Read Khoekhoegowab Deuteronomium 24 Bible Online

Deuteronomium 24 - Khoekhoegowab bible

Deuteronomium 24

¹Khoeb ga tara-e ū tsîb ga ǁîsa ǃgame, o i ge nî ī, ǀkhomas ga ǁîb mûǁae hō tama io, taotaosa xū-eb ge ǁîs tawa hō amaga, ob ge ǁîsa ǀgoraǂkhani-e xoaba tsî nî ǁîs di ǃomǁae mā tsî nî ǁîb di omsa xu ǃgû kai si.

²Tsî oms âba xu ǃgûǂoa tsîs ga sī tsî ǀkhara khoeb di tara kaio,

³tsî nē ǀuni aob ga ǁîsa ǁkhan tsîb ga ǀgoraǂkhani-e xoaba sio, tsîb ga ǁîs ǃomǁae mā sio, tsîb ga ǁîb di omsa xu ǃgû kai sio, ǀuni aob hîa ǁîsa tarase ge ūb ga ǁō-o,

⁴ob ge ǂguro aob âs hîa ge ǃgû kai siba ǁîsa ǁkhawa ū tide, ǁîbas nî tarase ībase, ǀuriǀurihes ges khaoǃgâ; ǁîs ge a ǁgai dī ǃKhūb di ais aiǃâ; nētits ge ǁnā ǃhūb, ǃKhūb, sa Elob ra ǀumise mā tsiba, ǁore kai tide.

⁵Khoeb ga ǀasa tara-e ūo, ǁîb ge ǂnubis ǀkha ǃgûǂoa tide, tsîb ge ǃgom-e ǁgui-aihe tide; ǀgui kurib kōseb ge oms âb ǃnâ ǃnorasase hâ, tsî nî ǁîb di taras hîab ge ūsa dâ kai.

⁶ǁKhamiǀuira hoara, ǃnaga hâs kas, ǀgapise hâs kas hoasats ge mâiǁkhaese ū tide; ǀomsats ra mâiǁkhaese ū xui-ao.

⁷Khoeb ga hōhe, ǀomsa ra ǃnariba ǃgâsan âb, Israeli ôana xu, tsîb ga ǁîb ǀkha hōbasensa hî tsî ǁamaxū bi, ob ge nē ǃnari-aoba nî ǁō, tsî sats ge ǂkhababa sa ǁaeguba xu nî dībē.

⁸ǂAnbasen ǃomamasis di ǁōb ǃnâ, î du ǂōrisase ǂan tsî dī Leviǁî pristergu nî ǁkhāǁkhā dun hoan ǃoa; ǁîga ta ge mîmās xase du ge ǂan tsî nî dī.

⁹ǂÂi ǃKhūb, sa Elob, Miriams tawa daob ai ge dīs xa, Egipteba xu du ge doeǂoao.

¹⁰Sa ǀgūkhoebats ga xū-e ǀkhupio, ots ge oms âb ǃnâ ǂgâ tide, mâiǁkhae-i âbats nî mâiǁkhaese ūga.

¹¹ǃAugats ge nî mâ, tsîb ge ǁnā khoeb, ǀkhupits geba, ǁauǁau xūba ǃaugab ǃoa sa tawa nî ūǂoa.

¹²Tsî ǀgâsa khoeb kao, ots ge mâiǁkhae-i âb ǀkha sī ǁgoe tide.

¹³ǂAnǂansasets ge mâiǁkhaesa ǁîba ǁkhawa nî mā, sores ǂgâ tama hâ hîa, îb sarab âb ǀkha ǁgoe, îb ǀkhae tsi; os ge ǁîsa ǂhanu-aisise nî ība tsi ǃKhūb, sa Elob di ais aiǃâ.

¹⁴ǀGâsa tsî ǂhâ hâ ǃgaesabats ge ǁgâiǀā tide, sa ǃgâsan dib kas, ǃhaokhoen dib, sa ǃhūb ǃnâ, ǁāgu âts ǃnâ ǁan hâb dib kas hoasa.

¹⁵Tsēs âb aits ge ǁîba amǃnâs âba nî mā, tsî sores ge mā tamats hâ hîa ǂgâ tide; ǁîb a ǀgâsa tsî ǀoms âb ra ǁîsa ǁkhore xui-ao; îb tā sa ǃoagu ǃKhūba ǂgaiǀî, îb tā ǁoreba hâ sa ǃnâ ti.

¹⁶ǁGûgu ge ǀgôan ǃaroma ǃgamhe tide, tsî ǀgôan ge ǁgûgu ǃaroma ǃgamhe tide; mâ-i hoa-i ge ǁî-i di ǁoreb ǂhanib ǃaroma nîra ǃgamhe.

¹⁷ǂHanub, ǃhaokhoeb dib tsî ǃoaǀgôab dibats ge gamagama tide, tsîts ge sarab ǃoataras diba mâiǁkhaese ū tide.

¹⁸Tsîts ge nî ǂâi, Egipteb ǃnâts ge khobo i tsî ǃKhūb, sa Elob ge ǁnāpa xu ore tsi ǃkhaisa; ǁnā-amagats ge nē ǃkhais tita ra mîmā tsisa nî dī.

¹⁹Sa ǃgaosats ga ǃhanab âts ai ǃgao-o, tsîts ga ǀgui ǃgaeǀkhādasa ǃhanab ai ǀuruo, ots ge oa tide, ǁîsats nî ūkhâise; ǃhaokhoeb, ǃoaǀgôab tsî ǃoatarasas ge ǁîsa nî hâba; ǃKhūb, sa Elob nî ǀkhae tsise sa ǃomgu di sîsenni hoab ǃnâ.

²⁰Sa ǀkherahais ǂûnats ga ǂnauǁnâo, ots ge ǂgonaga sa khaoǃgâ ǂōrisase ôaǃnâ tide; ǃhaokhoeb, ǃoaǀgôab tsî ǃoatarasan ge ǁîna nî hâba.

²¹Sa ǂauxûiǂûǃhanabats ga ǃorao, ots ge sa khaoǃgâ ǃoratoa tide; ǃhaokhoeb, ǃoaǀgôab tsî ǃoataras tsînan ge ǁîna nî hâba.

²²Tsîts ge nî ǂâi, Egipteb ǃnâts ge khobo isa, ǁnā-amagats ge nē ǃkhais, tita ra mîmā tsisa nî dī.