Read Khoekhoegowab Lukab 6 Bible Online

Lukab 6 - Khoekhoegowab bible

Lukab 6

¹Tsî i ge ge ī, sâtsēs aib ra ǃhoroǃhanaba ǃgûǃnâ hîa gu ge ǁkhāǁkhāsabegu âba ǃnuruga ǂgaeǁnâ tsî ǃomgu ǃnâ ǀnopoǀkhā tsî ǂû ǃkhaisa.

²O gu ge ǀnîgu Farisegu diga ǁîgu ǃoa ge mî: Tarexa go sâtsēs ai dīsa mā-amhe tama xū-e ra dī?

³Ob ge Jesuba ǃeream, tsî ǁîgu ǃoa ge mî: Nēs ona go ǁnâi khomai tama hâ, Davib ge dīsa, ǃâb geo, ǁîb ǂûb tsî ǁîb ǀkha ge hâ igu tsîna?

⁴Matib ge Elob ommi ǃnâ ǂgâ tsî ǁgauperega ū, tsî gere ǂûsa, tsî matib ge ǁkhāti ǁîb ǀkha ge hâ iga māsa, pristergu ǀguigu ge ǂûsa mā-amhe hâ iga.

⁵Ob ge ge mîǀîgu: Khoen Ôab ge a sâtsēs on di ǃKhū.

⁶Tsî i ge ǁkhāti ǀnî sâtsēs ai ge ī sinagogeb ǃnâ ǂgâ tsîb gere ǁkhāǁkhā ǃkhaisa. Ob ge ǁnāpa khoeb, amǀkhāb ǃommi âb ǂnâ hâba ge hâ i.

⁷O gu ge xoaǂansabegu tsî Farisegu tsîga gere ǃkhē bi, iseb nî sâtsēs ai ǂgauǂgau ǃkhaisa, ǃnuriǃgâ bi gu nî ǃkhaisa gu nî hōse.

⁸Ob ge ǂâidi âga ǂan, tsî ǂnâsa ǃomma ūhâ khoeb ǃoa ge mî: Khâi, î ǁaegub ǃnâ mâ! Ob ge khâi, tsî ge sī mâ.

⁹Ob ge Jesuba ǁîgu ǃoa ge mî: Xū-e ta ge nî dî du: Tare-e sâtsēs ai dīsa mā-amhe hâ? ǃGâidīsa? ǂKhabadīsa? Ûiba sâusa? Ûiba hîǀhurusa?

¹⁰Tsî hoana kōǂnamipe, tsîb ge khoeb ǃoa ge mî: ǀHōǂui ǃommi âtsa! Tsî ǁnātib ge dī, ob ge ǁîb ǃomma naub khami ge ǂuru.

¹¹O gu ge ǃkhausasib xa ǀoa, tsî ge ǃhoaǀhao, mâ xū-e gu nî Jesuba dīsa.

¹²Tsî i ge ǁnā tsēdi ǃnâ ge ī ob ge ǃhommi ǃoa ge ǃapa, ǀgoreb nîse; tsîb ge Elob ǃoa ǀgores ǃnâ ge hâǂkhai.

¹³Tsî ǁgoa i ge, ob ge ǁkhāǁkhāsabegu âba ǂgaihā, tsî ǁîga xu disiǀgamǀaga ge ǃkhōǂuibasen, apostelgu tib ge ǂgaiga.

¹⁴Simonni, Petrub tib ge ǁkhāti ǂgaib, Andreab ǁîb ǃgâsab, Jakobub, Johaneb, Filipub, Bartolomeub,

¹⁵Mateub, Tomab, Jakobub, Alfeub ôab, Simonni, Seloteb ti ra ǂgaiheb,

¹⁶Judab Jakobub ǃgâsab, tsî Judab Iskarioǁîb, ǁkhāti ǀapexū-ao kai geb tsîga.

¹⁷Tsîb ge ǁîgu ǀkha ǁgôa tsî ǂgā-am ǃkhai-i ai ge mâ, tsî ǁîb ǁkhāǁkhāsaben di ǂnubis tsîn, tsî kaise ǂgui khoen Judeab hoab tsî Jerusalems din, tsî hurib ǀkhāb Tires tsî Sidons tsîra din tsîna,

¹⁸ǁîban nî ǁnâuse, tsî ǀaesenn âna xun nî ǂgauǂgauhese ge hān, tsî ǃanuoǃnâ gagagu xa ra ǁnōrahen tsîna; tsîn ge ge ǂgauǂgauhe.

¹⁹Tsî ǂnubis hoas ge tsâǀkhā bis nîsa ge ôa-am, ǀgaib ge ǁîba xu ǂoa, tsî hoanab gere ǂgauǂgau xui-ao.

²⁰Tsî ǁkhāǁkhāsabegu âba kōǀî tsîb ge ge mî: ǃGâiǃō hâ du ge sadu ǀgâsado, sadu dib a Elob gaosiba xui-ao.

²¹ǃGâiǃō hâ du ge sadu, nēsi ra ǃâdo, ǁâǁâhe du nîra xui-ao. ǃGâiǃō hâ du ge sadu nēsi ra ādo, âi du nîra xui-ao.

²²ǃGâiǃō hâ du ge sado, khoen ga ǁkhan, tsî ǀgoraxū tsî mîǁgaiǁgai duo, tsî sadu ǀonsan ga ǂkhabas ase aoxūo Khoen Ôab ǃaroma.

²³ǃGâiaǂgao ǁnā tsēs ai, î dâ, mû, sadu amǃnâs kom ǀhommi ǃnâ a kaio. ǁGûgu ân kom kēbo-aoga ǁnās ǁkhās xase gere dī-ūo.

²⁴Xawe tsūba du sadu ǃkhū hâdo, sadu ǁkhaeǂgaosa du ūbē hâ xui-ao.

²⁵Tsūba du sadu ǂâuǀoa hâdo, ǃâ du nîra xui-ao. Tsūba du sadu, nēsi ra âido, ǃoa tsî du nîra ā xui-ao.

²⁶Tsūba du, khoen hoan ga sadu xa ǃgâise ǃhoao; ǁnās ǁkhās khami gu kom ǁgûgu âna ǂkhaba kēbo-aogu ǀkha gere dīo.

²⁷O ta sadu, ǁnâu rado ra mîba: Khākhoen âdo ǀnam, ǁkhan du rana ǃgâidī,

²⁸ǀâxare du rana ǀkhae, î ǂkhaba ǀonsa ra dība duna ǀgoreba,

²⁹xōb ai kara ǁapu tsi-e naub ona mā, tsî anaǂamxūb âtsa kara ūǀhana tsi-e nau anaxūb ona ūsa tā ǂkhā.

³⁰ǂGan tsi i kara-i hoa-e mā, tsî sa-e kara ū-e xu ǁî-e tā ǁkhawa ǂganoa.

³¹Tsî khoen nî sado dī-ū, ti du ǂgao hâs ǁkhās khami sadu ona ǁîna dī-ū.

³²Tsî sado ǀnam hâna du ga ǀnamo, mâ gangan-e du ǁnâi ūhâ? ǁOre-aon on kom ǁîna ǀnam hâna ra ǀnamo.

³³Tsî sado ra ǃgâidīna du ga ǃgâidīo, mâ gangan-e du ǁnâi ūhâ? ǁOre-aon on kom ǁnās ǁkhāsa ra dīo.

³⁴Tsî ǁîna xu du nî ǁkhawa hō-oa, ǂgomǃgâ-e du ūǃnâ hâna du kara ǀkhupio, mâ gangan-e du ǁnâi ūhâ? ǁOre-aon on kom ǁore-aona ra ǀkhupio, ǁkhawan nî ǁkhā-e hōse.

³⁵Î du ǁnâi khākhoen âdo ǀnam, ǃgâidī, î ǀkhupi, xū-e ǁkhawa ǂgaos ose; os ge sadu amǃnâsa nî kai, o du ge nî Hoan xa ǀGapib di ôa: ǁÎb kom ǁkhāti a ǃgâio ganganoǃnân tsî ǂkhaban tsîn ǂama.

³⁶ǀKhomxaǂgao ǁnâi re, sadu Îb ǁkhāti a ǀkhomxaǂgao khami.

³⁷Î tā ǀgoraǃgâ, o du ge ǀgoraǃgâhe tide, tā ǀâxarexū, o du ge ǀâxarexūhe tide, xore, o du ge nîra xorehe.

³⁸Mā, o du ge nîra māhe; ǃgâi, tsî ǁgâiǂgāhe tsî ǀhōǂgāhe tsî ǂnâǂam ra ǀguiroba du ge tîǂams âdu ǃnâ nîra māhe; ǀguiro-ū du ra ǀguirob ǁkhāb ǀkha du ǁkhawa nîra ǀguirohe xui-ao.

³⁹Tsîb ge ǂkhō-e ǁîgu ǃoa ge mî: ǂGī-e kha ǁkhā-i a, ǂgī hâ-e daodaobasa? Hoakha ǁnâi tsaus ǃnâ ǁnā tide?

⁴⁰ǁKhāǁkhāsabeb ge ǁkhāǁkhā-aob âb ǂamai hâ tama hâ, tsî mâ dīǀoasa ǁkhāǁkhāsabeb hoab nî ǁkhāǁkhā-aob âb ǀkha ǀguiti-ī.

⁴¹Tsî tarexats sa ǃgâsab di mûs ǃnâ hâ ǀapoǃâro-e ra mû, xawets sa mûs ǂhanis ǃnâ hâ ǃnaoba hōǃâ tama?

⁴²Tsî matits sa ǃgâsab ǃoa a mî ǁkhā: Ti ǃgâsatse, ǁnam î ta sa mûs ǃnâ hâ ǀapoba ūǂui, sa mûs ǂûs ǃnâ hâ ǃnaobats mû tama hîa? Sa hînaxaǃnâtse, aibe sa mûsa xu ǃnaoba ūǂui, ots ge ǃgâise nî mû, sa ǃgâsab di mûs ǃnâ hâ ǀapobats nî ūǂuise.

⁴³ǃGâi hai tamas ge, ǁkhoatama ǂûna ra ūǀkhīsa, tsî ǁkhoatama hai tamas ge, ǃgâi ǂûna ra ūǀkhīsa xui-ao.

⁴⁴Mâ hai-i hoa-i ge ǁî-i ǂû-i ǂhani-i ai ra mûǂanhe. ǁKhūna xuts kom ǀnomaǂûna ǃora tamao, tsî ǂarosa xuts kom ǂauxûiǂûhais ǂûna ǃgao tamao.

⁴⁵ǃGâi khoe-i ge ǁî-i ǂgaob di ǃgâi ǁuiba xu ǃgâi-e ra ūǀkhī, tsî ǂkhaba khoe-i ge ǁî-i ǂgaob di ǂkhaba ǁuiba xu ǂkhaba-e ra ūǀkhī; ǁî-i ǂgaob di ǀoasiba xus ǁî-i amsa ra ǃhoa xui-ao.

⁴⁶Tsî tarexa du: ǃKhūtse, ǃKhūtse ti ra ǂgai te, tita ra mî-e du dī tama xawe?

⁴⁷Mâ-i hoa-i, tita ǃoa ra hā-i, tsî ti mîde ǁnâu tsî ǁîde ra dī-i, ǁgau du ta nî, tari-i ǀkha-i ǀguiti-īsa:

⁴⁸ǁÎ-i ge khoe-i, om-e ge ǂnubi-i, tsî ǃgamse khao-i, tsî ǃgaoǃgaosa ǃhaob ai ge ǁgui-i khami ī-e; tsî ǃāgu ge dâu, ob ge ǁgamma ǁnā oms ai ǂnapisen, ob ge ǁnopeǁnope si ǁoa i, ǁaposases ge ǂnubihe hâ i amaga.

⁴⁹Tsî ǁîde ǁnâu tsî ga dī tama i-i ge khoe-i, om-e ǁause ǃhūb ai ǃgaoǃgaos ose ge ǂnubi-i khami i-e; tsî ǁgammi ge ǁî-i ai ǂnapiseno, o-i ge ǁnātimîsi ge ǃkhom, tsî ǁnā oms di ǃkhoms ge ge kai i.