Read Khoekhoegowab Lukab 3 Bible Online

Lukab 3 - Khoekhoegowab bible

Lukab 3

¹Tsî disikoroǀaǁî kurib Kaesar Tiberiub gaosis dib ǃnâ, Pontiub Pilatub ge Judeab ǃnâ ǃāǃkhōmâi-ao i ǃnubai, tsî Galileab ǂamab ge Herodeba hakaǁî ǃhūǃâs gao-ao i ǃnubai, tsî Filipub ǁîb ǃgâsab ge Itureab tsî Traxonitib hakaǁî ǃhūǃâs gao-ao i ǃnubai, tsî Lisaniab ge Abileneb hakaǁî ǃhūǃâs gao-ao i ǃnubai,

²Anab tsî Kajafab tsîkha ge ǀgapiprister i ǃnubais ge Elob di mîsa Johaneb, Saxariab ôaba ge hāba ǃgaroǃhūb ǃnâ.

³Ob ge Jordanna ǁgoeǂnamipe hâ ǃhūb ai sī, tsî ǁāǁnâs ǃhobasens dis, ǁoren ǀûbas ǃoa hâsa gere aoǁnâ.

⁴Xoahe hâ khami, ǂkhanis kēbo-aob Jesajab mîdi dis ǃnâ, nēti ra mîba: Dommi ǂgai rab dib ge ǃgaroǃhūb ǃnâ hâ: ǂHomi du ǃKhūb di daoba, î ǁîb di ǂgaroga ǂhauǂhau.

⁵Mâ ǃgoab hoab ge nîra ǀoaǀoahe, tsî mâ ǃhommi tsî ǃnommi hoab ge nîra ǂamǂamhe, tsî ǃhoan ge nîra ǂhanu, tsî ǀkhoa daogu ge nîra ǂhau-am dao kai.

⁶Tsî ǁgans hoas ge Elob di ǃgâiǃōsiba nîra mû.

⁷Tsîb ge ǁîb ǃoa ge ǂoaxa khoen, ǁîb xa ra ǁāǁnâkaisen ǂgaon ǃoa ge mî: Sa ǀaon ôado, tari-e sado ge ǁgau, ǃgoaxa ǁaiba du nî ǁhâxūsa?

⁸ǃHobasensa anu hâ ǂûna ǁnâi ūǀkhī; î tā: “Abrahamma da kom ǁgûse ūhâo” ti sadu ǃnâ mîtsoatsoa. Mîba du ta ra xuige, Elob a ǁkhā ǃkhaisa, nē ǀuina xu Abrahamma ǀgôana ǀkhī kaibasa.

⁹Tsî ǀnais ge ǁkhāti ǃōsa haidi ǃnomagu tawa ǁguihe hâ. Mâ hais, ǃgâi ǂû-e ǂûtani tamas hoas ge ǁhāǂuihe tsî ǀaes ǃnâ nî aoǂgāhe.

¹⁰Tsî ǂnubidi ge dî bi tsî ge mî: Tare-e da kha ǁnâi nî dī?

¹¹Ob ge ǃeream tsî ǁîn ǃoa ge mî: ǀGam anaxūra ūhâ-e, a-i ūhâ tama-e ǀgoraba! Tsî ǂû-e ūhâ-e, a-i ǁnās ǁkhās xase dī!

¹²Tsî mariǃkhōǃoa-aogu on ge hā, ǁāǁnâkaisen gu nîga, tsî ǁîb ǃoa ge mî: ǁKhāǁkhā-aotse, tare-e ge nî dī?

¹³Ob ge ge mîǀîgu: ǂNûibahe go hâ-i ǃgâ-ai tā ǂgaoǀkhā.

¹⁴Tsî toro-aogu on ge ǁîba dî tsî ge mî: Tsî sige, tare-e ge nî dī? Ob ge ǁîgu ǃoa ge mî: Tā khoe-e ǁkhâuǁnâ, î tā ǁgâiǀā, î sago amǃnâs ǀkha ǂkhî.

¹⁵Tsî ǁaes ge ge ǃâubasen hâ i, on ge hoana Johaneb xa ǂgaogu ân ǃnâ gere dîsen, iseb ǀnîsi Xristu tamasa.

¹⁶Ob ge Johaneba ǃeream tsî hoan ǃoa ge mî: Tita ge ǁgam-i ǀkha ra ǁāǁnâ du, xawe tita xa ǀgaisab ge ǃgoaxa, ǁharora âb di ǃhâurona xores xawesa ta anu tamaba, ǁîb ge ǃAnu Gagab tsî ǀaes tsîn ǀkha nîra ǁāǁnâ du.

¹⁷ǁÎb ge khâ-ū xapasa ǃommi âb ǃnâ ūhâ, ob ge dāǃnâǃharas âba nîra ǀkhaiǀkhaiǃnâ, tsî ǃhoroba ǁîb sâu-ommi ǃnâ nî ǀhaoǀhao tsî ǀhōba ǀarihe ǁoasa ǀaes ǀkha nî khauǃkhū.

¹⁸Tsîb ge ǁkhāti ǀnî xūn ǂguina ra ǁnamaǃâ ǁaesa ǃgâiǂhôasa gere aoǁnâ.

¹⁹Tsî Herodeb, hakaǁî ǃhūǃâs gao-aob ge ǁîb xa ǂgōǀauheo Filipub, ǁîb ǃgâsab taras ǃaroma, tsî Herodeb gere dī ǂkhaban hoan ǃaroma.

²⁰Ob ge naun hoan xōǀkhā nēs ona ge dī, Johanebab ǃkhō-oms ǃnâ ge ǂganam ǃkhaisa.

²¹Tsî i ge ge ī, ǁaes hoas ge ǁāǁnâheo, tsî Jesub on ge ǁāǁnâhe tsî ǀgoreo, ob ge ǀhomma ge ǁkhowa-amsen.

²²Tsî ǃAnu Gagab ge sorosi īsib ǃnâ ǂnabu-i axase ǁîb ai ge ǁgôaxa, tsî dommi ge ǀhomma xu ǀkhī, tsî ge mî: Sats ge a ti Ôa, ǀnam ta atsa, sats ǃnâ ta ge ǃgâiǃgâibasensa ūhâ.

²³Tsîb ge Jesuba, tsoatsoab geo, ǁaupexa ǃnonadisi kurixa ge i, tsîb ge khoen xa Joseb ôab ase ge ūhe hâ i. Joseb ge a Helib ôa,

²⁴tsî Matati ôa, tsî Levib ôa tsî Melxib ôa, tsî Jannaib ôa, tsî Joseb ôa,

²⁵tsî Matatiab ôa, tsî Amob ôa, tsî Nahummi ôa, tsî Eslib ôa, tsî Nagaib ôa,

²⁶tsî Maati ôa, tsî Matatiab ôa, tsî Semeib ôa, tsî Joseki ôa, tsî Jodab ôa,

²⁷tsî Joananni ôa, sî Resab ôa, tsî Serubabeli ôa, tsî Sealtieli ôa, tsî Nerib ôa,

²⁸tsî Melxib ôa, tsî Adib ôa, tsî Kosami ôa, tsî Elmadammi ôa, tsî Eri ôa,

²⁹tsî Josuab ôa, tsî Elieseri ôa, tsî Jorimmi ôa, tsî Matati ôa, tsî Levib ôa

³⁰tsî Simeonni ôa, tsî Judab ôa, tsî Joseb ôa, tsî Jonammi ôa, tsî Eljakimmi ôa,

³¹tsî Meleab ôa, tsî Menab ôa, tsî Matatab ôa, tsî Natanni ôa, tsî Davib ôa,

³²tsî Isaib ôa, tsî Obeb ôa, tsî Boab ôa, tsî Salmonni ôa, tsî Nasonni ôa,

³³tsî Aminadab ôa, tsî Adminni ôa, tsî Arnib ôa, tsî Hesronni ôa, tsî Pereb ôa, tsî Judab ôa;

³⁴tsî Jakob ôa, tsî Isaki ôa, tsî Abrahammi ôa, tsî Teraxi ôa, tsî Nahori ôa,

³⁵tsî Serugi ôa, tsî Rehub ôa, tsî Pelegi ôa, tsî Eberi ôa, tsî Selaxi ôa,

³⁶tsî Kenanni ôa, tsî Arpasadi ôa, tsî Semmi ôa, tsî Noaxi ôa, tsî Lamexi ôa,

³⁷tsî Metusalaxi ôa, tsî Henoxi ôa, tsî Jaredi ôa, tsî Malaleeli ôa, tsî Kenanni ôa,

³⁸tsî Enob ôa, tsî Seti ôa, tsî Adammi ôa, tsî Elob ôa.