Read Khoekhoegowab Lukab 17 Bible Online

Lukab 17 - Khoekhoegowab bible

Lukab 17

¹Tsîb ge ǁkhāǁkhāsabegu âb ǃoa ge mî: Īǁoa i kom ao, ǁgonǁgonǂgaodi hā tide ǃkhaisa; xawe tsūba-i ge, ǁî-e xu di ra hā-e.

²ǁÎ-e ga ǃgâiba, ǁkhamiǀuisa ǁî-i ǃaos ai ǃgaehe, tsî i ga hurib ǃnâ aoǂgāhe ǃkhaisa, nē ǂkharin di ǀgui-e i ga ǁgonǁgonǂgao ǃkhais xa.

³ǂAnbasen re. ǃGâsab âts ga sats ǃoagu ǁoreo, ǂgōǀau bi re; tsî ǃhausenni kao, ǀûba bi re.

⁴Tsî hû ǃnādeb ga ǀgui tsēs ai sats ǃoagu ǁoreo, tsî hû ǃnādeb ga tsēs ai hā ôa tsi, tsî ga mî: ǃHausen ta ra, ots ge nî ǀûba bi.

⁵Tsî gu ge apostelga ǃKhūb ǃoa ge mî: ǂGomsa ǀaroba ge re.

⁶Ob ge ǃKhūba ge mî: ǂGom-i mosterdǃkhomro-i xase ī-e go ga ūhâo, o go ga nē ǀnomahais ǃoa mî: ǂGaeǂuisen, î hurib ǃnâ aoǂgāsen! Os ga ǁnâuǀnam go hâ.

⁷Tsî tari-e sadu ǃnâ hâ, ǃhūǃgao tamas ka io ra ǀgoadī ǃgāba ūhâ-e, tsî nî ǁnātimîsi, ǃhanaba xub ra ǁaruhā ǃnubai ǁîb ǃoa mî: Hā, î tāb tawa ǂnû.

⁸Nētib kha mîǀî bi tide: ǂHomiba te ǂû ta nî xū-e, î ǃgaesen î ǃoaba te, ǂû tsî ta nî ās kōse, ots ge satsa ǁnās khaoǃgâ ǂû tsî nî ā?

⁹Ganganni nî xare ǁnā ǃgāba, mîmāheb go xūnab goro dī amaga? Tātsē, ti ta ra ǂâi.

¹⁰ǁNās ǁkhās xase sago ona, mîmāhe go ge xūn hoana go ga dī hâ xawe, nēti mî: Sige ge anu tama ǃgāge; dīsa anuba ge hân ǀguina ge kom ge dīo.

¹¹Tsî i ge ge ī, Jerusalems ǃoab ǃgûgaru, hîab ge Samariab tsî Galileab tsîkha ǁaegu ǃkharu ǃkhaisa.

¹²Tsî ǃāro-i ǃnâb ra ǂgâ, hîa gu ge disi ǃomamaxa khoegu, ǃnūse mâga ge ǃoa bi;

¹³tsî gu ge domma ǃhâkhâi, tsî ge mî: Jesu, ǁkhāǁkhā-aotse, ǀkhomxa ge re!

¹⁴Tsî mûb ge, ob ge ǁîgu ǃoa ge mî: ǃGû, î go pristerga sī ǁgausen. O-i ge ge ī, ǃgû gu garu hîa gu ge ǃanu ǃkhaisa.

¹⁵Ob ge ǁîgu di ǀguiba, ǂurub go ǃkhaisab ge mû ǃnubai oa, tsî kai dommi ǀkha Eloba ge kare.

¹⁶Tsî ǁîb di ǂaira tawa ais âb ai ǁnāǁgoe, tsî ge gangan bi; tsîb ge ǁîba Samariaǁî khoe ge i.

¹⁷Ob ge Jesuba ǃeream, tsî ge mî: Disise go kha ǃanuǃanuhe tama hâ? Mapa gu ǁnâi khoesega hâ?

¹⁸Tsî ǀnîga ǁnâi hōhe tama hâ, oa tsî nî Eloba ǃgôaba māga, nē ǃhaokhoeb ǀguiba?

¹⁹Ob ge ge mîǀî bi: Khâi, î ǃgû, ǂgoms âts go hui tsi xuige.

²⁰Tsî Farisegu xab ge dîheo, mâ ǁaeb nî gaosib Elob diba hāsao, ob ge ǁîga ǃeream, tsî ge mî: Elob gaosib ge ǃaugakam ǂkhaisa īsib ǀkha hā tama.

²¹Tsîn ge ǁkhāti: Mû, nēpab hâ, mû, naupab hâ, ti mî tide. Mû, Elob gaosib kom sadu ǁaegu hâo.

²²Tsîb ge ǁkhāǁkhāsabegu ǃoa ge mî: Tsēdi ge nîra hā, ǁîdi ǃnâ du ge Khoen Ôab tsēdi di ǀguisa nî mû tura, tsî du ge mû si tide.

²³Tsîn ge sadu ǃoa: Mû, nēpab hâ, mû, naupab hâ, ti nî mî. Tā sī, î tā sao.

²⁴Napab, ǀgui ǀkhāb ǀhommi ǃnagas diba xu nau ǀkhāb ǀhommi ǃnagas dib kōse ra napab ǁkhāb khamib kom Khoen Ôaba ǁîb di hās ǃnâ nîra īo.

²⁵Xaweb ge aibe kaise tsâ, tsî nē ǃhaos xa nîra aoxūhe.

²⁶Tsî Noaxi di tsēdi ǃnâ i ge īs ǁkhās khami i Khoen Ôab di tsēdi ǃnâ nîra ī.

²⁷ǂÛ tsîn ge gere ā, ǃgame tsîn ge ǃgameb ǃoa gere māǂuihe, Noaxi ge arki ǃnâ ǂgâ tsēs kōse, ob ge kai ǁgamma hā, tsî hoana ge hîkākā.

²⁸Tsî ǁkhāti Loti di tsēdi ǃnâ i ge īs ǁkhās khami i ge nîra ī: ǂÛ tsîn gere ā, ǁama tsîn gere ǁamaxū, ǂgā tsîn gere om;

²⁹xawe Loti ge Sodomsa xu ǂoa tsēs ai ra ge ǀaes tsî sulfuri tsîra ǀhomma xu ǀapi, tsî hoana ge hîkākā.

³⁰ǁNās ǁkhās xase i ge Khoen Ôab nî ǂhaiǂhaisen tsēs ai nîra ī.

³¹Tsî ǁnā tsēs ai, oms ǂamais ai hâ, tsî ga ǁî-i xūna oms ǃnâ ūhâ-e, a-i tā ǁgôaxa, ǁîna i nî ūbēse; tsî ǃhanab ai ga hâ-e, a-i ǁnās ǁkhās khami tā khaoǃgâ hân ǃoa oa.

³²ǂÂi Loti taras xa.

³³ǁÎ-i ûiba i nî sâubasen ǃkhaisa ga ôa-am-i ge ǁîba nî ǂoaǃnâ, tsî ǁîba ga ǂoaǃnâ-i ge ǁîba nî sâubasen.

³⁴Tsî ta ra mîba du: ǁNā tsuxub ǁkhāb ǃnân ǀgamna ǀgui kharob ai nî ǁgoe; ǀgui-i ge nî ūhe, tsî nau-i ge nî ǁnāxūhe.

³⁵ǀGamra ge ǀhûpe nî ǁkhami; ǀguis ge nî ǃkhōǃoahe, tsî naus ge nî ǁnāxūhe.

³⁶ǀGamkha ge ǃhanab ai nî hâ; ǀguib ge nî ǃkhōǃoahe, tsî naub ge nî ǁnāxūhe.

³⁷O gu ge ǃeream, tsî ge mîǀî bi: Mapa, ǃKhūtse? Ob ge ǁîgu ǃoa ge mî: Soros hâpa, ǁnāpan kom ǃariǃkhāna ra ǀhûo.