Read Khoekhoegowab Deuteronomium 16 Bible Online

Deuteronomium 16 - Khoekhoegowab bible

Deuteronomium 16

¹ǂAn ǁkhâb Abiba, îts ǃKhūb, sa Eloba Pasxaba tsēdība; ǁkhâb Abib ǃnâb ǃKhūb, sa Eloba Egipteǃhūba xu ge ǂgaeǂguiǂui tsi tsuxuba xuige.

²ǃNubaits ge ǃKhūb, sa Eloba Pasxaba nî ǂāba, gūn tsî goman tsîna ǁnā ǃkhais, ǃKhūb ga ǀons âbab nî ǁnāpa ǁan kaise ūǂuibasens tawa.

³Xū-i hîa ǀkhuruǀkhuruhe hâ-ets ge ǁîb ai ǂû tide; hû tsēdets ge ǀkhuruoǃnâ pereba ǁîb ai nî ǂû, ǀkhomǀkhomsasib di pereba; ama ǃhaesets ge Egipteǃhūba xu doeǂoa xui-ao, ǂâits nîga Egipteǃhūba xuts ge doeǂoa tsēs xa, sa ûitsēdi hoadi kōse.

⁴Hû tsēdi kōse i ge ǀkhuruǀkhurupere-i xare-e mûhe tide sa ǀkharigu hoagu ǃnâ; ǁkhāti i ge ǁnā ǁgan-i, ǂguro tsēs aits ga ǃuia ǂā-i xa xū-i xare-e ǃgau tide, ǁgoas kōse.

⁵Pasxabats ge ǂā tide ǁnā ǁāgu âts, ǃKhūb, sa Elob ra mā tsigu di ǂguib ǃnâ.

⁶Xawe ǁnā ǃkhais, ǃKhūb, sa Elob ga ǃkhōǂuibasens tawa, ǀons âbab nî ǁnāpa ǁan kaiga, ǁnāpats ge ǃuia Pasxaba nî ǂā, sores ra ǂgâ hîa, Egipteba xu doeǂoas di mîmâisa ǁaeb ai.

⁷ǃNubaits ge sâi tsî nî ǂû bi, ǁnā ǃkhais, ǃKhūb, sa Elob ga ǃkhōǂuibasens tawa; ǁnās khaoǃgâts ge ǁgoas ai oa tsî nî ǁaru tentomdi âts ǃoa.

⁸ǃNani tsēdets ge ǀkhuruoǃnâ perega nî ǂû, tsî hûǁî tsēs ais ge ǃkhâitsēs, ǃKhūb, sa Elob disa nî hâ; ǃnubaits ge sîsenni xareba dī tide.

⁹Hû wekhegats ge nî ǃgôabasen; ǃgaogôab ǀkhan ra mâ hâ ǃhorob ǃnâ ǃgaotsoatsoasa xuts ge hû wekhega nî ǃgôatsoatsoa.

¹⁰ǁNās khaoǃgâts ge ǃKhūb, sa Eloba wekhegu di kaitsēdi ǁaeba nî tsēdība; māsenxa ǁguibas sa ǃommi dis hîats nî mās ge nî ǁîb di, ǃKhūb, sa Elob nî ǀkhae tsi khami ī.

¹¹Tsîts ge nî ǃgâiaǂgao ǃKhūb, sa Elob di ais aiǃâ, sats, sa ôab, sa ôas, sa ǃgāb, sa ǃgās, Leviǁîb sa ǃādi ǃnâ hâb, ǃhaokhoeb, ǃoaǀgôab tsî ǃoataras sadu ǁaegu nî hâs tsîdo; ǁnā ǃkhais, ǃKhūb, sa Elob nî ǃkhōǂuibasens ǃnâ, ǀons âbab nî ǁnāpa ǁan kaise.

¹²Tsîts ge nî ǂâi, ǃgāts ge satsa is xa Egipteb ǃnâ; tsîts ge nē ǂnûiǂgāde ǃkhōǀgaipe tsî nî dī.

¹³ǃAm ǁhaogu kaitsēdi ǁaebats ge hû tsēdi kōse nî tsēdībasen, dāǃnâǃkhais âts tsî ǂauxûiǀāǃnâǃoreb âts dinats ge ǀhaoǀhaobasen ǃnubai.

¹⁴Tsîts ge nî ǃgâiaǂgao sa kaitsēs ai, sats, sa ôab, sa ôas, sa ǃgāb, sa ǃgās, Leviǁîb, ǃhaokhoeb, ǃoaǀgôab tsî ǃoataras tsîn, sa ǃādi ǃnâ hâna.

¹⁵Hû tsēdets ge ǃKhūb sa Eloba kaitsēsa nî tsēdība ǁnā ǃkhais, ǃKhūb ga ūǂuibasens tawa, ǃKhūb, sa Elob ge nîra ǀkhae tsi sa hōǂgābasens hoas ǃnâ tsî ǃommi âts di sîsenni hoab ǃnâ; ots ge ǃgâiaǂgaos ǀguisa nî hî.

¹⁶ǃNona ǃnādi kōseb ge sa ǀkha hâ aoreb hoaba ǃKhūb, sa Elob di ais aiǃâ nî ǂhai ǁnā ǃkhais, ǁîb nî ǃkhōǂuibasens tawa: ǀKhuruoǃnâ peregu di kaitsēdi ǁaeb ai, tsî wekhegu di kaitsēdi ǁaeb ai tsî ǃam ǁhaogu dib ai; xawe ab tā xū-i ose ǃKhūb di ais aiǃâ ǂhai;

¹⁷mâb hoaba ǁîb ǃommi di hōs ǃoa, ǃKhūb, sa Elob ge mā tsi ǀkhaeba ǃoa.

¹⁸ǂHanuǂhanu-aogu tsî ǃoabasabegu tsîgats ge sa ǃādi, ǃKhūb, sa Elob ga mā tsidi hoadi ǃnâ nî ǂnûibasen, sa ǃhaodi hoadi ǃnâ; î gu ǁaesa ǂhanuǂhanu, ǀgoraǃgâs ǂhanu-aisib dis ǀkha.

¹⁹ǂHanubats ge gamagama tide, aisats ge ǂan tide, tsîts ge ǁkhāti ǀkhaexū-e ū tide; ǀkhaexūb ge gā-ain di mûde ra ǂgī kai tsî ǂhanu-ain di mîde ra dawaǃkhapu xui-ao.

²⁰ǂHanu-aisib, ā ǂhanu-aisibats ge nî sauruǃgon, ûi tsîts nî ǁnā ǃhūb, ǃKhūb, sa Elob nî mā tsiba ǀumiga.

²¹ǀGomhaixa ǃkhai-ets ge haiǃnôa-i hoa-i xa ǂgābasen tide ǃKhūb, sa Elob di altars, hîats nî dībasenni xōǀkhā.

²²Tsîts ge ǁkhāti ǂnûikhâihesa ī-e ǂnûibasen tide, ǃKhūb, sa Elob ra ǁkhan ǃkhais ge a ǁî.