Read Khoekhoegowab Deuteronomium 14 Bible Online

Deuteronomium 14 - Khoekhoegowab bible

Deuteronomium 14

¹Sadu ge ǃKhūb, sadu Elob ôado; o du ge ǁî-aitsama ǃgaosen tide tsî sadu di ǃūǀûde ǂkhom tide ǁō hâ-i ǃaroma.

²Sadu ge ǃanu ǁaese ība ǃKhūb, sadu Eloba; tsî ǃKhūb ge sado ge ǃkhōǂuibasen, ǁaedi, ǃhūbaib ai hâdi hoade xu du ǁîba ūb hâ ǁaese nî ībaga.

³Sadu ge ǁgaiǁgaisa xū-e ǂû tide.

⁴Nēn ge ǀgoan ǂû ǁkhā du ana: Goma-i, gū-i tsî piri-i;

⁵ǁkhama-i, ǁgû-i, ǀgao-i, ǃari-i, ǃâu-i, ǃkhan-i tsî ǁkhâise-i tsîna.

⁶ǀGoan hoan, ǁkhorasa ra ǂkhawen tsî ǂkhawes ǁkhoras disa ǀgam ǃâra ǃnâ ra ǀgoran, tsî ǀgoan ǃnâ ra ǃgaiǁgaen, ǁîna du ge a ǂû ǁkhā.

⁷Xawe nēna du ge ǂû tide, ǁîn hîa ǃgaiǁgaes ǀguisa ra hîn xa, tsî ǁnān, ǂkhawe hâ ǁkhorasa ǀgoras ǀguisa ra hîn xa: Kamel-i tsî ǃôa-i tsî ǃâu-i tsîna; ǁîn ra ǃgaiǁgae, xawen ǀgorasa tama ǁkhorasa ūhâ xui-ao; ǁîn ge ǃanuoǃnâse nî ība du.

⁸Hāgūb tsîn, ǁkhorasab ra ǀgora xaweb ge ǃgaiǁgae tama hâ xui-ao; ǁîb ge ǃanuoǃnâse nî ība du. ǁÎn di ǁgan-i xa du ge ǂû tide, tsî ǁō hâ soros âna du ge tsâǀkhā tide.

⁹Nēna du ge a ǂû ǁkhā, ǁgam-i ǃnâ hân hoan xa: ǀGaregu tsî ǂhapirogu tsîga ūhân hoana du ge a ǂû ǁkhā.

¹⁰Xawe ǀgaregu tsî ǂhapiroga ūhâ tama hâna du ge ǂû tide. ǁÎn ge ǃanuoǃnâse nî ība du.

¹¹ǃAnu ani-i hoa-e du ge a ǂû ǁkhā.

¹²Xawe nēn ge ǁîn xa du ǂû tidena: ǃAriǃkhā-i tsî ǀhaiǀau-i tsî huriǃariǃkhā-i,

¹³tsî ǀau-i tsî ǃurigora-i tsî gir-i ǁî-i di ǃnôab ǃoa;

¹⁴tsî gora-i hoa-e ǁî-i di ǃnôab ǃoa;

¹⁵tsî ǀami-i tsî ǃhûro-i tsî ǃnoa-i tsî ǀgîǁgâu-i ǁî-i di ǃnôab ǃoa;

¹⁶tsî ǁhoaǀhone-i tsî ǂuwi-i tsî ǀhone-i,

¹⁷tsî rurdom tsî pelikan-i tsî ǂuwi-i

¹⁸tsî oivar-i tsî reir-i ǁî-i di ǃnôab ǃoa; tsî ǁkhūǃgōǃgō-i tsî soretsiǃgube-i.

¹⁹Tsî ǁgaboxa ǁgamaben hoan on ge ǃanuoǃnâse nî ība du; ǁîn ge ǂûhe tidena.

²⁰ǃAnu aniǃnôan hoana du ge a ǂû ǁkhā.

²¹ǁŌ hâ xū-e du ge ǂû tide; ǃhaokhoeb, sa ǁāgu ǃnâ hâb, ǁîba du ge ǁî-e nî mā, îb ǂû ti, îts ǁî-e ǃhaokhoeb tawa ǁamaxū; sadu ge ǃKhūb, sadu Eloba ǃanu ǁaese ība xuige. Sadu ge piriroba ǁgûs di daib ǃnâ sâi tide.

²²ǂGomǂgomsase du ge sadu ǃkhommi hoab di hōbasens, kurikorobe ǃhanaba xu ra ǀkhīs xa disiǁî ǃâ-e nî mā.

²³Tsî ǃKhūb, sadu Elob aiǃâ du ge ǁnā ǃkhais, ǁîb ga ǀons âbab nî ǁnāpa ǁan kaise ūǂuibasens tawa nî ǂû disiǁî ǃân sadu ǃhorob din, sadu ǂkhon ǂauxûib din, sadu olib din, ǂguroǃnaesaben sadu goman din tsî sadu gūn din tsîna, ǁkhāǁkhāsen du nîga ǃKhūb, sadu Eloba ǃaosa hoa tsēde.

²⁴Tsî daob xa du ga gaxubahe, ǁîna du a ūsī ǁoas kōse, ǁnā ǃkhais, ǃKhūb, sadu di Elob ga ǀons âbab nî ǁnāpa ǂnûise ūǂuibasens a ǃnūba du amaga, ǃKhūb, sadu Elob ga ǀkhae duo,

²⁵ǁnâi ǁîna marin ǃnâ ǂnûiǃkhuni, î du mariba sadu di ǃommi ǃnâ ǃgae î du ǃgû ǁnā ǃkhais, ǃKhūb, sadu Elob nî ūǂuibasens ǃoa,

²⁶î du ǁnā marina mā, sadu di ǀoms ga tura xūn hoan ama, goman amas kao, tsî ǀgaisa āxūb amas kao, tsî sadu ǀoms ga ǂgaoǀkhā du xūn hoan ama, î du ǁnāpa ǂû ǃKhūb, sadu Elob di ais aiǃâ, î du ǃgâiaǂgao, sats tsî sa ommi din tsîdo.

²⁷Tsî Leviǁîb, sa ǁāgu ǃnâ hâb, ǁîbats ge ǁnāxū tide; amǃnâ-i tsî ǀumi-i xare-eb sadu ǀkha ūhâ tama hâ xui-ao.

²⁸ǃNona kurigu di ǀams ai du ge ǁnā kurib ǁkhāb di disiǁî ǃâna ūǀkhī tsî nî ǁîna ǁguibē sadu di ǁāgu ǃnâ;

²⁹ob ge Leviǁîba nî hā, amǃnâ-i tsî ǀumi-i xare-eb sadu ǀkha ūhâ tama hâ xui-ao, tsî ǃhaokhoeb tsî ǃoaǀgôab tsî ǃoataras tsîn, sadu di ǁāgu ǃnâ hân on, tsîn ge ǂû tsî nîra ǁâ; ǃKhūb, sadu Elob nî ǀkhae duga, sadu ǃommi di sîsenni, hîa du nî dīb hoab ǃnâ.