Read Khoekhoegowab Deuteronomium 11 Bible Online

Deuteronomium 11 - Khoekhoegowab bible

Deuteronomium 11

¹ǁNā-amaga du ge ǃKhūb, sadu Eloba nî ǀnam, tsî du ge hoa tsēde nî ǃkhōǀgaipe ǁîb di mîs tsî ǁîb di ǂnûiǂgādi tsî ǁîb di mîmādi tsîna.

²Tsî du ge nētsē nî ǂan sadu ôan hîa ǀūn tsî ǃKhūb, sadu Elob di ǁgaus tsî ǁîb di kaisib tsî ǁîb di ǀgaisa ǃommi tsî ǁîb di ǀhōǂuihesa ǁôab tsîna mû tama hân ǀkha ta ǃhoa tama ǃkhaisa;

³tsî ǁîb di saodi tsî ǁîb di dīgu tsîn, Egipteb ǁaegub ge Faraob, Egipteǁî gao-aob tsî ǃhūb âb hoab tawa gere dīn,

⁴tsî Egipteǁîn di ǂnubis tawab gere dīn, ǁîb di hān tsî ǁîb di kunidi tsîn tawa; matib ge ǁîba ǂĀxahurib di ǁgamga ǁîn di aisa dâuǂam kai ǃkhaisa, khaosa xun ge sado ǃgôaǃgono, tsî matib ǃKhūba ǁîna ge hîkākā ǃkhaisa nētsēs kōse;

⁵tsî tare xū-eb ǃgaroǃhūb ǃnâ sadu tawa ge dī ǃkhaisa, nē ǃkhais tawa du ge hās kōse;

⁶tsî tare-eb ge dī ǃkhaisa Datanni tsî Abirammi tsîkha, Eliab, Rubenni ôab di ôakha tawa; matib ǃhūba ams âba khoba tsî ǁîna ge hapu ǃkhaisa ǁîn ommi din ǀkha tsî tentomdi ân tsî hâ a xūn hoan hîa ǁîn din ǀkha, Israeli hoab ǁaegu.

⁷Sadu mûdi ge nē kai sîsenni ǃKhūb dib hîab ge dība mû xui-ao.

⁸ǁNā-amaga ǃkhōǀgaipe mîmādi, nētsē ta ra mîmā du di hoade, î du ǀgaisa, î du ǂgâ, î du ǀumi ǁnā ǃhūb, ǁîb ǃoa du gauba, ǀumi bi du nîga;

⁹î du sadu di tsēde ǃnūǃnū ǁnā ǃhūb ǃnâ, ǃKhūb ge sadu îga nūbaba, ǁîn tsî ǁîn di suribab nî mā bi ti, ǃhūb, daib tsî danib tsîkha ra dâuǃnâba.

¹⁰ǃHūb, ǁîb ǃoa du ǀumi bi nîse ra ǃgûb ge Egipteǃhūb khami ī tama, ǁîba xu du ge ǃgûǂoab, ǁîb ai du ge sadu di ǃkhomma tsorob, ǁîba du ge sadu di ǂais ǀkha ǂnâba, ǃam xūn di ǃhanab xase.

¹¹Xawe ǁnā ǃhūb, ǁîb ǃoa du ge ǀumi bi nîse ǃgûb ge ǃhomxa tsî ǃgoaǃnāxa ǃhūba; ǁîb ra ǀapib ǀhommi dib di ǁgamma ā,

¹²ǃhūb, ǁîbab ra ǃKhūb, sadu Eloba ǂhansenbab; ǃKhūb, sadu Elob mûdi ge hugaǀgui ǁîb ai hâ, kurib di tsoatsoasa xu kurib di ǀunis kōse.

¹³Tsî i ge nîra ī, ôasase du ga ti mîmādi, nētsē ta ra mîmā dude ǁnâuo, ǃKhūb, sadu Eloba ǀnam tsî nî ǁîba ǃoabase, sadu di ǂgaob hoab ǀkha tsî sadu ǀoms hoas ǀkha,

¹⁴o ta ge tita ǀapib sadu ǃhūb diba ǁaeb ai nîra mā, haiǃkharub tsî ǃkhāǁaeb tsîkha, sadu di ǃhorob tsî sadu di ǂkhon ǂauxûib tsî sadu di oliba du nî ǀhaoǀhaobasense.

¹⁵Tsî ta ge sadu di ǃaub ai ǀgâba ǀgoan âdo nîra mā; tsî du ge ǂû tsî nîra ǁâ.

¹⁶ǂAnbasen îb sadu di ǂgaoba tā ǂgaeǂhapuhe, î du tā ǂgō, î du ǀkhara eloga tā ǃoaba, î du ǁîgu aiǃâ tā ǃhon.

¹⁷Îb ǁaib ǃKhūb diba saduǀî tā ǂhubi, îb tā ǀhomma ǂganam, ǀapi-i xare-i hâ tide tsî ǃhūb ūǀkhīn âba mā tidega; î du tā ǃhaese kā ǁnā ǃhūb, ǃKhūb ra mā duba xu.

¹⁸ǁNā-amaga nē mîdi âtade ǁguibē sadu di ǂgaob ǃnâ tsî sadu di ǀoms ǃnâ, î du ǁîde saose ǃgae sadu di ǃommi ai, î di ǃūs di ǃgaexūse ī sadu mûdi ǁaegu.

¹⁹Î du ǁîde sadu ôana ǁkhāǁkhā, ǁîdi xa ra ǃhoaǃâ, ommi ǃnâts ga ǂnûo tsî daob aits ga ǃgûo, tsî ǁgoets kao tsî khâits kao;

²⁰î du ǁîde xoa, haigu sadu ommi digu ai tsî sadu ǁāgu tawa;

²¹î di sadu tsēdi tsî sadu ôan di tsēde ǂguiǂguihe ǁnā ǃhūb, ǃKhūb ge sadu îga nūbab ǃnâ, māb nîse ǀhommi di tsēdi khami ǃhūbaib ai.

²²Ôasase du ga ǃkhōǀgaipeo nē mîmādi, nētsē ta ǁîde du nî dīse ra mîmā dude, ǃKhūb, sadu Eloba ra ǀnamse, ǁîb di daogu hoagu ǃnâ ra tanisense tsî ǁîb tawa ra ǂaese,

²³ob ge ǃKhūba nē ǁaedi hoade sadu ais aiǃâ ūn hâna xu nîra doeǁgaǂui, o du ge sadu ǃgâ-ai kai tsî ǀgaisa ǁaede nîra ǀumise ūhâ.

²⁴Mâ ǃkhais hoas, sadu ǂaiǃnās ǁîs ai ra dās ge nîra sadu di: ǃGaroǃhūb tsî Libanonna xu, ǃāba xu, Eufratǃāba xu hurib di ǀkhâuǀams kōseb ge sadu ǀkhariba nîra hâ.

²⁵Khoe-i xare-i ge sadu aiǃâ nîra mâ ǁoa: ǃKhūb, sadu Elob ge sadu di ǃhurib tsî sadu ǃaoba nîra mā, mâ ǃhūb, ǁîb ai du ga dāb hoab ai, ǁîb ge mî xase.

²⁶Mû, tita ge nētsē ra mâi-aiǃâ du ǀkhaeb tsî ǀâxareb tsîkha:

²⁷ǀKhaeba, ǁnâu du kao ǃKhūb, sadu Elob di mîmāde, nētsē ta ra mîmā dude;

²⁸tsî ǀâxareba, ǁnâu tama du ka io ǃKhūb, sadu Elob di mîmāde, tsî ǂgō du kao daob, nētsē ta ra mîmā duba xu, ǀkhara elogu hîa du ǂan tama hâga du nî saoga.

²⁹Tsî i ge nîra ī, ǃKhūb, sadu Elob ga ūǂgā duo ǁnā ǃhūb, ǁîb ǃoa du ǀumi bi nîse ra ǃgûb ǃnâ, o du ge ǀkhaeba nîra ǁgui Gerisimǃhommi ai tsî ǀâxareba, Ebalǃhommi ai.

³⁰Xare hâ tama kha hâ ǁîkha Jordanǃāb nauǃanib ai, sores ra ǂgâ ǃkhais di daob ǃgâbai, Kanaanǁîn ǂgāb ai Gilgals ǃoagu, aik-haixa ǃkhais, Mores tawa ǁan hân di ǃhūb ǃnâ?

³¹Sadu ge Jordanna nî ǃgâu, ǂgâ tsî du nî ǀumise ǁnā ǃhūb, ǃKhūb, sadu Elob nî mā duba; tsî du ge ǁîba ǀumise ūhâ tsî nîra ǁan ǁîb ǃnâ.

³²ǂAn ǁnâi î du dī ǂnûiǂgādi tsî ǂhanugu tsîn, nētsē ta ra mâi-aiǃâ dun hoana.