Read Khoekhoegowab Lukab 22 Bible Online

Lukab 22 - Khoekhoegowab bible

Lukab 22

¹Tsîs ge ǀkhuruǀkhuruhe tama peren di kaitsēs, Pasxa ti ra ǂgaihesa ǀgū ge i.

²Tsî gu ge ǀgapipristergu tsî xoaǂansabegu tsîga ge ôa-am, mati gu nî ǃgam bisa; ǁaesa gu ge ǃao xui-ao.

³Tsîb ge Satanna Judab, Iskarioǁîb ti ra ǂgaiheb, disiǀgamǀagu di ǀgui ge ib ǃnâ ge ǂgâ.

⁴Ob ge ǃgû, tsî ǀgapipristergu tsî danakhoegu tsîgu ǀkha ge ǃhoa, matib nî ǁîba māǁnâ gu ǃkhaisa.

⁵O gu ge ǃgâiaǂgao, tsî ǁîb ǀkha ge ǀgui, mari-e gu nî mā bisa.

⁶Ob ge mîmâi tsî ǃgâiga ǁaeba ge ôa-am ǂkhupi-i oseb nî ǁîga māǁnâ bise.

⁷Tsî ǀkhuruǀkhuruhe tama peren di tsēs ge hā, Pasxaǁkhaob nî ǁîs ai ǂāhesa,

⁸ob ge Petrub tsî Johaneb tsîkha sî, tsî ge mî: ǃGû, î Pasxaǁkhaoba sage ǂhomiba re, î ge ǂû.

⁹O kha ge ǁîb ǃoa ge mî: Mapa khom nî ǂhomisats ra ǂgao?

¹⁰Ob ge ge mîǀî kha: Mû, ǃās ǃnâ kho ra ǂgâ, hîab ge ǁgamsoa-e ra tani khoeba sakho nî ǃoa; î kho ǂgâb nî oms ǃoa sao bi;

¹¹î oms ǀhonkhoeba mîba: ǁKhāǁkhā-aob ra mîba kai tsi: Mapas ǃnā-omsa hâ, Pasxaǁkhaoba ta nî ti ǁkhāǁkhāsabegu ǀkha ǂûǃnâsa?

¹²Ob ge kai ǃnā-oms, ǂhomihe hâsa nî ǁgau kho; ǁnāpa ǂhomi re.

¹³O kha ge ǃgû, tsî ǁîb go mîba kha khami hō, tsî Pasxaba ge ǁāǁā.

¹⁴Tsî iri ge hā, ǃnubaib ge tāb tawa ge ǂnû, tsî disiǀgamǀa apostelga ǁîb ǀkha.

¹⁵Tsîb ge ǁîgu ǃoa ge mî: Kaise ta ge ge ǁkhore, nē Pasxaǁkhaoba ta nî sago ǀkha ǂûsa, tsâ ta nîs aiǃâ.

¹⁶Mîba go ta ra xui-ao, ǃaruǀî ta ǁîb xa ǂû tide ǃkhaisa, Elob gaosib ǃnâ i nî dīǀoaǀoahes kōse.

¹⁷Ob ge ǀgabisa ū, tsî gangan, tsî ge mî: Nēsa ū, î ǁîsa sago ǃnâ ǀgora;

¹⁸mîba go ta ra xui-ao, nēsisa xu ta ǂauxûiǂûhais di ǂûn xa ā tide ǃkhaisa, Elob gaosib nîra hās kōse.

¹⁹Tsî pereba ū, tsîb ge gangan, tsî mā gu, tsî ge mî: Nēs ge ti soros, sago ǃaroma ra māhesa; dī nēsa ti ǂâiǂâisensa ǃoa.

²⁰ǁNās ǁkhās xaseb ge ǀgabisa ū tsuxuǂûs khaoǃgâ tsî ge mî: Nē ǀgabis ge ǀasa ǃgaeǀhaosa ti ǀaob ǃnâ, sago ǃaroma ra ǂnâxūheba.

²¹Xawe mû, ǀapexū te rab di ǃommi ge tita ǀkha tāb tawa hâ.

²²Tsî Khoen Ôab ge ǂnûibaheb hâ khami ra ǃgû, xawe tsūba bi ǁnā khoeb, ǁîba ra ǀapexūba.

²³O gu ge ǁîgu ǃnâ ge dîgutsoatsoa, tarib âgu nîsa, ǁnāsa nîra dība.

²⁴Tsî i ge ǁkhāti ǂnoagu-ai-e ǁîgu ǃnâ ge hā, tarib âgu ga hoagu xa kaib ase ǃgôahe ǃkhaisa.

²⁵Ob ge ge mîǀî gu: ǁAedi di gao-aogu ge ǁîna ra gaoǂam, tsî ǁîn ǂama ǀgaiba ūhâgu ge ǃgâidī-aogo, ti ra ǂgaihe,

²⁶xawe go ge sago ǁnāti ī tide; ab sago ǃnâ hoagu xa kaiba hoagu xa ǂkharib ase ī, îb ai-aiba raba ǃoabasabese ī.

²⁷Tariba ǁnâi ǃnāsase kai, tāb tawa ra ǂnûba? ǃOaba raba? Tāb tawa ra ǂnû tamaba? Xawe tita ge sago ǃnâ ǃoaba rase īta.

²⁸Tsî sago ge ǁîgo, tita ǀkha ti ǃâitsâdi ǃnâ ge hâǃganugo.

²⁹O ta ge sago gaosiba ra mîmâiba, ti Îb ge ǁîba tita mîmâiba khami,

³⁰Ti tāb ai go ǂû tsî nî āse gaosib âtab ǃnâ, tsî trondi ai ǂnû tsî go nî disiǀgamǀa ǃhaodi, Israelǁîn dide ǀgoraǃgâse.

³¹Tsîb ge ǃKhūba ge mî: Simontse, Simontse, mû, Satanni ge sago ge ǂganǂuibasen, ǃhorob khamib nî ǀgora gose.

³²Xawe ta ge satsa ge ǀgoreba, ǂgoms âts ǀuni tidese; îts ǁnâi, ǀguitsēts ga ǃhobaseno, ǃgâsagu âtsa ǀgaiǀgai.

³³Ob ge ge mîǀî bi: ǃKhūtse, sats ǀkha ta ǂhomisen hâ, ǃkhō-oms ǃnâs kas, ǁōb ǃnâs kas hoasa ǂgâsa.

³⁴Ob ge ge mî: Mîba tsi ta ra, Petrutse, anib ge nētsē ā tide, ǃnona ǃnādets nî, titats a ǂan ǃkhaisa ǀūs kōse.

³⁵Tsîb ge ǁîgu ǃoa ge mî: Sago ta ge mariǁhō-i, tsî ǃkhoa-i, tsî ǁharon ose sîǂui ǃnubai, tôasi go ge xū-e? O gu ge: Tātsē, ti ge mî.

³⁶Ob ge ge mîǀî gu: Xawe nēsi, mariǁhō-e ūhâba ab ū, ǁnās ǁkhās khami ǃkhoa-e ūhâba, tsî ūhâ tamaba, ab sarab âba ǁamaxū, îb gôa-e ǁamabasen.

³⁷Mîba go ta ra xui-ao, nē-i, tita xa xoahe hâ-i tita ǃnâ nîra ǀoa ǃkhaisa: “ǂHanuoǃnân ǀkhab ge ǃgôahe hâ” ti mî-e, tita xa xoahe hân ǀam-e ūhâ xui-ao.

³⁸O gu ge ge mî: ǃKhūtse, mû, nē kha ge ǀgam gôakha hâ. Ob ge: ǂÂu hâ, ti ge mîǀî gu.

³⁹Tsî ǂoab ge, ob ge ǁnaetib âb ǃoa ǀKheraǃhommi ǃoa ge ǃgû, tsî gu ge ǁkhāti ǁkhāǁkhāsabegu âba ge sao bi.

⁴⁰Tsî ǁnā ǃkhais tawab ge sī, ob ge ǁîgu ǃoa ge mî: ǀGore, î go tā ǃâitsâb ǃnâ ǂgâ.

⁴¹Ob ge ǀui-i ra ǂnoahes kōse ǁîga xu ge bē, tsî ǃhonǁgoa, tsî ǀgore,

⁴²tsî ge mî: Abotse, ǂgaots karao, nē ǀgabisa tita xu ūbē re; xawe as tā ti ǂâisa ī, îs sa ǂâisa ī re!

⁴³Tsîb ge ǀhomǃgāba ǀhomma xu ǂhai, tsî ge ǀgaiǀgaiǃnâ bi.

⁴⁴Ob ge ǃgaugus ǃnâ sī, tsî ǁnās ǃgâ-ai ǀgaisase ge ǀgore. Tsîb ge aosenni âba ǀaoǁgamrodi ase ǃhūb ai ge ǁnā.

⁴⁵Tsî ǀgoresa xub ge khâio, ob ge ǁkhāǁkhāsabegu âb tawa sī, tsî ǃoab xa ǁom hâse hō gu,

⁴⁶tsî ge mîǀî gu: Tarexa go ra ǁom? Khâi, î ǀgore, î go tā ǃâitsâb ǃnâ ǂgâ.

⁴⁷Tsî ganupeb ra ǃhoa hîa, mû, os ge ǂnubisa ge hā; tsî disiǀgamǀagu di ǀguib, Judab ti ra ǂgaiheb ge ai-aiba gu; tsîb ge Jesuba ge ǀgū, ǁoa bib nîse.

⁴⁸Ob ge Jesuba ge mîǀî bi: Judatse, ǁoa-i ǀkhats kha Khoen Ôaba ra ǀapexū?

⁴⁹Tsî ǁîb tawa hâgu ge, tare-i ra ī ǃkhaisa mûo, o gu ge ge mîǀî bi: ǃKhūtse, gôab ǀkha ge nî ǂnau?

⁵⁰Tsîb ge ǁîgu di ǀguiba ǀgapipristeri di ǃgāba ǂnau, tsî amǀkhāb ǂgaes âba ge ǂnauǁnâ.

⁵¹Ob ge Jesuba ǃeream, tsî ge mî: Tā dī! ǂÂu go xuige. Tsîb ge ǂgaes âba tsâǀkhā, tsî ge ǂgauǂgau bi.

⁵²Tsîb ge Jesuba ǁîb ǃoagu go hā ǀgapipristergu, tsî tempeli di danakhoegu, tsî kaigu tsîgu ǃoa ge mî: ǃGam-ao-i ǃoas khami go go ǂoa, gôagu tsî haigu tsîn ǀkha.

⁵³Tsēkorobe ta ge sadu ǀkha tempeli ǃnâ ge hâ i, tsî du ge ǃomma tiǀî ǀhōǂui tama ge hâ i; xawe nēb ge sadu di iri, tsî ǃkhaenab di ǀgaiba.

⁵⁴O gu ge ǃkhō tsî ge ūǃgû bi, tsî ǀgapipristeri di oms ǃoa ge ūsī bi. Tsîb ge Petruba ǃnūseba xu ge sao.

⁵⁵Tsî ǀae-en ge ai-ommi ǁaegub ǃnâ khau, tsî ǀhûpe ǂnôa io, ob ge Petruba ǁîn ǁaegu ge ǂnû.

⁵⁶Tsî ǂanǂansa ǃgās ge ǁîba ǀaes tawa ǂnôase mû, os ge ǃgapaǀî bi, tsî ge mî: Nēb on kom ǁîb ǀkha go hâ io,

⁵⁷xaweb ge ǁîba ǀoa, tsî ge mî: ǂAn bi tama ta hâ, tarase.

⁵⁸Tsî ǂomxa tama i ǁnās khaoǃgâb ge ǀnîba mû bi, tsî ge mî: Sats on kom ǁîgu ditsao; xaweb ge Petruba ge mî: Khoetse, ǁîgu di tama ta hâ.

⁵⁹Tsî ǀgui nî ī iri ge ǃgôa-īo, ob ge ǀnîba ǃkhō-am, tsî ge mî: Amase, nēb on go ǁîb ǀkha hâ i: Galileaǁîb komo.

⁶⁰Ob ge Petruba ge mî: Khoetse, ǀū ta a, tare-ets ra mîsa. Tsî ǁnātimîsi, ganupeb ra ǃhoa, hîab ge aniba ge ā.

⁶¹Ob ge ǃKhūba ǂnan, tsî Petruba ge kōǀî. Ob ge Petruba ǃKhūb mîsa ge ǂâihō, matib ge mîba bisa: Anib nî ās aiǃâts ge ǃnona ǃnāde nî ǀūxū te.

⁶²Ob ge ǃaugaba ǃoa ǂoa tsî ause ge ā.

⁶³Tsî khoegu, Jesuba ge ǃkhōgu ge ǁîba ǃhō, tsî ge ǂnau,

⁶⁴tsî ǃgū-ai bi, tsî ge dî bi: Kēbo, tarib a ǃkhaisa, satsa go ǂnauba.

⁶⁵Tsî ǀnîn ǂguina gu ge ǃkhāǃkhā bi rase ge mîǀî bi.

⁶⁶Tsî ǁgoa i ge, o gu ge ǁaes di kaigu tsî ǀgapipristergu tsî xoaǂansabegu tsîga ge ǀhû, tsî ǁîba ǀapeǀhaos âgu ǃnâ ūhā

⁶⁷tsî ge mî: Xristuts kao, mîba ge re. Ob ge ge mîǀî gu: Mîba go ta ka xawe go ǂgom tide;

⁶⁸tsî dî ta ka, xawe go ǃeream tsî xū te tide.

⁶⁹Nēsisa xub ge Khoen Ôaba nî ǂnû amǀkhāb ǁôab Elob ǀgaib dib tawa.

⁷⁰O gu ge hoaga ge mî: Elob Ôatsa kha ǁnâi satsa? Ob ge ǁîgu ǃoa ge mî: Mî go ge ra, ǁî ta kom titao.

⁷¹O gu ge ge mî: Mâ ǃkhō-am-i ǀnî-e ge ǂhâba hâ? Aitsama ge kom ams âba xu go ǁnâuo.