Read Khoekhoegowab Lukab 9 Bible Online

Lukab 9 - Khoekhoegowab bible

Lukab 9

¹Tsî disiǀgamǀaga ǂgaiǁare tsîb ge ǁîga ǀgaib tsî ǁkhāsiba ge mā hoa ǁgâuagu ǂama, tsî ǀaesenaina gu nî ǂgauǂgause.

²Tsî ǁîga ge sîǂui, gaosib Elob diba gu nî aoǁnâse, tsî ǀaesen hâna gu nî ǂgauǂgause.

³Tsîb ge ǁîgu ǃoa ge mî: Tā xū-e daob ai ūǃgû, hai-i kas, ǃkhoa-i kas, pere-i kas, mari-i kas hoasa; tsî go ge ǁkhāti ǀgam sarakha ūhâ tide.

⁴Tsî om-i ǃnâ go ga ǂgâo, ǁnāpa hâ, î go ǁnāpa xu ǂoa.

⁵Tsî khoen ga sago ǃkhōǃoa tama io, ǁnā ǃāsa xu ǂoa, î tsaraba sago ǂaide xu ǃhaebeǁnâ, ǁîn ǃoagu ǃkhō-amsa ǃoa.

⁶O gu ge ǂoa, tsî ǃādi hoade ǃgûǃnâǃganu, ǃgâiǂhôasa aoǁnâ, tsî mâ ǃkhai-i hoa-i ai gere ǂgauǂgau.

⁷Tsî Herodeb, hakaǁî ǃhūǃâs gao-aob ge ǁîb ge dīn hoana ǁnâu, ob ge ge îganǀgē, ǀnîn gere mî xui-ao Johaneb kom ǁō hâna xu go khâio.

⁸Tsî naun ge: Eliab kom go ǂhaio, tsî naun ge: Kai kēbo-aogu di ǀguib kom go khâio, ti gere mî.

⁹Ob ge Herodeba ge mî: Johaneba ta ge ge ǁhāǁnâdana; tsî tariba kha nēb, ǁîb xa ta nēti īna ra ǁnâuba? Tsîb ge mû bib nîsa gere ôa-am.

¹⁰Tsî gu ge apostelga oahā, tsî dīgu gon hoana ge ǃhoaba bi; ob ge ǁîga ū, tsî Betsaida ti ra ǂgaihe ǃās ǀgūse hâ ǃgaroǃkhais ǃoa ge ǀguri hâǃgû.

¹¹Tsî ǂnubidi ge ǂano, on ge ge sao bi; ob ge ǁîna ǃkhōǃoa, tsî gaosib Elob dib xa ǁîn ǀkha ǃhoa, tsî ǂgauǂgauhesa ǂhâba hâna gere ǂgauǂgau.

¹²Tsî tsēs ra toaǁga, hîa gu ge disiǀgamǀaga ǁîb ǃoa hā, tsî ge mîǀî bi: ǂNubisa ǃgû kai, în ǁgoeǂnamipe hâ ǃādi tsî ǃārodi tawa sī hâǃkhai-e ôabasen, în ǂûna hōbasen, nēpa da ǃgaroǃkhais ai hâ xuige.

¹³Ob ge ǁîgu ǃoa ge mî: Sago ǁîna ǂûmā re. O gu ge ge mî: Sage kom koro peren tsî ǀgam ǁaukha tsîn ǀguina ūhâo. ǃGû tsî ge kha ǁnâi nē ǁaes hoasa nî ǂûna ǁamaba?

¹⁴Koroǀoadisi nî ī khoegu ge hâ i xui-ao. Ob ge ǁkhāǁkhāsabegu âb ǃoa ge mî: An ǂnû, ǃnandi ǃnâ, korodisise mâs hoasa.

¹⁵On gu ge ǁnāti dī, tsî hoatsama ǁîna ge ǂnû kai.

¹⁶Ob ge koro peregu tsî ǀgam ǁaukha tsîna ū, tsî ǀhommi ǃoa kōǃapa tsî ǀkhae tsî ge khôa, tsî ǁkhāǁkhāsabega ge mā, ǁaesa gu nî mâi-aiǃâse.

¹⁷Tsîn ge hoana ǂû tsî ge ǁâ tsîn ge ǃgau go ǃâron xa disiǀgamǀa ǀharudi ǀoaba ge ūkhâi.

¹⁸Tsî i ge ge ī, ǀgurib ra ǀgore, tsî ǁkhāǁkhāsabegu ge ǁîb tawa ge hâ io, ob ge ǁîga dî tsî ge mî: Tari ta, tin khoena ra mî?

¹⁹O gu ge ǃeream tsî ge mî: Johane ǁĀǁnâ-aots, tsî ǀnîna, Eliats, tsîn ge ǀnîna, Kēbo-aogu kaigu di ǀguib kom go khâio, ti ra mî.

²⁰Ob ge ǁîgu ǃoa ge mî: Tsî sago ǁnâi, tari ta, ti go ra mî? Ob ge Petruba ǃeream, tsî ge mî: Elob di Xristuts kom satsao.

²¹Ob ge ǁkhōse ǃkhâi gu, nēsa gu khoe-i xare-e mîba tidesa,

²²tsî ge mî: Khoen Ôab ge kaise nîra tsâ, tsî kaigu tsî ǀgapipristergu tsî xoaǂansabegu tsîgu xa aoxūhe tsî nîra ǃgamhe, tsî ǃnonaǁî tsēs aib ge nîra khâi.

²³ǃNubaib ge hoan ǃoa ge mî: Khoe-i ga tita sao ǂgao-o, a-i ǁî-aitsama ǀūxūsen, î-i ǁî-i ǃgâuhaiba tsēkorobe ūkhâi, tsî tita sao.

²⁴Ûib â-e ga sâubasen ǂgao-i ge ǁîba nî ǂoaǃnâ; tsî ûib â-e ga tita ǃaroma ǂoaǃnâ-i ge ǁîba nî ūhâbasen xuige.

²⁵Tsî tare xū-e i ga khoe-e harebeba, ǃhūbaib hoaba-i ga hō xawe, tsî i ga ǁî-aitsama gabasen tsî tôatôaseno?

²⁶Tsî tita tsî ti mîde ga tao-i, ǁnā-eb ge Khoen Ôab ona nîra tao, ǁîb tsî ǁîb Îb tsî ǃanu ǀhomǃgāgu di ǂkhaisib ǃnâb ga hāo.

²⁷Tsî amase ta ge ra mîba du: Nē mân xan ge ǀnîna hâ, ǁōba tsâ tidena, gaosib Elob diban nîra mûs kōse.

²⁸Tsî i ge ǁkhaisa nî ī tsēdi nē mîdi khaoǃgâ ge ī, ob ge Petrub tsî Johaneb tsî Jakobub tsîga ū, tsî ǃhommi ai ge ǃapa, ǀgoreb nîse.

²⁹Tsî ǀgoreb ra, hîab ge ais âb di īsiba ge ǀkhara, tsî sarab âb ge ǃuri tsî kaise ge ǂkhai.

³⁰Tsî mû, ǀgam khoekha, Moseb tsî Eliab tsîkha ge ǁîb ǀkha ge ǃhoa.

³¹ǁÎkha ge ǂkhaisib ǃnâ ge ǂhaiǂhaisen, tsî ǃgûǂoas âb, Jerusalems ǃnâb nîra ǀoaǀoas xa gere ǃhoa.

³²Tsî Petrub tsî ǁîb ǀkha ge hâ i kha ge ǂoms xa ge dāhe. Tsî ǃnoaǂkhai gu ge, o gu ge ǁîb di ǂkhaisib tsî ǁîb ǀkha mâ khoekha ge mû.

³³Tsî i ge ge ī, ǁîba xu kha ra ǀgora, hîab ge Petruba Jesub ǃoa ge mî: ǁKhāǁkhā-aotse, ǃgâi-i kom ao nēpa ge hâsa, a ge ǁnâi ǃnona ǁhaode dībasen, satsa ǀguis, Moseba ǀguis tsî Eliaba ǀguisa; tare-eb ra mîsa ǀū tsî.

³⁴Tsî nēnab ra ǃhoa, hîa i ge ǃâu-e hā, tsî ge somsomǂam gu; tsî ǁîkha ge ǃâus ǃnâ ǂgâo, o gu ge ge ǃao.

³⁵Tsî dommi ge ǃâusa xu ǀkhī, tsî ge mî: Nēb ge ti Ôab, ǀnam ta aba, ǁîba ǁnâu!

³⁶Tsî nē dommi ge ǀkhīs khaoǃgâb ge Jesuba ǀguri hâse ge hōhe. Tsî gu ge ǃnō, tsî ǁnā tsēdi ǃnâ gu ge mûn xa khoe-i xare-e ǂhôa tama ge i.

³⁷Tsî i ge sao ra tsē ge ī, ǃhomma xu gu ra ǁgôaxa, hîas ge kai ǂnubisa ǃoa bi ǃkhaisa.

³⁸Tsî mû, khoeb ǂnubis dib ge ǂgaiǂui, tsî ge mî: ǁKhāǁkhā-aotse, ǀkhoma tsi ta ra, ti ôaba kōba te, ǀguise ǃnaeba te hâb a ǁî xuige.

³⁹Tsî mû, gaga-i ra ǃkhō bi, ob ge ǁnātimîsi ra ǃau; tsî-i ge ǁîba goa-ammi nîs kōse ǀkhau tsî ǂkhūǂkhū bi tsî ǁaupexa ǁîba xu bē tama hâ.

⁴⁰Tsî ta ge ǁkhāǁkhāsabegu âtsa go ǁgoa, ǁî-e gu nî ǃhaeǂuisa, xawe gu go ǁkhā tama i.

⁴¹Ob ge Jesuba ǃeream, tsî ge mî: Sa ǂgomoǃnâ tsî ǂkhaba ǃhaose. Matikōse ta kha sadu ǀkha hâ tsî nî tani du? Sa ôaba nēpa ūhā!

⁴²Tsî ganupeb ǁîb ǃoa ǃgoaxa, hîab ge ǁgâuaba ǂnoaǁgui tsî ge ǀkhau bi. Ob ge Jesuba ǃanuoǃnâ gagaba ǃgabe tsî ǀgôaba ǂgauǂgau tsî ǁgûba ǁkhawa ge mā bi.

⁴³On ge hoana Elob di kaisib xa ge burugâ. Tsî Jesub gere dīn hoan ǂaman ge buru, ob ge Jesuba ǁkhāǁkhāsabegu âb ǃoa ge mî:

⁴⁴Nē mîde ǂgaedi âgo ǃnâ ǁgui, Khoen Ôab ge khoen ǃomǁae nîra māǁnâhe xuige.

⁴⁵Xawe gu ge nē mîsa ǁnâuǃā tama ge i, tsîs ge ǂganǃgâsaba gu ge i, ǃkhā ǁoa gu ge is kōse; tsî gu ge nē mîs xa dî bisa ge ǃao.

⁴⁶Tsî i ge ǂâi-e ǁîgu ǃnâ ge khâi, tari-i ǁîgu xa ǃnāsase kai ǃkhaisa.

⁴⁷Tsî Jesub ge ǁîgu ǂgaogu di ǂâisa ǂan, ob ge ǀgôaro-e ū, tsî ǁî-e ǁîb xōǀkhā mâi,

⁴⁸tsî ge mîǀî gu: Nē ǀgôaro-e ga ti ǀons ǃnâ ǃkhōǃoa-i ge tita ra ǃkhōǃoa-e, tsî tita ga ǃkhōǃoa-i ge tita ge sîba ra ǃkhōǃoa-e. Sago hoago xa ǂkharib, ǁnāb ge a kai xui-ao.

⁴⁹Ob ge Johaneba ǃeream tsî ge mî: ǁKhāǁkhā-aotse, ǀguiba ge ge go mû, sa ǀons ǃnâ ǁgâuaga ra ǃhaeǂuiba; o ge ge go ǃkhâi bi, sageb sao tama amaga.

⁵⁰Ob ge Jesuba ǁîb ǃoa ge mî: Tā ǃkhâi, sago ǃoagu hâ tama-i kom sago ǀkha hâ-eo.

⁵¹Tsî i ge ge i, ūǃapaheb nî tsēdi ge ǀoao, ob ge ais âba Jerusalems ǃoab nî ǃapase ge unu.

⁵²Tsîb ge sîsabega ǁîb aiǃâ ge sî; o gu ge ǃgû, tsî Samariaǁîn di ǃāro-i tawa ge sī, hâǃkhai-e gu nî ǂhomiba bise.

⁵³Tsîn ge ǃkhōǃoa bi tama ge i, ais âb ge Jerusalems ǃoab nî ǃgûse ī i amaga.

⁵⁴Tsî ǁkhāǁkhāsabekha âb Jakobub tsî Johaneb tsîkha ge mû, o kha ge ge mî: ǂGaots ra, ǃKhūtse, î khom mîmā, ǀae-i ǀhomma xu ǁgôaxa tsî nî ǁîna hapu ǃkhaisa, Eliab gere dī khami?

⁵⁵Ob ge Jesuba ǂnan, tsî ǃgabe kha tsî ge mî: ǂAn tama kho hâ, mâ gagas di kho asa.

⁵⁶Khoen Ôab kom khoen di ǀomdeb nî hîkākāse hā tamao, tsîb kom ǁîdeb nî sâuse ge hāo. Tsî gu ge ǀnî ǃās ǃoa ge ǃgû.

⁵⁷Tsî daob ai gu garu, hîa i ge ge ī, ǀguib ǁîb ǃoa ge mîsa: ǃKhūtse, satsa ta ge nî sao, ǃgûǀîts kas hoasa.

⁵⁸Ob ge Jesuba ǁîb ǃoa ge mî: ǀGirin ge āde ūhâ, tsî ǀhommi di anin ge omde ūhâ; xawe Khoen Ôab ge danasab nî ǂnûi-ai ǃkhai-e ūhâ tama hâ.

⁵⁹Tsîb ge ǀnîb ǃoa: Sao te! ti ge mî. Ob ge ǁîba ge mî: ǃKhūtse, mā-am te, î ta aibe ti îba sī ǁkhō re.

⁶⁰Ob ge Jesuba ǁîb ǃoa ge mî: An ǁō hâna ǁîn di ǁō hâna ǁkhō; î satsa ǃgû, î Elob gaosiba sī aoǁnâ.

⁶¹Tsî ǀnîb ge ge mî: Sao tsi ta nî ǃKhūtse, îts aibe ti oms dina tawedesa mā-am te re.

⁶²Ob ge Jesuba ǁîb ǃoa ge mî: Khoe-i hîa ǁî-i ǃomma ǃhūǃgao-ūdas ai ǁgui, tsî khaos ai hân ǃoa ra ǂnan-i, ǁnā-i ge gaosib Elob diba ǁkhāba tama hâ.