Read Khoekhoegowab Lukab 21 Bible Online

Lukab 21 - Khoekhoegowab bible

Lukab 21

¹Tsî ǃgapakhâib ge, ob ge, matin ǃkhū hâna mādi âna ǁuiǂgaes ǃnâ ra aoǂgā ǃkhaisa ge mû.

²Tsîb ge ǁkhāti ge mû, matis ǂanǂansa, ǀgâsa ǃoatarasa ǀgam ǂkhari marirora ra aoǂgāsa,

³Ob ge ge mî: Amase ta ra mîba du, nē ǀgâsa ǃoataras go hoadu xa ǃnāsase aoǂgā ǃkhaisa.

⁴Naun hoan ge ǁîn di ǃnāǂamsiba xu Elob ǁguibadi tawa go aoǂgā; xawes ge ǁîsa tôasib âsa xu, ūs hâ ûixū-i hoa-e go aoǂgā.

⁵Tsî ǀnîgu ge tempeli xa mîo, îsa ǀuigu tsî ǃnarexūn ǀkhab anu-anuhe hâsa, ob ge ge mî:

⁶Nē go ra ǃgapaǀîn ǂama di ge tsēde nîra hā, ǁîdi ǃnâ ǀgui ǀui-i nau ǀui-i ai ǁnāxūhe tidede, khôaǁnâhe tidese ī-e.

⁷O gu ge dî bi, tsî ge mî: ǁKhāǁkhā-aotse, mâ ǁaen kha nēna nîra ī, tsî mâsa saos, nēn nîra ī ǁaeb disa?

⁸Ob ge ge mî: ǂAnbasen, î du tā ǂgaeǂhapuhe. ǂGuin kom ti ǀons ǃnâ hā, tsî nî mîo: Tita ge Xristuta, tsî: ǁAeb go ǀgū. Tā ǁnâi ǁîna sao.

⁹Tsî torogu tsî khâikhâisendi tsîn xa go ga ǁnâuo, tā ǃhuri, nēn aibe nîra ī xuige; xawes ge ǀamsa ǁnātimîsi hā tide.

¹⁰ǃNubaib ge ǁîgu ǃoa ge mî: Nē ǁaes ge nau ǁaes ǃoagu nîra khâi, tsî nē gaosisa nau gaosis ǃoagu;

¹¹tsî ǃkharaga ǃkhaidi ain ge ǃhūǂgubigu tsî ǃâtsūǀkhāgu tsî ǂhīǁōgu tsîna nîra ī, tsîn ge ǃaoǃaosa xūn tsî kai saodi tsîna ǀhomma xu nîra ī.

¹²Xawe nēn hoan aiǃân ge sadu ai ǃomgu âna ǁgui, tsî nîra ǃgôaǃgon du, tsî sinagogegu tsî ǃkhō-omgu ǃnâ nîra māǁnâ du, tsî du ge gao-aogu tsî ǃāǃkhōmâi-aogu tsîgu aiǃâ nîra ūsīhe ti ǀons ǃaroma.

¹³Tsî i ge nē mîdans ǃoa nîra hāǂam du.

¹⁴Sadu ǂgaogu ǃnâ ǁnâi ǂâibasen, mati du nî ǃeream ǃkhais xa du ǂhansen tidesa.

¹⁵Tita nîra mîdi tsî gā-aisib tsîna mā du, sado mâǃoa hân hoan ǃhoaǃoa tsî mâǃoa ǁoana xuige.

¹⁶Tsî du kom ǁgûn, tsî ǃgâsan, tsî khoeǃgâgun, tsî khoen ǂûn xa nîra māǁnâheo, tsîn kom ǀnîn âdo nîra ǃgamo.

¹⁷Tsî du kom hoan xa nîra ǁkhanheo, ti ǀons ǃaroma.

¹⁸Xawe i kom danas âdu di ǀû-i xare-e kā tideo.

¹⁹ǃNūǃnâxasib âdu ǃnâ du nî sadu ûiba hōbasen.

²⁰Tsî Jerusalems ra toroǂnubidi xa ǃnamiǂgāhe ǃkhaisa du ga mû, ǃnubai ǂan, ǁîs di hîǀhuruhes a ǀgū ǃkhaisa.

²¹ǃNubai an Judeab ǃnâ hâna ǃhommi ǃoa ǁhâ; tsî ǃās ǁaegub ǃnâ hâna an ǂoa; tsî ǃhanagu ai hâna, an tā ǁîs ǃnâ ǂgâ.

²²ǀKhaotsēdi ge nî ǁîde xui-ao, xoahe hân hoan nîra ǀoa ga.

²³Tsî tsūba di ǀgamǀkhā hâdi tsî daisi radi tsîde ǁnā tsēdi ǃnâ. Kai tsūǀkhāb ge ǃhūbaib ai nîra hâ, tsî kai ǁaiba nē ǁaes ǂama.

²⁴On ge gôab di ǀāba xu nîra ǁnā, tsî ǁaedi hoadi ǃoa nîra ūǃgûhe; tsîs ge Jerusalemsa ǁaedi xa nîra dāǃgâhe, ǁaedi di ǁaegu nîra ǀoas kōse.

²⁵Tsî di ge saode nîra ī sores ai, tsî ǁkhâb ai, tsî ǀgamiron tsîn ai; tsî ǃhūbaib aib ge ǁaedi di ǂōǂōsiba ǂhansens ǀkha nîra hâ, hurib tsî ǃgabigu tsîn di ǀōb ama.

²⁶Tsîn ge khoena ǃaob tsî ǃhūbaib ai nî hā xūn di ǃâus xa nîra ǀhūǁō, ǀhommi di ǀgaigu nîra ǁnopeǁnopehe xui-ao.

²⁷Tsî ǁnāǃnubain ge Khoen Ôaba nîra mû kai ǀgaib tsî ǂkhaisib tsîkha ǀkha ǀnanu-i ai ǃgoaxase.

²⁸Tsî nēn ga ītsoatsoa, ǃnubai ǃgapakhâi, î danadi âdo ǃhâkhâi, sadu ores go ǀgū xuige.

²⁹Tsîb ge ǂkhō-e ǁîgu ǃoa ge mî: ǀNomahais tsî haidi hoade kōǀî re:

³⁰ǁÎdi ra ǁhao ǃkhaisa du kara mû, o du kom aitsama a ǂano, ǁkhūnab ǀnai ǀgūse hâ ǃkhaisa.

³¹ǁNās ǁkhās khami, nēn ra ī ǃkhaisa du ga mû, ǃnubai ǂan, Elob gaosib go ǀgū ǃkhaisa.

³²Amase ta ra mîba du, tātsēs ge nē ǃhaosa ǃgôa-ī tide, hoan nîra īs kōse.

³³ǀHommi tsî ǃhūbaib tsîkha ge nîra ǃgôa-ī, xawe di ge ti mîde tātsē ǃgôa-ī tide.

³⁴ǂAnbasen, î du sadu ǂgaoga tā ǃgomǃgomhe, ōs tsî ākhanus tsî nē ǃhūbaib di ǂhansenaidi tsîn ǀkha, îs tā ǁnā tsēsa ǃnapetama du hâse ǁnoa-i xase hāǂam du;

³⁵ǃhūbaib ai ǁan hân hoan ǂamab nîra hā xuige.

³⁶ǂKhaikari ǁnâi hâ re, mâ ǁaeb hoaba, î ǀgore re, ī nîra xūn hoana ǁhâxū, tsî du nî Khoen Ôab di ais aiǃâ mâ ǁkhāga.

³⁷Tsîb ge tsēa tempeli ǃnâ gere ǁkhāǁkhā, tsî tsuxuba ǂoa, tsî ǁnā ǃhommi, ǀKheraǃhommi ti ra ǂgaiheb ai ge hâǂkhai.

³⁸Os ge ǁaes hoasa ǃnauǁgoaga tempeli ǃnâ ǁîb tawa ge sī, ǁnâu nîse.