Read Khoekhoegowab Lukab 4 Bible Online

Lukab 4 - Khoekhoegowab bible

Lukab 4

¹Tsîb ge Jesuba ǃAnu Gagab ǀkha ǀoa hâse ǁkhawa Jordanna xu oa, tsî Gagab xa ǃgaroǃhūb ǃoa ge ūǃgûhe.

²Tsîb ge hakadisi tsēde ǁgâuab xa gere ǃâitsâhe; tsî ǁnā tsēdi ǃnâb ge ǂûs tsîna hî tama ge hâ i; tsî ǃgôa-ī di geo, ob ge ega ge ǃâ.

³Ob ge ǁgâuaba ǁîb ǃoa ge mî: Elob Ôats kao, nē ǀuisa mîmā îs pere kai!

⁴Ob ge Jesuba ǃeream bi, tsî ge mî: Xoamâihe hâ: “Khoe-i ge pereba xu ǀgui ûi tama hâ, xawe mâ mîs Elob dis hoasa xu.”

⁵Ob ge ǁgâuaba ǀgapi ǃhommi ai ūǃapa bi, tsî hoa gaosidi ǃhūbaib dide ǀgui ǃnās ama ge ǁgau bi.

⁶Ob ge ǁgâuaba ǁîb ǃoa ge mî: Satsa ta ge nē ǀgaib hoab tsî gaosidi di ǂkhaib ona nî mā; tita tsîn ge ge māhe, tsî ta ǂgao ta ra-i hoa-e ǁîna ra mā xui-ao.

⁷Sats ga ǀgoreǀî teo, on ge nî hoana sa.

⁸Ob ge Jesuba ǃeream bi, tsî ǁîb ǃoa ge mî: Bēxū te Satantse! Xoamâihe hâ xuige: “ǃKhūb sa Elobats ge nî ǀgoreǀî tsî ǁîb ǀguiba nî ǃoaba.”

⁹Ob ge ǁîba Jerusalems ǃoa ūǃgû, tsî tempeli ǂamais ai mâi, tsî ge mîǀî bi: Elob Ôats kao, nēpa xu ǁnāǁnāsen!

¹⁰Nēti xoahe hâ xuige: ǁÎb ǀhomǃgāgab ge sats xa nî mîmā, ǃûi tsi gu nîsa,

¹¹tsî gu nî ǃomgu ai tani tsisa, ǂais âtsats ǀui-i tawa ǃnom tidese.

¹²Ob ge Jesuba ǃeream, tsî ge mîǀî bi: ǃKhūb sa Elobats ge ǃâitsâ tide, ti i kom ge mîheo.

¹³Tsî ǁgâuab ge ǃâitsâb hoab ǀkha toao, ob ge ǁaeb kōse ǁîba xu ge bē.

¹⁴Tsîb ge Jesuba ǁkhawa Gagab di ǀgaib ǃnâ Galileab ǃoa ge oa, tsîb ge gommi âba Galileaba ǁgoeǂnamipe hâ ǃhūgu hoagu ǃoa ge ǂoa.

¹⁵Tsîb ge ǁîn di sinagogegu ǃnâ ǁkhāǁkhā, tsî hoan xa gere koahe.

¹⁶Tsîb ge Nasarets, kaikaiheb ge ǃās tawa sī, tsî ǁnaetib âb ǃoa sâtsēs ai sinagogeb ǃnâ ǂgâ tsî ge khâi, khomaib nîse.

¹⁷Ob ge Jesajab kēbo-aob di ǂkhanisa ge māhe; tsî ǂkhanisab ge khowa, ob ge nē xoamâihe hâ ǃkhai-e ge hō:

¹⁸Gagab ǃKhūb dib ge tita ai hâ, titab ge ǂkhau amaga, ǀgâsana ta nî ǃgâiǂhôasa aoǁnâbase. Tsîb ge ge sî te khôaǂkhūsa ǂgaoba ūhâna ta nî ǂuruǂuruse,

¹⁹tsî ǃkhōsana ta nî ǃnoraǃnorasisa aoǁnâbase, ǂgī hâna ta nî mû kaise, tsî ǁgâiǀāhe hâna ta nî orese, tsî ǃkhōǃoa-anusa kurib ǃKhūb diba ta nî aoǁnâse.

²⁰Tsî ǂkhanisa ǂganam tsîb ge ǃgāba ǁkhawa mā, ob ge ge ǂnû. O di ge sinagogeb ǃnâ hân hoan di mûde ǁîb ai ge kōǀgara.

²¹Ob ge ǁîn ǃoa ge mîtsoatsoa: Nētsēs ge nē xoasa sadu ǂgaedi ǃnâ go ǀoaǀoahe.

²²On ge hoana ǁîba ǃkhō-am, tsî ǁîb amsa xu goro ǀkhī ǀnamǀnamsa mîdi xa buru, tsî ge mî: Nēpa kha Joseb ôa tamaba?

²³Ob ge ǁîn ǃoa ge mî: ǂAn ta ge a, nē ǂkhoamî-e du nî mîǀî te ǃkhaisa: ǂGauǂgau-aotse, sa-aitsama ǂuruǂurusen! Kapernaums ǃnâ go īn hoan, ǁîn xa da ra ǁnâun, ǁîna ǁkhāti nēpa sa aboxanǃhūb ǃnâ dī!

²⁴Ob ge ge mî: Amase ta ge ra mîba du kēbo-ao-i xare-i ǁî-i aboxanǃhūb ǃnâ ǃkhōǃoasa tama ǃkhaisa.

²⁵Amab ǃnâ ta ra mîba du, ǂgui ǃoataradi ge Eliab tsēdi ǃnâ, Israeli ǃnâ hâ i ǃkhaisa, ǀhommi ge ǃnona kurigu tsî ǃnani ǁkhâga ǂganamhe hâ i ǃnubai, kai ǃâtsūǀkhāb ge ǃhūb hoab ǃnâ hā ǃnubai;

²⁶Tsî ǀguis ǁîdi dis xawes ǃoab ge Eliaba sîhe tama, Sidons ǃhūb di Sarefats tawa ge hâ i ǃoataras ǀguis ǃoa.

²⁷Tsî kēbo-aob Elisab di ǁaeb ain ge ǂgui ǃomamaxana Israelǁîn ǃnâ ge hâ i, tsî ǀgui-i xare-i ǁîn di-i ge ǃanuǃanuhe tama, Naamanni Siriaǁîb ǀguib.

²⁸On ge sinagogeb ǃnâ hân hoana ǁaib ǀkha ge ǀoa, nē mîsan ge ǁnâu ǃnubai.

²⁹Tsî khâi, tsîn ge ǁîba ǃās ǃaugaba ǃoa aoǂui, tsî ǃās ân ǂnubi-aihe hâ ǃhommi di ǂaob ǃoa ge ūsī, aoǁnâ bin nîse.

³⁰Xaweb ge ǁîn ǁaegu ǃgûǃkharu tsî ge bē.

³¹Tsîb ge Kapernaums, Galileab ǃās tawa sī, tsî ǁîna sâtsēs ai gere ǁkhāǁkhā.

³²On ge ǁîb di ǁkhāǁkhās xa ge burugâ, mîs âb ge ǀgaisa i amaga.

³³Tsî sinagogeb ǃnâb ge khoeb, ǃanuoǃnâ gagaba ūhâba ge hâ i, tsîb ge ǃgari dommi ǀkha ǂgai,

³⁴tsî ge mî: Hoi, tare-e ge sige sats ǀkha ǁae hâ, Jesu, Nasareǁîtse? Hāts go, sigets nî hîkākāse? Tarits a ǃkhaisa ta a ǂan: Elob di ǃanuts komo.

³⁵Ob ge Jesuba ǃgabe bi, tsî ge mî: ǃNō, î ǁîba xu ǂoa! Ob ge ǁgâuaba ǁaegub ǃnâ ǂîǁgui bi tsî ge ǂoaxu bi, ǂkhôa-i xare-e dī bi tamase.

³⁶Os ge burugâsa hoan ǂama ge hā; on ge ǃhoa-ūgu, tsî ge mî: Tarebe mîsa kha nēsa? ǁKhāsib tsî ǀgaib ǀkhab ra ǃanuoǃnâ gagaga mîmāo, o gu kom ra ǂoao.

³⁷Tsî gommi âb ge ǁnā ǁgoeǂnamipe hâ ǀkharib hoab ǃoa ge ǂoa.

³⁸Tsîb ge sinagogeba xu khâi tsî Simonni oms ǃnâ ge ǂgâ. Tsî ǀuiǁgûs Simonni dis ge kaise ǁkhais xa ǃkhōhe hâ i, on ge ǁîba ǁîsa ge ǀkhomaba.

³⁹Ob ge ǁîs ǃoa-ai mâ, tsî ǁkhaisa ge ǃgabe, os ge ge ǁnāxū si. Os ge ǁnātimîsi khâi, tsî ǁîna ge ǃoaba.

⁴⁰Tsî sores ge ǂgâ, on ge ǃkharaga ǀaesenain ǀkha hâ ǀaesen hâna ǁîb ǃoa ge ūhā. Ob ge mâ-i hoa-i ǁîn di-e ǃomma ǁgui-ai, tsî ǁîna ge ǂgauǂgau.

⁴¹Tsî ǂguina xu gu ge ǁkhāti ǁgâuaga ǂoa tsî ǃau tsî ge mî: Sats kom a Xristu, Elob Ôao! Ob ge ǃgabe gu tsî ǃhoa kai gu tama ge i, Xristub asa gu ge ǂan amaga.

⁴²Tsî ǁgoa i ge, ob ge ǂoa, tsî ǃgaroǃkhais tawa ge sī. O di ge ǂnubide ôa bi, tsî ǁîb tawa sī, tsî ge ǁkhaeǀgara bi, ǁîna xub ǃgû tidega.

⁴³Ob ge ǁîn ǃoa ge mî: Nau ǃādi ona ta nî ǃgâiǂhôas Elob gaosib disa aoǁnâ; ǁîs ǃoa ta kom ge sîǂuiheo.

⁴⁴Tsîb ge Galileab di sinagogegu ǃnâ gere aoǁnâ.