Read Khoekhoegowab Deuteronomium 2 Bible Online

Deuteronomium 2 - Khoekhoegowab bible

Deuteronomium 2

¹ǁNās khaoǃgâ da ge oa tsî ge doe ǃgaroǃhūb ǃoa ǂĀxahurib di daoba-ū, ǃKhūb ge tita mîmā xase, tsî da ge ǃhommi Seira ge doeǂnamipe ǂgui tsēde.

²ǃNubaib ge ǃKhūba tita ǀkha ǃhoa tsî ge mî:

³ǂÂu hâse du ge nē ǃhomma ge doeǂnamipe; ǂnan ǀapasǀî.

⁴Î ǁaesa mîmā îts mî: Sadu ǃgâsan, Esaub di ôan, Seirs ǃnâ ǁan hân di ǀkhariba du ge nî doe-īǀkhāǃganu; ǁîn ge sado nî ǃao, xawe sadu ge kaise nî ǂanbasen.

⁵Tā ǁîn ǀkha ǁaeǁaesen; tita ge sado ǁîn di ǃhūb xa mā tide, ǀgui dāǃharos kōse xawe tama; tita ge Esauba ǃhommi Seira ǀumise mā xui-ao.

⁶ǂÛna du ge ǁîn tawa marin ama nî ǁama, ǂû du nîga, tsî du ge ǁkhāti ǁîn tawa ǁgam-e nî ǁama marin ama, ā du nîga.

⁷ǃKhūb sadu Elob ge sadu di ǃommi di sîsenni hoab ǃnâ ǀkhae du xui-ao; ǁîb ge nē kaise kai ǃgaroǃhūb di ǃgûǃganus âdo a ǂan; nē hakadisi kurigab ge ǃKhūb, sadu Eloba sadu ǀkha ge hâ i; xū-i xare-e du ge ge tôasi tama hâ i.

⁸Tsî sada di ǃgâsan, Esaub ôan, Seirs ǃnâ ge ǁan hâ ina xu da ge doe-īǀkhāǃganuo, ǂgās di daob Elats dib tsî Esion-Gebers diba-ū, o da ge oa tsî Moab ǃgaroǃhūb di daoba ge doe-īǀkhāǃganu.

⁹ǃNubaib ge ǃKhūba tita ǃoa ge mî: Moabǁîna tā ǂōǂō î du ǁîna tā torodī-ū. Tita ge ǁîn di ǃhūb xa ǀumi-i xare-e mā du tide, Loti di ôana ta ge Ara ǀumise mā amaga.

¹⁰Emiǁîn ge aiga ǁîb ǃnâ ge ǁan, kai tsî ǀoasa tsî gaxu ǁaesa, Anakǁîn khami.

¹¹ǁÎn ge ǁkhāti Refaimǁî khoese ge ūhe hâ i, Anakǁîn xase, tsî Moabǁîn ge ǁîna Emiǁîn ti ge ǂgai.

¹²Tsî Horiǁîn ge aiga ǁkhawa Seiri ǃnâ ge ǁan, xawe Esaub ôan ge ǁîna ǁîsisa xu doeǁgaǂui tsî ǁîna ge hîǀhuru ais âna xu tsî ge ǁan ǁîn di ǃās ǃnâ, Israeli ǀumis âb di ǃhūb tawa ge dī xase, ǃKhūb ǁîna ge māba.

¹³Khâi ǁnâi î du ǃārob Sereda ǃgâu. Nēti da ge ǃārob Sereda ge ǃgâu.

¹⁴Tsî Kades-Barneasa xu ǃgû tsî da ge ǃārob Sereda ǃgâus kōse di ge tsēde ǃnonadisiǁkhaisaǀa kuri ge i, toro-aogu di ǃhaos hoaragas ge ǂnubis ǁaeguba xu hîkākāhes kōse, ǃKhūb ge ǁîna nūbas xase.

¹⁵Nētib ge ǃKhūb di ǃomma ǁîn ǃoagu ge hâ i, ǂnubis ǁaeguba xun nî hîǀhuruhese, hapuhen ges kōse.

¹⁶Tsî i ge ge ī, toro-aogu ge hapuheo, ǂnubis ǁaeguba xu ra ǁōtoaǃâ,

¹⁷ob ge ǃKhūba tita ǀkha ǃhoa tsî ge mî:

¹⁸Nētsē du ge Ari, Moab di ǀkharib kōse nî doeǃgâu.

¹⁹Tsî du ge nî ǀgū Amonni ôan ǃoa-ais kōse; ǁîna tā ǂōǂō îts ǁîna tā ǁae-ū: Tita ge Amonni di ǃhūb xa ǀumi-i xare-e mā du tide, Loti ôana ta ge ǁîba ǀumise mā xui-ao.

²⁰ǁÎb ge ǁkhāti Refaimǁîn di ǃhūse ge ūhe, Refaimǁîn ge aiga ǁîb ǃnâ ǁan hâ i xui-ao, tsî Amonǁîn ge ǁîna Samsumǁîn ti ge ǂgai,

²¹kai tsî ǂgui tsî gaxu ǁaesa, Anakǁîn khami; xawe ǃKhūb ge ǁîna ais âna xu ge hîkākā, on ge ǁîna ǁîsisa xu doeǁgaǂui tsî ǁîn di ǃās ǃnâ ge ǁan,

²²Esaub ôan, Seiri ǃnâ ǁan hân, ǁîn di aisa xub Horǁîna ge doeǁgaǂuin tawab ge dīs ǁkhās xase; tsîn ge ǁîna ǁîsisa xu doeǁgaǂui tsî ǁîn di ǃās ǃnâ ge ǁan, nētsēs kōse.

²³ǁKhātin ge Kaftoriǁîn, Kaftorsa xu ge doeǂoana Aviǁîn ǃāde xu Gasas kōse ge ǁan hâ ina hîkākā tsî ǁîn di ǃās ǃnâ ge ǁan.

²⁴Khâi î du doe î du ǃārob Arnonna doeǃgâu; mû, tita ge Sihonni, Hesbons di gao-aob, Amorǁîb, tsî ǁîb di ǃhūba sa ǃomǁae ge mā; ǀumitsoatsoa î du ǁîb ǀkha ǃkham.

²⁵Nētsēs ǁkhāsa xu ta ge tita sadu di ǃhurib tsî sadu di ǃaoba nîra mātsoatsoa, ǁaedi di ais aiǃâ ǀhommi hoaragab ǃnaga; sadu di gomma ga ǁnâun hoan ge ǀkhū tsî nîra ǃao sadu di ais aiǃâ.

²⁶ǃNubai ta ge ǃgaroǃhūb Kedemota xu sîsabega ge sî Hesbons di gao-aob Sihonni ǃoa ǂkhîb di mîdi ǀkha, mî raǃâ:

²⁷A ta sa ǃhūba doeǃnâǃganu; daob ǀguib ǀkha ta nî doe; ǂgō ta tide amǀkhāb ǁôab ais kao, ǁareǀkhāb ǁôab ais kao.

²⁸Marin ama ǂûna ǁamaxū-ai te re, î ta ǂû, îts marin ama ǁgam-e mā te re, î ta ā; ti ǂaidi ǀguidi ai î ta doeǃganu,

²⁹Esaub ôan, Seiri ǃnâ ǁan hân, tsî Moabǁîn, Ari ǃnâ ǁan hân ge dī te khami, Jordanna-ū ta nî ǁnā ǃhūb, ǃKhūb, sida Elob nî mā dab ǃnâ sīs kōse.

³⁰Xawe Sihonni, Hesbons di gao-aob ge ǁîba doeǃganu kai da ǂgao tama ge i; ǃKhūb, sadu Elob ge gagas âba karokaro tsî ǂgaob âba ǀkhamaǀkhama xui-ao, sadu ǃomǁaeb nî ǁîba māse, nētsēs ǁkhās ai ī khami.

³¹Ob ge ǃKhūba tita ǃoa ge mî: Mû, tita ge Sihonni tsî ǁîb di ǃhūba sa ais aiǃâ ge mātsoatsoa; ǁnâi ǀumitsoatsoa îts ǃhūb âba ǀumise ūhâ.

³²Ob ge Sihonna sada ge ǃgûǃoa, ǁîb tsî ǁaes âb hoab ǃkhammi ǃoa, Jahas ǁga.

³³Ob ge ǃKhūb sada Eloba ǁîba ge mā sada di ais aiǃâ, tsî da ge ǁîba ge ǂnau tsî ǁîb di ôagu tsî ǁîb di ǁaes hoasa.

³⁴Tsî da ge ǁnā ǁaeb ǁkhāb ai ǁîb di ǃādi hoade ge ū, tsî da ge ǃādi hoadi, aogu, taradi tsî ǀgôaron tsîna ge ǀâxare; khoe-i xare-e da ge ǃgau kai tama ge i.

³⁵ǀGoan ǀguina da ge sada ge ǁkhâuǁnâbasen tsî ǁnā ǃnarixūn ū da ge ǃādi dina.

³⁶Aroers, Arnonni amǃgâ ǁgoesa xu tsî ǁnā ǃās, ǃārob amǃgâ ǁgoesa xu Gileadi kōses ge ǃās hîa ǀgapidā da hâsa ge ǀkhai i; ǃKhūb, sada Elob ge ǁîn hoana ge mā da.

³⁷ǃHūb, Amonni ôan dib ǀguiba du ge ǀgū tama ge i tsî ǁkhāti Jabokǃāb di ǃhūǃâs hoaragas tsî ǁkhāti ǃhommi di ǃādi tsî ǁkhāti ǁnā xū-i, ǃKhūb, sada Elob ge ǃkhâi da-i hoa-e du ge ǀgū tama ge i.