Read Khoekhoegowab Lukab 20 Bible Online

Lukab 20 - Khoekhoegowab bible

Lukab 20

¹Tsî i ge ǁnā tsēdi di ǀguis ai ge ī, ǁaesab ra tempeli ǃnâ ǁkhāǁkhā tsî ǃgâiǂhôasab ra aoǁnâ, hîa gu ge ǀgapipristergu tsî xoaǂansabegu tsîga kaigu ǀkha ge hā.

²Tsî ǁîb ǀkha ǃhoa, tsî ge mî: Mîba ge re, mâ ǀgaiba xuts ra nēna dī ǃkhaisa, tsî tarib a ǃkhaisa, nē ǀgaiba ge mā tsiba.

³Ob ge ǃeream, tsî ǁîgu ǃoa ge mî: Tita on ge ǀgui xū-e nî dî go, î go mîba te:

⁴ǁĀǁnâs, Johaneb disa ǀhomma xus ge hâ i? Khoena xus ge hâ i?

⁵O gu ge ǁîgu ǃnâ ǂâiǂâisen tsî ge mî: Mî ge kao: ǀHomma xus, ob ge sage ǃoa nî mî: Tarexa go ǁnâi ǂgom bi tama hâ?

⁶Tsî mî ge kao: Khoena xus, os kom ǁaesa sage nî ǀuiǁhomo, Johaneb a kēbo-ao ǃkhaisan ǂan xui-ao.

⁷O gu ge, mapa xus ge hâ i ǃkhaisa gu a ǀū, ti ge ǃeream.

⁸Ob ge Jesuba ǁîgu ǃoa ge mî: O ta tita ona sago mîba tide, mâ ǀgaiba xu ta nēna ra dī ǃkhaisa.

⁹Tsîb ge ǁaes ǃoa nē ǂkhōsa ge mîtsoatsoa: ǂAnǂansa khoeb ge ǂauxûiǂûǃhanaba ǂgā, tsî sîsenaoga ǃgaeba bi tsî ǂomxa ǁaeba ǃnū ǃhū-i ǃoa ge doebē.

¹⁰Tsî ǁaeb aib ge ǃhanasîsenaoga ǃoa ǃgāba ge sî, ǁîba gu nî ǂauxûiǂûǃhanab di ǂûn xa māse; xawe gu ge ǃhanasîsenaoga ǂnau bi, tsî ǀkhaiǃomse ge sîbē bi.

¹¹Ob ge ǁkhawa ǀnî ǃgāba ge sî; xawe gu ge ǁîb ona ǂnau, tsî taotaosase sîsenū, tsî ǀkhaiǃomse ge sîbē.

¹²Ob ge ǁkhawa ǃnonaǁîba ge sî; xawe gu ge ǁnāb ona ǀhapiǂnûiǀkhā, tsî ge aoǂui.

¹³Ob ge ǂauxûiǂûǃhanab di ǀhonkhoeba ge mî: Tare-e ta nî dī? Ti Ôab, ǀnam ta aba ta ge nî sî; ǀnîsi gu nî ǁîba sâu, mû bi gu kao.

¹⁴Tsî sîsenaogu ge mû bi, o gu ge ǃhoaǀîgu, tsî ge mî: Nēb kom ǀumi-aobao, hā î ge ǃgam bi, îs ǀumisa sage di.

¹⁵O gu ge ǂauxûiǂûǃhanab ǃaugaba ǃoa aoǂui, tsî ge ǃgam bi. Tare-eb ǁnâi ǂauxûiǂûǃhanab di ǀhonkhoeba ǁîga dī?

¹⁶Hā tsîb kom nē sîsenaoga hîkākā, tsî nî ǂauxûiǂûǃhanaba ǀkharaga māo. Tsî nēsa gu ge ǁnâu, o gu ge ge mî: Tātsē i kom ī tideo.

¹⁷Ob ge ǃgapaǀî gu, tsî ge mî: Tare-e ǁnâi nē xoahe hâ-e: “ǀUib, omǂnubi-aogu xa ge aoxūheb, ǁnāb ge ge ommiǁhôas di danaǀui kai?”

¹⁸Mâ-i hoa-i, ǁnā ǀuib ai ga ǁnā-i ge nîra ǂkhūǂkhūhe, tsî ǁî-i aib ga ǁnā-i, ǁnā-eb ge nîra hîkākā.

¹⁹O gu ge ǀgapipristergu tsî xoaǂansabegu tsîga ǁkhā iri ǃnâ, mati gu nî ǃommâiǀkhā bisa ge ôa-am, xawe gu ge ǁaesa ge ǃao, nē ǂkhōsab go ǁîgu xa mî ǃkhaisa gu ge ǁnâuǃā xui-ao.

²⁰O gu ge kōǀgara bi, tsî ǂhauǃnâgu ase ra dīsen ǃkhē-aoga ge sîǂui, mîs âb ǃnâ gu nî ǃkhō biga, î gu ga ǁîba ǂamkhoegu tsî ǃāǃkhōmâi-aob di ǀgaib ǃnâ māǁnâ, ti.

²¹O gu ge ǁîba dî, tsî ge mî: ǁKhāǁkhā-aotse, ǂan ge ge a, ǂhanusets ra ǃhoa tsî ǁkhāǁkhā ǃkhaisa, tsî khoe-i ībats ǃkhōǃoa tama ǃkhaisa, tsî Elob daobats ra amab ǃnâ ǁkhāǁkhā ǃkhaisa.

²²Sida xare, mā-amhe da hâ, Kaesara ǁgui-aimarisa māsa? Mā-amhe tama da hâ?

²³Tsî gāxaǃnâsib âgab ge ǂanǃnâguo, ob ge ǁîgu ǃoa ge mî: Tare-e go ra ǃâitsâ teba?

²⁴Denara ǁgau te! Tari-i di īb tsî xoamâisab ūhâ? O gu ge ǃeream, tsî ge mî: Kaesari dis komo.

²⁵Ob ge ge mîǀî gu: Î du ǁnâi Kaesara Kaesari di-e mā, tsî Eloba Elob di-e.

²⁶O gu ge ǁaes aiǃâ ǀgui mî-i xawe-i ǀkha ǃkhō bi ǁoa ge i; tsî ǃereams âb xa buru, tsî gu ge ge ǃnō.

²⁷Tsî gu ge ǀnî Sadusegu ge hā, khâi-i hâ tama ti ra mîga, tsî dî bi,

²⁸tsî ge mî: ǁKhāǁkhā-aotse, Moseb ge sida ge xoaba: Khoeb di ǃgâsab, tarasa ūhâb ga ǁō, tsîb ga ǀgôan ose ǁō, ob ge ǃgâsab âba tarasa nî ū, ǁîb ǃgâsabab nî suriba ǀkhī-ūbase.

²⁹O gu ge hû ǃgâsaga ge hâ i; tsîb ge ǂguroba tarasa ge ū, tsî ǀgôan ose ge ǁō

³⁰tsîb ge ǀgamǁîba tarasa ū, tsî ǁkhāti ǀgôan ose ge ǁō.

³¹Tsîb ge ǃnonaǁîba ǁîsa ge ū, tsî ǁnās ǁkhās khami hoa hûga; tsî gu ge ǀgôana ǁōǃgau tama ge i.

³²ǀUnis ai, hoagu khaoǃgâs ge taras tsîna ge ǁō.

³³Khâis ǃnâ ǁnâi, mâb ǁîgu dib di tarases nî ī? Hûgu hoagu kom ǁîsa taras ase ge ūhâ io.

³⁴Ob ge Jesuba ǃeream, tsî ge mîǀî gu: Nē ǃhūbaib di ôan ra ǃgame, tsî ǃgameb ǃoa ra māǂuihe,

³⁵xawe ǁnā ǃgoaxa ǃhūbaib tsî ǁō hâna xu khâis ǃnâ nî amǃnâxasa anu-anuhe hân kom ǃgame tideo tsî ǃgameb ǃoa māǂuihe tideo;

³⁶tsîn kom ǁkhāti ǃaruǀî a ǁō ǁoao; ǀhomǃgāgu ǀkhan ra ǀguiti-ī xui-ao, tsî Elob ôan ge ǁîna, khâis di ôan a amaga.

³⁷Tsî ǁō hân nîra ǂkhaiǂkhaihe ǃkhaisab ge ǁkhāti Moseba ǁkhūhais tawa ge ǁgau, ǃKhūbab ge Abrahammi di Elob, tsî Isaki di Elob, tsî Jakob di Elob, ti ǂgai ǃnubai.

³⁸Elob ge ǁō hân di Elo tamaba, tsîb ge a ûitsaman di. Hoan kom ǁîba ra ûibao.

³⁹O gu ge ǀnî xoaǂansabega ǃeream, tsî ge mî: ǁKhāǁkhā-aotse, ǃgâisets goro ǃhoa.

⁴⁰Tsî gu ge ǃaruǀî dītsâ tama ge i, ǁîba xū-e dîsa.

⁴¹Tsîb ge ǁîgu ǃoa ge mî: Matin kha, Xristub a Davib ôa, ti ra mî?

⁴²Davib ǂûb kom psalmǂkhanis ǃnâ ra mîo: Tsîb ge ǃKhūba ti ǃKhūb ǃoa ge mî: ǂNû ti amǀkhāb ǁôab ai,

⁴³sa khākhoena ta nî ǂaira âts di ǂnûi-aidas ase dīs kōse.

⁴⁴Tsî Davib ga: “ǃKhūb” ti ǂgai bio, matib a ǁnâi ǁîb di ôa?

⁴⁵Tsî ǁaes hoas ra ǁnâu, hîab ge ǁkhāǁkhāsabegu âb ǃoa ge mî:

⁴⁶Xoaǂansabega ǂanbasen re, gaxu saragu ǃnâ ǃgûmas, tsî ǁamaxūǃkhaidi tawa tawedehes xa ǃgâibahega, tsî ǂguro ǂnûǃkhaide sinagogegu ǃnâ, tsî aiǂnûǃkhaide ǂûǁaedi ǃnâ ǀnamga,

⁴⁷ǃoataradi di omde ra hapuga, tsî ǂhauǃnâdīsens ǃaroma gaxu ǀgorede ra dīga; ǁîgu ge ǃnāsa ǀgoraǃgâ-e nîra hō.