Read Khoekhoegowab Deuteronomium 22 Bible Online

Deuteronomium 22 - Khoekhoegowab bible

Deuteronomium 22

¹Sa ǃgâsab di goma-i kas, ǀgoa-i kas hoas ra ǁhapu ǃkhai-ets ga mû, xawets ge ūdawasen tide, sa ǃgâsabats ge ǁîna ǀoasase ǁkhawa nî sî-oaba.

²Tsî sa ǃgâsab ga ǀgūse hâ tama io, ǁîbats ga ǂan tama io, ots ge ǁîna sa oms tawa nî ǀhaoǀhao, în sa tawa hâ, ǃgâsab âts nî ǁîna ôas kōse, ǃnubaits ge ǁîna ǁkhawa nî mā bi.

³Nētits ge ǁkhāti ǁîb di esel-i ǀkha nî dī tsî nētits ge ǁîb di sara-i ǀkha nî dī, tsî nētits ge sa ǃgâsab di kā hân, ǁîba xu kā hân, sats ga hō hân hoan ǀkha nî dī; ūdawasents ge tide.

⁴Sa ǃgâsab di esel-i kas, ǁîb di goma-i kas hoas ra daob ai ǁnā ǃkhai-ets ga mû, xawets ge ūdawasen tide, ǀoasasets ge ǁîna ǁîb ǀkha nî guikhâi.

⁵Sarab aorekhoeb dib ge tarare khoes tawa hâ tide, tsî aorekhoeb ge tarare khoes di sara-e ǂgaeǂgā tide; nēti īna ga dī-i hoa-i ge ǃKhūb, sa Eloba ǁgaidīse ība.

⁶Ī i kao, daob aits ra ani-om-e sīǂam ǃkhaisa, hai-i ǃnâs kas, ǃhūb ais kas, ǂkhamron ǀkhas kas, ǃupun ǀkhas kas hoasa, tsî ǁgûs ga ǂkhamron ais kas, ǃupun ais kas hoasa ǂnûo, ots ge ǁgûsa ǂkhamron ǀkha ū tide.

⁷ǁGûsats ge hoaragase nî ǃnora kai îts ǂkhamrona ūbasen, ǃgâibahets nîga tsî tsēdets nî ǃnūǃnūbasenga.

⁸ǀAsa omsats ga ǂnubibaseno, ots ge ǂamǃnâs âs ai ǃgâsenai-e nî dīǂnamipe, ǀaoǀhapi-ets sa oms ai ǁgui tidese, khoe-i ga ǁnāpa xu ǁnāo.

⁹Sa ǂauxûiǂûǃhanabats ge ǀgamǃnâguse tsoro tide, ǀoasib ǃkhommi dib hîats ge tsorob tsî ǂauxûiǂûǃhanab di hōbasens ǀuriǀurihe tidega.

¹⁰Gomab tsî eseli tsîkha ǀkhats ge ǀhûpe ǃhūǃgao tide.

¹¹ǂGāǃnâguhe hâ ǃkhaib xarebats ge ana tide, ǀûb tsî lineb tsîkha ǀhûpe.

¹²Tsurirogats ge nî dībasen, haka ǀamdi sa anaǂamsarab, hîats ra ǂgaeǂgāb didi tawa.

¹³Aob ga tara-e ū tsîb ga ǁîs tawa ǂgâ tsîb ga ǁnās khaoǃgâ ǁkhan sio,

¹⁴tsîb ga ǁause xū-e ǁguiǂam sio, tsîb ga ǂkhaba ǀonsa dība si tsîb ga mîo: Nē tarasa ū tsî ta ge ǁîsa ge ǀgū, xawe ta ge ǁîs tawa oaxaesisa hō tama ge i,

¹⁵ob ge ǁgûb nē ǂkham khoes dib tsî ǁgûs âs tsîra ū tsî nî ǁîsa kaigu ǃās digu ǃoa ǁāb tawa ūǂoa, oaxaesis nē ǂkham ǀgôas dis ǂama.

¹⁶Ob ge ǁgûb, nē ǂkham khoes diba kaigu ǃoa nî mî: Tita ge ti ôasa nē aoba tarase ge mā, xaweb ge ǁîsa ge ǁkhan;

¹⁷tsî mû, xū-eb ge ǁîsa ge ǁguiǂam, mî rase: Tita ge oaxaesisa hō tama ge i sa ôas tawa; nēs ge oaxaesis ti ôas disa. O ra ge saraba kaigu ǃās digu di ais aiǃâ nî ǃā.

¹⁸ǃNubai gu ge kaigu ǁnā ǃās diga aoba ū tsî nî ǁkhara bi.

¹⁹Tsî gu ge ǁkharaǁguiba-e ǁîba nî ǁgui-ai, ǀguikaidisi ǀhaiǀurimarina, tsî gu ge ǁîna ǁgûb ǂkham khoes diba nî mā, ǂkhaba ǀonsab ge ǂkham khoes Israels disa dība amaga; os ge ǁîsa tarase nî ība bi; tātsēb ge ǁîsa ǃgû kai tide, tsēdi âb hoadi kōse.

²⁰Xawe mîs ga amao, oaxaesis ga ǂkham khoes tawa hōhe tama hâ io,

²¹on ge nē ǂkham khoesa ǁgûb di omsa xu ūǂui, tsî khoen ǁnā ǃās din ge ǁîsa ǀuiǁhom, ǁōs nîga, gâsi-es ge Israels ǃnâ dī amaga, ǁgûb di oms ǃnâ ra ǀaiǃâ; nētits ge ǂkhababa sa ǁaeguba xu nî dībē.

²²Khoeb ga aob di ǃgametaras ǀkhab ǁgoese hōheo, o ra ge hoara nî ǁō; aob, taras ǀkha go ǁgoeb tsî taras tsîra; nētits ge ǂkhababa Israelsa xu nî dībē.

²³ǂKham khoes ga hâo, oaxaes, ao-e āba ge māsa, tsîb ga aore khoeba ǃās ǃnâ ǁîsa hō tsî ǁgoeǀkhā sio,

²⁴o du ge hoara ǁnā ǃās di ǁāb ǃoa ūǂoa tsî ǁîra nî ǀuiǁhom, ǁîra nî ǁōs kōse; ǂkham khoesa, ǃās ǃnâs ge ǂgai tama i amaga, tsî aoba, ǀgūkhoeb âb di tarasab ge ǃgamǃgam amaga; nētits ge ǂkhababa sa ǁaeguba xu nî dībē.

²⁵Tsî khoeb ga ǂkham khoes, āba ge māsa ǃgarob ai hō, tsî ǁîsa ǃkhō tsî ǁîs ǀkha ǁgoeo, ob ge khoeb ǁîs ǀkha ge ǁgoeb ǀguiba nî ǁō;

²⁶xawe ǂkham khoesats ge xū-e dī tide; ǂkham khoes ge ǁōba anu hâ ǁore-e ūhâ tama hâ; khoeb ra khâi ǁîb di ǀgūkhoeb ǃoagu tsî ǁîba ra ǃgams ǁkhās xases ge nē ǃkhaisa ī.

²⁷ǃGarob aib ge ǁîsa ge hō xui-ao; āba ge mā khoes ge ǂgai, xawe khoe-i, ǁîsa ga ore-i ge ǀkhai ge i.

²⁸Aore khoeb ga ǂkham khoesa hō, oaxaes, āba mā tama hâsa, tsîb ga ǃkhō tsî ǁîs ǀkha ǁgoeo, tsî ra ga hōheo,

²⁹ob ge khoeb, ǁîs ǀkha ge ǁgoeba, ǂkham khoes di îba korodisi ǀhaiǀurimarina nî mā, tsîs ge nî ǁîb di tara kai, ǁîsab ge ǃgamǃgam amaga; ǁîsab ge nî ǃgû kai ǁoa, ǁîb di tsēdi hoadi kōse.