Read Khoekhoegowab Deuteronomium 13 Bible Online

Deuteronomium 13 - Khoekhoegowab bible

Deuteronomium 13

¹Nē mîs, hîa ta ra mîmā dus hoasa du ge ǂan tsî nî dī; ǁîsa du ge xū-e dīǀāro tide tsî ǁkhāti ūǁnâ tide.

²Sadu ǃnâ ga kēbo-aob kas, ǁhapode ra ǁhapo ǁhapo-aob kas hoasa khâi tsî ga sao-i kas, buruxadī-i kas hoasa māo;

³tsî ǁnā sao-i kas, buruxa dī-i kas, sadu ǃoab ga ǃhoas hoas ga hā: A da ǀkhara elogu, ǀū du aga sao, î da ǁîga ǃoaba, ti ra mîse,

⁴o du ge nē mîdi, ǁnā kēbo-aob didi ais kas, tsî ǁnā ǁhapode ra ǁhapo ǁhapo-aob didi ais kas hoasa ǁnâu tide, ǃKhūb, sadu Elob ra ǃâitsâ du amaga, ǂan nîse, ise du ǃKhūb, sadu Eloba ǂgaob hoab ǀkha tsî ǀoms hoas ǀkha nî ǀnam ǃkhaisa.

⁵ǃKhūb, sadu Eloba du ge sao tsî nî ǁîba ǃao, tsî du ge mîmādi âba nî ǃkhōǀgaipe tsî dommi âba nî ǁnâuǀnam tsî ǁîba nî ǃoaba tsî ǁîb tawa nî ǂgāmâisen.

⁶Ob ge ǁnā kēbo-aob kas, ǁhapode ra ǁhapo ǁhapo-aob kas hoasa nî ǃgamhe, ǃKhūb, sadu Elob, Egipteba xu ge ǂgaeǂguiǂui dub tsî khobosis omma xu ge ore dub ǃoagub ge ǁnāǁgôa-i xa ǃhoa xui-ao, ǁnā daob, ǃKhūb, sadu Elob ge ǁîb ǃnâ du nî ǃgûse mîmā duba xub nî doeǁgabē duga; tsî du ge ǂkhababa sadu ǁaeguba xu nî dībē.

⁷Sa ǃgâsab, sa îs di ôab kas, sa ôab kas, sa ôas kas, sa tîǂams di taras kas, sa ǀhōsab, sa ǀoms ǂûs khami īb kas hoas ga ǂgânǃgâsase nana tsî mîǀî tsio: A da ǃgû, î da ǀkhara elogu, sats kas, sa îgu kas hoas a ǀūga ǃoaba,

⁸ǁnā ǁaedi sa ǂnamipe hâdi, sa tawa ǀgūse, satsa xu ǃnūse hâdi di elogu xa, ǃhūb di nē ǀamsa xu ǃhūb di nau ǀams kōse,

⁹ots ge ǁîba māsen tide tsî ǁîba ǁnâu tide; ǁkhātis ge sa mûsa ǁîba sâu tide, tsîts ge ǀkhom tsî gaugau bi tide,

¹⁰tsîts ge ǂanǂansase nî ǃgam bi; sa ǃommi ge ǂguro ǁîb ǃoagu nî hâ, ǃgam bi nîse, tsî ǁnās khaoǃgâ ǁaes hoas di ǃomma.

¹¹Tsîts ge nî ǀuiǁhom bi ǁōb nîga, ǁîb ge ge ôa-am ǃKhūb, sa Elob, Egipteǃhūb khobosis omma xu ge ǂgaeǂguiǂui tsiba xub nî doeǁgabē tsi ǃkhaisa.

¹²Israels hoas nî ǁnâu tsî ǃaose tsî ǃaruǀî dī tidese, nē ǂkhabadīǃkhais ī khami sadu ǁaegu.

¹³Sa ǃādi, ǃKhūb, sadu Elob ǁanǃnâ du nîga nî mā dudi di ǀguis ǃnâts ga ǁnâu, mîn rasa:

¹⁴Khoegu, Beliali ôagu ge sadu ǁaeguba xu ǃgûǂoa tsî ǃās di ǁansabena ǃkhari tsî ge mî: ǃGû î du ǀkhara eloga ǃoaba, sadu a ǀūga,

¹⁵ots ge satsa ǃkhaisa nî ôa-am tsî ǃkhari tsî ǃgâise dîǃgâ; tsî mû, ǃkhais ga amao, ǃkhais ga ǁapo-o, ǁnāti ī ǁgaiǁgaisab ga sadu ǁaegu dīhe hâo,

¹⁶ots ge ǁansaben ǁnā ǃās dina hoaragase nî ǂnau gôab di ǀāb ǀkha, ǁîsa ra ǀâxareǃâ, ǁîs ǃnâ hân hoan ǀkha tsî ǁkhāti ǁîs di ǀgôana, gôab di ǀāb ǀkha.

¹⁷Tsî ǁkhâuǁnâs âts hoasats ge ǁîs di ǁaegu nî ǀhaoǀhao, tsîts ge ǁnā ǃās tsî ǁkhâuǁnâs âs hoasa ǃKhūb, sa Eloba nî khauǃkhūba, ǀaes ǀkha; os ge ǀamose khôaǂkhūsase nîra hâ, tsîs ge ǁkhawa ǂnubihe tide.

¹⁸Î i tā xū-e ǂae sa ǃommi ai ǁnā ǀâxarehe hân xa, îb ǃKhūba ǂnan ǃgamsib ǁaib âb diba xu, îb ǀkhomxaǂgaosiba mā tsi, îb ǀkhom tsi îb ǂguiǂgui tsi, sa îgab ge nūba xase,

¹⁹ǁnâuǀnamts kao ǃKhūb, sa Elob di domma, dīts nîse ǁîb di mîmādi, nētsē ta ra mîmā tsidi hoade, dīts nîse ǃKhūb, sa Elob mûǁae a ǂhanu xūna.