Read Khoekhoegowab Deuteronomium 10 Bible Online

Deuteronomium 10 - Khoekhoegowab bible

Deuteronomium 10

¹ǁKhā ǁaeb aib ge ǃKhūba tita ǃoa ge mî: ǀGam ǀuixoa-aixūra ǂguro ra ge ī i khami īra ǁhāǂuibasen îts tita ǃoa nē ǃhommi ai ǃapahā, îts ǂgae-e dībasen, hai-e xu.

²O ta ge tita ǁnā xoa-aixūra ai nî xoa ǁnā mîdi, ǂguro xoa-aixūra, sats ge khôara ai ge hâ ide; ots ge ǁîra ǁnā ǂgaes ǃnâ nî ǁgui.

³Nēti ta ge sitimhai-i xa ǂgae-e dī tsî ǀgam ǀuixoa-aixūra ge ǁhābasen, ǂgurora ge ī i khami īra, tsî ta ge ǃhommi ai ge ǃapa, ǁnā ǀgam ǀuixoa-aixūra ti ǃomǁae ūhâǃâ.

⁴ǃNubaib ge ǂguro xoas dommi ai ǁnā mîdi ǃKhūb ge ǀhûs di tsēs ai ǃhommi ai ǀaes ǁaeguba xu sadu ǁga ǃhoade, xoa-aixūra ai ge xoa; tsî ǃKhūb ge ǁîra tita ge mā.

⁵O ta ge dabasen tsî ǃhomma xu ǁgôaxa tsî xoa-aixūra, tita ge dīra, ǂgaes ǃnâ ge ǁgui; tsî ǁnāpa ra ge hâ, ǃKhūb ge mîmā te xase.

⁶Tsî Israeli ôan ge Beerot-Bene-Jaakans tsî Moserasa xu ge dāǁnâ. ǁNāpab ge Aronna ge ǁō, tsî ǁnāpab ge ge ǁkhōhe; tsî ǁîb di ôab Eleasari ge pristerǃoabasa ǁîb di ǃās ǃnâ gere ǃoaba.

⁷ǁNāpa xun ge Gudgodsa ǃoa ge dāǁnâ, tsî Gudgodsa xu Jotbatas, ǁgamxa ǃhūb ǃoa.

⁸ǁNā ǁaeb ǁkhāb aib ge ǃKhūba ǃhaos Levib disa ge ǀgoraǂui, ǃgaeǀhaos di ǂgaes ǃKhūb disan nî tanise, ǃKhūb di ais aiǃân nî mâse, ǁîban nî ǃoabaga, tsî ǀons âb ǃnân nî ǀkhaega, nētsēs kōse.

⁹ǁNā-amagab ge Leviba ǃgâsagu âb ǀkha amǃnâ-i tsî ǀumi-i xare-e ūhâ tama hâ; ǃKhūb ge a ǁîb di amǃnâ, ǃKhūb, sadu Elob ge ǁîb ǃoa mî xase.

¹⁰Tsî ta ge ǃhommi ai ge mâ i, aibegam tsēdi ǃnâs xase, hakadisi tsēdi tsî hakadisi tsuxugu kōse; tsî ǃKhūb ge nē ǃnās on ai ge ǁnâu-am te; ǃKhūb ge sado hîǀhuru ǂgao tama ge i.

¹¹Tsî ǃKhūb ge tita ǃoa ge mî: Khâi îts ǁaes di ais aiǃâ dāǁnâ; în ǂgâ în ǁnā ǃhūb, ǁîn di îga ta ge ǁîna ta nî mā bisa nūbaba ǀumi.

¹²Tsî nēsi ǁnâi, Israeltse, tare xū-eb Eloba satsa ra ǂgaoǀkhā? ǃKhūb, sa Eloba ǃaos ǀguis, ǁîb di daogu ǃnâ tanisens ǀguis, tsî ǁîba ǀnams ǀguis tsî ǃKhūb, sa Eloba ǃoabas ǀguis, ǂgaob âts hoas ǀkha tsî ǀoms âts hoas ǀkha,

¹³ǃkhōǀgaipets nîga, ǃKhūb di mîmādi tsî ǁîb di ǂnûiǂgādi nētsē ta ra mîmā tside, sa ǃgâiba ǃoa.

¹⁴Mû, ǀhommi tsî ǃhomgu di ǀhommi ge a ǃKhūb, sa Elob di, tsî ǃhūbaib tsî ǁîb ǃnâ hân hoana.

¹⁵Xawe sa îgu ǀguigu tawab ge ǃKhūba turaba ge ūhâ i, ǁîgab nî ǀnamga, tsîb ge ǁîgu di suriba ǁîgu khaoǃgâ, sado, ǁaedi hoade xu ge ǃkhōǂuibasen, nētsē ī khami.

¹⁶ǃGao ǁnâi aikhōb sadu ǂgaob diba, î du ǃaruǀîǀgui tā ǂnîxaǃao.

¹⁷ǃKhūb, sadu Elob ge a elogu di Elo tsî ǃkhūgu di ǃKhū; ǁnā kai, ǀgaisa tsî ǃaoǃaosa Elob, ai-e kōǀî tamab tsî ǁkhāti ǀkhaexū-e ǃkhōǃoa tamab;

¹⁸ǃoaǀgôa-i tsî ǃoataras tsîna ǂhanuba ra kurubab, tsî ǃhaokhoe-e ǀnam hâba, pereb tsî saran tsînab nî ǁî-e māse.

¹⁹ǁNā-amaga du ge ǃhaokhoe-e nî ǀnam, Egipteb ǃnâ du ge ǃhaokhoe ge i amaga.

²⁰ǃKhūb, sadu Eloba ǀnam, tsî du ge nî ǁîba ǃoaba, tsî du ge ǁîb tawa ǂgāsen tsî nî ǀons âb tawa nū.

²¹ǁÎb ge a sadu di ǃkhōǀkhā, tsî ǁîb ge a sadu Elo, sadu tawa nē kai tsî ǃaoǃaosa xūn, sadu mûdi ra mûna ge dība.

²²Sadu di îgu ge Egipteb ǃoa ge doeǁgôa hûdisi ǀomdi â-ise; tsî nēsib ge ǃKhūb, sadu Eloba ǀhommi di ǀgamiron a ǂgui khami ge dī du.