Read Khoekhoegowab Lukab 19 Bible Online

Lukab 19 - Khoekhoegowab bible

Lukab 19

¹Tsîb ge Jesuba Jerixos ǃnâ ǂgâ, tsî ge ǃgûǃkharuǃnâ si.

²Tsî mû, khoeb, Saxeub ti ǀon hâb ge ǁnāpa ge hâ i, tsîb ge mariǃkhōǃoa-aon di ǂamkhoe ge i, tsîb ge ge ǃkhū hâ i.

³Tsîb ge ge ôa-am, Jesubab nî mûse, tarib asa, tsîb ge khoen xa ǁkhā tama ge i, ǃnubub ge i amaga.

⁴Ob ge aiǃâ ǃkhoe, tsî ǀgopes ai sī ge ǃapa, mû bib nîga, ǁnā daoba-ūb nîra ī xui-ao.

⁵Tsî Jesub ge ǁnā ǃkhais tawa sī, ob ge ǃgapakhâi, tsî ǁîba mû, tsî ge mîǀî bi: Saxeutse, ǃhaese ǁgôaxa re; nētsē ta nî sa oms ǃnâ hâ xuige.

⁶Ob ge ǃnoesase ǁgôaxa, tsî ǃgâiaǂgaob ǀkha ge ǃkhōǃoa bi.

⁷On ge mû gen hoana ǀara tsî ge mî: ǁOre-aob tawab kom hâ nîse go ǂgâo.

⁸Tsîb ge Saxeuba mâ, tsî ǃKhūba ǃoa ge mî: Mû, ǃKhūtse, ti xūn di ǃkhareba ta ǀgâsana ra mā; tsî xū-e ta ga khoe-e gāxaǃnâse ūǀhana hâo ǁî-e hakaǃnâguse ra mādawa.

⁹Ob ge Jesuba ǁîb ǃoa ge mî: Nētsēs ge nē omsa ǃgâiǃōsi-e go hō, nēb on a Abrahammi ôa amaga.

¹⁰Khoen Ôab ge hā, ǃkhoeǂnâ hâ-e ôa tsîb nî ǁî-e ǃgâiǃō kaise xui-ao.

¹¹Tsî nēnan ra ǃgâbasen, hîab ge ǃaruǀî ǂkhō-e ge mî, Jerusalemsab ge ǀgū i, tsî ǁnātimîsib nî Elob gaosiba ǂhaiǂhaisen, tin gere ǂâi amaga.

¹²Ob ge ge mî: ǂAnǂansa ǀgapiǃgôahesa khoeb ge ǃnū ǃhūb ǃoa ge ǃgû gaosisab nî hōbasenga, tsîb nî ǁnās khaoǃgâ oase.

¹³Ob ge disi ǃgāgu âba ǂgai, tsî disi ponde mā gu, tsî ge mîlî gu: ǁAmagusa dī, ǁkhawa ta nî hās kōse.

¹⁴Tsî gu ge ǁgâuǁîgu âba ǁkhan bi, tsî sîsabega sîǃgon bi, tsî ge mîba kai bi: ǂGao tama ge hâ, nēb nî sige ǂama gaosa.

¹⁵Tsî i ge ge ī, gaosisab ge hō ǃnubaib ge hā ǃkhaisa, ob ge ǁnā ǃgāgu, maribab ge māga ǁîb ǃoa ge ǂgai kai, îb ga ǂan, tarib âgu ǁamagus ǃnâ xū-e hōbasen hâ ǃkhaisa, ti.

¹⁶Ob ge ǂguroba hā, tsî ge mî: ǃKhūtse, sa ponds ge ǀnî disi ponde go hōba tsi.

¹⁷Ob ge ge mîǀî bi: Aio, ǃgâi ǃgātse, ǀoro-i ǃnâts ge ǂgomǂgomsa i, xuige disi ǃādi ǂama ǀgaiba ūhâ re.

¹⁸Ob ge ǀgamǁîba hā, tsî ge mî: ǃKhūtse, sa ponds ge ǀnî koro ponde go hōba tsi.

¹⁹Ob ge ǁkhāti ǁîb ǃoa ge mî: Sats ona ǀnî hâ koro ǃādi ǂama.

²⁰Ob ge nauba hā tsî ge mî: ǃKhūtse, nēs ge hâ sa ponds, aosenǃkhai-i ǃnâ ta sâuba tsi hâsa;

²¹ǃao tsi ta kom geo, ǁkhō khoets a amaga: ǁGuiri tamats hânats kom ra ūo, tsî tsoro tamats hânats kom ra ǃgao-o.

²²Ob ge ge mîǀî bi: Sa amsa xu ta nî ǀgoraǃgâ tsi, ǂkhaba ǃgātse! ǂAnts ge i, ǁkhō khoeta a ǃkhaisa tsî ǁgui tama ta hâpa ta ra ū, tsî tsoro tama ta hâna ta ra ǃgao ǃkhaisa.

²³Tsî tare xū-i ǃaromats kha ǁnâi ti pondsa mariǂharuguǂgaes ǃnâ mā tama ge i, o ta kom ga ti hās ǃnâ ǁîsa hōs ǀkha ǂgaoǀkhā hâo?

²⁴Ob ge ǁîb tawa mâgu ǃoa ge mî: Pondsa ūǀhana bi, î diside ūhâba mā si!

²⁵O gu ge ǁîb ǃoa ge mî: ǀNaib kom disi ponde ūhâo, ǃKhūtse.

²⁶Mîba du ta ra: Ūhâ-i hoa-i ge nîra māhe; tsî ūhâ tama i ge ǁkhāti ū-i hâ-e nîra ūǀhanahe.

²⁷Î go ǁnā khākhoegu âtagu, tita nî ǁîgu ǂama gao ǃkhaisa ǂgao tama ge iga nēpa ūhā, î ti aiǃâ ǂnauǃan gu.

²⁸Tsî nēna mî tsîb ge ǁîga aiǃgûba tsî Jerusalems ǃoa ge ǃapa.

²⁹Tsî i ge ge ī, Betfages tsî Betanisab ge ǀgūo, ǁnā ǃhommi, ǀKheraǃhommi ti ra ǂgaiheb tawa, ob ge ǁkhāǁkhāsabegu âb di ǀgamkha sîǂui

³⁰tsî ge mî: ǃGû, ǃoa ǃganu ǂnôa ǃāros ǃoa; tsî ǁîs ǃnâ kho ra ǂgâ, hîa kho ge ǃgaemâihe hâ eselǂkhamro-i, tātsē khoe-i xare-i xa ǂnû-aihe tama-e nî hō; xore, î ūhā-i re.

³¹Tsî khoe-i ga sakho dî: Tare xū-i ǃaroma kho ǁî-e ra xore? O kho ge ǁî-i ǃoa: ǃKhūb kom ǁî-e ǂhâba hâo, ti nî mî.

³²O kha ge sîsabekha ǃgû, tsî mîbahe kha go khami ge hō.

³³O gu ge ǁî-i di ǀhonkhoega, eselǂkhamro-e kha ra xore hîa ǁîkha ǃoa ge mî: Tare xū-i ǃaroma kho eselroba ra xore?

³⁴O kha ge: ǃKhūb kom ǁîba ǂhâba hâo, ti ge mî.

³⁵O kha ge ǁîba Jesub ǃoa ge ūǃgû, tsî ǁîkha saran ǂhanina eselrob ai ǁgui, tsî Jesuba ǁîn ai ge ǂnûi.

³⁶Tsî garub a hîan ge ǁîn di sarana daob ai gere ǃā.

³⁷Tsî ǀKheraǃhommi di ǁnōb ǀgūseb ge sī, ǃnubaib ge ǁkhāǁkhāsaben âb di ǂguiba ǃgâiaǂgao hâse Eloba ǃgari dommi ǀkha ge karetsoatsoa, hoa ǀgaisa dīgu hîan ge mûgu ǂama.

³⁸Tsîn ge ge mî: ǀKhaeheb ge hâ ǃgoaxa gao-aoba ǃKhūb di ǀons ǃnâ! ǂKhîba ab ǀhommi ǃnâ hâ, tsî ǂkhaisiba hoan a ǀgapi ǃkhaidi ǃnâ!

³⁹O gu ge ǀnî Farisega ǂnubis ǁaeguba xu ǁîb ǃoa ge mî: ǁKhāǁkhā-aotse, ǁkhāǁkhāsabegu âtsa ǃgabe re.

⁴⁰Ob ge ǃeream, tsî ge mîǀî gu: Mîba go ta ra, ǁîgu ga ǃnō o di kom ǀuide nî ǃauo.

⁴¹Tsî ǀgūse sī tsîb ge ǃāsa mûo, ob ge ǁîs ǂama ā

⁴²tsî ge mî: Îs ga sas ona mûǂan hâ, nētsēs âs ǃnâ i ga ī xawe, sa ǂkhîb ǃoa hâna! Xawen ge nēsi sa mûra a ǂganǃgâsaba.

⁴³O di kom tsēde nîra hāǂam sio, ǁîdi ǃnâ gu khākhoegu âsa ǁkhuiga kuruǂnamipe si, xāǂgā tsî mâ ǃnam-i hoa-e xu nîra ǂōǂō side.

⁴⁴Tsî gu ge sas tsî sas ǃnâ hâ ǀgôan tsîna ǃhūb ai nîra ǂnauǁgui, tsî gu ge sas ǃnâ ǀgui ǀui-e nau ǀui-i ai ǁnāxū tide, ǁîb ǃnâs sarihe hâ ǁaebas ge mûǂan tama i xui-ao.

⁴⁵Tsî tempeli ǃnâ ǂgâ, tsîb ge ǁîb ǃnâ ǁamaxū tsî ra ǁamaga ge ǃhaeǂui,

⁴⁶Tsî ge mîǀî gu: Xoamâihe hâ: “Ti ommi ge ǀgore-om” ti nî ǂgaihe, xawe du ge sado ǁîba “ǃgamaon ǁhāse” ge dī.

⁴⁷Tsîb ge tsēkorobe tempeli ǃnâ gere ǁkhāǁkhā. O gu ge ǀgapipristergu tsî xoaǂansabegu tsî ǁaes di ǂamkhoegu tsîga ǃgam bi gu nîsa gere ôa-am.

⁴⁸Xawe mati gu ǁîsa nî dī ǃkhaisa gu ge hō tama ge i, ǁaes hoas ge ǁîb ai ǂgāmâisen, tsî gere ǁnâu bi xui-ao.