Read Khoekhoegowab Lukab 7 Bible Online

Lukab 7 - Khoekhoegowab bible

Lukab 7

¹Tsî ǁîb di mîdi hoadeb ge ǁaes di ǂgaedi ǃnâ mîtoao, ob ge Kapernaums ǃoa ge ǃgû.

²Tsî kaidisigu danakhoeb di ǃgāb, kaise ǃgôaǃgôasaba bi ge ib ge ge ǀaeǁgoe hâ i, tsî ge ǁōǁga,

³Tsî Jesub xab ge ǁnâuo, ob ge Jodeǁîn di kaiga ǁîb ǃoa sî, tsî ge ǂgan bi, hā tsîb nî ǃgāb âba ǂgauǂgau ti.

⁴Tsî Jesub tawa gu ge sī, o gu ge kaise ǀkhoma bi, tsî ge mî: Anub kom hâo, nēsats nî dība bisao.

⁵Sada ǁaesab ǀnam hâ, tsî sinagogebab ge ǂnubiba da xui-ao.

⁶Ob ge Jesuba ǁîgu ǀkha ge ǃgû. Tsî omsa xub ǃnū tama hîab ge kaidisigu danakhoeba khoen âba sî, tsî ge mîba kai bi: ǃKhūtse, tā ǀhupuǀhupusen re, anu tama ta kom hâo, ti oms ǃnâts nî ǂgâsao;

⁷ǁnā-amaga ta ge ǁkhāti aitsama sa tawa sīsa anuse ǃgôasen tama go i; ǁnâi mîs ǀguisa hî, ob ge ti ǃgāba nî ǂgau.

⁸Tita on ge a khoe, ǂamkhoegu ǀgaib ǃnâ mâta, tsî ta ge toro-aoga ti ǃnaga ūhâ. Tsî nēb ǃoa ta ga: ǃGû, ti mî, ob ge ra ǃgû, tsî naub ǃoa: Hā, ob ge ra hā tsî ti ǃgāb ǃoa: Dī nēsa, ob ge ra dī.

⁹Tsî Jesub ge ǁnâu, ob ge ǁîb ǂama buru, tsî ǂnan, tsî ǁîba ra sao ǂnubis ǃoa ge mî: Mîba du ta ra, nēti ī ǂgom-e ta ge tātsē Israelǁaes ǃnâ hō tama hâsa.

¹⁰Tsî sîhe go gu ge oms tawa sī, o gu ge ǀaesen go hâ i ǃgāba ǂuruse ge hō.

¹¹Tsî i ge sao ra tsēs ai ge ī, ǃās Nains ti ra ǂgaihes ǃoab ǃgûgaru ǃkhaisa; tsî ǁkhāǁkhāsabegu âb tsî kai ǁaes tsîn ge ge ǃgûǀkhā bi.

¹²Tsî ǃās di ǁābab ge ǀgū, mû, o-i ge ǁō hâ-e ge taniǂuihe, ǁgûs di ǀguise ǃnae hâba, tsîs ge ǁîsa ǃoatara ge i; tsî ǂgui khoen ǁnā ǃās din ge ǁîs ǀkha ge hâ i.

¹³Tsî ǃKhūb ge mû si, ob ge ǀkhomxa tsî ge mîǀî si: Tā ā re!

¹⁴Tsî ǃgûsī, tsîb ge tani-aixūba ge tsâǀkhā; o gu ge tani-aoga ge mâ. Ob ge: ǂKhamkhoetse, tita ra mîba tsi: Khâimâ! ti ge mî.

¹⁵Ob ge ǁō hâba ǂnûkhâisen tsî ge ǃhoatsoatsoa. Ob ge ǁgûsa ge mā bi.

¹⁶On ge hoana ǃaob xa hāǂamhe, tsî Eloba kare tsî ge mî: Kai kēbo-ao-i ge sada ǃnâ khâi hâ, tsî Elob ge ǁîb ǁaesa go sari.

¹⁷Tsî nē gommi âb ge Judeab hoab tsî ǃnamam ǁgoe ǀkharib hoab ǃoa ge ǂoa.

¹⁸Tsî gu ge Johaneb di ǁkhāǁkhāsabega nēn hoan xa ge sī ǂhôa bi.

¹⁹Ob ge Johaneba ǁkhāǁkhāsabegu âb di ǀgamkha ǂgaihā, tsî ǁîkha Jesub ǃoa sî, tsî ge mî: Satsa koma hā nîtsa? ǀKharaba da nî ǃâu?

²⁰Tsî khoekha ge ǁîb tawa sīo, okha ge ge mî: Johaneb ǁĀǁnâ-aob ge sikhoma sats ǃoa sî, tsî go mî: Satsa koma hā nîtsa? ǀKharaba da nî ǃâu?

²¹Tsîb ge ǁkhā iri ǃnâ ǂguina ge ǂgauǂgau ǀaesenga xu, tsî tsûga xu, tsî ǁaixa gagaga xu, tsî ǂgui ǂgī hânab ge ge mû kai.

²²Ob ge Jesuba ǃeream, tsî ge mîǀî kha: ǃGû, î Johaneba ǂhôa, mû tsî kho go ǁnâuna: ǂGī hân ra mûsa, ǃhoran ra ǃgûsa, ǃomamaxan ra ǃanuǃanuhesa, ǂganaǂgae hân ra ǁnâusa, ǁō hân ra ǂkhaiǂkhaihesa, ǀgâsan ra ǃgâiǂhôasa aoǁnâbahesa,

²³tsî ǃgâiǃō-i ge hâ, tita ǃnâ ǁgonǁgonǂgaosen tide-e.

²⁴Tsî Johaneb di sîsabekha ge bē, ob ge Jesuba Johaneb xa ǁaes ǁga ge mîtsoatsoa: Tare-e nî mûse du kha ǃgaroǃhūb ǃoa go ǂoa? ǂĀ-i, ǂoab xa ra ǂhapumahe-e?

²⁵Tsî tare-e nî mûse du go ǂoa? Khoe-i, tsamra saran ǀkha anasen hâ-e? Mû, tsamra ǃkhain tsî turab ǃnâ ra ûin ge gao-aon omgu ǃnâ hâ.

²⁶Tsî tare-e nî mûse du kha go ǂoa? Kēbo-ao-e? Aio, kēbo-ao-e ǃnāǂam hâb, ti ta ra mîba du.

²⁷Nēb kom ǁnāb, ǁîb xa xoahe hâbao: Mû, tita ge ti ǀhomǃgāba sa aiǃâ ra sî, daob âtsa nî sa ais aiǃâ ǂhomiba tsiba, ti.

²⁸Mîba du ta ra, taradi xa ge ǁorahegu ǃnâ i ge Johaneb ǁĀǁnâ-aob xa kai kēbo-ao-e hâ tama hâ; xawe gaosib Elob dib ǃnâ hoan ǂamai ǂkhari-i ge ǁîb xa kai-e.

²⁹Tsî ǁnâu bi ge ǁaes hoas tsî mariǃkhōǃoa-aon tsîn ge Eloba amaba mā, Johaneb ǁāǁnâs ǀkha ra ǁāǁnâkaisens ǀkha.

³⁰Xawe Farisegu tsî xoaǂansabegu tsîgu ge Elob di ǃgâi ǀapemās, ǁîgu ǃoa hâsa ge ǃharaxū, tsî ǁîb xa ǁāǁnâkaisen tama ge i.

³¹Tsîb ge ǃKhūba ge mî: Tari-i ǀkha ta kha khoen nē ǃhaos dina nî ǂkhō? Tsî tari-i khamin ī?

³²ǀGôaron khamin ī, ǁamaxūǃkhais ai ǂnôan, tsî ǂgaiǀîgu, tsî ra mîn: ǂNuniba du da go, xawe du ǂnā tama, ǃoaxa am-e da go ǁnae, xawe du ā tama.

³³Johaneb ǁĀǁnâ-aob ge ge hā, pere-e ǂû tamase tsî ǂauxûi-e ā tamase, o du ge ra mî: ǁGâuabab kom ūhâo.

³⁴Khoen Ôab ge ge hā, ǂû tsî ra āǃâ, o du ge ra mî: Mû, nēb ge ō-aob tsî ǂauxûi-ā-aoba, mariǃkhōǃoa-aon tsî ǁore-aon tsîn di horesab komo.

³⁵Tsîb ge gā-aisiba ǁîb di ôan hoan xa amaba ge māhe.

³⁶Tsîb ge Farisegu di ǀguiba ge ǁkhau bi, ǁîb ǀkhab nî ǂûse; ob ge Fariseb di oms ǃnâ sī tsî tāb tawa ge ǂnû.

³⁷Tsî mû, taras ge ǁnā ǃās ǃnâ ge hâ i, ǁore-ao ge isa. Tsî Fariseb di oms ǃnâb tāb tawa ǂnôa ǃkhaisas ge ǁnâu, os ge alabaxaparo-i, ǃgâihamxū-i hâǃnâ-e ge ūhā.

³⁸Os ge ǃgâbǀkhāba xu ǁîb ǂaira tawa hā mâ, tsî ge ā, tsî ǂaira âba ǁgamron ǀkha ge ǀâǀâtsoatsoa tsî danaǀûn ǀkha ge ǀomǀkhā ra, tsî ǂaira âba ge ǁoa, tsî ǃgâihamxūb ǀkha ge ǂkhau.

³⁹Tsî ǁkhau bi go Fariseb ge mû, ob ge ǁîb ǃnâ ge mî: Nēb ga kēbo-ao io, ob ge ga ǂan, mati ī tsî tarebe taras a ǃkhaisa, nē ra tsâǀkhā bisa; ǁore-aos komo.

⁴⁰Ob ge Jesuba ǃeream, tsî ge mîǀî bi: Simontse, mîba tsi ta nî xū-e ta ūhâ. Ob ge: ǁKhāǁkhā-aotse, mî re, ti ge mî. Ob ge ge mî:

⁴¹ǂAnǂansa surudemā-aob ge ǀgam surude-aokha ge ūhâ i. ǀGuib ge korokaidisi marin, tsî naub ge korodisi marina surude bi ge hâ i.

⁴²Tsî mataresa kha ge ǁkhā tama i, ǃnubaib ge hoakha ge ǀûba. Mî ǁnâi re, tarib âkha nî ǃnāsase ǀnam bi?

⁴³Ob ge Simonna ǃeream, tsî ge mî: Kaiseb ge ǀûbab komo, ti ta ra ǂâi. Ob ge ge mîǀî bi: ǂHanusets go ǀgora.

⁴⁴Ob ge taras ǃoa ǂnan, tsî Simonni ǃoa ge mî: Mûts ra nē tarasa? Sa oms ǃnâ ta go ǂgâxa, xawets go ǁgam-e ti ǂaira ǃaroma mā te tama hâ i; xawes ge ǁîsa ti ǂaira ǁgamron ǀkha ǀâǀâ tsî danaǀûn âs ǀkha go ǀomǀkhā.

⁴⁵ǁOa-ets go mā te tama hâ i; xawes ge ǁîsa ǂgâxas gosa xu, ti ǂaira ǁoasa ǀû tama hâ.

⁴⁶Ti danasats go oli-i ǀkha ǂkhau tama hâ i; xawes ge ǁîsa ti ǂaira ǃgâihamxū-i ǀkha go ǂkhau.

⁴⁷ǁNā-amaga ta ge ra mîba tsi: ǁÎs di ǁoren, hîa ǂgui ge inas ǀûbahe hâ ǃkhaisa, kaises go ǀnam xui-ao; xawe ǀorose ǀûbahe hâ-i ge ǂkharise ra ǀnam-e.

⁴⁸Ob ge ge mîǀî si: ǀÛbahes hâ sa ǁorena.

⁴⁹On ge tāb tawa ǂnôana ǁîn ǃnâ ge mîtsoatsoa: Tariba kha nēb, ǁoren tsîna ra ǀûbaba?

⁵⁰Ob ge taras ǃoa ge mî: Sa ǂgoms go hui si; ǃgû re ǂkhîb ǃnâ.