Read Khoekhoegowab Deuteronomium 1 Bible Online

Deuteronomium 1 - Khoekhoegowab bible

Deuteronomium 1

¹Nēdi ge mȋdi, Moseb ge Israels hoaragas ǃoa gere ǃhoade Jordanni nē ǃanib ai ǃgaroǃhūb ǃnȃ ǂgās ai, Sufs ǃoa-ai, Parans tsȋ Tofels tsȋ Labans tsȋ Hatserots tsȋ Di-Sahabs tsȋdi ǁaegu.

²ǀGuiǀa tsēdi daob ge a Horeba xu ǃhommi Seiri di daoba ū Kades-Barneas kōse.

³Tsȋ i ge ge ī hakadisiǁȋ kurib ǃnȃ, ǀguiǀaǁȋ ǁkhȃb ai, ǂguro tsēs ǁkhȃb dis ai, ob ge Moseba Israeli ôan ǃoa gere ǃhoa, ǃKhūb ge ǁȋba ǁȋn ǂama mān hoana;

⁴Sihonni, Amorǁȋn di gao-aob, Hesbons tawa ǁan hȃbab ge ǂnaus khaoǃgȃ, tsȋ Ogi, Basanni di gao-aob, Astarots tawa ǁan hȃb, Edreis tawa.

⁵Jordanni tawa nē ǃanib ai Moab di ǃhūb ǃnȃ, ǁnāpab ge Moseba ǂhanuba ǁguiǃā tsoatsoa tsȋ ge mȋ:

⁶Khūb sada di Elob ge Horeb tawa ǃhoaǀȋ da tsȋ ge mȋ: ǂȂu hȃse du ge nē ǃhommi tawa ge hȃ i;

⁷oa ȋ du dāǁnȃ ȋ du Amorǁȋn di ǃhommi ǃoa ǃgȗ tsȋ ǀgūse ǁan hȃn hoan ǃoa, ǂgās ais kao, ǃhommi ais kao, ǃgoaǃnāb ǃnȃs kao, ǃkhawagasǀȋs kao, hurib di ǂnȗidomdi tawas kao, Kanaanǁȋn di ǃhūb ǃoa tsȋ Libanonni ǃoa, ǁnā kai ǃāb Eufrati kōse.

⁸Kō, tita ge ǃhūba ge mā sadu di ais aiǃȃ; ǂgȃ ȋ du ǀomise ūhȃ ǁnā ǃhūb, ǃKhūb ge sadu di ȋgu, Abrahammi tsȋ Isaki tsȋ Jakob tsȋga ge nūbaba, ǁȋgu tsȋ ǁȋgu di ǃkhommab nȋ ǁȋba ǁȋgu khaoǃgȃ mā, ti.

⁹Tsȋ tita ge ǁnā ǁaeb ǁkhāb ai sadu ǀkha ǃhoa tsȋ ge mȋ: Tita ǀgui ta ge sado nȋ tani ǁoa.

¹⁰ǃKhūb sadu di Elob ge sado ge ǂguiǂgui, tsȋ mȗ, o du ge nētsē ǀhommi di ǀgamirodi kōse a ǂgui.

¹¹ǃKhūb, sadu ȋgu di Eloba ab nēsi du īsa xu ǀoadisi ǃnādi kōse ǂguiǂgui du, ȋb ǁȋba ǀkhae du, sadu ǃoab ge ǃhoa xase.

¹²Mati ta kha ǁnȃi tita ǀguri sadu di ǀhupub tsȋ sadu di ǃgommi tsȋ sadu di ǂnoagu-aidi tsȋna nȋ tani ǁkhā?

¹³Ūbasen du sadu di ǃhaode xu, gā-ai tsȋ ǁnȃuǃāxa tsȋ hōǃȃsenxa aoga, ȋ ta ǁȋga tanikhoese mȃi.

¹⁴ǃNūbai du ge ǃeream te tsȋ ge mȋ: Nē mȋs ge a ǃgȃi, sats go mȋsa, dīhes nȋga.

¹⁵O ta ge sadu ǃhaodi di danakhoega ge ū, gā-ai tsȋ hōǃȃsenxa aoga, tsȋ ta ge ǁȋga danase ge ǂnȗi, sadu ǂama ǂamkhoese, ǀoadisin dise tsȋ ǂamkhoese kaidisin dise tsȋ ǂamkhoese korodisin dise tsȋ ǂamkhoese disin dise tsȋ ǃoabasabegu sadu ǃhaodi digu dise.

¹⁶Tsȋ ta ge sadu di ǂhanuǂhanu-aoga ǁnā ǁaeb ǁkhāb ai mȋmā tsȋ ge mȋ: ǁNȃu go sago di ǃgȃsagu ǁaegu hȃ ǂnoaguǃkhaide ȋ go ǀgoraǃgȃ, aob tsȋ ǃgȃsab ȃb ǁaegu tsȋ ǁȋb di ǃhao khoeb ǁaegu.

¹⁷Aisa go ge ǀgoraǃgȃs ǃnȃ ǂan tide; ǂkhariba go ge kaib ǁkhāb xase nȋ ǁnȃu; sago ge khoe-i di aisa ǃao tide, ǀgoraǃgȃs ge a Elob di xuige; xawe ǁnā ǃkhais, ǁȋs xa go ga ǃgomdāhes, ǁȋsa go ge tita ǃoa nȋ ūhā, ȋ ta tita ǁnȃu si.

¹⁸Nētimȋ ta ge ǁnā ǁaeb ǁkhāb ai ǃkhaidi, dī du nȋdi hoade ge mȋmā du.

¹⁹ǁGoasi da ge Horeba xu dāǁnȃ tsȋ ǁnā kai tsȋ ǃaoǃaosa ǃgaroǃhūb, sadu ge mȗb hoaba ge doeǃnȃǃganu Amorǁȋn ǃhommi di daob ai, ǃKhūb, sada di Elob ge mȋmā da khami; tsȋ da ge Kades-Barneas tawa ge sī.

²⁰ǃNūbai ta ge tita sadu ǃoa ge mȋ: Sadu ge go hā, Amorǁȋn di ǃhommi, ǃKhūb, sada di Elob nȋ mā dab tawa.

²¹Mȗ, ǃKhūb, sadu di Elob ge ǁnā ǃhūba sadu di ais aiǃȃ ge mā; doeǃapa ȋ du ǁȋba ǀomise ūhȃ, ǃKhūb, sadu ȋgu di Elob ge sadu ǃoa ǃhoa khami; tā ǃao ȋ du tā ǃhuri.

²²ǃNūbai du ge hoatsama ti ǀgūse ǀkhī tsȋ ge mȋ: A da aoga sȋ, sada di ais aiǃȃ, ǃhūba nȋ ôaǃnȃba daga tsȋ ǃereamsa nȋ ūhȃba daga, mȃ daoba ū da nȋ doeǃapa tsȋ mȃ ǃādi tawa da nȋ sī ti.

²³Os ge nē ǃkhaisa ge ǃgȃi i ti mȗǁae; o ta ge sadu xa ǀgamǀa aoga ge ū, mȃ ǃhaos hoasa xu ǀgui aoba.

²⁴O gu ge ǂnan tsȋ ǃhommi ai ǃapa tsȋ ge sī ǃgoaǃnāb Eskoli tawa tsȋ ǁȋba gere ǃkhē.

²⁵Tsȋ gu ge ǃhūb di ǂȗn xa ǃomǁae ū tsȋ ǁȋna ge ūǁgôaxaba da, tsȋ amsa ūhāba da tsȋ ge mȋ: ǁNā ǃhūb, ǃKhūb, sada di Elob nȋ mā dab ge a ǃgȃi.

²⁶Xawe sadu ge doeǃapa ǂgao tama ge i, tsȋ du ge ǃKhūb, sadu Elob di amsa ge mȃǃoa,

²⁷tsȋ du ge sadu di tentomdi ǃnȃ ǀara tsȋ ge mȋ: ǃKhūb ta ǁkhan da amagab ge Egipteǃhūba xu ge ǂgaeǂguiǃapa da, māǁnȃ dab nȋga, Amorǁȋn di ǃomǁae, hȋkākāhe da nȋse.

²⁸Mȃǀȋ da kha nȋ doeǃapa? Sada di ǃgȃsagu ge ǂgaob ȃda go tsunitsuni, mȋ rase: ǁNā ǁaes ge sada xa a kai tsȋ gaxu; ǃādi ge a kai tsȋ a ǁaposa ǀhommi kōse; tsȋ da ge ǁnapa ǁkhāti Anakǁȋn di ôana go mȗ.

²⁹ǃNūbai ta ge tita sadu ǃoa ge mȋ: Tā ǃhuri ȋ tā ǁȋna ǃao!

³⁰ǃKhūb, sadu di Elob, sadu di ais aiǃȃ ra ǃgȗb, ǁȋb ge sado nȋ ǂnoaba, ǁnān, Egipteb ǃnȃb ge sadu di mȗdi aiǃȃ sadu tawa gere dīn hoan ǃoa.

³¹Tsȋ ǃgaroǃhūb ǃnȃ, ǁȋb ǃnȃ du ge mȗ ǃKhūb, sadu di Elob ǁȋb ǃnȃ ge tani du ǃkhai-e, aob ta ǀgôaba tani khami, ǁnā daob, ǁȋb ai du ge ǃgȗb hoab ai, nē ǃkhais tawa du ge hās kōse.

³²Xawe du ge nē mȋsa xu ǂgom tama ge i ǃKhūb, sadu di Elob ǃnȃ,

³³ǁȋb sadu di ais aiǃȃ daob ai ge ǃgȗb, ǁnā ǃkhais, ǁȋs ai du nȋ ǁgoesab nȋ mȗǂuiba duse, tsuxuba ǀaes ǃnȃ, daob, ǁȋb ai du nȋ ǃgȗbab nȋ ǁgau duse tsȋ tsēa ǀnanus ǃnȃ.

³⁴Tsȋ ǃKhūb ge sadu di mȋdi di domma ǁnȃuo, ob ge kaise ǁaixa tsȋ nū tsȋ ge mȋ:

³⁵ǀGuib xareb, ǁnā aogu nē ǂkhawa ǃhaos digu dib ge ǁnā ǃgȃi ǃhūba mȗ tide, ǁȋb xa ta ge tita nūb, sadu ȋga ta nȋ mā bi ǃkhai-eba.

³⁶Kaleb ǀguib, Jefuneb ôab, ǁȋb ge nȋra mȗ bi, tsȋ ǁȋba ta ge ǁnā ǃhūb ǁȋb aib ge dāba nȋra mā tsȋ ǁȋb di ôana; ǃKhūbab ge sao hȃhȃ amaga.

³⁷Tita on ǀkhab ge ǃKhūba ge ǁaixa, sadu ǂama, mȋ raǃȃ: Sats on ge ǁnāpa sī ǂgȃ tide.

³⁸Josuab, Nunni ôab, sa ais aiǃȃ mȃb, ǁȋb ge nȋra sī ǂgȃ; ǀgaiǀgai bi re, Israelab nȋ ǁȋba ǀomi kai xuige.

³⁹Tsȋ sadu di ôaron, ǁȋn xa du ge: ǀȂxūsen kom nȋ īo, ti gere mȋn, tsȋ sadu di ôaron, nētsē mȃ-i a ǃgȃi tsȋ mȃ-i a ǂkhawa ǃkhai-e a ǀūn ge nȋra ǂgȃ, tsȋ ǁȋna ta ge tita ǁȋba nȋra mā, tsȋ ǁȋn ge ǀomise ǁȋba nȋra ūhȃ.

⁴⁰Xawe sado oa ȋ du doe ǃgaroǃhūb ǃoa ǂĀxahuriba ū gau daob ai.

⁴¹ǃNūbai du ge ǃeream tsȋ ge mȋǀȋ te: Sida ge ǃKhūb ǃoagu goro ǁore, ǃapa tsȋ da ge nȋ ǃkham, ǃKhūb, sida di Elob ge mȋmā dan hoan ǃoa. O du ge mȃ-i hoa-e ǁȃtanin ȃ-i ǀkha ǃgaesen, tsȋ du ge māsenxase ge ī, tsȋ ǃhommi ai sī ǃapasa.

⁴²Ob ge ǃKhūba tita ǃoa ge mȋ: ǁȊna mȋba: Tā doeǃapa ȋ du tā ǃkham, tita ge sadu ǁaegu hȃ tama hȃ xuige; ȋ du sadu khākhoen di ais aiǃȃ tā ǂnauhe.

⁴³Tsȋ sadu ǃoa ta ge ǃhoa xawe du ge ǁnȃu tama tsȋ du ge ǃKhūb di amsa mȃǃoa tsȋ ǂkhawase dī tsȋ ǃhommi ai ge ǃapa.

⁴⁴ǃNūbain ge Amorǁȋn, ǃhommi ai ǁan hȃna sado ǃgȗǃoa tsȋ ge ǃgôaǃgon du, ǃhabun ra dī khami; tsȋn ge Seirs ǃnȃ ge ǂnauǂkhūǂkhū du Hormas kōse.

⁴⁵Tsȋ oa tsȋ du ge āo ǃKhūb di ais aiǃȃ, ob ge ǃKhūba sadu di domma ǁnȃu tama tsȋ ǁȋb di ǂgaera sado ǂōǀȋ tama ge i.

⁴⁶Nēti du ge ǂgui tsēde Kades tawa ge hȃ, ǁnāpa du ge hȃ i tsēdi hoade.