Read Khoekhoegowab Deuteronomium 25 Bible Online

Deuteronomium 25 - Khoekhoegowab bible

Deuteronomium 25

¹ǂNoagub ga khoen ǁaegu hāo, tsîn ga ǂhanub tawa dāhāo, ǂhanuǂhanuhen nîga, o gu ge ǂhanu-aiba ǂhanu-aise nî ǀgora tsî ǂhanuoǃnâba nî ǀgoraǃgâ.

²Tsî i ge nî ī, ǂhanuoǃnâb ga ǂnauhesa anuo, ob ge ǂhanuǂhanu-aoba ǁîba ǁgoe kai tsî nî ǂnau kai bi, ǁîb hâ hîa, ǂhanuoǃnâsib âba ǂâu hâ ǀgaus ai.

³Hakadisi ǃnabagab ge nî ǂnau kai bi, tsîb ge dīǀaro tide; îb sa ǃgâsaba ǀnîsi tā ǃaruǀîb ga ǂgui ǂnaudi ǀkha ǂnau bio, sa mûǁae ǃharaxūhesase ūhâhe.

⁴Gomabats ge ǃgae-amǃgâ tide, ǃhorobab ra dā-ai hîa.

⁵ǃGâsagu ga ǁanǀhao, tsî ǀguib âgu ga ǁō tsî ǀgôaba ūhâ tama io, os ge ǁō geb di tarasa ǃhaokhoeb, ǃaugab diba ǃgame tide; aob âs di ǃgâsab ge ǁîs tawa ǂgâ tsî nî tarase ū si tsî nî anub, aob di ǃgâsab diba dī-ū si.

⁶O i ge nî ī, ǂguroǃnaesabeb, ǁîs ga ǁorab ge ǃgâsab âb, ǁō geb di ǀons ǃnâ nî mâ ǃkhaisa, ǀons âb Israelsa xu ǀarihe tidega.

⁷Xawe nē aob ga ǃgâibahe tama io, ǃgâsab âb di tarasa ūsa, os ge ǃgâsab âb di tarasa ǁāb ǃoa nî ǃgûǃapa, kaigu ǃoa tsî nî mî: Ti aob di ǃgâsab ra ǂkhā, ǃgâsab âba ǀonsa ǂkhaiǂkhaibasa Israels ǃnâ, ǁîb ge aob di ǃgâsab di anuba dī-ū te ǂgao tama hâ.

⁸O gu ge kaigu ǁîb di ǃās diga ǁîba ǂgai tsî nî ǁîb ǀkha ǃhoa; ǁîs tawa hâ tsîb ga: Ū si ǂgao tama ta hâ, ti mîo,

⁹os ge ǃgâsab âb di tarasa kaigu di mûdi aiǃâ ǁîb tawa dāhā tsî nî ǁharos âba ǁîb di ǂaisa xu ǂgaeǂui tsî ais âb ǃnâ ǂara tsî ǃkhō-am tsî: ǁNātib ge ǁnā aoba nî dī-ūhe, ǃgâsab âb di omsa om ǂgao tama hâba, ti nî mî.

¹⁰Tsî ǁîb di ǀons ge Israeli ǃnâ ǁnāb, ǁharos âba ge ǂgaeǂuiheb di oms, ti nîra ǂgaihe.

¹¹Aogu ga ǃkhamūguo, tsî ǀguib di taras ga dāhāo, ǁîs di aobas nî ǁnāb, ǁîba ra ǂnaub di ǃomma xu orega, tsîs ga ǃommi âsa ǀhōǂui tsî taotaosa ǃkhais âba ǃkhō-o,

¹²ots ge ǃommi âsa nî ǁhāǁnâ, sa mûs ge ǃkharesi tide.

¹³ǀGamǃnâgu ǀnō-ūǀuirats ge sa ǁhōs ǃnâ ūhâ tide, kais tsî ǂkharis tsîra.

¹⁴Sa oms ǃnâts ge ǀgamǃnâgu efara ūhâ tide, kais tsî ǂkharis tsîra.

¹⁵ǀOasa tsî ǂhanu ǀnō-ūǀuisats ge nî ūhâ; ǂgau tsî ǂhanu efasats ge nî ūhâ; sa tsēdi nî ǃnūǃnūhese ǃKhūb, sa Elob nî mā tsi ǃhūb ǃnâ.

¹⁶Nēna ga dī-i hoa-i ge ǃKhūb, sa Eloba ǁgaidīse ība, ā, ǂkhabase ga dī-i hoa-i.

¹⁷ǂÂi, Amaleki ge daob ai, Egipteba xu du ge doeǂoa ǃnubai dī-i xa:

¹⁸Matib ge daob ai satsa ǃoa tsî sa ǃnâ ǃonkhao hâ ǂkhabusana ǂnau ǃkhaisa ǀhupu tsîts tsau hâ hîa; tsîb ge Eloba ǃao tama ge i.

¹⁹Tsî i ge nîra ī, ǃKhūb, sa Elob ga sa khākhoen, sa ǂnamipe hân hoana xu sâ kai tsio ǁnā ǃhūb, ǃKhūb, sa Elob nî ǀumise mā tsib ǃnâ, ǀumisets nî ūhâ biga, ots ge Amaleki di ǂâiǂâisensa ǀhommi ǃnagaba xu nîra ǀari: ǁÎsa tā ǀuru.