Read Khoekhoegowab Lukab 23 Bible Online

Lukab 23 - Khoekhoegowab bible

Lukab 23

¹Tsîs ge ǁîn di ǂnubis hoasa khâi, tsî Pilatub ǃoa ge ūǃgû bi.

²Tsîn ge ǀhapiǀhapi bitsoatsoa, tsî ge mî: Nēba da kom ge hō, ǁaesa ra ǂgaeǁnâb, tsî Kaesara ǁgui-aimarisa māsa ra ǃkhâib ase, tsî ǁî-aitsama: Xristuta, gao-aota, ti ra mîb ase.

³Ob ge Pilatuba dî bi, tsî ge mî: Jodeǁîn gao-aotsa satsa? Ob ge ǃeream bi tsî ge mî: Sats go mî.

⁴Ob ge Pilatuba ǀgapipristergu tsî ǁaes tsîn ǃoa ge mî: ǀHapi-i xare-e ta ge nē khoeb ǃnâ hō tama hâ.

⁵On ge ǁgarisase ge mî: ǁAesab kom ra gongono, Judeab hoaragab ǃnâ ra ǁkhāǁkhāǃâ, Galileaba xu tsoatsoa tsî nēpas kōse.

⁶Tsî Pilatub ge ǁnâu, ob ge ge dîǃā, īseb khoeba a Galileaǁî ǃkhaisa.

⁷Tsî Herodeb di gaosa xub hâ ǃkhaisab ge ǁnâuǃā, ob ge Herodeb, aitsama ǁkhāti ǁnā tsēdi ai Jerusalems ǃnâ ge hâ ib ǃoa ge sî bi.

⁸Ob ge Herodeba, Jesubab ge mûo, kaise ge ǃgâiaǂgao, ǀnaisa xub ge mû bi ǂgao hâ i xui-ao, ǂguinab ge ǁîb xa ǁnâu, tsî ǁîb xa nî dīhe sao-eb nî mûseb gere ǃâubasen amaga.

⁹Ob ge ǂgui mîdi ǀkha ge dî bi; xaweb ge ǁîba ǀgui xū-i xare-e ǃeream bi tama ge i.

¹⁰Tsî gu ge ǀgapipristergu tsî xoaǂansabegu tsîga mâ, tsî ǀûs ose ge ǀhapiǀhapi bi.

¹¹Ob ge Herodeba ǁîb di toro-aogu ǀkha ǃharaxū bi tsî ge ǃhō bi, ǃuri sara-e ana, tsî ǁkhawa Pilatub ǁga ge sî bi.

¹²O kha ge Pilatub tsî Herodeb tsîkha ǁkhā tsēs ai ge khoexagu; aibe kha kom khākhoebagu ge io.

¹³Ob ge Pilatuba ǀgapipristergu, tsî danakhoegu, tsî ǁaes tsîna ǂgaiǀhao,

¹⁴tsî ǁîn ǃoa ge mî: Nē khoeba du go ūhāba te, ǁaesa ra ǂgaeǁnâb ase; tsî mû, tita ge sadu aiǃâ goro dîǃnâ bi, tsî ǁnā ǀhapi-i, sadu ra ǀhapiǀhapi bi-e ǁîb ǃnâ hō tama hâ;

¹⁵tsî Herodeb on ge hō tama, sage ǃoab ǁkhawa go sî bi xui-ao; tsî mû, ǁōba anu hâ xū-e kom ǁîb xa dīhe tamao.

¹⁶O ta ge ǁkhara tsî nî ǁnāxū bi.

¹⁷Tsîb ge kaitsēs di ǁaeb ai ǀguibab nî ǁîna ǁnāxūbasa ǁnaeti ge hâ i.

¹⁸Os ge ǂnubis hoaragasa ǀguiǂgai, tsî ge mî: Ūbē nēba, î Barababa xūba da!

¹⁹ǃĀs ǃnâ ge ǃnae gongonǃnâ-i tsî ǃgam-i ǃaroma ǃkhō-oms ǃnâ aoǂgāhe hâ khoeb ge ǁnāba ge i.

²⁰Ob ge Pilatuba ǁkhawa ǁîn ǃoa ge ǃhoa, Jesuba ǁnāxū ǂgao tsî.

²¹Xawen ge ǁnās ǃoagu ǂgai, tsî ge mî: ǃGâu bi! ǃGâu bi!

²²Ob ge ǃnonaǁî ǃnās ai ǁîn ǃoa ge mî: Okha, mâ tsū xū-eb ǁnâi nēba dī hâ? ǁŌba anu hâ ǀhapi-e ta ǁîb ǃnâ hō tama, xui-ao ta ǁkhara tsî nî ǁnāxū bi.

²³Xawen ge ǃaruǀîǀgui ǃgari dommi ǀkha ge ǂgaoǀkhā hâhâ, ǃgâuheb nîsa; tsîs ge ǂgais ân tsî ǀgapipristergu tsîn disa kaise ge ǀgaisa.

²⁴Ob ge Pilatuba ge ǀgoraǃgâ, ǂgans ân nî īsa;

²⁵Ob ge gongonǃnâ-i tsî ǃgam-i ǃaroma ǃkhō-oms ǃnâ ge aoǂgāhe hâ ib, ǁîn goro ǂgaoba ge ǁnāxū; tsî Jesubab ge ǁîn di ǂâibaens ǃnâ ge māǁnâ.

²⁶Tsî ūǃgû bin garu hîan ge ǂanǂansa Simonni, Kireneǁîb, ǃaugaba xu ra hāba ū, tsî ǃgâuhaiba ge ǁgui-ai bi, Jesubab nî taniba bise.

²⁷Tsî kai ǁaes tsî taradi tsîn ge ge sao bi, ǁîb ǂama ā tsî ra ǃgaede.

²⁸Ob ge Jesuba ǁîdi ǃoa ǂnan tsî ge mî: Jerusalems ôaso, tā tita āba, xawe saso tsî saso ôan ǂama ā.

²⁹Mû, tsēdi ge nîra hā, ǁîdi ain nî mîde: ǃGâiǃōdi ge ǁora tamade, tsî ǃnāgu hîa ǀgôa-e hō tamaga, tsî samdi hîa daisi tamade.

³⁰ǃNubain ge ǃhomgu ǃoa: ǁNā-ai da re tsî ǃnomgu ǃoa: ǃGū-ai da re! ti nîra mîtsoatsoa.

³¹Nēnan ra ǃam haib ai dīo, tare xū-e ǁnâi ǂnâsab ǀkha nî ī?

³²Tsî kha ge ǁkhāti ǀgam tsūdī-aokha ge ūǃgûhe, ǁîb ǀkha nî ǃgamhese.

³³Tsî ǃkhais, danaǂkhōdi ǃās ti ra ǂgaihes tawan ge sī, o gu ge ǁnāpa ge ǃgâu bi, tsî tsūdī-aokha ona, ǀguiba amǀkhāb ai, tsî nauba ǁareǀkhāb ai.

³⁴Ob ge Jesuba ge mî: Abotse, ǀûba in re, tare-en ra dīsan a ǀū xuige. Tsî gu ge saran âba ge ǀgoragu, ǂnōgusa ao tsî.

³⁵Tsîs ge ǁaesa mâ, tsî gere ǃgapa. Tsî gu ge ǁkhāti danakhoega ǁîn ǀkha ǁam bi, tsî ge mî: Naunab gere hui, ab ǁî-aitsama huisen, Xristub, Elob di ǃkhōǂuibasensab ka io.

³⁶Tsî gu ge ǁkhāti toro-aoga ǁîba ǃhō, tsî ǃgûsī tsî ǀkhuru xûi-e ūsība bi

³⁷tsî ge mî: Jodeǁîn gao-aots ka satsao, ǁî-aitsama huisen.

³⁸Tsî i ge ǁkhāti xoamâi-e ǁîb ǂama xoahe ge hâ i, Grikeǁî tsî Romeǁî tsî Hebreǁî xoamûdi ǀkha: Nēb ge gao-aob Jodeǁîn diba, ti.

³⁹Tsîb ge ǂgāmâihe hâ tsūdī-aokha di ǀguiba ǃkhāǃkhā bi, tsî ge mî: Xristuts kao, ǁî-aitsama huisen tsî sikhom ona.

⁴⁰Ob ge nauba ǃeream tsî ǃgabe bi, tsî ge mî: Sats ona kha Eloba ǃaoǃgâ tama hâ, ǁkhā ǀgoraǃgâs ǃnâts hâ hîa?

⁴¹Tsî sakhom ge ǂhanuse ǁîs ǃnâ hâ, dī khom gena anu hâ-e khom ra ǃkhōǃoa xui-ao; xawe nēb ge tsū xū-e dī tama hâ.

⁴²Ob ge Jesub ǃoa ge mî: ǂÂi te re, ǃKhūtse, sa gaosib ǃnâts ga sīo.

⁴³Ob ge Jesuba ǃeream tsî ge mîǀî bi: Amase, ta ra mîba tsi, nētsēts ge tita ǀkha paradais ǃnâ nîra hâ.

⁴⁴Tsî i ge ǃnaniǁî nî ī iri ai ge ī, ob ge ǃkhaenaba ǃhūbaib hoab ai ge hâ, khoeseǁî iri kōse.

⁴⁵Os ge soresa ge ǃkhae, tsî ǂgāmâisab tempeli dib ge ge doaǃā, ǁaegub ǃnâ.

⁴⁶Tsî Jesub ge kai dommi ǀkha ǂgai, tsî ge mî: Abotse, sa ǃomkha ǃnâ ta ge ti gagasa ra māǁnâ; tsî nēna mî tsîb ge gagasa ge mā.

⁴⁷Tsî kaidisigu danakhoeb ge ī go-e mû, ob ge Eloba kare tsî ge mî: Amase, nē khoeb ge ǂhauǃnâ go i.

⁴⁸Tsî ǁaes hoas, nēnas nî mûse go ǀhûs ge ī gona mû, os ge ǁkhaib ai ǂnau tsî ge oa.

⁴⁹Tsîn ge ǁîb di ǂansaben hoana ǃnūse ge mâ i, tsî Galileaba xu gere sao bi taradi ona, tsîn ge nēna gere ǃgapa.

⁵⁰Tsî mû, khoeb, Jose ti ǀon hâb, ǀapemā-aob, ǃgâi tsî ǂhauǃnâ khoeb,

⁵¹ǁîgu di ǀapeǀhaos tsî dīs ǀkha ge ǀgui tama hâ ib, Arimateas, Jodeǁîn ǃās dib, ǁkhāti ǁî-aitsama Elob gaosiba ra ǃâub,

⁵²ge Pilatub tawa ǂgâ, tsî Jesub sorosa ge ǂgan.

⁵³Tsîb ge ūǁnâ, tsî ǃuri ǃkhaib ǃnâ ge ǃgami si, tsî ǃhaob ǃnâ ǁhāǂgāhe hâ ǁao-i, tātsē i ge khoe-e ǁguiǃnâhe tama hâ i-i ǃnâ ge ǁgui si.

⁵⁴Tsîs ge aiǂhomisentsē ge i, tsîs ge sâtsēsa ge tsoatsoa.

⁵⁵Tsî di ge ǁkhāti taradi, Galileaba xu ǁîb ǀkha ge hā hâ ide sao, tsî ǀhobasa ge kō, tsî matis soros âba ge ǁguihesa.

⁵⁶Tsî oa tsî di ge ǃgâihamxūn tsî ǂkhauxūna ge ǂhomi; tsî sâtsēs ai di ge mîmās ǃoa ge sâ.