Read Khoekhoegowab Deuteronomium 23 Bible Online

Deuteronomium 23 - Khoekhoegowab bible

Deuteronomium 23

¹Khoeb xareb ge ǁgûb di tarasa ū tide tsî ǁgûb di ǃgū-aisa khowa-ai tide.

²ǂKhūǂkhūhes ǀkha ǀhapiǂnûihe hâb kas, aorekhoesib âba ǃgaoǁnâhe hâb kas hoas ge ǃKhūb di ǀhaohâb ǃnâ sī tide.

³ǀAiǀgôab xareb ge ǃKhūb di ǀhaohâb ǃnâ sī tide; disiǁî ǃhaos âb ka xawes ge ǃKhūb di ǀhaohâb ǃnâ sī tide.

⁴Amonǁîb xareb kas, Moabǁîb xareb kas hoas ge ǃKhūb di ǀhaohâb ǃnâ sī tide; disiǁî ǃhaos ân ka xawes ge ǃKhūb di ǀhaohâb ǃnâ sī tide, ǀamosib kōse.

⁵Daob ain ge sado pereb tsî ǁgam-i tsîn ǀkha ǃoa tama i amaga, Egipteba xu du ge doeǂoa ǃnubai; tsî Bileammi, Beori ôab, Petors dibab ge Mesopotamiaba xu ge ǂgai xui-ao, satsab nî ǀâxarese.

⁶Xawe ǃKhūb, sa Elob ge Bileamma ǁnâu ǂgao tama ge i, tsî ǃKhūb, sa Elob ge satsa ǁnā ǀâxareba ǀkhaeb ǃnâ ge ǀkharaǀkharaba, ǃKhūb, sa Elob ǀnam tsi hâ amaga.

⁷ǁÎb di ǂkhîb tsî ǁîn di ǃgâibats ge ôa tide sa tsēdi hoade, ǀamosib kōse.

⁸Edomǁîbats ge ǃharaxū tide, sa ǃgâsab a amaga; Egipteǁîbats ge ǃharaxū tide, ǃhaokhoets ge i ǁîb di ǃhūb ǃnâ xui-ao.

⁹ǀGôan xasa, ǁîna nî ǃnonaǁî ǃhaos ǃnâ ǁorabahen: Mâ-i hoa-i ân ge ǃKhūb di ǀhaohâb ǃnâ nîra sī.

¹⁰Toroǂnubis ga ǃgûǂoao sa khākhoen ǃoagu, ots ge mâ ǂkhaba ǃkhai-i hoa-e xu nî ǃûisen.

¹¹Khoeb sadu dib hîa ǃanu tamab ga sadu ǁaegu hâ, tsuxuba tsū ǃkhai-i xa go hāǂamheb, ǁîb ge ǁgoeǃkhais ǃauga nî ǃgûǂoa, ǁîb ge ǁgoeǃkhais ǃnâ sī ǂgâ tide.

¹²Xawe i ge nî ī, ǃui-amǁaeb aib ǁgam-i ǀkha nî khōsen ǃkhaisa; tsî sores ga ǂgâ ǃnubaib ge ǁgoeǃkhais ǃnâ nî sī ǂgâ.

¹³Tsîts ge ǃkhai-e nî ūhâ ǁgoeǃkhais ǃauga, tsî ǁnāpats ge nî ǃgûǂoa.

¹⁴Tsîts ge sa sîsenūdan tawa khao-ūxūro-e nî ūhâ; tsî i ge nî ī, ǃaugats ga ǂnûo, ots ge ǁî-i ǀkha khao tsî nî ǂoa go xū-e dawasen tsî nî ǁhanǂgan.

¹⁵ǃKhūb, sa Elob ge sa ǁgoeǃkhais ǁaegu ra ǃgûma xui-ao, satsab nî orese, tsî sa khākhoenab nî sa ais aiǃâ māse; ǁnā-amagas ge sa ǁgoeǃkhaisa nî ǃanu, îb tā taotaosa xū-e sa tawa mû, tsî tā satsa xu ǃgûbē.

¹⁶Khobob, ǀhonkhoeb âba xu sa ǃoa ga ǃhūbats ge ǁîb di ǀhonkhoeba māǁnâ tide.

¹⁷ǁÎb ge sa ǁaegub ǃnâ sa ǀkha nî hâ ǁnā ǃkhais, ǁîb nî ūǂuibasens tawa sa ǁāgu di ǀguib ǃnâ, ǃgâiba bi ka ǃkhais ai; ǁgâiǀā bits ge tide.

¹⁸ǀAi-aos xares ge Israeli ôadi ǃnâ hâ tide; tsî taotaosa ǀgôab ge Israeli ôagu ǃnâ hâ tide.

¹⁹ǀAib di amǃnâs xares tsî arib di ǀgaus xaresats ge ǃKhūb, sa Elob di ommi ǃnâ ūǂgā tide mîmâis ase; nēra hoara on ge ǃKhūb, sa Eloba ǁgaidīse ība xui-ao.

²⁰Sa ǃgâsabats ge hōǃnā-e ǁgui-ai tide, hōǃnās marib xas kas, hōǃnās ǂûb xas kas, hōǃnās ǀnî xū-i, ǁî-i xats ra hōǃnāsa hî-i xas kas hoasa.

²¹ǃHaokhoebats ge hōǃnāsa ǁgui-ai ǁkhā, xawe sa ǃgâsabats ge hōǃnāsa a ǁgui-ai ǁoa, îb ǃKhūb, sa Eloba ǀkhae tsi xūn, ǁîn aits ra sa ǃomma ǁguin hoan ǃnâ ǁnā ǃhūb, ǁîb ǃoats ra ǃgûb ǃnâ, ǀumi bits nîse.

²²ǃKhūb, sa Elobats ga mîmâi-e mîmâibao, ots ge ǀhawe tide ǁîsa mataresa; ǃKhūb, sa Elob ge ǁîsa ǂanǂansase satsa nî ǂgaoǀkhā, tsî ǁore-i ge sa ǃnâ nî hâ.

²³Xawe mîmâiǀûts kao, o i ge ǁorese ība tsi tide.

²⁴Sa amǁgaukha xu ga ǂoan, ǁînats ge ǂan tsî nî dī, ǃKhūb, sa Elobats ge māsenxase ǁguibasa mîmâiba khami, ams âts ǀkhats ge ǃhoa khami.

²⁵ǂAuxûiǂûǃhanab sa ǀgūkhoeb dib ǃnâts ga ǂgâo, ots ge ǂauxûiǂûna nî ǂû, ǂgaots ras kōse; xawe sa ǁgarus ǃnâts ge xū-e ǂgā tide.

²⁶Sa ǀgūkhoeb di mâ hâ ǃhorob ǃnâts ga ǂgâo, ots ge ǃnuruga ǃommi âts ǀkha nî ǃora; xawe ǃgaogôabats ge sa ǀgūkhoeb di mâ hâ ǃhorob ǂama gongon tide.