Read Khoekhoegowab Lukab 24 Bible Online

Lukab 24 - Khoekhoegowab bible

Lukab 24

¹Tsî ǂguro tsēs wekheb dis ai di ge ǃnauǁgoaga ǀhobas tawa sī, tsî ǂhomi di go ǃgâihamxūna ge ūsī, tsî ǀnîde ǁîdi ǀkha.

²Tsî di ge ǀuisa ǀhobasa xu gababēhe hâse ge hō.

³Tsî ǂgâ di ge, o di ge ǃKhūb Jesub di sorosa hō tama ge i.

⁴Tsî i ge ge ī, ǁîs xa di ge îganǀgēo, mû, o kha ge ǀgam khoekha ǂkhai ra saran ǃnâ ǁîdi tawa ge mâ i.

⁵O di ge ǃhuri, tsî aidi âde ǃhūb ai ge ǃgam. O kha ge ǁîdi ǃoa ge mî: Tare-i ǃaroma so ûitsamaba ǁō hân tawa ra ôa?

⁶Nēpab a ǀkhai, khâib go. ǂÂi, matib ge sadu ǃoa ǃhoasa, Galileab ǃnâb gorose hâ hîa:

⁷Khoen Ôab ge ǁore-aon di ǃomǁae māǁnâhe, tsî nîra ǃgâuhe, tsîb ge ǃnonaǁî tsēs ai nîra khâi.

⁸O di ge mîdi âb xa ge ǂâi.

⁹Tsî ǀhobasa xu oa, tsî di ge nēn hoana disiǀguiǀagu tsî naun hoana ge sī ǂhôa,

¹⁰tsî di ge nēde ge hâ i: Maria Magdalenas, Johanas, Marias, Jakobub îs, tsî ǀnîde ǁîdi ǀkha, nēna apostelga ge mîbade.

¹¹Tsî di ge mîdi âde ǁau ǃhoa-ain axase ge ība gu, tsî gu ge ǁîde ǂgom tama ge i.

¹²Ob ge Petruba khâi, tsî ǀhobas ǃoa ge ǃkhoe, tsî ǃgamǃgâb ge, ob ge ǃuri ǃkhaina ǀguri ǁgoese ge mû, tsî ǁîb ǂûb ǃnâ ī go-i ǂama buru hâse ge oa.

¹³Tsî mû, ǁkhā tsēs ai kha ge ǁîgu di ǀgamkha ǃāros, disiǀguiǀa kilometerde Jerusalemsa xu hâs, Emaus ti ǀon hâs ǃoa ge ǃgû.

¹⁴Tsî kha ge ī gon hoan xa gere ǃhoa-ūgu.

¹⁵Tsî i ge ge ī, ǃhoa-ūgu tsîkha ra dîǃnâgu, hîab ge Jesub ǂûba ǀgūse hā, tsî ǁîkha ǀkha ǃgû ǃkhaisa.

¹⁶Xawe di ge mûdi âkha ge ǁkhaesa i, tsîkha ge mûǂan bi tama ge i.

¹⁷Ob ge ǁîkha ǃoa ge mî: Mâ mîǃnôade kha nēde, ǃgûgaruǃâ kho ra ǃhoa-ūgude, tsî tarexa kho ǃoa hâse ī?

¹⁸Ob ge ǀguib, Kleofab ti ǀon hâba ǃeream, tsî ǁîb ǃoa ge mî: Sats ǀguitsa kha Jerusalems ǃnâ a ǃhaokhoe, tsîts nē tsēdi ai ǁîs ǃnâ go ī ǃkhaide a ǀū?

¹⁹Ob ge ge mîǀî kha: Mâde kha? O kha ge ge mîǀî bi: Jesub Nasareǁîb dide, sîsenni tsî mîdi tsîn ǃnâ ǀgaisa kēbo-ao ge iba, Elob tsî ǁaes hoas aiǃâ;

²⁰mati gu ge sada ǀgapipristergu tsî danakhoegu tsîga ǁōb di ǀgoraǃgâs ǃnâ māǁnâ bi, tsî ǃgâu bi ǃkhaisa.

²¹Tsî da ge sida ǃâu hâ i, ǁîb a ǁnāb, Israelǁîna nîra oreba ǃkhaisa; tsî ǁnāti ī xawes ge nēsa a ǃnonaǁî tsē nēn go īsa xu;

²²tsî di ge ǁkhāti ǀnî taradi sida dide go ǃhuri kai da, ǃnauǁgoaga ǀhobas tawa go sīde,

²³tsî soros âba di go hō tama i, ǃnubai di go hā, tsî mî, ǀhomǃgākha, ǁîb ûi hâ ti ra mîkha di ai-e di go mû ǃkhaisa.

²⁴O gu ge ǀnîgu sida diga ǀhobas tawa sī, tsî taradi goro mî khami go hō, xawe ǁîba gu ge mû tama go hâ i.

²⁵Ob ge ǁîkha ǃoa ge mî: Okha sa gâre tsî ǁgarasa ǂgaoba ūhâkho, kēbo-aogu ge mîn hoana ǂgomsa.

²⁶Xristuba kha nēna tsâ, tsî ǁnāti ǁîb di ǂkhaisib ǃnâ ǂgâb tide?

²⁷Tsî Moseb tsî kēbo-aogu hoaga xu tsoatsoa, tsîb ge ǁîkha xoadi hoadi ǃnâ ǁîb xa xoahe hâna gere ǁguiǃāba.

²⁸Tsî gauǀî gu a ǃārosa gu ge ǀgū, ob ge aiǃâb ǃoab ra ǃgûǁgase ge dīsen.

²⁹O kha ge ǁgūǀkhā bi tsî ge mî: Sikhom ǀkha hâ re, ǃui-i kom rao, tsî tsēs kom go toao. Ob ge ge ǂgâ, ǁîkha ǀkhab nî hâse.

³⁰Tsî i ge ge ī, ǁîkha ǀkhab tāb tawa ǂnôa, hîab ge pereba ū, tsî ǀkhae, tsî khôa tsî ǁîkha ge mā.

³¹O di ge mûdi âkha ge khowahe, tsî kha ge ge mûǂan bi, tsîb ge ǁîba ǁîkha xu ge kā.

³²O kha ge ge mîǀîgu: Sakhom ǂgaoba kha khauǃnâ khom tamab go hâ i, daob aib goro ǃhoa-ū khom, tsî xoadeb goro ǁguiǃāba khom ǃnubai?

³³O kha ge ǁkhā iri ai khâi, tsî Jerusalems ǃoa oa, tsî disiǀguiǀagu tsî ǁîgu ǀkha hân tsîna ǀhao hâse ge hō,

³⁴tsîn ge ge mî: ǃKhūb ge amase khâi hâ, tsî Simonni xa go mûhe.

³⁵O kha ge ǁîkha ona daob ai go īn, tsî matib go pereb di khôas ǃnâ ǁîkha xa mûǂanhe ǃkhaisa ge ǃhoaba.

³⁶Tsî nēn xan ra ǃhoa, hîab ge Jesub ǂûba ǁîn ǁaegu mâ, tsî ǁîna ge mîǀî: ǂKhîba ab hâǀkhā du!

³⁷On ge ǃhurib tsî ǃaob tsîkha xa ǀoa, tsî gaga-en ra mû, ti ge ǂâi.

³⁸Ob ge ǁîna ge mîǀî: Tarexa du go ǃhuri, tsî tare xū-i ǃaroma di nēti ī ǂâide sadu ǂgaogu ǃnâ go khâi?

³⁹Mû, ti ǃomkha tsî ti ǂaira. Tita ǁkhā ta komo. Tsâǀkhā te, î kō, gaga-i kom ǁgan-i tsî ǂkhōna ūhâ tamao, tita ūhâse du ra mû khami.

⁴⁰Tsî nēsa mî, tsîb ge ǃomkha tsî ǂaira tsîna ǁîna ge ǁgau.

⁴¹Tsî ganupen ǃgâiaǂgaob xa ǂgom tama i tsî ra buru, hîab ge ǁîna ge mîǀî: ǂÛxū-e nēpa ū du hâ?

⁴²On ge amhe hâ ǁau-i di ǃkhare-i tsî ǃom hâ dani-e ge mā bi.

⁴³Ob ge ū, tsî ǁîn di ais aiǃâ ge ǂû.

⁴⁴Tsîb ge ǁîna ge mîǀî: Nēdi ge ǁnā mîdi, ganupe ta sadu ǀkha hâ, hîa ta ge sadu ǃoa mîde, hoan nîra ǀoaǀoahese, tita xa Moseb di ǂhanub tsî kēbo-aogu tsî psalmdi tsîn ǃnâ xoahe hâna.

⁴⁵ǃNubaib ge ǁîna ǁnâuǃāba ge khowaba, xoaden nî ǁnâuǃāse.

⁴⁶Ob ge ǁîn ǃoa ge mî: Nēti xoahe hâ, tsî nētib ge Xristuba anu, tsâ tsîb ǃnonaǁî tsēs ai ǁōba xu khâi ǃkhaisa,

⁴⁷tsî ra nî ǁîb di ǀons ǃnâ aoǁnâhese ǃhobasens tsî ǁoren ǀûbas tsîra hoa ǁaedi ǃnâ, Jerusalemsa xu tsoatsoa tsî.

⁴⁸Tsî du ge sado nēn di ǀhûǀguitimî-ao.

⁴⁹Tsî mû, tita ge mîmâis ti Îb disa sadu ai nîra sî; o du ge ǃās Jerusalems ǃnâ nî hâ, ǀgaib ǀkha du ǀgapiseba xu nîra anahes kōse.

⁵⁰Tsîb ge ǁîna Betanis kōse ge ǂgaeǂguiǂui; tsî ǃomkha ūkhâi tsîb ge ǁîna ge ǀkhae.

⁵¹Tsî i ge ge ī, ǁînab ra ǀkhae, hîab ge ǁîna xu ǀgora, tsî ǀhommi ǃoa ūǃapahe ǃkhaisa

⁵²On ge ǁîba ǀgoreǀî, tsî kai ǃgâiaǂgaob ǀkha Jerusalems ǃoa ge oa.

⁵³Tsîn ge hūkaǀgui tempeli ǃnâ ge hâ i, Eloba ra koa tsî ganganǃâ.