Read Khoekhoegowab Lukab 18 Bible Online

Lukab 18 - Khoekhoegowab bible

Lukab 18

¹Tsîb ge ǁkhāti ǂkhō-e ge mîǀî gu, mati i nî khoe-e hugaǀgui ǀgore tsî ǂkhabuǂâi tide ǃkhaisa;

²ob ge ge mî: ǂAnǂansa ǀgoraǃgâ-aob ge ǂanǂansa ǃā-i ǃnâ ge hâ i, Eloba ǃaoǃgâ tamab, tsî khoena ǃgôa tamaba.

³Tsîs ge ǂanǂansa ǃoatarasa ǁkhā ǃās ǃnâ ge hâ i. ǁÎs ge hā, tsî ge mîǀî bi: Mâǃoa te rab ǃoagu hui te re!

⁴Tsîb ge ǂomxa ǁaeba dī ǂgao tama ge i; xawe egab ge ǁîb ǃnâ ge mî: Eloba ta ǃaoǃgâ tama xawe, tsî khoena ta ǃgôa tama;

⁵xawe nē ǃoataras ra ǀhupuǀhupu te hā, amaga ta nî ǂhanuǂhanuba si, îs tā hūkaǀgui hā ǁnora te.

⁶Tsîb ge ǃKhūba ge mî: ǁNâu go ra, ǂhanuoǃnâ ǀgoraǃgâ-aob ra mî-e?

⁷Eloba ǁîb di ǃkhōǂuibasensan, tsēs tsî tsuxub tsîra ǁîba ra ǂgaiǀîna ǂhanuǂhanubab tide, ǁînab nî huisab ra ǀhape xawe?

⁸Mîba du ta ra, ǃhaeseb nî ǁîna ǂhanuǂhanuba ǃkhaisa. Tsî Khoen Ôab ga hā ǃnubai, xare kha ǂgom-e hōb nî ǃhūbaib ai?

⁹Tsîb ge ǁkhāti ǀnîn, ǂhauǃnân a ti ǂgomǃgâsen hân, nauna sora hân ǃoa nē ǂkhōsa ge mî:

¹⁰ǀGam khoekha ge tempeli ǃoa ge ǃapa, ǀgore nîse. ǀGuib ge Farise ge i, tsî naub ge mariǃkhōǃoa-ao ge i.

¹¹Tsîb ge Fariseba ǀguri mâ, tsî nēti ǁîb ǃnâ ge ǀgore: Elotse, gangan tsi ta ra, nau khoen, ǁkhâuǁnâ-aon, ǂhanuoǃnân, ǀai-aon, nē mariǃkhōǃoa-aob tsîn khami ta ī tama ǃkhais xa.

¹²ǀGam ǃnāra ta wekheb ǃnâ ra ǂûtamahâ, tsî hō ta ran hoan xa ta disiǁî ǃâsa ra mā.

¹³Tsîb ge mariǃkhōǃoa-aoba ǃnūse mâ, tsî ǁîb di mûra ǀhommi ǃoa ǃhâkhâis xawesa ge dītsâ tama hâ i; xaweb ge ǁkhaib âb ai ǂnau tsî ge mî: Elotse, ti ǁore-aota ǀkhomxa re!

¹⁴Mîba du ta ra, ǁîb ge naub ǂamai ǂhanu-ai kaihe hâse oms âb ǃoa oa ǃkhaisa; mâ-i hoa-i ǁî-aitsama ra ǀgapiǀgapisen-i ge nîra ǃgamǃgamhe, tsî ǁî-aitsama ra ǃgamǃgamsen-i ge nîra ǀgapiǀgapihe xui-ao.

¹⁵Tsîn ge ǁkhāti ǀgôarona ǁîb ǃoa ge ūhā, ǁînab nî tsâǀkhāga; tsî ǁkhāǁkhāsabegu ge mû, o gu ge ǁîna ge ǃgabe.

¹⁶Xaweb ge Jesuba ǁîna ǂgaihā, tsî ge mî: An ǀgôarona tita ǃoa hā, î ǁîna tā ǂhani; nēti īn dib a gaosib Elob diba xuige.

¹⁷Amase ta ra mîba du, Elob di gaosiba ǀgôaro-i khami ǃkhōǃoa tama ga ī-i ge tātsē ǁîb ǃnâ ǂgâ tide-e.

¹⁸Tsîb ge ǂanǂansa ǂamkhoeba dî bi, tsî ge mî: ǃGâi ǁkhāǁkhā-aotse, tare-e dī tsî ta nî ǀamo ûiba ǀumi?

¹⁹Ob ge Jesuba ǁîb ǃoa ge mî: Tarexats ǃgâi, ti ra ǂgai te? Khoe-i xare-i kom ǃgâi tamao, Elob ǀguib.

²⁰Mîmādets ge a ǂan: ǃGamebats ge khôa tide. ǃGamts ge tide. ǃNarits ge tide. ǂKhabasets ge ǂgā-am tide. Saob tsî saos tsîrats ge nî ǃgôa, ti ra mîde.

²¹Ob ge ge mî: Nēn hoana ta kom ti ǂkhamsisa xu ge ǃkhōǀgaipeo.

²²Tsî Jesub ge nēna ǁnâu ob ge ge mîǀî bi: ǀGui-ets gorose tôasi hâ: Ūts hân hoana ǁamaxū î ǁîna ǀgâsan ǃnâ ǀgora, ots ge ǀhommi ǃnâ ǁui-e nî ūhâ, îts hā sao te.

²³Tsî nēnab ge ǁnâu, ob ge ǃgamse ge ǃoa, kaiseb ge ǃkhū hâ i xui-ao.

²⁴Tsî ǃoab go ǃkhaisab ge Jesuba mû, ob ge ge mî: Matikōse i a ǃgom, ǃkhū hâ khoen nî Elob gaosib ǃnâ ǂgâ ǃkhaisa.

²⁵Supu i ge a, ǃnai-i nî nali di mûros ǃnâ ǂgâsa, ǃkhū hâ-i nî Elob di gaosib ǃnâ ǂgâs xa.

²⁶On ge ǁnâu rana ge mî: Tari-e ǁnâi a ǃgâiǃō ǁkhā?

²⁷Ob ge ge mî: Khoen tawa a īǁoan kom Elob tawa a īǁkhāo.

²⁸Ob ge Petruba ge mî: Mû, sige ge hoana ǁnāxū tsî ge sao tsi.

²⁹Ob ge ge mîǀî gu: Amase ta ra mîba go: Khoe-i ga oms tsî ǁgûra, tsî ǃgâsan tsî taras tsî ǀgôan tsîna Elob di gaosib ǃaroma ǁnāxū,

³⁰o-i ge ǁîna ǂguiǃnâguse nî hōdawa nē hâ ǁaeb ǃnâ, tsî ǃgoaxaǁaeb ǃnâ ǀamo ûiba.

³¹Tsîb ge disiǀgamǀaga ū, tsî ǁîgu ǃoa ge mî: Mû, Jerusalems ǃoa ge ge ra ǃapa, on ge kēbo-aogu xa Khoen Ôab xa xoahe hân hoana nîra ǀoa.

³²ǀŪbenab ge nîra māǁnâhe, tsîb ge nîra ǃhōhe, tsî ǁgaisise dī-ūhe, tsîb ge nîra ǂara-aihe.

³³Tsîn ge ǂnau tsî nîra ǃgam bi; tsî ǃnonaǁî tsēs aib ge nîra khâi.

³⁴Xawe gu ge nēn xa xū-i xare-e ǁnâuǃā tama ge i, tsîs ge nē mîsa ǂganǃgâsaba gu ge i, tsî gu ge mîhe gena ǁnâuǃā tama ge i.

³⁵Tsî i ge Jerixosab ra ǀgū hîa ge ī, ob ge ǂanǂansa ǂgī khoeba daob tawa ǂnû tsî gere ǀkhope.

³⁶Tsî khoen ra ǃgû-ī ǃkhaisab ge ǁnâuo, ob ge ge dî, tare-i a ǃkhaisa.

³⁷On ge ge ǂhôa bi, Jesub Nasareǁîb ra ǃgû-īsa.

³⁸Ob ge ǂgai, tsî ge mî: Jesu, Davib Ôatse, ǀkhomxa te re!

³⁹On ge aiǃâ garuna ge ǃgabe bi, ǃnōb nîga; xaweb ge ǁnās ǃgâ-ai ge ǂgai: Davib Ôatse, ǀkhomxa te re!

⁴⁰Ob ge Jesuba mâ, tsî ǁîb ǃoab nî ūhāhesa ge mîmā; tsî ǀgūseb ge hā, ob ge dî bi,

⁴¹tsî ge mî: Tare-e ta nî dība tsi, ǃkhaisats ra ǂgao? Ob ge ge mî: ǃKhūtse, mû kaihe ta nîsa.

⁴²Ob ge Jesuba ǁîb ǃoa ge mî: Mû! ǂGoms âts go hui tsi.

⁴³Ob ge ǁnātimîsi mû, tsî ge sao bi, Eloba ra karese; tsî ǁaes hoas ge mûn geo, Eloba koasa gere mā.