Read Khoekhoegowab Deuteronomium 12 Bible Online

Deuteronomium 12 - Khoekhoegowab bible

Deuteronomium 12

¹Nēn ge ǂnûiǂgādi tsî ǂhanugu tsîn, sadu nî ǃkhōǀgaipen dī du nîse ǁnā ǃhūb, ǃKhūb, sadu îgu Elob ge mā dub ǃnâ, ǀumi bi du nîga, ǁnā tsēdi, ǃhūbaib ai du nî hâdi hoadi kōse.

²Sadu ge hoaragase nî hîkākā ǁnā ǃādi, ǁîdi ǃnâ di ge ǁaedi, sadu nî ǀumide ǁîn eloga gere ǃoabade; ǀgapi ǃhomgu ai tsî ǃnomgu ai tsî ǃam hai-i hoa-i ǃgao.

³Tsî du ge ǁîn di altarde ǃhanǁgui tsî ǁîn di ǂnûikhâihesa īga nî khôaǂkhū tsî ǁîn di haixa ǃkhaide ǀaes ǀkha nî khauǃkhū tsî ǁîn elogu di ǃgaohesa īga nî ǁhāǁgui; tsî du ge ǁîgu di ǀonsa nî hîkākā ǁnā ǃkhaisa xu.

⁴Xawe du ge ǃKhūb, sadu Eloba ǁnāti dī tide.

⁵Tsî du ge ǁnā ǃkhais, ǃKhūb, sadu Elob sadu ǃhaodi hoade xu nî ǃkhōǂuibasens, ǀons âbab nî ǁnāpa ǂnûiga, ǁnā ǃkhais âba dîǃgâ tsî ǁnāpa nî sī.

⁶Tsî du ge ǁnāpa nî ūsī sadu di khauǁguibadi, sadu ǂāǁguibadi, sadu di disiǁî ǃâdi, ǃkhōkhâiǁguibas sadu ǃommi dis, sadu di mîmâidi, sadu di māsenxa ǁguibadi, ǂguroǃnaesabegu sadu goman tsî sadu gūn digu tsîna.

⁷Tsî du ge ǁnāpa ǃKhūb, sadu Elob di ais aiǃâ ǂû tsî nî ǃgâiaǂgao, sadu tsî ommi âdu tsîdo, sadu ǃomma du ge ǁguiǀkhā xūn, ǃKhūb, sadu Elob ge ǁîn ǃnâ ǀkhae dun hoan ǂama.

⁸Sadu ge dī tide, nētsē da nēpa ra dīn hoan ǃoa, mâ-i hoa-e, ǁî-i di mûǁae i a ǃgâi xase.

⁹Nēs kōse du ge ǁnā sâb tsî ǁnā ǀumis, ǃKhūb, sadu Elob nî mā dus ǃnâ sī tama hâ xui-ao.

¹⁰Xawe du ge Jordanna ǃgâu tsî ǁnā ǃhūb, ǃKhūb, sadu di Elob nî ǀumi kai dub ǃnâ nî ǁan, tsîb ge sadu ǂnamipe hâ khākhoen hoana xu sâba nî mā du, o du ge sâusase nîra ǁan.

¹¹ǃNubai i ge ǃkhai-e nîra hâ, ǃKhūb, sadu Elob nî ūǂuibasen-e, ǀons âbab nî ǁnāpa ǁan kaise; ǁnāǀî du ge mîmā du ta ra xūn hoana nî ūsī: Sadu khauǁguibadi tsî ǂāǁguibadi tsî disiǁî ǃâdi tsî ǃkhōkhâiǁguibas sadu ǃommi dis tsî sadu mîmâidi, ǃKhūba du ga mîmâibadi hoadi xa ǃgâis tsîna.

¹²Tsî du ge nî ǃgâiaǂgao ǃKhūb, sadu Elob di ais aiǃâ, sadu, sadu ôagu, sadu ôadi, sadu ǃgāgu, sadu ǃgādi tsî Leviǁîb, sa ǁāgu ǃnâ hâb tsîdo; amǃnâ-i tsî ǀumi-i xare-eb sadu ǀkha ūhâ tama hâ amaga.

¹³ǂAnbasen, î du sadu di khauǁguibade, mû du ga ǃkhai-i hoa-i ai tā ǁguiba;

¹⁴xawe ǁnā ǃkhais, ǃKhūb nî sadu ǃhaodi di ǀguis ǃnâ ǃkhōǂuibasens tawa, ǁnāpa du ge sadu di khauǁguibade nî ǁguiba, tsî ǁnāpa du ge mîmā du ta ra xūn hoana nî dī.

¹⁵Î du sadu ǀoms di turab hoab ǃoa ǂā, î du ǁgan-e ǂû ǁnā ǀkhaeb sadu Elob dib hîab ra mā dub ǃoa, sadu di ǁāgu hoagu ǃnâ; ǃanuoǃnâ-i tsî ǃanu-i ge ǁî-i xa a ǂû ǁkhā, ǁgû-i xas a khami, ǁkhama-i xas a khami.

¹⁶ǀAob ǀguiba du ge ǂû tide; ǁîba du ge ǃhūb ai nî ǁhōxū, ǁgam-i xase.

¹⁷Xawe du ge sadu di ǁāgu ǃnâ ǂû tide disiǁî ǃâs sa ǃhorob dis kas, ǂkhon ǂauxûib dis kas tsî olib dis kas tsî sa ǂguroǃnaesabegu, sadu goman tsî sadu gūn din kas hoasa, tsî ǀnî mîmâi-i, mîmâi du ka-i hoa-i kas, sadu di māsenxa ǁguibadi kas, sadu ǃommi di ǃkhōkhâiǁguiba-i kas hoasa.

¹⁸Xawe du ǁîna ǂû ǃKhūb, sadu Elob di ais aiǃâ, ǁnā ǃās, ǃKhūb, sadu Elob nî ǃkhōǂuibasens ǃnâ, sats, sa ôab, sa ôas, sa ǃgāb, sa ǃgās tsî Leviǁîb, sa ǁāgu ǃnâ hâb tsîdo; tsî du ge nî ǃgâiaǂgao ǃKhūb, sadu Elob di ais aiǃâ ǁnā xūn, sadu di ǃomma du ga ǁîna ǁguiǀkhān hoan ǂama.

¹⁹ǂAnbasen, î du Leviǁîba tā ǁnāxū, sadu ûitsēdi hoadi kōse, sadu ǃhūb ǃnâ.

²⁰ǃKhūb, sadu Elob ga sadu ǀkhariba haraharao, sadu ǃoab ge mî khami, tsî sadu ga mîo: ǁGan-e da ra ǂû ǂgao, sadu ǀoms ra ǁganǂûsa ǁkhore amaga du ge nî ǂû, sadu ǀoms di turab hoab ǃoa.

²¹ǁNā ǃās, ǃKhūb, sadu Elob ga ǀons âbab nî ǁnāpa ǂnûise ūǂuibasens ga sado xu ǃnūo, o du ge nî ǂā sadu di goman tsî sadu di gūn, ǃKhūb nî mā dun xa, mîmā du ta ge xase; tsî du ge nî ǂû sadu di ǁāgu ǃnâ, sadu ǀoms di turab hoab ǃoa.

²²O du ge ǁgûb kas, ǁkhamab kas ra ǂûhes ǁkhās khami ǁîsa nî ǂû; ǃanuoǃnâb kas, ǃanub kas hoas ge ǁîsa nî ǂûǀhao.

²³Nēs ǀguisa dī î du ǀaoba tā ǂû, ǀaob a ǀom xuige; ǁnā-amaga du ge ǀomsa ǁgan-i ǀkha ǂû tide;

²⁴ǁîba du ge ǂû tide; ǃhūb ai du ge ǁîba nî ǂnâxū ǁgam-i khami.

²⁵ǁÎba du ge ǂû tide sadu tsî sadu ôan nî sadu khaoǃgâ ǃgâibahega, ǃKhūb mûǁae a ǂhanu xū-e du ga dīo.

²⁶Sadu khaixūn hîa du ga ūhân tsî sadu mîmâin tsîna du ge ū tsî nî ǁnā ǃās, ǃKhūb nî ǃkhōǂuibasens tawa sī.

²⁷Tsî du ge sadu di khauǁguibadi, ǁgan-i tsî ǀaob tsîna ǃKhūb, sadu Elob di altars ai nî ǁāǁā; tsî ǀaob sadu ǂāǁguibadi diba ab ǃKhūb, sadu Elob di altars ai ǂnâxūhe, xawe ǁgan-e du ge nî ǂû.

²⁸ǃGaoǃgâ î du ǁnâu ǁnā mîdi, nētsē ta ra mîmā dude, î du sadu tsî sadu di ôana sadu khaoǃgâ ǃgâibahe ǀamos kōse, dī du kao ǃKhūb, sadu Elob mûǁae a ǃgâi tsî ǂhanu xūna.

²⁹ǃKhūb, sadu Elob ga sadu di ais aiǃâba xu ǃhomǂuio ǁnā ǁaedi, ǁîdi ǃoa du gaudi, ǁîde du nî ǀumise ūhâga, ǁîde ǀumise ū tsî du ga ǁîn ǃhūb ǃnâ ǁano,

³⁰ǂan î du tā ǃnamiǂgāsen ǁîn khaoǃgâ, sadu ais aiǃân ga hîkākāheo, î du ǁîn di ǁgôa-eloga tā dîǃgâ, mî raǃâ: Nē ǁaedi ge elogu âna gere ǃoabas ǁkhās xase ta ge ǁkhāti nî dī.

³¹Sadu ge ǃKhūb, sadu Eloba ǁnāti dī-ū tide; ǃKhūba a ǁgaiǁgaisaba xūn, ǁîb ra ǁkhan xūn, ǁnānan ge elogu âna gere dība; ǁîn ôagu tsî ǁîn ôadi tsînan kom ǁgôa-elogu âna gere khauǃkhūbao.