Read Khoekhoegowab Deuteronomium 18 Bible Online

Deuteronomium 18 - Khoekhoegowab bible

Deuteronomium 18

¹Leviǁî pristergu, Levib di ǃhaos hoas ge amǃnâ-i tsî ǀumi-e ūhâ tide Israeli ǀkha; ǀaeǁguibadi ǃKhūb didi tsî ǁîb di ǀumi-amǃnâsan ge nî ǂû.

²ǁNā-amagab ge ǀumi-i xare-e ūhâ tide ǁîb ǃgâsagu ǁaegu; ǃKhūb ǂûb ge a ǁîb di amǃnâ, ǁîb ge ǁîb ǃoa mî xase.

³Tsî nēb ge ǂhanub, pristeri di nî ība ǁaes tawa, ǁnān, ǁguiba-e ra ǁguiban tawa, goma-i xas kas, ǀgoa-i xas kas hoasa: A-i pristera mā ǁgaras, ǀgam ǃnanikha tsî ǁkhoms tsîna.

⁴ǂGurosaben, sa ǃhorob din, tsî sa ǂkhon ǂauxûib din tsî sa olib din, tsî ǂgurosaben sa gūǂkhoms din tsînats ge ǁîba nî mā.

⁵ǃKhūb, sa Elob ge ǁîba sa ǃhaodi hoade xu ge ǃkhōǂuibasen, mâ tsîb nî ǃKhūb di ǀons ǃnâ ǃoabaga, ǁîb tsî ǁîb di ôagu ona hoa tsēde.

⁶Tsî Leviǁîb ga sa ǁāgu di ǀguiba xu ǀkhī, Israeli hoaba xu, ǁanni hâ ǃkhaisa xu, tsîb ga ǀons âb di turab ǀkha hāo, ǁnā ǃkhais, ǃKhūb ga ūǂuibasens ǃoa,

⁷tsîb ga ǀons ǃKhūb sa Elob disa ǃoabao, ǃgâsagu âb, Leviǁîgu, ǁnāpa ǃKhūb di ais aiǃâ mâgu hoagu khami,

⁸o gu ge ǁkhā amǃnâs ǀguisa nî ǂû, ǁamaxūhe ka xūn ǁgûgu din ose.

⁹ǁNā ǃhūb, ǃKhūb, sa Elob nî mā tsib ǃnâts ga sīo, ots ge ǁkhāǁkhāsen tide ǁnā ǁaedi di ǁgaidīn ǃoa dīsa.

¹⁰Sa tawab ge hōhe tide ǁîb ôab kas, ǁîb ôas kas hoasa ǀaesa ra ǃgûǃganu kaib, ǃgai-aob, aimûǀgarusa ra sîsenūb, tsēde ra ūǂuibasenni tsî ani-ās ai ra ǃgaoǃgâb kas tsî ǃgai-aob kas,

¹¹tsî nūba-aob, nūbasa ra sîsenūb kas, ǃgai-aob, aimûǀgaru ra gaga-e ra dîb kas, ǁgâuaǁāǁāǁkhāsabeb kas, ǁō hâna ra dîb kas hoasa.

¹²Nē xūna ga dī-i hoa-i ge ǃKhūba ǁgaiǁgaisase ība xui-ao; tsî nē ǁgaiǁgaisan ǃaromab ra ǃKhūb, sa Eloba ǁîna sa ais aiǃâ ūn hâna xu doeǁgaǂui.

¹³ǂHauǃnâsets ge ǃKhūb, sa Elob ǀkha nî hâ.

¹⁴Nē ǁaedi hîats nî ǀumidi ge ǃgai-aon tsî aimûǀgaru-aona ra ǁnâuǀnams; xawe sats xasa: ǃKhūb, sa Elob ge ǁnāti ī xūna mā-am tsi tama hâ.

¹⁵Kēbo-aob tita khami ībab ge ǃKhūb, sa Eloba ǃgâsagu âtsa xu nîra ǂkhaiǂkhaiba tsi; ǁîbats ge nî ǁnâuǀnam;

¹⁶ǁnā xūn, ǃKhūb, sa Elobats ge Horeb tawa ǀhûs di tsēs ai ǂgaoǀkhān hoan ǃoa, mî raǃâ: ǃAruǀî ta ge ǃKhūb, ti Elob di domma ǁnâu tide, tsî nē kai ǀaesa ta ge ǃaruǀî mû tide, ǁō ta tidega.

¹⁷ǃNubaib ge ǃKhūba tita ǃoa ge mî: ǃGâi ǃkhais ge ǁîn goro mîsa.

¹⁸Kēbo-aoba ta ge tita ǁîna nîra ǂkhaiǂkhaiba, ǃgâsagu ân di ǁaeguba xu, sats khami ība; tsî tita ge ti mîde ǁîb ams ǃnâ nîra mā, tsîb ge ǁîn ǃoa nî ǃhoa ǁîba ta nî mîmān hoana.

¹⁹Tsî i ge nîra ī, ǁnā khoeb, ti mîdi, ǁîb nî ǀons âtas ǃnâ ǃhoade ga ǁnâuǀnam tama ib, ǁîb tawa ta tita ǁîsa nîra ôa ǃkhaisa.

²⁰Xawe ǁnā kēbo-aob, ǃguriǂgaoxase dī tsî ga ti ǀons ǃnâ mîs, mîmā bi tama ta hâsa ǃhoab, ǀkhara elogu di ǀons ǃnâ ga ǃhoab, ǁnā kēbo-aob ge nîra ǁō.

²¹Tsî ǂgaob âts ga mîo: Mati ta ǁnâi ǁnā mîs, ǃKhūb ǃhoa tamasa nî ǂan?

²²Kēbo-aob ga ǃKhūb di ǀons ǃnâ ǃhoa tsî ǁnā mîs ga ī tama io tsîs ga hā tama io, ǁnās ge mîs, ǃKhūb ǃhoa tamasa: ǀGapiǂâixasiba xub ge ǁnā kēbo-aoba go ǃhoa; ǁîbats ge ǃao tide.