Read Khoekhoegowab Lukab 5 Bible Online

Lukab 5 - Khoekhoegowab bible

Lukab 5

¹Tsî i ge ge ī, ǂnubis ge ǁgūǀkhā bio, Elob mîsan nî ǁnâuga, ob ge hurirob Genesareti tawa ge sī mâ.

²Tsî ǀgam ǂgaurab ge hurirob amǃgâ mûmâ, ǁauǃkhō-aogu ǂoa, tsî ǀûide ra ǁā hîa,

³ob ge ǂgaura di ǀguis Simonni di ge is ǃnâ ǂgâ, tsî ge ǂgan bi, ǂkhariroseb nî ǃhūba xu ūǂgâ bisa; tsî ǂnûb ge, ob ge ǂnubisa ǂgausa xu gere ǁkhāǁkhā.

⁴Tsî ǃhoatoab ge, ob ge Simonni ǃoa ge mî: ǃGammi ǃoa ǃnariǂgâ, î ǀûidi âgo aoǂui, ǃkhō go nîga.

⁵Ob ge Simonna ǃeream, tsî ge mîǀî bi: ǁKhāǁkhā-aotse, tsuxub hoaba ge goro sîsen, tsî xū-e hō tama go i; xawe sa mîs ai ta ge ǀûisa nî aoǂgā.

⁶Tsî nēsa gu ge dī, o gu ge kaise ǂgui ǁauna ge ǃkhō, tsîdi ge ǀûidi âga ge doaǁga.

⁷O gu ge nau ǂgaus ǃnâ hâ horesaga ge nape, hā tsî gu nî ǁîga huise; o gu ge hā, tsî ǂgaura hoara ge ǀoaǀoa, domǂgâǁga ra ges kōse.

⁸Simon Petrub ge mû, ob ge Jesub ǁgoara aiǃâ ǁnāǁgoe, tsî ge mî: Tita xu bē, ǃKhūtse, ǁorexa khoeta komo.

⁹Burugâs xab ge ǃkhōhe hâ i xui-ao, tsî ǁîb ǀkha ge hâ igu hoagu ona, ǁîgu go ǃkhō ǁaun ǂama.

¹⁰Tsî ǁnās ǁkhās xase Jakobub tsî Johaneb, Sebedeub ôakha, Simonni horesa ge ikha on. Ob ge Jesuba Simonni ǃoa ge mî: Tā ǃao, nēsisa xuts ge khoena nîra ǃkhō.

¹¹Tsî ǂgaura gu ge ǃnamam ūsī o gu ge hoana ǁnāxū, tsî ge sao bi.

¹²Tsî i ge ge ī, ǃādi di ǀguis ǃnâb hâ hîa, mû, ob ge ǃomamaxa khoeba ǁnāpa ge hâ i. Tsî Jesubab ge mû, ob ge ais âb ai ǁnāǁgoe, tsî ǀgoreǀî bi, tsî ge mî: ǃKhūtse, ǂgaots ka, ots a ǃanuǃanu te ǁkhā.

¹³Ob ge ǃomma ǀhōǂui, tsî tsâǀkhā bi, tsî ge mî: ǂGao ta ra, xuige ǃanu! Os ge ǃomamasisa ǁnātimîsi ǁîba xu ge bē.

¹⁴Tsîb ge: Tā khoe-e mîba, ti ge mîmā bi, î ǃgû, î sa-aitsama pristera ǁgausen, î ǃanuǃanusis âts ǃaroma ǁguiba, Moseb ge ǂnûiǂgā hâ i khami, ǁîgu di mîdansa ǃoa.

¹⁵Xaweb ge gommi âba ǃaruǀîǀgui ge ǂoa; os ge kai ǂnubisa ge ǀhû, ǁnâu bi tsîn nî ǀaesengu âna xu ǂuruǂuruhese.

¹⁶Ob ge ǁîba ǃgaroǃhūgu ǃoa ǃgû, tsî gere ǀgore.

¹⁷Tsî i ge ǁnā tsēdi di ǀguis ai ge ī, ǁkhāǁkhāb ra hîa gu ge Farisegu tsî ǂHanub ǁkhāǁkhā-aogu, Galileab tsî Judeab di ǃārodi hoadi tsî Jerusalemsa xu go hā hâ iga ǁnāpa ge ǂnôa i; tsîb ge ǃKhūb di ǀgaiba ge hâ i, khoenab nî ǂgauǂgause.

¹⁸Tsî mû, aogu ge ǃhom hâba kharob ai ūhā, tsî ge ôa-am, mati gu nî ūǂgā, tsî ǁîb ais aiǃâ ǁgui bisa.

¹⁹Tsî ǂnubis xa gu ge soa-e mû tama io, mati gu nî ǁîba ūǂgā ǁkhā ǃkhaisa, o gu ge oms ǂamais ǃoa ǃapa, tsî ǂamais ǀuide xu kharob ǀkha ge ǁgôa kai bi, khoen ǁaegub ǃnâ, Jesub aiǃâ.

²⁰Tsî ǁîgu ǂgomsab ge mû, ob ge ge mî: Khoetse, ǁoren âtsats ge ǀûbahe hâ.

²¹O gu ge xoaǂansabegu tsî Farisegu tsîga ǂâiǂâisentsoatsoa, tsî ge mî: Tariba kha nēb, eloǃkhāǃkhāsa ra ǃhoaba? Tari-e a ǁkhā, ǁorena ǀûbasa? Elob ǀguib komo.

²²Tsî Jesub ge ǂâidi âga ǂan, ob ge ǃeream tsî ge mî: Tare xū-e go ǂgaogu âgo ǃnâ ra ǂâi?

²³Mâsa kha supu mîsa: ǁOren âtsats ǀûbahe hâ, ti mîs tsî: Khâi î ǃgû! ti mîs tsîra xa?

²⁴Xawe ǂan go nîga, Khoen Ôab ǃhūbaib ai, ǁorenab nî ǀûbase ǀgaiba ūhâsa, ob ge ǃhom hâb ǃoa ge mî: Tita ge ra mîba tsi, khâi, î kharob âtsa ūkhâi, î ǁaru!

²⁵Ob ge ǁnātimîsi khâi, tsî ǁgoe-aib go hâ i xūba ūkhâi, tsî ge ǁaru, Eloba ra karese.

²⁶Tsî burugâs ge hoana ge hāǂam, on ge Eloba kare, tsî ǃaob xa ǀoa, tsî ge mî: Buruxana da kom nētsē go mûo.

²⁷Tsî nēn khaoǃgâb ge ǃgûǂoao, ob ge mariǃkhōǃoa-aob, Levi ti ǀon hâba matare-ommi ǃnâb ǂnôa hîa mû, tsî ǁîb ǃoa ge mî: Sao te re!

²⁸Ob ge hoana ǁnāxū, tsî khâi, tsî ge sao bi.

²⁹Tsîb ge Leviba oms âb ǃnâ kai ǂûǁaesa ge dība bi; tsîn ge ǂgui mariǃkhōǃoa-aon tsî ǀnîna ǁîgu ǀkha tāb tawa ge ǂnôa i.

³⁰O gu ge Farisegu tsî xoaǂansabegu âga ǁîb di ǁkhāǁkhāsabega ǀara-ai, tsî ge mî: Tarexa go mariǃkhōǃoa-aon tsî ǁore-aon tsîn ǀkha ra ǂû tsî ā?

³¹Ob ge Jesuba ǃeream, tsî ge mîǀî gu: ǂUrun ge soǀôadī-aoba ǂhâba tama hâ, xawe ǀaesen hân ge ǂhâba bi hâ.

³²ǂHanu-aina ta nî ǂgaise ta ge hā tama hâ, xawe ǁore-aona ta nî ǃhobasens ǃoa ǂgaise ta ge ge hā.

³³O gu ge ǁîb ǃoa ge mî: Johaneb di ǁkhāǁkhāsabegu ge ǀnî ǃnāde ǂûtamahâ tsî kaise ra ǀgore, ǁnās ǁkhās xase Farisegu digu ona, xawe sago ge ǂû tsî ra ā.

³⁴Ob ge Jesuba ǁîgu ǃoa ge mî: ǁKhā go a, ǃgameǁâus khoena ǂûtamahâ kaisa, dî-amaob ǁîn ǀkha hâ hîa?

³⁵Xawe di ge tsēde nîra hā, ǃgame-aob ǁîna xu nîra ūbēhede, on ge ǁnā tsēdi ǃnâ nîra ǂûtamahâ.

³⁶Tsîb ge ǁkhāti ǂkhō-e ǁîgu ǃoa ge mî: Khoe-i xare-i ge ǀasa ǃkhai-i di ǃnaba-e ū tsî ǀoro ǃkhai-i ai ǃnaba tama hâ; ǀasa-i kom ǀoro-e nî doa kaio, tsî ǀasa-i kom ǀoro-i ǀkha ǀgui tamao.

³⁷Tsî khoe-i xare-i ge ǀasa ǂauxûi-e ǀoro ǃgapagu ǃnâ ǁaiǂgā tama hâ; ǀasa ǂauxûib kom ǃgapaga ra doa kaio, ob kom nî ǁhōxūseno, tsî ǃgapagu kom nî ǂkhôaheo.

³⁸O-i ge khoe-e ǀasa ǂauxûiba ǀasa ǃgapagu ǃnâ nî ǁaiǂgā, o kha ge hoa kha nî hâ.

³⁹Tsî khoe-i xare-i, ǀoroba ra ā-i ge ǀasaba ǂgao tama hâ; ǀorob a ǁnāb xa ǃgâi, ti i ra mî xui-ao.