Read Khoekhoegowab Deuteronomium 19 Bible Online

Deuteronomium 19 - Khoekhoegowab bible

Deuteronomium 19

¹ǃKhūb, sa Elob ga ǁnā ǁaedi, ǁîdi di ǃhūbab nî mā tside ǃhomǂuio, tsî sats ga ǁîba ǀumise ūhâ tsî ǃādi ân tsî omgu ân ǃnâts ga ǁano,

²ots ge ǃnona ǃāde nî khaibasen ǃhūb âts di ǁaegu, ǃKhūb, sa Elob nî mā tsib ǃnâ, ǁîbats nî ǀumise ūhâga.

³Daoba ǁāǁābasen tsîts ge nî ǀkharib ǁnā ǃhūb, ǃKhūb, sa Elob nî ǀumi kai tsiba ǃnona ǃâdi ǃnâ ǀgora; tsîs ge nēsa nî ī, mâ ǃgamaob hoab nî ǁnāǀî ǁhâse.

⁴Tsî nēs ge ǃkhais ǃgamaob disa, ǁnāǀî nî ǁhâba, ûib nîga; ǀgūkhoeb âb, ǁaris kas, aetsēs kas hoasab ga ǁgapadommi ai ǂnauǃanni,

⁵ǀgūkhoeb âb ǀkha ga ǀgomhaixa ǃkhais ǃnâ ǂgâb, haina nî ǁhāse, tsî ǃommi âb ga ǁhātsâ tsî ǃōs ga haiba xu ǃae tsîs ga ǀgūkhoeb âba hō, ǁōb nîse, ǁîb ge nē ǃādi di ǀguis ǃnâ ǁhâǂgâ tsî nî ûi;

⁶îb ǀaoǀkhao-aoba tā, ǀgamsab a hîa ǃgamaoba ǃgôaǃgon, îb tā daob xab ra ǃnūdāhe amaga saoǁae tsî ûib tawa ǂnau bi, ǁōb di ǀgoraǃgâǃkhai-i ǁîb ǃnâ a ǀkhai hîa, ǁarisa xus kas, aetsēsa xus kas hoasab ge ǁkhan bi tama hâ i xui-ao.

⁷ǁNā-amaga ta ge ra mîmā tsi: ǃNona ǃādets ge nî khaibasen, ti.

⁸Tsî ǃKhūb, sa Elob ga ǀkharib âtsa haraharao, ǁîb ge sa îga nūba xase, tsîb ga ǁnā ǃhūb hoaba mā tsi, sa îgab ge ǁîb xa: Mā du ta nî, ti mîbaba;

⁹nē mîmās hoas, nētsē ta ra mîmā tsisa ǂan tsîts ga dīo, ǃKhūb, sa Eloba ǀnam hâǃâ tsî tsēdi hoade daob âb ǃnâ ra ǃgûǃâ, ots ge nē ǃnonadi tawa ǀnî ǃnona ǃāde nî ǀaro;

¹⁰ǀhapiob di ǀaob sa ǃhūb, ǃKhūb sa Elob nî ǀumi-amǃnâse mā tsib di ǁaegub ǃnâ ǂnâxūhe tide tsî di ǀaoǀhapide sa ai hâ tidega.

¹¹Xawe khoeb ga hâo, ǀgūkhoeb âba ga ǁkhanni tsî ga ǁnoaga ǁguiba bib tsî ga khâi ǁîb ǃoagu tsî ûib tawa ǂnau bib, ǁōb nîs kōse, tsîb ga ǁnā ǃādi di ǀguis ǃoa ǁhâo,

¹²o gu ge ǁîb ǃās di kaiga sî tsî nî ǁnāpa xu ū bi, tsî gu ge ǀaoǀkhao-aob di ǃomǁae nî mā bi, ǁōb nîse.

¹³Sa mûs ge ǁîba sâu tide, tsîts ge ǀhapiob di ǀaoba Israela xu nî dībē, ǃgâibahets nîga.

¹⁴Sa ǀgūkhoeb di ǃhūǀkharib, abogu ge mâiǁapoǁapobats ge ǂnûiǃkhuni tide, sa ommi amǃnâs hîats nî ǀumis ǃnâ, ǁnā ǃhūb, ǃKhūb, sa Elob nî mā tsib ǃnâ, ǁîbats nî ǀumise ūhâga.

¹⁵ǀGui ǃkhō-amaob ǀguib ge ǀguri khâi tide, khoe-i xare-i ǃoagu, ǂhanuoǃnâsi-i kas, ǁore-i kas hoas ǂama, mâ ǁore-i, ǁî-i ga ǁore-i hoa-i xa; ǀgam ǀhûǀguitimî-aon di amǃnâs kas, ǃnona ǀhûǀguitimî-aon di amǃnâs kas hoasas ge ǃkhaisa nî hâ.

¹⁶ǂKhaba ǃkhō-amaob ga khoe-i ǃoagu khâio, ǂkhaba xū-eb nî ǁî-i ǃoagu ǃkhō-amse,

¹⁷o kha ge ǁnā ǀgam aokha, ǂnoaguba ūǀîgu hâkha nî mâ ǃKhūb di ais aiǃâ, pristergu di ais aiǃâ, tsî ǂhanuǂhanu-aogu, ǁnā tsēdi ai nî hâgu aiǃâ.

¹⁸O gu ge ǂhanuǂhanu-aoga ǃgâise nî ôaǃnâ; tsî mû, ǃkhō-amaob ga ǂkhaba ǃkhō-amao io, ǃgâsab âb ǃoagub ga tsūse ǃkhō-am hâ io,

¹⁹o du ge ǁîba nî dī-ū, ǃgâsab âbab ge dī-ū ǂgao hâ i xase; nēti du ge ǂkhababa sadu ǁaeguba xu nî dībē,

²⁰în ǃgau hâna ǁîsa ǁnâu tsî ǃao, în tā ǃaruǀî dī nē ǂkhaba dīǃkhais ǃoa, sadu ǁaegu.

²¹Îs sa mûsa tā ǃkharesi; ǀomsa ǀoms ama, mûsa mûs ama, ǁgûsa ǁgûs ama, ǃomma ǃommi ama, ǂaisa ǂais ama.