂgai bi, tsî ǁîb ǃoa ge mî: Mati ta kha nēsa sats xa ra ǁnâu? ǃEreamsa mā sa ommûǂamsis xa; ǃaruǀîts kom a ommûǂamao ǁoao.

³Ob ge ommûǂamaoba ǁîb ǃnâ ge mî: Tare-e ta nî dī, ti ǀhonkhoeb ra ommûǂamsisa ūǀhana teo? Khao ǁoa ta a, tsî ǀkhopesa ta kom ra tao-o.

⁴O ta a ǂan, tare-e ta nî dīsa, ommûǂamsisa xu ta nî ūǁnâhe ǃnubai, omdi ân ǃnân nî ǃkhōǃoa tega.

⁵Ob ge surude-aogu ǁîb ǀhonkhoeb diga ǂgai, tsî ǂgurob ǃoa ge mî: Matikōsets satsa ti ǀhonkhoeba surude hâ?

⁶Ob ge ge mî: ǀGuikaidisi soadi olib xa. Ob ge ǁîb ǃoa ge mî: Surudeǂkhanis âtsa ū, î ǂnû, î ǃhaese korodisi, ti xoa.

⁷ǁNās khaoǃgâb ge naub ǃoa ge mî: Tsî satsa, matikōsets surude hâ? Ob ge ge mî: ǀGuikaidisi ǀnōb ǃhorob xa. Ob ge ǁîb ǃoa ge mî: Surudeǂkhanis âtsa ū, î ǁkhaisadisi, ti xoa.

⁸Ob ge ǀhonkhoeba ǂhanuoǃnâ ommûǂamaoba ge koa, gā-aiseb go dī amaga; nē ǃhūbaib di ôan ǃnâb di ôan ǂamai a gā-ai amaga ǁîn di ǃhaos ǃnâ.

⁹O ta ge ra mîba du: ǂHanuoǃnâ ǃkhūsib ǀkha ǀhōsana dībasen, în sadu ga tôasio, ǀamo omdi ǃnâ ǃkhōǃoa du.

¹⁰ǂKharin ǃnâ ǂgomǂgomsa-i ge ǁkhāti kain ǃnâ ǂgomǂgomsa-e; tsî ǂkharin ǃnâ ǂhanuoǃnâ-i ge ǁkhāti kain ǃnâ a ǂhanuoǃnâ-e.

¹¹Tsî ǂhanuoǃnâ ǃkhūsib ǃnâ du ga ǂgomǂgomsa tama io, tari-e ǁnâi ama-ai-e nî ǂgomǃgâ du.

¹²Tsî naun di xū-i ǀkha du ga ǂgomǂgomsa tama io, tari-e ǁnâi sadu di-e nî mā du:

¹³ǃGā-i xare-i ge ǀgam ǀhonkhoekha a ǃoaba ǁoa; dī-i kao, o-i kom ǀguiba ǁkhān, tsî nauba nî ǀnamo, tsî nēb ai ǂgāmâisen, tsî nauba nî ǃharaxūo. Elob tsî ǃkhūsib tsîkha du ge a ǃoaba ǁoa.

¹⁴Tsî nēn hoana gu ge Farisegu, xūǃgunuxa ge igu ona ǁnâu, o gu ge ǁîba ge re ǀhoe.

¹⁵Ob ge ǁîgu ǃoa ge mî: Sago ge ǁîgo, khoen aiǃâ ra ǂhauǃnâkaisen go, xaweb ge Eloba sago ǂgaoga a ǂan; khoen aiǃâ ǀgapi-i ge Elob aiǃâ ǁgaidī-i ase ī xui-ao.

¹⁶ǂHanub tsî kēbo-aogu tsîgu ge Johaneb kōse ge hâ i; ǁnā ǃnūba xub ge Elob gaosiba ra aoǁnâhe, tsî mâ-i hoa-i ge ǁîb ǃnâ ra ǁgūǂgâ.

¹⁷ǀHommi tsî ǃhūbaib tsîkha ǃgôa-īs ge a supu, ǂhanub di ǀgui ǂkhanimûro-i nî ǁnās xa.

¹⁸Mâb hoab, taras âba ǀgoraxū tsî ga ǀkharasa ǃgameb ge ra ǃgamekhôa; tsî aob xa ǀgoraxūhe hâsa ga ǃgameb hoab on ge ra ǃgamekhôa.

¹⁹Tsî ǂanǂansa ǃkhū hâ khoeb ge ge hâ i, purpuri tsî tsamra ǃuri sarana ana, tsî tsēkorobe ǃgâiaǂgaob tsî ǂkhaisib ǃnâ gere ûiba.

²⁰Tsî ǂanǂansa ǀgâsa khoeb ge ge hâ i, Lasarub ti ǀon hâba, ǁîb ge ai-ommi âb di dao-ams tawa ge ǁgoe i, ǀhapin xa ǀoa hâse;

²¹tsîb ge ǃkhū hâ khoeb di tāba xu ra ǁnā ǂomaron xab ga ǁâsa gere tura; tsîn ge arina hā, tsî ǁîb ǀhapina gere tsā-ai.

²²Tsî i ge ge ī, ob ge ǀgâsa khoeba ǁō, tsî ǀhomǃgāgu xa Abrahammi tîǂams ǃoa ge tanihe; tsî ǃkhū hâ khoeb on ge ǁō, tsî ge ǁkhōhe.

²³Tsî ǀamoǀaeb ǃnâb hâ hîab ge mûra âba ǃhâkhâio, tsûb ǃnâ hâse, ob ge Abrahamma ǃnūseba xu ge mû, tsî Lasaruba ǁîb di tîǂams ai;

²⁴ob ge ǂgai, tsî ge mî: Abo Abrahamtse, ǀkhomxa te re, î Lasaruba sî re, îb ǁîb ǀkhunub di ǀamsa ǁgam-i ǃnâ ǂgā, îb ti namma hā karakaraba te, kaise ta nē ǁhabub ǃnâ ra tsâ xuige.

²⁵Ob ge Abrahamma ge mî: ǀGôatse, ǂâiǂâisen re, sats ge sa ǃgâiba ǃkhōǃoa ǃkhaisa sa ûib ǃnâ, tsî Lasaruba ǁnās ǁkhās xase tsūba. Ob ge ǁîba ra ǁkhaeǂgaohe, tsîts ge satsa ra tsâtsâhe.

²⁶Tsî nēn hoan ǂamaib kom sida tsî sadu ǁaegu kai ǁhāba ǁguiǁapohe hâo, on ge nēpaxu sadu tawa ra sī ǂgaona sī ǁkhā tama hâ, tsî ǁkhāti naupa xu sida ǃoa ra ǃgâuxa ǂgaona ǁkhā tama hâ.

²⁷Ob ge ge mî: O ta ra ǀkhoma tsi, abotse, ǁîbats nî ti îb oms ǃoa sîsa;

²⁸koro ǃgâsaga ta ūhâ xui-ao, îb ǁîga ǀhûǀguitimîba, ǁîgu on nē ǃkhais tsûb dis ǃoa hā tidega.

²⁹Ob ge Abrahamma ǁîb ǃoa ge mî: Moseb tsî kēbo-aogu tsîga gu kom ūhâo; a gu ǁîga ǁnâu.

³⁰Ob ge ge mî: Hî-î, abo Abrahamtse, xawe ǁō hâna xu i ga khoe-e ǁîgu tawa sīo, o gu ge nî ǃhobasen.

³¹Ob ge ge mîǀî bi: Moseb tsî kēbo-aogu tsîga gu ga ǁnâu tama io, o gu kom ǁkhāti ǂgom tideo, khoe-i ga ǁō hâna xu khâi xawe.