Read Khoekhoegowab Deuteronomium 15 Bible Online

Deuteronomium 15 - Khoekhoegowab bible

Deuteronomium 15

¹Hû kurigu di ǀunis ai du ge ǃnorakaisa nî hî.

²Tsî nēs ge ǃkhais ǃnorakais disa: Mâ surudemā-aob hoab, ǀgūkhoeb âba ga ǀkhupi hâba, ab ǁîba ǀûba; ab ǀgūkhoeb âb kas, ǃgâsab âb kas hoasa tā ǂgaoǀkhā, ǃnorakaisan ge ǃKhūba ǂgaiǂuiba xui-ao.

³ǃHaokhoebats ge nî ǂgaoǀkhā; xawe sa ǃgâsab tawats ūhân, ǁînab ge sa ǃomma nî ǀûba.

⁴Nēs ǀguis ǂama, ǀkhope-ao-i xare-i sadu ǃnâ hâ tidega: ǃKhūb ge ǃnāǂamsase nîra ǀkhae tsi xui-ao ǁnā ǃhūb, ǃKhūb sa Elob ǀumise nîra mā tsib ǃnâ, ǀumisets nî ǁîba ūhâga,

⁵ǃKhūb, sa Elob di dommats ga ôasase ǁnâuǀnamo, ǂan tsîts nî dīse nē mîmādi, nētsē ta ra mîmā tsidi hoade.

⁶ǃKhūb, sa Elob nîra ǀkhae tsi mîba tsib ge khami xui-ao: Nētits ge satsa ǂgui ǁaede nî ǀkhupi, xawe sats ge ǀkhupi tide; tsîts ge ǂgui ǁaedi ǂama nî gao, xawen ge sats ǂama gao tide.

⁷Sadu ǃnâb ga ǀgâsaba hâ, sa ǃgâsagu di ǀguiba, ǁāgu âts di ǀguib ǃnâ sa ǃhūb, ǃKhūb, sa Elob nî mā tsib ǃnâ, ots ge sa ǂgaoba karokaro tide tsî sa ǃomma ǃgâsab âts hîa ǀgâsaba ǂganamba tide;

⁸tsîts ge ǃommi âtsa māsenxase khowa tsî nî ǃkhū hâse ǀkhupi bi, tôasib hîab tôasi hâb nî ǂâuba bis kōse.

⁹ǃÛisen, î-i tā Beliali mî-e hâ sa ǂgaob ǃnâ, hîa ra mî-e: Hûǁî kurib, ǃnoraǃnoras di kurib ra ǀgū, îs sa mûsa tā ǂkhaba, sa ǃgâsab hîa ǀgâsabǀî, mā bits tidega; tāb sats ǂama ǃKhūb ǃoa ǂgai, îb tā ǁoreba sa ǃnâ hâ.

¹⁰Māsenxasets ge nî mā bi, tsî ǂgaob âts ge ǂkhaba tide, mā bits ra hîa; nē ǃkhais ǂûs ǃaromab ge ǃKhūb, sa Eloba nîra ǀkhae tsi xui-ao sa sîsenni hoab ǃnâ tsî sa ǃommats ga ǁgui-ai xū-i hoa-i ǃnâ.

¹¹ǀGâsab ge ǀkhai tide ǃhūb di ǁaegub ǃnâ xui-ao; ǁnā-amaga ta ge tita ra mîmā tsi, mî raǃâ: Harasets ge sa ǃomma nî ǁkhowa-am sa ǃgâsabǀî, sa ǁgâiǀāhesanǀî tsî sa ǀgâsanǀî, ǃhūb âts ǃnâ.

¹²Sa ǃgâsa-i, Hebreǁîb kas, Hebreǁîs kas hoas, ga sa tawa ǁamaxūheo, o i ge ǃnani kurigu kōse nî ǃoaba tsi, xawe hûǁî kurib ǃnâts ge ǁî-e ǃnorasase satsa xu nî ǃgû kai.

¹³Tsî ǃnorasasets ga ǁî-e ǃgû kai, xawets ge ǀkhaiǃomse ǁî-e ǃgû kai tide.

¹⁴ǃKhū hâsets ge sa gūn xa ǁî-e nî ǁgui-ai tsî sa dāǃnâǃkhais xa tsî sa ǂauxûiǀāǃnâǃoreb xa; ǁnā xū-i, ǁî-i ǀkhats ǃKhūb, sa Elob xa ǀkhaehe hâ-i ǀkhats ge ǁî-e nî ǀkhae.

¹⁵Tsîts ge nî ǂâi, Egipteǃhūb ǃnâts ge ǃgā ge isa tsî ǃKhūb, sa Elob ge ore tsi ǃkhaisa; ǁnā-amaga ta ge nētsē nē ǃkhaisa ra mîmā tsi.

¹⁶Tsî i ga īo, sa ǃoab ga mîsa: Tita ge satsa xu ǃgûǂoa tide, sats tsî ommi âtsa ta ǀnam hâ amaga, sa tawa ta ǃgâise hâ amaga, ti

¹⁷ots ge ǂorosa ū tsî nî ǂgaes âb ǃnâ tsî dao-ams ǃnâ nî ǃkhā, ob ge ǀamose sa ǃgāse nî hâ; tsî ǃgās âts tawats ge ǁkhās ǁkhāsa nî dī.

¹⁸Karosaba tsi tide sa mûǁae, satsa xuts ga ǃnorasase ǃgû kai bio; ǃhonarisa amǃnâs â-i ǃgaesab aseb ǃnani kuriga gere ǃoaba tsi xui-ao; ob ge ǃKhūb, sa Eloba dīts ka xūn hoan ǃnâ nîra ǀkhae tsi.

¹⁹ǂGuroǃnaesabeb hoab, goman tsî gūn ǃnâ ga ǃnae, aoreb; ǁîbats ge ǃKhūb, sa Eloba nî khaiba. ǂGuroǃnaesabeb sa goman dib ǀkhats ge sîsen tide, tsî ǂguroǃnaesabeb sa gūn dibats ge ǂkhom tide.

²⁰ǃKhūb, sa Elob di ais aiǃâts ge ǁîna nîra ǂû, ǁnā ǃkhais, ǃKhūb nî ūǂuibasens tawa, sats tsî ommi âts din tsîdo.

²¹Xawe ǂkhôa-i ga ǁîb tawa hâo: ǃHorab kao, ǂgīb kao, ǀnî ǂkhôa-eb ga ūhâo, ots ge ǁîba ǃKhūb, sa Eloba ǁguiba tide;

²²sa ǁāgu ǃnâts ge ǁîba nî ǂû, ǃanuoǃnâ-i tsî ǃanu-i tsîn ge nî ǂû bi, ǁgû-i axase, ǁkhama-i axase.

²³ǁÎb di ǀaob ǀguibats ge ǂû tide; ǃhūb aits ge ǁîba nî ǂnâxū ǁgam-i axase.