Read Khoekhoegowab Deuteronomium 21 Bible Online

Deuteronomium 21 - Khoekhoegowab bible

Deuteronomium 21

¹ǃGamhe hâ-i ga ǁnā ǃhūb, ǃKhūb sa Elob nî ǀumits nîse mā tsib ǃnâ hōheo, ǃgarob ǃnâ ǁgoese, tari-i go ǃgam-i ǃkhaisa i khoe-e ǂan tama hâse,

²o gu ge sa kaigu tsî sa ǂhanuǂhanu-aogu tsîga ǂoa tsî ǃādi, ǃgamhe hâ-i ǂnamipe hâdiǀî nî ǀguiro.

³Tsî ǁnā ǃās, hoadi xa ǃgamhe hâ-i tawa ǀgūs: ǁNāpa gu ge ǁnā ǃās di kaiga tsâusa goman xa nî ū, sîsenūhe tama hâs, ǃnaob ǃnâ ǂgae tama hâsa;

⁴tsî ǁnā ǃās di kaigu ge tsâusa ǀkhaiǃnâ ǃgoaǃnāb, sîsenhe tsî tsorohe tama hâb ǃoa ūǁgôa tsî nî ǁnāpa ǂkham gomasa ǃgoaǃnāb ǃnâ ǃaos âsa ǁhāǁnâ.

⁵ǃNubai gu ge pristergu, Levib ôaga nî dāǀgū; ǃKhūb, sa Elob ge ǁîga ge ǁhûiǂuibasen, ǁîba gu nî ǃoabaga, tsî ǃKhūb ǀons ǃnâ gu nî ǀkhaese, tsî ǁîgu di ams ǃoa i ge mâ ǂnoagu-i hoa-i tsî mâ tsûtsû-ai-i hoa-e nî dībēhe.

⁶Tsî ǁnā ǃās di kaigu hoagu, ǃgamhe hâ-i tawa ǀgū hâgu ge ǃomgu âga nî ǁāǁnâ, tsâu, ǃgoaǃnāb ǃnâ ǃaos âsa ge ǁhāǁnâhes ai.

⁷Tsî gu ge ǃkhō-am tsî nî mî: Sige di ǃomgu ge nē ǀaoba ǂnâxū tama hâ, tsî sige di mûdi ge ǁîba mû tama hâ.

⁸ǀKhom re sa ǁaes Israels, sats, ǃKhūts, ge oresa, îts ǀhapio ǀaob xareba tā ǁgui re sa ǁaes Israels ǁaegu. Ob ge ǁnā ǀaoba ǁîna nîra ǀûbahe.

⁹Nētits ge ǀhapio ǀaoba sa ǁaeguba xu nî dībē, ǃKhūb mûǁae a ǂhanu-ets nî dī xui-ao.

¹⁰Tsî torob ǃoats ga ǂoao, sa khākhoen ǃoagu, tsî ǃKhūb, sa Elob ga ǁîna sa ǃomǁae māo, tsîts ga ǃkhōsan âna ūǃgûo;

¹¹tsîts ga ǃkhōsan ǃnâ taras îsa īsib â-isa mûo, tsîts ga ǁîsa ǁâo, tsîts ga ǁîsa tarase ūo,

¹²ots ge ǁîsa sa oms ǃnâ nî ūǂgâ; os ge ǁîs di danas tsî ǁgorogu âsa nî ǂkhom;

¹³os ge ǃkhōsis âs di saraba ǁhûǁnâ tsî sa oms ǃnâ ǂnû tsî nî ǁgûb tsî ǁgûs tsîra ǀgui ǁkhâb kōse āba; ots ge ǁnās khaoǃgâ ǁîs tawa ǂgâ tsî nî ǁîs di ao kai, tsî ǁîs ge nî sa tara kai.

¹⁴Tsî i ge nîra ī, ǁîs xats ga ǃgâibahe tama io, ots ge ǁîs ra ǂgao khami nî ǃgû kai si; xawets ge ǁîsa tātsē marin ama ǁamaxū tide tsî khobodī si tide, ǁîsats go ǃgamǃgam amaga.

¹⁵Aob ga ǀgam tarara ūhâo, ǀgui ǀnamsabes tsî ǀgui ǁkhansabes tsîra; tsî hoara, ǀnamsabes tsî ǁkhansabes tsîra ga ǀgôaga ǁoraba bi hâo, tsî ǂguroǃnaesabeb ga ǁkhansabes di,

¹⁶o i ge nîra ī, ǀgôagu âbab ra ūb hâna ǀumi kai tsēs ai, ob ge ǀnamsabes di ôaba ǂguroǃnaesisa a mā ǁoa, ǁkhansabes di ôab hîa a ǂguroǃnaesabeb di ais aiǃâ.

¹⁷Xaweb ge ǂguroǃnaesabeb, ǁkhansabes di ôaba ǂan tsî nî ǁîba ūb hân, ǁîb tawa ra hōhen hoan xa ǃhonarisa amǃnâ-e mā; ǁîb ge a ǀgaib âb di ǂgurosa, ǁîb ge ǂguroǃnaesisa a anu.

¹⁸Khoe-i ga ǃnâudanaxa tsî mâǃoaxa ǀgôab, ǁgûb tsî ǁgûs tsîra di domma ǁnâuǀnam tama hâba ūhâo, tsîn ga ǁkhara bi xaweb ga ǁnâu ǂgao tama io,

¹⁹o ra ge ǁgûb tsî ǁgûs tsîra ǁîba ǃkhō tsî nî ǁîba ǃās âb di kaigu ǃoa ūǂoa, ǃās di ǁāb tawa,

²⁰tsî ra ge ǃās âb di kaigu ǃoa nî mî: Nēb, sim di ôab, ge a ǃnâudanaxa tsî mâǃoaxa, ǁîb ge sim di domma ǁnâu ǂgao tama hâ, hîtoa-aob tsî ā-aob ge a ǁî.

²¹On ge ǃās âb di khoen hoana ǁîba ǀuidi ǀkha nî ǂnoa, îb ǁō ti; tsîts ge ǂkhababa sa ǁaeguba xu nî dībē; îb Israeli hoaba ǁnâu îb ǃao ti.

²²ǃAruǀî khoe-i ǃnâ ga ǁore-i, hîa ǁōba anu hâ-e hâo, ǃgamhe-i nî ti, tsî i ga haib ai ǂgāmâiheo,

²³os ge ǁō hâ soros â-e haib ai hâǁgoa tide, tsîts ge ǁnā tsēs ǁkhās ai ǁîsa nî ǁkhō; ǂgāmâihe hâ-i ge Elob tawa a ǀâxarexūsa xui-ao. Nētits ge sa ǃhūb, ǃKhūb, sa Elob ǀumise ra mā tsiba, ǀuriǀuri tide.