Read Khoekhoegowab Deuteronomium 20 Bible Online

Deuteronomium 20 - Khoekhoegowab bible

Deuteronomium 20

¹Tsî ǃgûǂoats kao ǃkhamgub ǃoa, sa khākhoeb ǃoagu, tsîts ga mûo hān, kunidi tsî sadu xa a kai ǁaesa, ots ge ǁîn aiǃâ ǃao tide: ǃKhūb, sa Elob ge sa ǀkha hâ, ǁîb, Egipteǃhūba xu ge ǂgaeǂguiǂui tsiba.

²Tsî ī i kao, ǃkhamguba du ra ǀgū ǃkhaisa, ob ge pristera dāhā tsî ǁaesa ǃhoa-ū

³tsî ǁîn ǃoa nî mî: ǁNâu, Israeltse, sadu ge nētsē ǃkhamguba ǀgū hâ sadu di khākhoen ǃoagu; ab sadu di ǂgaoba tā tsau, tā ǃao î du tā ǀkhū, î du tā ǃhuri ǁîn di ais aiǃâ.

⁴ǃKhūb, sadu di Elob a ǁî, sadu ǀkha ra ǃgûba, sadu di khākhoenab nî ǃkhamūba duse, sadob nî orega xuige.

⁵ǃNubai gu ge ǃoabasabega ǁaesa ǃhoaǀî tsî nîra mî: Tariba ǁnā khoeb, ǀasa omsa ǂnubi tsî khai tama hâba? Ab ǁîba ǃgû îb ǁîb di oms ǃoa ǁaru, îb tā ǀnîsi ǃkhamgub ǃnâ ǁō, îb tā ǀkhara khoeba ǁîsa ǁanǃnâ.

⁶Tsî tariba ǁnā khoeb, ǂauxûiǂûǃhanaba ge ǂgāb tsî ǁîb di ǂûn xa ǂû tama hâba? Ab ǁîba ǃgû îb ǁîb di ommi ǃoa ǁaru, îb tā ǀnîsi ǃkhamgub ǃnâ ǁō, îb tā ǀkhara khoeba ǁîba sîsenū.

⁷Tsî tariba ǁnā khoeb, tarasa ge dî-ammi tsî ūbasen tama iba? Ab ǁîba ǃgû, îb ǁîb di oms ǃoa ǁaru, îb tā ǀnîsi ǃkhamgub ǃnâ ǁō, îb tā ǀkhara aoba ǁîsa ū.

⁸ǁNās khaoǃgâ gu ge ǃoabasabega ǃaruǀî ǁaes ǀkha ǃhoa tsî nî mî: Tariba ǁnā khoeb, ǃaoǃnâb tsî ǂkhabusa ǂgaob â-iba? Ab ǁîba ǃgû, îb ǁîb di oms ǃoa ǁaru; îb ǃgâsagu âb di ǂgaoba tā tsuni, ǁîb dib khami.

⁹Tsî i ge nîra ī, ǃoabasabegu ga ǁaesa ǃhoa-ūtoao, o gu ge ǁîga ǂnubidi di danakhoega nî ǂnûi, ǁaes di danakhoese.

¹⁰ǃĀsats ga ǀgūo, ǃkhamū sits nîga, ots ge ǁîsa ǂkhîba nî ǂgaiǀî.

¹¹Tsî i ge nîra ī, ǂkhîba ǃeream tsîs ga ǁkhowa-amsenba tsi, os ge ǁîs ǃnâ ga hōhe ǁaes hoasa satsa ǃoabasabese nî ība tsî nî ǃoaba tsi.

¹²Xawe ǂkhîbas ga sa ǀkha dī tama i, tsîs ga torodīo, ots ge nî xāǂgā si.

¹³Ob ge ǃKhūb, sa Eloba, sa ǃomǁae nî mā si; ots ge ǁîs ǃnâ hâ aoreb hoaba nî ǂnau, gôab di ǀāb ǀkha.

¹⁴Taradi, ǀgôaron, ǀgoan tsî ǃās ǃnâ ga hân hoan ose: ǁÎs di ǁkhâuǁnâs hoasats ge nî ǀâbasen; tsîts ge ǁkhâuǁnâs sa khākhoen dis, ǃKhūb, sa Elob nî mā tsisa nîra ǂû.

¹⁵Nētits ge ǁnā ǃādi, satsa xu ǃnūdi, nē ǁaedi di ǃā tamadi hoadi ǀkha nî dī.

¹⁶Xawe nē ǁaedi di ǃādi, ǃKhūb, sa Elob nî satsa ǀumise mādi xats ge ǀomsa ūhâ xū-i xare-e ûi kai tide.

¹⁷Tsîts ge ǁîna hoaragase nî ǀâxare: Hetiǁîn, Amorǁîn, Kanaanǁîn, Perisiǁîn, Hiviǁîn tsî Jebusǁîn tsîna, ǃKhūb, sa Elob ge mîmā tsi xase;

¹⁸ǁîn di ǁgaidīn ǃoa dīsan ǁkhāǁkhā du tidega, ǁnān ǁîn di elogan gere dībana, î du tā ǁore ǃKhūb, sadu Elob ǃoagu.

¹⁹ǃĀsats ga ǂgui tsēde xāǂgāo, ǁîsa ra ǃkhamūǃâ, ū sits nîga, ots ge haidi âsa hîǀhuru tide, ǃōsa ǁîdi ǃnâ ra ǁhāǂgāse; ǁîdi xats nî ǂû amagats ge ǁîde ǁhāǁnâ tide, ǃaub di hain ge a khoen di ǂû xui-ao; î di sa ais aiǃâ sâuǃkhaise ība tsi.

²⁰Xawe ǁnā haidi, ǂûtani tama haisets a ǂandi, ǁîdets ge hîǀhuru tsî nî ǁhāǁnâ; tsîts ge sâuǃkhai-e ǁnā ǃās ǃoa-ai nî ǂnubibasen, ǁîs ǃkhamū tsi rasa, ǁîs nî ǀkhais kōse.