Read Khoekhoegowab Lukab 8 Bible Online

Lukab 8 - Khoekhoegowab bible

Lukab 8

¹Tsî i ge nēs khaoǃgâ ge ī, ob ge ǃādi tsî ǃārodi tsîde ge ǃgûǃnâ, tsî ǃgâiǂhôas Elob gaosib disa ǂhôa tsî gere aoǁnâ, tsî disiǀgamǀagu ona ǁîb ǀkha.

²Tsî ǁkhāti ǀnî taradi, ǂkhaba gagagu tsî ǀaesenaina xu ge ǂgauǂgauhe hâ ide: Marias, Magdalenas ti ra ǂgaihes, ǁîsa xu gu hû ǁgâuaga ge ǂoas,

³tsî Johanas, Xusab Herodeb di marimûǂamaob taras tsî Susanas tsî ǀnîdi ǂgui xūn âdi ǀkha gere ǃoaba bidi tsîna.

⁴Tsî kai ǂnubis ge ǀhû, tsî ǃādi hoade xun ge ǁîb ǃoa hāo, ob ge ǂkhō-i ǃnâ ge mî:

⁵Tsoro-aob ge ge ǂoa, ǃkhommi âbab nî tsorose; tsî tsorob ra, hîa i ge ǀnî-e daob amǃgâ ǁnā tsî ge dāǂkhūhe, tsî ǀhommi di anin ge ǁî-e ge hapu.

⁶Tsî ǀnî-i ge ǃhaob ai ge ǁnā; tsî ǀkhī-i ge, ǃnubai i ge ge ǂnâ, ǀâ-e i ge ūhâ tama hâ i amaga.

⁷Tsî ǀnî-i ge ǁkhūn ǃnâ ge ǁnā; tsîn ge ǁkhūna ǀomkhâiǀhao, tsî ǁî-e ge ǀhomǀom.

⁸Tsî ǀnî-i ge ǃgâi ǃhūb ǃnâ ge ǁnā; tsî ǁhai-i ge, o-i ge kaidisiǃnâguse ge ǂûtani. Tsî nēsa mî, tsîb ge ge ǂgai: ǂGaera ūhâ-e, ǁnâu-i nîse, a-i ǁnâu!

⁹Tsî gu ge ǁîb di ǁkhāǁkhāsabega dî bi, tsî ge mî: Tare-es nē ǂkhōsa ra ǂâibasen?

¹⁰Ob ge ge mî: Sadu ge māhe hâ, ǂganǃgâsigu Elob diga ǁnâuǃāsa; xawe naun ǃoa ta ǂkhōdi ǃnâ ra ǃhoa, mûn ra, xawen mû tidese, tsî ǁnâun ra, xawen ǁnâuǃā tidese.

¹¹Tsî nēs ge ǂkhōsa: ǃKhommi ge Elob mîsa,

¹²tsî daob ai tsorohe hân ge ǁnâu rana; ǁnās khaoǃgâb ge ǁgâuaba hā tsî mîsa ǁîn di ǂgaoga xu ra ūbē, ǂgom tsîn ǃgâiǃō tidese.

¹³Tsî ǃhaob ai tsorohe hân ge ǁîn mîsan ra ǁnâuo, ǃgâiaǂgaob ǀkha ra ǃkhōǃoa sina; xawe ǃnoma-en ūhâ tama amagan ge ǁaeb ǀguiba ǂgom, tsî ǃâitsâhen ka ǁaeb ai ra ǁnāǁgôa.

¹⁴Tsî ǁkhūn ǃnâ ra ǁnān ge ǁîn ǁnâu tsî ǂhansendi tsî ǁuib tsî tura-ain ûib din ǃnâ ra ǃgû tsî ǀhomǀomhen, tsî tātsē ǁansa ǂûna ūǀkhī tamana.

¹⁵Tsî ǃgâi ǃhūb ǃnâ ra ǁnān ge ǁîn mîsa ra ǁnâun, tsî ǃgâi tsî ǂhauǃnâ ǂgaob ǃnâ sâu si tsî ra ǂûtanina.

¹⁶Tsî khoe-i xare-i, ǃamamǀae-e ra ǃam-i ge ǁî-e soa-i ǀkha ǃgū-ai tamas ka io kharo-i ǃnaga mâi tama hâ, xawe i ge ǁî-e kandelari ai ra mâi, ǂgâxa ran hoan nî ǃnâba mûse.

¹⁷ǂGanǃgâsase hâ-i, ǂhaiǂhaihe tide-i ge hâ tama hâ, tsî ǃgū-aihe hâ-i, ǂanhe tsî ǃnâb ǃoa ǀkhī tide-i ge hâ tama hâ xui-ao.

¹⁸ǂAnbasen ǁnâi, mati du ra ǁnâusa; ūhâ-i, ǁî-i ge nîra māhe tsî ūhâ tama-i ǁî-i ge ǁkhāti ū-i hâ ti-i ra ǂâi-e nîra ūǀhanahe xuige.

¹⁹Tsîn ge ǁkhāti ǁgûs tsî ǃgâsagu âba ǁîb ǃoa hā, tsî ǂnubis xa ǁîb tawa ge sī ǁoa i.

²⁰On ge ge ǂhôa bi: Sa îs tsî ǃgâsagu âts tsîn ge ǃauga mâ, tsî ra mû tsi ǂgao, ti.

²¹Ob ge ǃeream, tsî ǁîn ǃoa ge mî: Ti îs tsî ti ǃgâsan tsîn ge ǁnān, Elob mîsa ǁnâu tsî ra dīna.

²²Tsî i ge ǁnā tsēdi di ǀguis ai ge ī, ǂgaus ǃnâb ge ǂgâ ǃkhaisa, tsî ǁkhāǁkhāsabegu âba ǁîb ǀkha. Ob ge ge mîǀî gu: A ge hurirob nauǃani ǃgâu! O gu ge ge ǂhāǁnâ.

²³Tsî ǃgâu gu garu, hîab ge ge ǁom. Tsî ǁgaoǂoa-i ge hurirob ai hā, o gu ge ǁgammi xa ǀoa, tsî tsūǃgâb ǃnâ ge hâ i.

²⁴O gu ge sī ǂkhaiǂkhai bi, tsî ge mî: ǁKhāǁkhā-aotse, ǁkhāǁkhā-aotse, kā ge komo rao. Ob ge khâi tsî ǂoab tsî ǃgabigu tsîga ge ǃgabe; o gu ge ge ǀû, tsî i ge ge ǃnōǃari.

²⁵Ob ge ǁîgu ǃoa ge mî: Mapas kha ǂgoms âgo hâ? O gu ge ǃao, tsî buru, tsî ge mîǀîgu: Tariba kha nēb, ǂoagu tsî ǁgammi tsîga ra mîmāb, tsî ǁîgu xa ra ǁnâuǀnamheba?

²⁶Tsî gu ge Gadareǁîn ǀkharib, Galileab nauǃani hâba ǃoa ge ǃgâu.

²⁷Tsî ǃhūb aib ge ǂoa, ob ge ǃās di khoeba ge ǃoa bi, ǁgâuagu xa hâǃnâhe ge ib, tsî ǂomxa ǁaeba sara-e ana tama ge hâ ib, tsî om-i ǃnâ hâ tama ge hâ ib tsî ǀhobadi ǃnâ gere hâba.

²⁸Tsî Jesubab ge mû, ob ge ǃau tsî ǁîb aiǃâ ǁnāǁgoe, tsî ǃgari dommi ǀkha ǂgai tsî ge mî: Tare-e ta sats ǀkha ǁae hâ, Jesu, Hoan xa ǀGapi Elob di Ôatse? ǀGore tsi ta ra, tā tsûtsû te re!

²⁹ǃAnuoǃnâ gagabab ge mîmā, khoeba xub nî ǂoasa amaga. ǂOmxa ǁaeba xub ge ǃkhō bi hâ i; tsîn ge ǁkhamgu tsî ǂaiǃgae-ūdan ǀkha ǃgae tsî gere ǃûi bi, xaweb ge ǃgae-ūdana gere khôaǃā tsî ǁgâuab xa ǃgaroǃhūb ǃoa gere doeǁgarihe.

³⁰Ob ge Jesuba dî bi, tsî ge mî: Matits ǀon hâ? Ob ge Legiota, ti ge mî; ǂgui ǁgâuagu ge ǁîb ǃnâ ǂgâ hâ i amaga.

³¹O gu ge ge ǀkhoma bi, îb ǁîga tā mîmā, ǃgammi ǃoa ǁgôasa, ti.

³²Tsî i ge ǁnāpa kai hāgūn ǀhao-e ǃhommi tawa gere ǃû. O gu ge ge ǀkhoma bi, îb ǁîn ǃnâ ǂgâsa mîmā gu ti; ob ge ge mā-am gu.

³³O gu ge ǁgâuaga khoeba xu ǂoa, tsî hāgūn ǃnâ ge ǂgâ; on ge hāgūn hoana ǃhaoba xu hurirob ǃnâ uriǁgôa tsî ge āǁō.

³⁴Tsî ǃûi ra gu ge ī go-e mûo, o gu ge ǁhâ, tsî ǃās tsî ǃārodi ǃnâ ǁî-e ge sī ǂhôa.

³⁵On ge ī go-e nî mûse ge ǂoa; tsî Jesub tawan ge sī, on ge ǁgâuagu go ǂoaxū khoeba anahe hâse tsî ǁnâuǃāxase Jesub ǂaira tawa ǂnôase ge hō; on ge ge ǃao.

³⁶Tsî mû gon ge ǁkhāti ǁîna ge ǂhôa, matib go ǁgâuab xa hâǃnâheba ǂgauǂgauhesa.

³⁷Ob ge Gadareǁîn ǃnamam ǁgoe ǃhūb di ǂguib hoaba ge ǀkhoma bi, îb ǁîna xu bē, kai ǃaob xan ge ǃkhōhe hâ i xui-ao. Ob ge ǂgaus ǃnâ ǂgâ tsî ge oa.

³⁸Tsîb ge ǁgâuagu go ǂoaxūba ge ǀkhoma bi, ǁîb ǀkhab ga hâsa, xaweb ge Jesuba ǃgû kai bi, tsî ge mî:

³⁹Sa oms ǃoa ǁaru, î Elob go dī tsi kai xūna ǃhoaba; ob ge ǃgû tsî Jesub go dī bi kai xūna ǃās hoaragas ǃnâ gere ǂhôa.

⁴⁰Tsî Jesub ge oaǀkhīo, os ge ǂnubisa ge ǃkhōǃoa bi, hoatsaman ge ǃâu bi hâ i xui-ao.

⁴¹Tsî mû, khoeb, Jairub ti ǀon hâb, sinagogeb di danakhoeb ge ǁîb ǃoa hā, tsî Jesub di ǂaira aiǃâ ǁnāǁgoe, tsî ge ǀkhoma bi, ǁîb oms ǃnâb nî sīsa.

⁴²ǀGuise ǃnaeba bi hâ ǀgôas, ǁaupexa disiǀgamǀa kurixa ge isab ge ūhâ i, tsîs ge ǁîsa ǁōǁga rase ǁgoe i xui-ao. Tsî ǃgûb garu hîas ge ǂnubisa gere ǁgâi bi.

⁴³Os ge taras, disiǀgamǀa kuriga ǀaoǂnâba ge ūhâ is, tsî ûixūn âs hoasa ǂgauǂgau-aoga mā, tsî xawe ǀguib xaweb xa ǂuruǂuruhe ǁoa ge isa,

⁴⁴ǃgâbǀkhāba xu hā, tsî ǂomamǃgâb ǁîb sarab diba ge tsâǀkhā; ob ge ǁnātimîsi ǀaoǂnâb âsa ge toa.

⁴⁵Ob ge Jesuba ge mî: Tari-e go tsâǀkhā te? Tsî hoan ge ǀoa, ob ge Petrub tsî ǁîb ǀkha hâga ge mî: ǁKhāǁkhā-aotse, ǂnubis kom ǂgâu tsî ra ǀā tsio; ots: Tari-e go tsâǀkhā te, ti ra mî?

⁴⁶Ob ge Jesuba ge mî: Khoe-i ge go tita tsâǀkhā; ǀgaib go tita xu ǂoa ǃkhaisa ta kom ra hōǃâo.

⁴⁷Tsî ǂganǃgâ tamas hâ ǃkhaisas ge tarasa mû, os ge ǀkhū rase hā, tsî ǁîb aiǃâ ǁnāǁgoe, tsî ǁaes hoas aiǃâ ge ǂhôa bi, tare xū-i ǃaromas go tsâǀkhā bi tsî matis go ǁnātimîsi ǂgau ǃkhaisa.

⁴⁸Ob ge ǁîs ǃoa ge mî: ǃGâiǂâisen re, ǀgôase, ǂgoms âs ge go hui si. ǃGû ǂkhîb ǃnâ re!

⁴⁹Tsî ganupeb ra ǃhoa, hîa i ge sinagogeb danakhoeb di khoe-e hā, tsî ǁîb ǃoa ge mî: ǁŌ go ǀgôas âts ge, xuige ǁkhāǁkhā-aoba tā ǀhupuǀhupu re.

⁵⁰Tsî Jesub ge ǁnâu, ob ge ǃeream bi tsî ge mî: Tā ǃao; ǂgoms ǀguisa hî, os ge nî huihe.

⁵¹Tsî oms ǃnâb ge sī, ob ge ǀgui-i xare-e ǂgâsa mā-am tama, Petrub, Jakobub, Johaneb, tsî ǁgûra tsîn ǀguina.

⁵²Tsîn ge hoatsama ā tsî ǁîs ǂama ge ǃoa. Ob ge ge mî: Tā ā; ǁîs ge ǁō tama xawes ge ǁom hâ.

⁵³On ge ge âiǂui bi; ǁōs hâ ǃkhaisan ge ǂan i amaga.

⁵⁴Ob ge hoana ǃhaeǂui, tsî ǃommi âsa ǃkhō, tsî ǂgai tsî ge mî: ǀGôase, khâima!

⁵⁵Os ge gagas âsa ǁkhawa ge hā, tsîs ge ǁnātimîsi ge khâi. Ob ge ǂûmāhes nîsa ge mîmā.

⁵⁶Tsî ra ge ǁgûra ge burugâ, tsîb ge ǁîba ge ǃkhâi, khoe-i xare-en ī go-e mîba tidesa.