Read Khoekhoegowab Deuteronomium 17 Bible Online

Deuteronomium 17 - Khoekhoegowab bible

Deuteronomium 17

¹ǃKhūb, sa Elobats ge goma-i kas, ǀgoa-i kas, ǁî-i tawa ǂkhôa-i kas, tsū-i kas hoasa hâ-e ǂāba tide; ǁîs ge ǃKhūb sa Eloba ǁgaiǁgaisase ība xui-ao.

²Sa ǁaegu i ga sa ǃādi, ǃKhūb sa Elob ga mā tsidi di ǀguis ǃnâ khoeb kas, taras kas hoasa hōheo, ǃKhūb, sa Elob mûǁae a ǂkhaba xū-e ra dī-e, ǁîb di ǃgaeǀhaosa ra ǃûǂamǃâ,

³ǃgû tsî i ga ǀkhara eloga ǃoaba tsî i ga ǁîgu aiǃâs kao, sores aiǃâs kao, ǁkhâb aiǃâs kao, ǀhommi di ǂnubis hoas aiǃâs kao ǃhonǁgoa, ǃkhais hîa ta mîmā tama hâsa,

⁴tsîts ga satsa ǁî khaisa mîbaheo, tsîts ga ǁnâu sio, ots ge îsase nî ôaǃnâ; tsî mû, ama i kao, ǃkhais ga ǁaposao, ǁnāti ī ǁgaiǁgaisa ǃkhais ga Israels ǃnâ dīhe hâo,

⁵ots ge ǁnā khoeb kas, ǁnā taras kas hoas, nē tsū ǃkhaisa ge dī-e sa ǁāgu ǃoa nî ūǂui, ǁnā khoeb tamas ka io tarasa; tsîts ge ǁî-e ǀuiǁhom, ǁō i nîs kōse.

⁶ǀGam tamas ka io ǃnona ǀhûǀguitimî-aon di ǃkhō-ams ǃoa i ge ǁnā-i, ǁōba anu hâ-e nî ǃgamhe; ǀgui ǀhûǀguitimî-ao-i di ǃkhō-ams ǀguis ǃoa i ge ǃgamhe tide.

⁷ǀHûǀguitimî-aon di ǃommi ge ǂgurosa ǁî-i ǃoagu nî hâ, ǁî-e nî ǃgamse, tsî ǁnās khaoǃgâ ǁaes hoas di ǃomma; nētits ge ǂkhababa sa ǁaeguba xu nî dībē.

⁸ǃKhai-i xats ga ǂhanub ǃnâ ǃgomdāhe, ǀaob tsî ǀaob tsîkha ǁaegu, ǂhanu ǃkhai-i tsî ǂhanu ǃkhai-i tsîn ǁaegu, tsî ǂnaus tsî ǂnaus tsîra ǁaegu sa ǃādi ǁāgu ǃnâ hâ ǂnoaguǃkhaise, ots ge khâi tsî nî ǃapa ǁnā ǃkhais, ǃKhūb, sa Elob ga ǃkhōǂuibasens ǃoa;

⁹tsîts ge Leviǁî pristergu tawa nî hā tsî ǂhanuǂhanu-aob, ǁnā tsēdi ai nî hâb tawa, tsîts ge ǁîga nî dîǃā, o gu ge ǃkhais ǂhanub disa nî mîǃāba tsi;

¹⁰ots ge satsa nî dī, mîs ra mî khami, ǁîgu ga mîba tsisa ǁnā ǃkhais, ǃKhūb ga ǃkhōǂuibasensa xu; tsîts ge ǂan tsî nî dī, ǁîgu ga ǁkhāǁkhā tsin hoan ǃoa.

¹¹ǂHanub di mîmās, ǁîgu ga ǁkhāǁkhā tsis tsî ǀgoraǃgâs, ǁîgu ga mîba tsis ǃoats ge nî dī; ǁgôats ge tide ǁnā mîs, ǁîgu ga mîba tsisa xu, amǀkhāb ǁôab ais kas, ǁareǀkhāb ǁôab ais kas hoasa.

¹²Tsî ǁnā khoeb, ǃnâudanaxase ga dīb tsî ga pristera ǁnāpa mâ tsî ǃKhūb, sa Eloba ra ǃoabab kas, ǂhanuǂhanu-aob kas hoasa ǁnâu ǂgao tama ib, ǁnā khoeb ge nîra ǁō; tsîts ge ǂkhababa Israelsa xu nîra dībē.

¹³Îs ǁaes hoasa ǁîsa ǁnâu, în ǃao în tā ǃaruǀî ǃnâudanaxase sîsen.

¹⁴Tsî ǁnā ǃhūb, ǃKhūb, sa Elob ra mā tsib ǃnâ sī tsîts ga ǁîba ǀumise ūhâ tsî ǁîb ǃnâ ǁano, tsîts ga mîo: Tita ge gao-aoba ti ǂamai nî ǂnûi, ǁaedi, ti ǂnamipe hâdi hoadi ūhâ khami,

¹⁵ots ge ǁnāb, ǃKhūb, sa Elob ga ūǂuibasenni ǀguiba sa ǂamai gao-aose nî ǂnûi; sa ǃgâsagu di ǁaeguba xuts ge gao-ao-e sa ǂamai nî ǂnûi; ǃhaokhoeb, hîa sa ǃgâ tamabats ge a ǂnûi ǁoa,

¹⁶îb ǁîba tā hāna ǂguiǂguibasen, îb ǁaesa tā oa kai Egipteb ǃoa, hāna nî ǂguiǂguibasense, ǃKhūb ge sadu ǃoa: ǃAruǀî du ge ǁkhawa ǁkhā daoba-ū oa tide, ti mî xui-ao.

¹⁷ǁKhātib ge tarade ǂguiǂguibasen tide, ǂgaob âb ǁnāǁgôa tidega; tsîb ge ǁkhāti ǀhaiǀurib tsî ǃhuniǀurib tsîkha kaise ǂguiǂguibasen tide.

¹⁸O i ge nîra ī, ǂnû-aiǃnaos ǁîb gaosis dis aib ga ǂnûo, ob ge ǃhonarisa xoas, nē ǂhanub disa ǂkhani-i ǃnâ nî xoaǁnâbasen, Leviǁî pristergu di ais aiǃâ hâsa xu;

¹⁹os ge ǁîb tawa nî hâ, tsîb ge ǁîs ǃnâ nîra khomai ûitsēdi âb hoadi kōse; ǁkhāǁkhāsenni nîra, ǃKhūb, ǁîb Eloba ǃaosa, nē ǂhanub di mîdi hoade sâusa tsî nē ǂnûiǂgādi, ǁîdeb nî dīga;

²⁰ǂgaob âb ǀgapiǀgapisen tidese ǃgâsagu âb ǂamai, tsî mîmāsa xub ǁnāǁgôa tidese, amǀkhāb ǁôab ais kas, ǁareǀkhāb ǁôab ais kas hoasa; tsēdi âbab nî ǃnūǃnūse gaosis âb ǃnâ, ǁîb tsî ǁîb ôagu tsîga, Israeli ǁaegu.