Read Khoekhoegowab Lukab 2 Bible Online

Lukab 2 - Khoekhoegowab bible

Lukab 2

¹Tsî i ge ge ī ǁnā tsēdi ǃnâ, o i ge mîmā-e Kaesar Augustuba xu ge ǂoa, ǃhūbaib hoab nî xoamâihe ǃkhaisa.

²Tsîs ge nē ǂguro xoamâisa ge ī Sireniub, Siriab ǃnâ ǃāǃkhōmâi-ao ge i ǁaeb ai.

³On ge hoana ge ǃgû, xoamâihen nîga, mâ-i hoa-e ǁî-i di ǃāsa ǃoa.

⁴Ob ge Joseba ǁkhāti ge ǃgûǃapa, Nasarets, Galileab ǃnâ hâ ǃāsa xu, Davib ǃās, Judeab ǃnâ hâs, Betlehems ti ra ǂgaihesa ǃoa, Davib ommi tsî ǃhaosa xub hâ amaga,

⁵xoamâiheb nîga, Marias, āba mā bi hâs, ǀgamǀkhā hâs ǀkha.

⁶Tsî i ge ge ī, ǁnāpa ra hâ hîa di ge hōtsēdi âsa mâtoa ǃkhaisa.

⁷Os ge ǂguro ǀgôab âsa ǁora, tsî ǃkhain ǃnâ ǃgami bi, tsî ǁgorob ǃnâ ge ǁgui bi, ǃgûkhoen ommi ǃnâ i ge ǃkhai-e ǀkhai-i amaga.

⁸Tsî gu ge ǃûi-aoga ǁnā ǃaub ǃnâ ge hâ i, tsuxub ǃnâ gūn âga ra ǃûiga.

⁹Tsî mû, ǀhomǃgāb ǃKhūb dib ge ǁîga ge ǂhai, tsî ǂkhaisib ǃKhūb dib ge ge ǃnâǃnâǂnamipe gu; o gu ge kaise ge ǃao.

¹⁰Ob ge ǀhomǃgāba ǁîgu ǃoa ge mî: Tā ǃao, mû kai ǃgâiaǂgaoba ta ra ǂhôa go, mâ ǁae-i hoa-i di nîba,

¹¹nētsēb ge ǃGâiǃōdī-aoba go ǃnaeba du ǃKhūb Xristub ge ǁîba, Davib ǃās ǃnâ.

¹²Tsî nēs ge saos âgo: ǀGôaroba go ge ǃkhain ǃnâ ǃgamihe tsî ǁgorob ǃnâ ǁgoese nî hō.

¹³Tsî ǁnātimîsis ge ǀhomǃgāb ǀkha ǀhommi di ǂnubisa ge hâ i, tsî gu ge Eloba koa tsî ge mî:

¹⁴ǂKhaisiba ab Eloba ūhâ ǀgapiseb ǃnâ, ǂkhîba ab hâ ǃhūbaib ai, tsî ǃgâiǃgâibasensa khoen ǃnâ!

¹⁵Tsî i ge ge ī, ǀhomǃgāgu ge ǁîga xu ǀhommi ǃoa bēo, o gu ge ǃûi-aoga ge mîǀîgu: A ge Betlehems ǃoa ǃgû, î ge ī go ǃkhais, ǃKhūb go ǂanǂan gesa sī mû.

¹⁶O gu ge ǃhaese sī tsî, Marias tsî Joseb tsîra, tsî ǀgôaroba ǁgorob ǃnâ ǁgoese ge hō.

¹⁷Tsî mû gu ge, o gu ge mîs, nē ǀgôarob xa gu ge mîbahesa hoana ge ǃhoaba.

¹⁸Tsî ǁnâu si gen hoan ge ge buru, ǃûi-aogu xan go mîbahen ǂama.

¹⁹Tsî Marias ge nē mîdi hoade ǀhûpe ge sâu, tsî ǁîdi xa ǂgaob âs ǃnâ gere ǂâiǂâisen.

²⁰Tsî ǃûi-aogu ge ǁkhawa oa, tsî Eloba koa tsî ge kare, ǁnâu tsî gu go mûn hoan ǂama, mîbahe gu go khami.

²¹Tsî ǁkhaisa tsēdi ge ǀoao, ǀgôarob nî ǃgaohega, os ge ǀons âba Jesub ti ge ǂgaihe, ǀhomǃgāb ge ǁgûs soros ǃnâb ǃkhōǃoahe tama hîa ǂgaisa ǃoa.

²²Tsî ǃanuǃanusentsēdi âra ge ǀoa Moseb ǂhanub ǃoa, o ra ge ǁîba Jerusalems ǃoa ge ūǃapa, ǃKhūba ra nî mâi-aiǃâ bise,

²³ǃKhūb ǂhanub ǃnâ xoahe hâ khami: “Aore-i hoa-i, ǁgûsa ra ǁkhowa-am-i ge ǃKhūba khaibahe hâ-i ti nî ǂgaihe.”

²⁴Tsî ǁguibasa ra nî māse, ǃKhūb ǂhanub ǃnâ ge mîhesa ǃoa: ǀGam ǂnaira kas, ǀgam ǂkham ǂnabura kas hoasa.

²⁵Tsî mû, khoeb ge Jerusalems ǃnâ ge hâ i, Simeon ti ge ǀon hâ iba; tsî nē khoeb ge ǂhauǃnâ tsî eloǃaoǃgâxa ge i, tsî Israeli ǁkhaeǂgaoba gere ǃâubasen, tsî ǃAnu Gagab ge ǁîb ai ge hâ i.

²⁶Tsîb ge ǃAnu Gagaba xu ǃeream-e ge hō, ǁōbab mû tidesa, ǃKhūb Xristubab mû tamas aiǃâ.

²⁷Tsîb ge Gagaba xu tempeli ǃnâ ge sī. Tsî ǁgûra ge ǀgôarob Jesuba ūǂgâxao, ǂhanub di ǁnaetib ǃoa ra nî dī-ū bise,

²⁸ob ge ǁôakha ǃnâ ū bi tsî Eloba kare tsî ge mî:

²⁹Nēsits ge, ǃKhūtse, sa ǃgāba ǂkhîb ǃnâ nî ǃgû kai, mîs âtsa ǃoa,

³⁰ti mûra go ǃgâiǃōsib âtsa mû xui-ao,

³¹ǁaedi hoadi di ais aiǃâts go ǂhomiba.

³²ǃNâb, ǀūbena nîra ǃnâǃnâb, tsî sa Israelǁaesa nîra ǂkhaiǂkhaib ase.

³³Tsî Joseb tsî ǁgûs tsîra ge gere buru, ǁîb xa go mîhen ǂama.

³⁴Tsîb ge Simeonna ǁîra ǀkhae tsî Marias ǃoa ge mî: Mû, nēb ge ǂnûihe hâ Israelǁîn ǂguin di ǁnāse tsî khâise, tsî ǃhoaǃoahe nîra saose.

³⁵Tsî sa ǀoms ǂûs ge ǁkhāti gôab xa nîra ǃganuhe, ǂgui ǂgaogu di ǂâidi nîra ǂhaiga.

³⁶Tsîs ge Anas, kēbo-aos, Fanueli ôas, Aseri ǃhaos disa ǁnāpa ge hâ i. ǁÎs ge kaise ge kaira hâ i tsî ǁîs aob ǀkha hû kuriga ge ûi hâ i ǁîs di ǂkhamkhoesisa xu.

³⁷Tsîs ge ǁkhaisadisihakaǀa nî ī kurixa ǃoatara ge i, tempela xu bē tamas, tsî ǂûtamahâs tsî ǀgores ǀkha Eloba tsēa tsî tsuxuba ra ǃoabasa.

³⁸Tsîs ge ǁîs ona ǁkhā iri ai hā tsî Eloba gangan, tsî ǁîb xa ge ǃhoa Jerusalems ǃnâ oresa ra ǃâun hoan ǃoa.

³⁹Tsî ǃKhūb ǂhanuba anuba hân hoana ra ge dītoao, o ra ge ǁkhawa Galileab ǃoa ge oa, Nasarets ǁîra di ǃās ǁga.

⁴⁰Tsîb ge ǀgôaroba kaikhâi, tsî gagas ǃnâ ge ǀgai, gā-aisib xa ǀoa hâse, tsî ǀkhommi Elob dib ge ǁîb ai ge hâ i.

⁴¹Tsî ǁgûra ge kurikorobe Jerusalems ǃoa gere ǃapa Pasxakaitsēs ǃoa.

⁴²Tsî disiǀgamǀa kurixab ge, ǃnubai ra ge Jerusalems ǃoa ge ǃapa, kaitsēs di ǁnaetiba ǃoa.

⁴³Tsî kaitsēde ra ge hâtoao, ob ge ǀgôab Jesuba, ǁaru ra garu hîa, Jerusalems ǃnâ ge hâ-oa, Joseb tsî ǁgûs tsîra a ǀūse.

⁴⁴ǀHûpe ǁarugarun ǃnâb hâ ti ra ge ǂâi hâ i, amaga ra ge ǀgui tsēs daoba ǃgû tsî ǀaokhoen tsî ǂansaben ǁaegu gere ôa bi.

⁴⁵Tsî hō bi tama ra ge io, o ra ge ǁkhawa Jerusalems ǃoa ge oa, ôa bi rase.

⁴⁶Tsî i ge ge ī, ǃnona tsēdi khaoǃgâ ra ge tempeli ǃnâ hō bi ǃkhaisa, ǁkhāǁkhā-aogu ǁaegu ǂnôase, ǁîga ǃgâ tsî ra dîǃnâguǃâ.

⁴⁷Tsî ǁnâu bi ran hoan ge ge burugâ, ǁîb ǂans tsî ǃereamdi xa.

⁴⁸Tsî mû bi ra ge, o ra ge ge ǃhuri, tsîs ge ǁgûsa ǁîb ǃoa ge mî: ǀGôatse, tarexats ǁnāti sim ǀkha go dī? Mû, sa îb tsî tita tsîm ge ǂâiǂhansen rase goro ôa tsi.

⁴⁹Ob ge ǁîra ǃoa ge mî: Tarexa ro tita goro ôa? ǂAn tama ro ǁnâi hâ, ti Îb din ǃnâ ta nî tita hâsa?

⁵⁰Tsî ra ge mîb go mîsa ge ǁnâuǃā tama hâ i.

⁵¹Tsîb ge ǁîra ǀkha ǁgôa, tsî Nasarets tawa sī, tsî gere ǁnâuǀnam ra. Tsî ǁgûs ge nē mîdi hoade ǂgaob âs ǃnâ ge sâu.

⁵²Tsî Jesub ge ǃaruǀîǀgui gā-aisib tsî kais tsîn ǃnâ ge ǀāro, tsî ǀnamǀnamsasib ǃnâ Elob tsî khoen tsîn tawa.